3 Pe loplombo na lɛ Ahiezer, na Joash. Shemaah bibilɛ na lɛ, a pra yiri Gibeah na. Pre ŋunɔwifɛɛnlɛ pre na lɛ, Jeziel, na Pelet, Azmaveth bibilɛ na lɛ, na Beracah, na Jehu, a pra yiri Anathoth na, 4 na Gibeon ndro Ishmaiah, wra pe wifun ŋmba wra mɛɛ shɔ, a wre na wi pe wifɛɛnlɛ loplombo fulo na kɛ pre yɛklo. Na Jeremiah, na Jahaziel, na Johanan, na Gederah ndro Jozabad, 5 na Eluzai, na Jerimoth, na Bealiah, na Shemariah, na Haruphite ndro Shephatiah, 6 na Elkanah, na Isshiah, na Azarel, na Joezer, na Jashobeam, Korah leele pre, 7 na Joelah na Zebadiah Jeroham ŋmba wra yiri Gedor na kre bibilɛ na lɛ.

8 Ŋunɔwifɛɛnlɛ plɛ na yiri Gad jlom leele nu mna sɛ ya David na u ŋunɔwifɛɛnlɛ na tablɔ tra kre nu wa. Pra pe gbunfɛɛnlɛ, mna wi na chombo, na yirɛ nyjɛ ni pe peyɛ toni ŋunɔ ni mu chin, pe kee naa fiɛrɛ ni na jirae lɛ, a praa nyaanyaa na kafaala wa nyuɛ na. 9 Pe lopom na wi Ezer, a Obadiah na taa, a Eliab na taa, 10 a Mishmannah na taa, a Jeremiah na taa, 11 a Attai na taa, a Eliel na taa, 12 a Johanan na taa, a Elzabad na taa, 13 a Jeremiah na taa, a Macbannai na taa.

14 Pre Gad jlon leele mblɛ kro na pe ŋunɔwifɛɛnlɛ loplombo. Pe plɛ naa wa ŋunɔwifɛɛnlɛ kagbenyi nyu na, a plɛ naa wa lafɛɛ nyu na. 15 Pre pra da mu Jordan lɔɔ kre kun nyiɛpɔ jle wo kre nu, na ki nyi na tro ki mbɛɛlɛ na, mna sɛ wi na leele mblɛ praa wa ki landɛɛ yire nu pre ni, pra wi mna sɛ ki yilafinhaa, na ki yilatohaa yire kro nu.

16 Benjamin na Judah leele plɛ na sɛ taa David kro tablɔ tra kre nu wa. 17 Ŋga praa paan kre, David na yili mna sɛ pe fni mna yo pe pan mbo, “Na wejinyiŋge ni e paan mbe ya ni na wala, kena mbe e shɔ, mbe mi na yire pe nunu. La, na e pan mbe ni wɔ mbe le ni loŋgoolo kɛɛ, nyjila ŋga ni n e pe sisaa ka kre, kena o tolɛɛlɛ Nyiɛkpɔɔ wre u ki le mbe e ndie tini.”

18 Titɛɛ kre nu to, a Nyiɛkpɔɔ ŋumu na pan mu le Amasai ŋmba wra kɔ mu pe ŋunɔwifɛɛnlɛ fulo na kɛ mblɛ praa mɛɛ ni pre lopom wre nu, a wra paara mbo,

A David na pe shɔ, mna pe pe u wifɛɛnlɛ pre loplombo mblɛ pie na shie mbra chiɛ toni kre plɛ.

19 Manasseh leele pre plɛ na peyɛ kun mna pan mu ya David na, nyjila ŋga David na sɛ ya Philistine leele na mbe pe sɛ wi na ŋunu Saul ni kre. La, ŋga pe ŋulo pre na kɔ mu jawa na, kie jaa pan na David we laa pe na, mbe ndruu sɛ ya Saul na kre, pra David ni mu laa peyɛ kro, a wra ndru mu sɛ tni Ziklag na. 20 Ŋga David na sɛ Ziklag na kre, Manasseh leele mblɛ pra peyɛ kun mna sɛ ya u na kre na lɛ, Adnah, na Jozabad, na Jediael, na Michael, na Jozabad, na Elihu, na Zillethai. Pre leele mblɛ krɛrɛ na pe Manasseh jlon kre wifɛɛnlɛ loplombo. 21 Pe kro na pe wifɛɛnlɛ mblɛ pee gbun ni, mnaa yaa David na, a wra wii na loŋgoolo mblɛ praa paan na pe chiɛ yire toni pre ni. A pe kro na pe ŋunɔwifɛɛnlɛ loplombo. 22 Blenyini ŋga, pan leele naa shie na yaa David na, mna sɛ su na u wifɛɛnlɛ na nɛɛ.

23 Ŋunɔwifɛɛnlɛ mblɛ pra peyɛ kun mna sɛ ya David na Hebron na mbe Saul ŋunumu shɔ mbe David ŋga, imi o Tafun Nyiɛkpɔɔ na ki yo kre na lɛ kre. 24 Judah kɛ leele mblɛ pan ŋunɔwiyirɛ na nyi naa kagbenyi kɔɔnanu na lafɛɛ kɔɔnatarɛ. 25 Simeon kɛ leele ŋunɔwifɛɛnlɛ naa kagbenyi kɔɔnashin na lafaa nunu. 26 Levi kɛ wolo naa kagbenyi jijirɛ na lafɛɛ kɔɔnanu. 27 Jehoiada ŋmba na wi Aaron sele lopom wre wolo naa bilɛ kagbenyi taarɛ na lafɛɛ kɔɔnashin. 28 Yirifuŋu gbunfun winchinfun Zadok, na u sele loplombo fulo na shiin pra pan. 29 Benjamin kɛ wolo mblɛ pra pe Saul leele naa kagbenyi taarɛ, pe tataara na wa Saul kro mna pan mu su na pra laa mu sɛ tataara naa wa David kro. 30 Ephraim kɛ leele pre naa gbun ni na wii, a pra mɛɛ shɔ pe jlom na, pe leele naa kagbenyi fulo na lafɛɛ kɔɔnatarɛ. 31 Manasseh sele yɔɔ kre wolo mblɛ pra wɔ mbe pe sɛ ya mbe David tɛɛ jɔɔn na pre naa kagbenyi kɛmbɔkɔɔnatarɛ. 32 Issachar kɛ wolo pre naa ŋulo lafɛɛ shiin, a pra chin kee ŋga Israel leele fna mbe pe kre nyjila kre nu, pre na pe leele mblɛ praa wa pe jaara ni kro. 33 Zebulun kɛ leele mblɛ pra ŋunɔ winchin, mbe jaa wi ŋunɔ wiyirɛ nyjɛ mu chin ŋga kro ni, mna lɛɛ wɔ mbe sɛ ya David na pre naa kagbenyi fuloe shiin na kɛ. 34 Naphtali kɛ wolo naa bilɛ kagbenyi fulo na kɛmbɔkɔɔnashin, na pe ŋunɔ wiyirɛ ni, pre na pe loplombo kagbeŋge nunu. 35 Dan kɛ leele wifɛɛnlɛ naa kagbenyi fulo na kɔɔnatarɛ na lafɛɛ kɔɔnanu. 36 Asher kɛ wolo mblɛ pra wi mu chin mna peyɛ kna mbe sɛ wi naa kagbenyi fuloe shiin. 37 Reuben wolo, na Gad wolo, na Manasseh sele yɔɔ kre wolo mblɛ praa wa Jordan lɔɔ kre yilafinhaa wa kre na peyɛ kna na pe ŋunɔwiyirɛ nyininyini ni, pre naa kagbeŋge lafaa na fulo.

38 Pre ŋunɔwifɛɛnlɛ mblɛ krɛrɛ na peyɛ kɔ mu tɛɛ mbe wi. Pe kro na peyɛ kna mna sɛ Hebron na mbe sɛ David tɛɛ Israel ŋunu. Israel leele hamblɛ pre kro nyu naa nunu na pe David tɛɛ jɔɔn kre na. 39 Pre leele mblɛ kro na li ble nununu taarɛ David jaara, mnaa lii na gboo, ŋgi na hin? Pe sele leele kro na pan na pe sroe ni. 40 Pe sele leele mblɛ praa wa Issachar, na Zebulun, na Naphtali trɛ yire nu haalee, na pe mblɛ pra mbra pe na pre kro na sroe taa taa bubunlɔ, na nyuuma, na napɔɛlɛɛ na mna pan mu u ŋga. Sroe nyjɛ ni pra pan yire na nɛɛ. Pra pan na mimi ni, mna yirɛ bɛɛlɛ yɛ kla, na simi gbɔwo, na simi liwo, na nui, na mbaala ni, ŋgi na hin? Na yɛshɔɔrɔ kpɔɔ wa Israel tra nu.