Ngwayila Saulo widiꞌzh cheꞌn Dios por Jesukrist
9
Per stubi raꞌ nidiꞌzh Saulo,
lëꞌ xaꞌ gut rë men cheꞌn Jesukrist,
kuzeꞌ ngwa xaꞌ lo rë ngulëiꞌ roꞌ,
2 par ngwaloꞌ xaꞌ tu yech kwaꞌn kinu permis,
par yalaꞌ xaꞌi lo rë xaꞌ nileꞌ mandad leꞌn rë yoꞌ plo nitseꞌd rë men Israel widiꞌzh cheꞌn Dios yezh Damasco,
par yatsen Saulo rë men cheꞌn Jesukrist kwaꞌn nzhin zeꞌ,
miyiꞌy no unaꞌi,
par weiꞌ Saulo bixaꞌ yezh Jerusalén par yo bixaꞌ lizhyiꞌb.
3 Or nzhazhin la Saulo yezh Damasco kun rë men xaꞌ nzha xaꞌ kun lëꞌ,
lëꞌchi nguluxoꞌb tu ki dizde lo yibëꞌ kwaꞌn mizini nayiꞌ al nakaꞌn plo nzhazë bixaꞌ,
4 orzeꞌ ngwachin Saulo lo yuo,
mbaino mbin xaꞌ tu widiꞌzh kwaꞌn nzhab lo xaꞌ:
―¡Saulo,
Saulo!
¿Chon kirukël ticha par dilal kun na?
5 Orzeꞌ nzhab Saulo:
―¿Cho lu,
Señor?
Orzeꞌ nzhab widiꞌzh reꞌ:
―Na Jesús kwaꞌn kirukël tich,
mbaino kidilal kun lëꞌ;
chi lëꞌl dil kuna,
lo mis lu kikwaꞌn yalne cheꞌnal.
6 Orzeꞌ maska nixiz xaꞌ di zheꞌb,
orzeꞌ nzhab xaꞌ:
―Señor,
¿kwan nzhakla go len?
Orzeꞌ nzhab widiꞌzh zeꞌ:
―Waxche,
no wa yezh Damasco;
zeꞌ ne tu xaꞌ kwan ñal leꞌl.
7 No rë xaꞌ nzha kun Saulo,
xe miaꞌn bixaꞌ tuli,
nangaktraꞌ ngadiꞌzh bixaꞌ;
mbin bixaꞌ widiꞌzh zeꞌ,
per yent cho ngane bixaꞌ.
8 No or ngwaxche Saulo lo yuo,
mikal lo xaꞌ tuli.
Orzeꞌ men nguzen yaꞌ xaꞌ,
par mizhin xaꞌ yezh Damasco.
9 Zeꞌ nguio xaꞌ chon ngubizh,
no nikal lo xaꞌ,
nangaot xaꞌ,
mbaino ni nits nangot xaꞌ.
10 No yezh Damasco nibëz tu men cheꞌn Jesukrist xaꞌ lë Ananías.
Ngurulo Jesukrist lo xaꞌ reꞌ kun widiꞌzh reꞌ:
―¿Mal Ananías?
Orzeꞌ nzhab Ananías:
―Lëꞌda reꞌ,
Señor.
11 Orzeꞌ nzhab Jesukrist:
―Nayen wa nez kwaꞌn lë Direch,
plo nzob lizh Judas.
Zeꞌ binaꞌbdiꞌzh por tu xaꞌ lë Saulo,
tu xaꞌ kwaꞌn nzë yezh Tarso;
porke mer kinaꞌb xaꞌ reꞌ lon nalreꞌ,
12 no lëꞌ Dios miluꞌ la lo Saulo,
tu miyiꞌ xaꞌ lë Ananías xoꞌb xaꞌ yaꞌ xaꞌ yek Saulo par yani lo xaꞌ xtu wëlt.
13 Or milox mbin Ananías widiꞌzh reꞌ,
orzeꞌ nzhab Ananías:
―Per Señor,
dox nzhona,
lëꞌ miyiꞌ baꞌ nizakzi rë xpenal,
rë xaꞌ kwaꞌn nzho yezh Jerusalén,
14 no nu reꞌ,
kinu xaꞌ permis cheꞌn rë ngulëiꞌ ro,
par ko xaꞌ rë xpenal lizhyiꞌb.
15 Orzeꞌ nzhab Jesukrist:
―Wa,
porke lëꞌda ngule la xaꞌ reꞌ,
par diꞌzh xaꞌ xtizha lo rë men gat lëꞌt men Israel,
no lo rë rey,
mbaino lo rë men Israel,
16 porke lëꞌda lu lo miyiꞌ baꞌ,
por da,
dox nakiꞌn zakzi xaꞌ.
17 Orzeꞌ ngwa Ananías plo nzho Saulo,
no or mizhin xaꞌ,
migal xaꞌ Saulo,
mbaino nzhab xaꞌ:
―¿Mal,
wecha Saulo?
Lëꞌ mis Señor Jesús kwaꞌn ngurulo lol,
or nzël nez,
lëꞌ Me mixëꞌl da par yani lol xtu wëlt,
mbaino par yo Sprit cheꞌn Dios laxtoꞌl.
18 Mis orzeꞌ,
ngob rë kwaꞌn lo Saulo,
rë kwaꞌn nak nela kwaꞌn nzhoꞌb tich mbël gaꞌ,
orzeꞌ ngok ngwani lo Saulo xtu wëlt.
Orzeꞌ ngwatso xaꞌ par ngoklëiꞌ xaꞌ leꞌn nits,
19 mbaino ndao xaꞌ par nkaꞌ la xaꞌ xtu wëlt,
no miaꞌn xaꞌ zipla ngubizh kun rë men cheꞌn Jesukrist kwaꞌn nzho yezh Damasco.
Nguzublo kiluꞌ Saulo widiꞌzh cheꞌn Dios por Jesukrist leꞌn yezh Damasco
20 No nguzublo kiluꞌ Saulo widiꞌzh cheꞌn Dios por Jesukrist leꞌn rë yoꞌ plo nitseꞌd men widiꞌzh cheꞌn Dios,
yezh Damasco;
zeꞌ galo laka midiꞌzh Saulo lëꞌ Jesukrist nak Xgaꞌn Dios,
Me nzho lo yibëꞌ.
21 No or mbin rë men kureꞌ,
xe miaꞌn bixaꞌ tuli,
mbaino kidiꞌzh bixaꞌ:
―¿Chi gat lëꞌt miyiꞌ reꞌ,
xaꞌ kwaꞌn kizakzi rë men cheꞌn Jesukrist xaꞌ nzho yezh Jerusalén?
¿No chi gat lëꞌt mis xaꞌ reꞌ,
xaꞌ nzë reꞌ par zen xaꞌ rë men cheꞌn Jesukrist,
par weiꞌ xaꞌ bixaꞌ lo rë ngulëiꞌ ro?
22 Per Saulo,
kad ngubizh más dub la xaꞌ,
kidiꞌzh xaꞌ widiꞌzh cheꞌn Dios por Jesukrist;
haxta mileꞌ xaꞌ net rë men Israel kwan leꞌ xaꞌ,
rë xaꞌ kwaꞌn nzhin Damasco,
porke miluꞌ xaꞌ,
walika lëꞌ Dios mixëꞌl Jesús,
Me kwaꞌn nak Krist.
Mikëꞌ Saulo karre lo rë men Israel
23 Nayax ngubizh nded,
lëꞌchi tutsa miaꞌn rë men Israel kwaꞌn nzhin yezh Damasco,
par gut bixaꞌ Saulo,
24 per mbin Saulo cho xigab nileꞌ bixaꞌ,
zhëy-yëꞌle kimbëz bixaꞌ,
roꞌ rë pwert cheꞌn yezh Damasco,
par gut bixaꞌ Saulo.
25 Per rë men cheꞌn Jesukrist,
yëꞌl nguloꞌ bixaꞌ Saulo,
ngulo bixaꞌ Saulo leꞌn tu kardor,
par mila bixaꞌ Saulo xtu tich simient ke kwaꞌn nzho nakaꞌn roꞌ yezh zeꞌ.
Mizhin Saulo yezh Jerusalén
26 Or mizhin Saulo yezh Jerusalén,
ngokla xaꞌ ngabin xaꞌ kun rë men cheꞌn Jesukrist,
kwaꞌn nzho zeꞌ,
per nangayilat bixaꞌ,
chi walika nak Saulo tu men cheꞌn Jesukrist.
27 Orzeꞌ xtu men cheꞌn Jesukrist xaꞌ lë Bernabé,
ngwanu xaꞌ Saulo lo rë apost,
no nzhab Bernabé lo rë xaꞌ reꞌ:
“Lëꞌ Saulo une Señor or nzha xaꞌ nez Damasco,
no midiꞌzh Señor lo xaꞌ,
mbaino yezh Damasco lëꞌ Saulo midiꞌzh widiꞌzh cheꞌn Dios por Jesús dub la xaꞌ.”
28 Orzeꞌ miaꞌn Saulo yezh Jerusalén,
nguzhin xaꞌ kun rë men cheꞌn Jesukrist kwaꞌn nzhin zeꞌ,
no ni nangazheb xaꞌ midiꞌzh xaꞌ widiꞌzh cheꞌn Dios por Jesukrist,
29 no michëlroꞌ Saulo kun rë men Israel kwaꞌn nidiꞌzh widiꞌzh grieg,
per rë xaꞌ reꞌ kikwaꞌn mod par gut bixaꞌ Saulo.
30 Or mbin rë men cheꞌn Jesukrist kureꞌ,
lwegaꞌ mbiyꞌ pla bixaꞌ Saulo par yezh Cesarea,
di zeꞌ ña xaꞌ par yezh Tarso.
31 Mbaino lëꞌ rë men cheꞌn Jesukrist kwaꞌn nzho yezh Judea,
no yezh Galilea,
mbaino kun rë xaꞌ yezh Samaria,
dox chul nzhin bixaꞌ,
mbaino más nzharoꞌb xigab cheꞌn bixaꞌ lo rë cheꞌn Dios,
no más nzhon bixaꞌ roꞌ Dios,
naban bixaꞌ nela xmod nzhakla Dios;
no mileꞌ Sprit cheꞌn Dios,
más miar bixaꞌ.
Miak tu xaꞌ lë Eneas
32 No or nikizë Per nayax rë yezh,
ñatsiꞌ xaꞌ rë men cheꞌn Jesukrist,
orzeꞌ nu rë men cheꞌn Jesukrist kwaꞌn nzho yezh Lida ngwatsiꞌ xaꞌ.
33 Zeꞌ nzho tu miyiꞌ xaꞌ lë Eneas.
Nzha xon liꞌn,
naꞌx xaꞌ lo loꞌn,
nagakt win xaꞌ,
34 orzeꞌ nzhab Per lo xaꞌ:
―Eneas,
lëꞌ Jesukrist miliwen lal.
Waxche,
no gulits loꞌn cheꞌnal.
Lwegaꞌ ngwaxche Eneas,
35 no rë men xaꞌ nzho yezh Lida,
kun más rë men xaꞌ nzho tu lach kwaꞌn lë Sarón,
or une bixaꞌ miak Eneas,
nu bixaꞌ ngwayila widiꞌzh cheꞌn Dios por Jesukrist.
Nguruban tu unaꞌ xaꞌ lë Dorkas
36 No leꞌn yezh kwaꞌn lë Jope,
zeꞌ nibëz tu men cheꞌn Jesukrist,
tu unaꞌ lë Tabita (widiꞌzh kwaꞌn gab Dorcas).
Unaꞌ reꞌ,
dub tiemp miban xaꞌ,
mileꞌ xaꞌ wen,
mbaino nzhaknu xaꞌ rë men prob.
37 Leꞌn rë ngubizh zeꞌ,
unaꞌ reꞌ ngokne no ngut unaꞌ.
Or milox mizët bixaꞌ kwerp cheꞌn unaꞌ reꞌ,
orzeꞌ mbiyꞌ bixaꞌ kwerp cheꞌn unaꞌ reꞌ leꞌn tu kwart al ya,
yek yoꞌ.
38 No mbin rë men cheꞌn Jesukrist kwaꞌn nibëz yezh Jope,
lëꞌ Per nzo gax laka yezh Lida,
gax laka par zeꞌ,
orzeꞌ mixëꞌl bixaꞌ chop miyiꞌ kwaꞌn ngwayab lo Per,
nzhab bixaꞌ:
―Leꞌ go jabor,
lwegaꞌ dëꞌ go yezh Jope reꞌ.
39 Or mizhin Per kun rop xaꞌ reꞌ,
mbiyꞌ xaꞌ Per yek yoꞌ al ya plo nzhoꞌb unaꞌ reꞌ,
no rë unaꞌ ngut xmiyiꞌ nzhin zeꞌ,
nzhoꞌn biunaꞌ lo Per,
no miluꞌ biunaꞌ rë lar kamis no bestid kwaꞌn mitib unaꞌ reꞌ or naban raꞌ unaꞌ.
40 Mbaino nzhab Per,
roꞌ rë xaꞌ reꞌ leꞌn kwart zeꞌ.
Orzeꞌ nguzuxib Per par minaꞌb xaꞌ lo Dios,
no or milox minaꞌb xaꞌ lo Dios,
miëk Per lo unaꞌ reꞌ,
nzhab Per:
―Tabita,
waxche.
Orzeꞌ miwiꞌ unaꞌ,
une unaꞌ Per;
lwegaꞌ ngwaxche unaꞌ,
no nguzob unaꞌ.
41 Or nguzen Per yaꞌ unaꞌ,
mizuli xaꞌ unaꞌ.
No or ngurezh Per rë unaꞌ xaꞌ ngut xmiyiꞌ zeꞌ,
kun más rë men cheꞌn Jesukrist kwaꞌn nzhin tich zeꞌ,
zeꞌ miluꞌ Per,
lëꞌ unaꞌ nguruban.
42 No rë men yezh Jope,
mbin bixaꞌ kwaꞌn nguzak Tabita,
kuzeꞌ nayax men kwaꞌn nzho zeꞌ,
ngwayila bixaꞌ widiꞌzh cheꞌn Dios por Jesukrist.
43 No nayax ngubizh miaꞌn Per yezh Jope,
lizh tu miyiꞌ xaꞌ lë Simón,
tu xaꞌ nizuxkwaꞌ yid.