Nzo Pab lo rey Agripa
26
Orzeꞌ nzhab rey Agripa lo Pab:
―Gak diꞌzhal por lu.
Orzeꞌ ngulits Pab yaꞌ Pab lo men,
seꞌ nguzublo midiꞌzh Pab,
nzhab Pab:
2 ―Rey Agripa,
dox wen nzhan nzon lo go,
par dizha,
gat walit nak da ni tu kwaꞌn ne men Israel nak da,
3 porke go nane ka xmod nak rë kostumbr cheꞌn rë men Israel,
no rë kwaꞌn nichëꞌlroꞌ bixaꞌ xid bixaꞌ.
Kuzeꞌ kinaꞌba lo go gon go cheꞌp kwaꞌn ganin lo go.
Midiꞌzh Pab xmod miban xaꞌ nzhala
4 Orzeꞌ nzhab Pab:
―Rë men Israel nane ka xmod miban da xid bixaꞌ dizde or win da,
mbaino nane bixaꞌ xmod miban da yezh Jerusalén.
5 No por dizde nzhala nilibeꞌ bixaꞌ da,
mbaino nu,
chi nzhakla bixaꞌi,
gak ne bixaꞌi,
na ngok tu men fariseo,
xaꞌ kwaꞌn más nileꞌ ley kwaꞌn milaꞌ Dios lo Muisés,
mbaino rë kostumbr kwaꞌn ñal leꞌ no par ñakë no tich Dios.
6 No nal,
namás por ñilan,
lëꞌ rë men ngut ruban,
nela xmod milaꞌ Dios diꞌzh lo rë xuz no xaꞌ tiemp,
por kureꞌ nzadnu bixaꞌ da lo go,
par leꞌ go yalgustis kuda.
7 Mbaino dub tu dusen ben men Israel ñila kureꞌ.
Kuzeꞌ kun dub la bixaꞌ,
zhëy-yëꞌle,
nileꞌ bixaꞌ kult lo Dios.
No nal,
por ñilan kureꞌ,
o rey Agripa,
ne bixaꞌ nzëꞌb xkin.
8 Rë go men Israel,
nidiꞌzh go ñila go,
lëꞌ rë men ngut ruban,
mbaino,
¿chon tatu nen par yila go lëꞌ Jesús nguruban?
Pab midiꞌzh, lëꞌ Pab ngurukë tich rë men cheꞌn Jesukrist
9 ’Nzhala,
nu ka da mile xigab,
dox ñal kwaꞌn milen,
ngurukëꞌn tich rë men cheꞌn Jesukrist,
xaꞌ nzë yezh Nazaret,
par kana lo rë kwaꞌn nileꞌ bixaꞌ.
10 Nu yezh Jerusalén milen rë kureꞌ.
Gunaꞌba lo rë ngulëiꞌ,
xaꞌ más nileꞌ mandad,
par mineꞌ bixaꞌ permis,
mitsaoꞌyoꞌn rë xaꞌ ñila Jesukrist.
Mbaino nu or mileꞌ rë ngulëiꞌ mandad gat rë men cheꞌn Jesukrist,
nu da nzhap ñal ka rë xaꞌ baꞌi.
11 Nayax wëlt milen,
mizakzin rë men cheꞌn Jesukrist,
par ngoklan ngalaꞌ bixaꞌ ngayilatraꞌ bixaꞌ widiꞌzh cheꞌn Jesukrist.
Seꞌgaꞌ milen rë plo nitseꞌd men Israel widiꞌzh cheꞌn Dios.
No por dox niyiꞌ da ninen bixaꞌ,
haxta lazh rë men zit ngwakwana bixaꞌ par ngazakzin bixaꞌ.
Midiꞌzh Pab, xmod ngok xaꞌ xtu men
12 ’Kureꞌ nzhalen,
nzhan yezh Damasco,
nzhatsena rë men cheꞌn Jesukrist,
por mandad cheꞌn rë ngulëiꞌ ro.
13 Per or nzhan nez,
O rey Agripa,
paste como garol zhë,
lëꞌchi nguroꞌ tu ki dizde lo yibëꞌ kwaꞌn más nayiꞌ nizini ke ngubizh,
miziniy nakaꞌn plo nzhan kun rë xaꞌ kwaꞌn nzha kuda.
14 Orzeꞌ ngwachin rë no,
no mbina tu widiꞌzh hebreo kwaꞌn ne lon:
“Saulo,
Saulo,
¿chon kirukël ticha?
Chi lëꞌl dil kuda,
lo mis lu kikwaꞌn yalne cheꞌnal.”
15 Orzeꞌ nzhapa:
“¿Cho go Señor?”,
orzeꞌ ne widiꞌzh zeꞌ:
“Na Jesús,
no ticha kirukël.
16 Nal waxche no watsuli.
Ngurulon lol porke lu ngulen,
par gakal tu xpena,
mbaino par diꞌzhal rë kwaꞌn milun lol nal,
no rë kwaꞌn laore lun lol.
17 Lëꞌda xëꞌlal lo rë men Israel par diꞌzhal lo bixaꞌ por da,
mbaino nu lo rë xaꞌ gat lëꞌt men Israel yal;
per nalata gal ni tu rë men baꞌ lu,
18 par xaꞌlal lo bixaꞌ,
nes par naleꞌraꞌ bixaꞌ kwaꞌn gat lëꞌ,
sino ke leꞌ bixaꞌ kwaꞌn wen;
no par rutin bixaꞌ yaꞌ Mizhab,
orzeꞌ gon bixaꞌ roꞌ Dios;
nes par yubchi rë kwaꞌn nzëꞌb xki bixaꞌ lo Dios,
mbaino par yo bixaꞌ xid rë men mixoꞌbyek Dios,
por ngwayila bixaꞌ Da.”
Mbin Pab kwaꞌn miluꞌ Jesukrist
19 ’Kuzeꞌ nin lo go,
o rey Agripa,
nangaktaꞌ da nad lo widiꞌzh kwaꞌn nguroꞌ lo yibëꞌ zeꞌ,
20 sino ke galo laka yezh Damasco midizhne,
dispwés ngwadizhne yezh Jerusalén,
orzeꞌ midizhne dub lazh men Judea,
mbaino lult midizhne lo rë men gat lëꞌt men Israel;
no midizhne kad plo,
laꞌ bixaꞌ rë kwaꞌn nakap kileꞌ bixaꞌ,
par gon bixaꞌ roꞌ Dios,
mbaino leꞌ bixaꞌ kwaꞌn luꞌ,
walika milaꞌ bixaꞌ rë kwaꞌn nakap.
21 Por rë kureꞌ,
nguzen rë men Israel da leꞌn yadoꞌ,
no ngokla bixaꞌ ngut bixaꞌ da.
22 Per por kiyaknu Dios da haxta zhë nalzhë reꞌ;
stubi naban da no nzon lo go,
par dizha,
walika lëꞌ Jesús nak Krist,
lo rë men wanei choi,
xaꞌ tsake o xaꞌ natsakte.
Nabtsa kwaꞌn nidizha nak kwaꞌn midiꞌzh rë profet,
rë xaꞌ midiꞌzh por Dios,
haxta nu Muisés midiꞌzh la kureꞌ.
Rë bixaꞌ midiꞌzh la,
lëꞌ rë kureꞌ gak.
23 Rë bixaꞌ midiꞌzh la,
nakiꞌn zakzi Krist,
no haxta gat Krist.
Per nu midiꞌzh bixaꞌ,
lëꞌ Me gak xaꞌ galo laka ruban,
par galo laka rë men Israel,
xaꞌl Dios yek,
mbaino xaꞌl Dios yek rë men,
xaꞌ gat lëꞌt men Israel.
Ngokla Pab, ngala yek rey Agripa, ngayila xaꞌ Jesukrist
24 Stubi kidiꞌzh Pab kureꞌ lo rey Agripa,
lëꞌchi naye nzhab Festo:
―¡Pab,
nzhak miyizhal!
¡Por tanta nzhakal yech,
kuzeꞌ ngok miyizhal!
25 Orzeꞌ nzhab Pab lo gobiernador Festo:
―Gat lëꞌt nzhak miyizh da,
Festo,
go xaꞌ dox tsak;
porke kwaꞌn nin lo go reꞌ dox waliy,
mbaino dox ñale.
26 Dub laxtoꞌn ñilan lëꞌ rey Agripa nane ka rë kureꞌ,
kuzeꞌ kidizhne dub laxtoꞌn lo xaꞌ,
porke kureꞌ gat lëꞌt xlaꞌn ngoke.
27 Lëꞌo,
rey Agripa,
¿chi ñila go rë kwaꞌn midiꞌzh rë profet,
rë xaꞌ kwaꞌn midiꞌzh por Dios nzhala?
Per na nane,
lëꞌo ñila kai.
28 Orzeꞌ nzhab rey Agripa lo Pab:
―Xcheꞌp win tsa ngalal yeka ngak da tu men cheꞌn Jesukrist.
29 Orzeꞌ nzhab Pab:
―Wanei,
ter xche dizha lo go o tu rratsai,
Dios nane,
dub laxtoꞌn nzhaklan,
gat lëꞌt nab go yilai,
sino ke rë go,
xaꞌ kwaꞌn nzhin reꞌ,
per gat nut liꞌb go nela xmod naliꞌb da reꞌ.
30 Orzeꞌ ngwatsuli rey,
no gobiernador,
mbaino Berenice,
no kun rë xaꞌ nzob kun lëꞌ bixaꞌ.
31 Orzeꞌ nguroꞌ nab bixaꞌ tu lad,
midiꞌzh bixaꞌ,
nzhab bixaꞌ:
―Miyiꞌ reꞌ,
yent kwan nak xaꞌ par ñal gat xaꞌ,
no ni par yo xaꞌ lizhyiꞌb.
32 No orzeꞌ nzhab rey Agripa lo Festo:
―Miyiꞌ reꞌ ngak ngaliyaꞌ be xaꞌ chi nanganaꞌbt xaꞌ ngagobeꞌ rey César kwent cheꞌn xaꞌ.