Per no Cornelio
10
Leꞌn yezh Cesarea,
nguio tu miyiꞌ xaꞌ lë Cornelio,
tu xaꞌ nileꞌ mandad lo tu gayoꞌ sondad italiano.
2 Dox wen xaꞌ reꞌ,
no wen rë melizh xaꞌ,
mbaino nzhon xaꞌ roꞌ Dios,
no dox nzhaknu xaꞌ nayax men Israel kun dimi cheꞌn xaꞌ,
no zilitaꞌ ninaꞌb xaꞌ lo Dios.
3 No ngol tu ngubizh,
paste las tres guzhe,
ngurulo tu ganj cheꞌn Dios plo nzo xaꞌ,
nzhab ganj lo xaꞌ:
―¡Cornelio!
4 Orzeꞌ dox mizheb xaꞌ,
xe miwiꞌ xaꞌ,
mbaino nzhab xaꞌ:
―¿Kwan nzhaklal,
Señor?
Orzeꞌ nzhab ganj:
―Rë kwaꞌn ninaꞌbal lo Dios,
no rë kwaꞌn nileꞌl nzhaknul rë men prob,
nake nela tu gon kwaꞌn ño laxtoꞌ Dios gaꞌ.
5 No nal,
bixëꞌl pla xpenal yezh Jope,
par yakaꞌ bixaꞌ tu xaꞌ lë Simón Per.
6 Xaꞌ reꞌ nzho lizh tu xaꞌ lë Simón,
tu xaꞌ kwaꞌn nizuxkwaꞌ yid,
xaꞌ reꞌ nibëz gax laka roꞌ nitsdoꞌ.
Xaꞌ reꞌ ne kwan nakiꞌn leꞌl.
7 No or ña ganj kwaꞌn midiꞌzh kun Cornelio reꞌ,
orzeꞌ ngurezh Cornelio chop mos cheꞌn xaꞌ,
kun tu sondad xaꞌ nzhon roꞌ Dios,
tu xaꞌ kwaꞌn nzho xid rë xaꞌ kwaꞌn nzhaknu xaꞌ zilitaꞌ.
8 Orzeꞌ mizaꞌ xaꞌ kwente lo rë xaꞌ reꞌ,
kwan nguzak xaꞌ,
orzeꞌ mixëꞌl xaꞌ rë miyiꞌ reꞌ par yezh Jope.
9 Xtu riyëꞌl,
or nzhazë rë miyiꞌ reꞌ,
no nzhazhin la bixaꞌ yezh Jope,
no lëꞌ Per nkë yek yoꞌ,
paste ngol garol zhë,
par naꞌb xaꞌ lo Dios.
10 Mbaino nilaꞌn Per,
nzhakla xaꞌ gao xaꞌ,
no dub kiline men tu kwaꞌn gao xaꞌ,
lëꞌchi miluꞌ Dios tu kwaꞌn lo xaꞌ.
11 Mixaꞌl lo yibëꞌ,
orzeꞌ ngulayët tu kwaꞌn nak nela tu lar ro gaꞌ haxta plo nzo Per,
no kad skine naliꞌb.
12 Lo lar ro reꞌ nikë rë klas ma kwaꞌn nizë kun rop niꞌ no rop yaꞌ,
no rë ma kwaꞌn nizë naduꞌb laxtoꞌ,
mbaino kun rë ma kwaꞌn nzob xiꞌl.
13 Orzeꞌ mbin Per tu widiꞌzh kwaꞌn nzhab seꞌ:
―Per,
watso no bit rë ma reꞌ no dao ma.
14 Orzeꞌ nzhab Per:
―¡Aꞌa Señor!,
laltaꞌ gat ga̱u̱ tu kwaꞌn nayiꞌ gao men nzhab Dios.
15 Orzeꞌ xtu wëlt nzhab widiꞌzh zeꞌ lo Per:
―Rë kwaꞌn mitsumbe la Dios,
nagabtraꞌl nayiꞌ gao mene.
16 Chon wëlt ngok kureꞌ,
orzeꞌ nguiubre ska lar ro reꞌ lo yibëꞌ.
17 Dub net Per kwan leꞌ Per por kwaꞌn une Per,
lëꞌchi mis orzeꞌ mizhin rë miyiꞌ kwaꞌn mixëꞌl Cornelio,
kinabdiꞌzh bixaꞌ plo nzob lizh Simón,
mizhin bixaꞌ roꞌ yoꞌ.
18 Naye kinabdiꞌzh bixaꞌ,
nzhab bixaꞌ:
“¿Chi reꞌ nzho tu xaꞌ kwaꞌn lë Simón Per?”
19 Stubi kileꞌ Per xigab por lar ro kwaꞌn une Per,
lëꞌchi nzhab Sprit cheꞌn Dios lo Per:
―Biwiꞌ,
lëꞌ chon miyiꞌ kikwaꞌnal.
20 Watso no gula,
wa lo bixaꞌ.
Naleꞌtal xigab,
porke na mixëꞌl bixaꞌ.
21 Orzeꞌ ngula Per,
nzhab Per lo rë xaꞌ reꞌ:
―Na xaꞌ kwaꞌn kikwaꞌn go zeꞌ.
¿Kwan ne go?
22 Orzeꞌ nzhab bixaꞌ:
―Lëꞌ Cornelio mixëꞌl no,
tu xaꞌ kwaꞌn nileꞌ mandad lo tu gayoꞌ sondad,
tu xaꞌ menaye,
no nzhon xaꞌ roꞌ Dios,
mbaino tu xaꞌ wen ñët xid rë men Israel.
Lo xaꞌ reꞌ ngurulo tu ganj kwaꞌn nzhab ya go lizh xaꞌ ne,
par gab go lo xaꞌ kwaꞌn nakiꞌn gab go.
23 Orzeꞌ miteꞌd Per bixaꞌ leꞌn yoꞌ,
miaꞌn bixaꞌ zeꞌ kun Per yëꞌl zeꞌ.
Orzeꞌ xtu riyëꞌl,
nzha Per kun lëꞌ bixaꞌ,
no kun zipla men cheꞌn Jesukrist xaꞌ nzho yezh Jope mileꞌ kumpañ Per.
24 No xtu ngubizh,
or mizhin bixaꞌ yezh Cesarea,
zeꞌ lëꞌ Cornelio mikan la rë melizh xaꞌ kun zipla xaꞌ dox nichëꞌl xaꞌ,
kimbëz la bixaꞌ zhin Per.
25 Or mizhin Per lizh Cornelio,
nguroꞌ Cornelio ngwakinez xaꞌ Per,
orzeꞌ nguzuxib xaꞌ xaniꞌ Per,
nzhab xaꞌ:
“Dox nazhon go.”
26 Per militso Per xaꞌ,
nzhab Per lo xaꞌ:
―Watsuli,
porke tutsa nak ka be.
27 Bin kidiꞌzh Per kun lëꞌ xaꞌ,
ña bixaꞌ leꞌn yoꞌ,
une Per,
nayax men nzhin la zeꞌ,
28 orzeꞌ nzhab Per:
―Rë go nane,
lo ley cheꞌn men Israel,
nagakt zhëꞌl tu men Israel kun tu men xaꞌ gat lëꞌt men Israel,
no per ni gat ña bixaꞌ lizh men zeꞌ.
Per Dios miluꞌ lon,
gat ñalt gapa lo ni tu men:
“Men baꞌ,
gat niwiꞌt Dios lo.”
29 Kuzeꞌ lwegaꞌ nzhala or mileꞌ bixaꞌ abis lon,
nangaktaꞌ da nayaꞌ.
Per nal nzhaklan gona,
¿kwan ngurezh go da?
30 Orzeꞌ nzhab Cornelio:
―Nzha tap ngubizh,
or nal taꞌ reꞌ,
paste las tres guzhe,
duba xlatsa kinaꞌba lo Dios,
lëꞌchi ngurulo tu miyiꞌ nak lar ñaꞌzbël laka lon,
31 ne xaꞌ:
“Rë kwaꞌn ninaꞌbal,
no rë kwaꞌn nileꞌl nzhaknul rë men prob,
nake nela tu gon kwaꞌn ño laxtoꞌ Dios gaꞌ.
32 No nal,
bixëꞌl pla men par yezh Jope,
par yakaꞌ bixaꞌ tu xaꞌ lë Simón Per.
Xaꞌ reꞌ ne kwan nakiꞌn leꞌl,
xaꞌ reꞌ nzho lizh tu xaꞌ kwaꞌn nibëz gax roꞌ nitsdoꞌ,
tu xaꞌ lë Simón,
kwaꞌn nizuxkwaꞌ yid.”
33 Kuzeꞌ mixëla pla xaꞌ lo go,
par yiꞌdkaꞌ xaꞌ go,
no wen go nzëka go lo no.
Lëꞌ rë no nzhin reꞌ lo Dios,
nal nzhakla no gon no rë kwaꞌn mileꞌ Dios mandad go,
ne go.
Kwaꞌn midiꞌzh Per lizh Cornelio
34 Orzeꞌ nguzublo midiꞌzh Per,
nzhab Per:
―Nal unen,
walika,
gat nibet Dios men,
35 sino ke men nzhon roꞌ Dios no nileꞌ bixaꞌ kwaꞌn ñal,
wen niwiꞌ Dios lo bixaꞌ,
wanei plo nzë xaꞌ.
36 No kureꞌ nak widiꞌzh kwaꞌn milaꞌ Dios lo rë men Israel,
or mixëꞌl Dios Jesukrist,
Me kwaꞌn nileꞌ mandad lo rë men.
No por widiꞌzh reꞌ,
nibin rë men wen kun Dios,
wanei cho mene,
xaꞌ ñilai.
37 No lëꞌ go nane ka widiꞌzh reꞌ mireꞌch rë yezh cheꞌn rë men Israel,
galo laka kun rë men Galilea mireꞌche.
Per antis di zublo reꞌch widiꞌzh reꞌ,
Juan midiꞌzh la,
nakiꞌn laꞌ men rë kwaꞌn nakap kwaꞌn nak men,
ban xaꞌ xtu mod kun Dios,
mbaino gaklëiꞌ bixaꞌ leꞌn nits.
38 No nane go,
ke lëꞌ Dios mizaꞌ dox poder,
mbaino mizaꞌ Dios Sprit cheꞌn Dios yo laxtoꞌ Jesús,
Me nzë yezh Nazaret;
porke Dios nzo kun lëꞌ Me,
nkizë Me miliwen Me rë xaꞌ nzhakne mbaino rë xaꞌ kileꞌ Mizhab bid naban.
39 Mbaino no,
rë xaꞌ kwaꞌn une,
rë kwaꞌn mileꞌ Jesús,
lazh men Israel,
no yezh Jerusalén,
dispwés di mikëꞌ bixaꞌ Jesús lo krus par ngut Me.
40 Per mileꞌ Dios nguruban Me ngubizh yon,
no mileꞌ Dios ngurulo Me lo no.
41 Per gat lëꞌtaꞌ lo rë men ngurulo Me,
sino lo nab tsa rë xaꞌ kwaꞌn ngule Dios par ne rë kureꞌ.
No nak rë xaꞌ kwaꞌn ndao no nguꞌ kun lëꞌ Me dispwés di nguruban Me.
42 Mbaino Jesús mixëꞌl no par diꞌzh no lo rë men,
ke lëꞌ Dios ngule Jesús,
par gab Me xmod gak kun kad men por kwaꞌn mileꞌ bixaꞌ,
men naban no men ngut.
43 No rë profet,
rë xaꞌ kwaꞌn midiꞌzh por Dios,
midiꞌzh la bixaꞌ rë kureꞌ,
ke rë men xaꞌ yila Jesús,
lë Dios cheꞌ rë kwaꞌn nzëꞌb xki bixaꞌ lo Dios.
Nguio Sprit cheꞌn Dios laxtoꞌ rë xaꞌ gat lëꞌt men Israel
44 Stubi kidiꞌzh Per widiꞌzh reꞌ,
lëꞌchi nguio Sprit cheꞌn Dios laxtoꞌ kad bixaꞌ kwaꞌn mbin widiꞌzh reꞌ.
45 No más rë men Israel,
men cheꞌn Jesukrist kwaꞌn nzë kun Per zeꞌ,
miaꞌn xe bixaꞌ tuli,
or une bixaꞌ,
lëꞌ nu rë xaꞌ gat lëꞌt men Israel,
nguio Sprit cheꞌn Dios laxtoꞌ,
46 porke mbin bixaꞌ,
kidiꞌzh rë men nzhin zeꞌ lo Dios kun xtu ben diꞌzh,
nzhab bixaꞌ,
dox nazhon Dios.
47 Orzeꞌ nzhab Per lo rë men Israel xaꞌ nzhin zeꞌ:
―¿Chi zak gab be lo rë xaꞌ baꞌ,
nagakt gaklëiꞌ rë men reꞌ leꞌn nits,
rë xaꞌ kwaꞌn nguio Sprit cheꞌn Dios laxtoꞌ,
nela be gaꞌ?
48 Orzeꞌ mileꞌ Per mandad,
ngoklëiꞌ rë xaꞌ reꞌ leꞌn nits,
nela mileꞌ ka Jesukrist mandad.
Orzeꞌ nzhab rë men ngoklëiꞌ zeꞌ lo Per:
“Biyaꞌn go pla ngubizh kun no.”