Saulo mizakzi rë men cheꞌn Jesukrist
8
Tutsa nak xigab cheꞌn Saulo kun rë xaꞌ mbit Teb.
Mis zhë reꞌ,
nguzublo nguzakzi dox rë men cheꞌn Jesukrist xaꞌ nzho yezh Jerusalén.
Orzeꞌ nzho bixaꞌ mireꞌch par rë yezh kwaꞌn ñaꞌn lazh men Judea,
no más bixaꞌ ña rë yezh kwaꞌn ñaꞌn lazh men Samaria;
no nab tsa rë apost miaꞌn yezh Jerusalén.
2 No pla rë men xaꞌ nzhon roꞌ Dios,
mikaꞌch bixaꞌ kwerp cheꞌn Teb,
no dox mbiꞌn bixaꞌ por Teb.
3 Per Saulo nguzublo kizakzi rë men xaꞌ nak men cheꞌn Jesukrist,
rë xaꞌ kwaꞌn nzho yezh Jerusalén;
ño xaꞌ yoꞌ por yoꞌ,
unaꞌi miyiꞌy nizubxax xaꞌ,
mbaino nigo xaꞌ men lizhyiꞌb.
Miluꞌ men cheꞌn Jesukrist widiꞌzh nazhon cheꞌn Dios lazh men Samaria
4 No lëꞌ rë men cheꞌn Jesukrist kwaꞌn mireꞌch zeꞌ,
kidiꞌzh bixaꞌ widiꞌzh nazhon cheꞌn Dios por Jesukrist rë plo.
5 Tu xaꞌ zeꞌ lë Lip,
ngwa xaꞌ tu rë yezh kwaꞌn ñaꞌn lazh men Samaria;
zeꞌ nguzublo kidiꞌzh xaꞌ widiꞌzh cheꞌn Jesukrist lo rë men zeꞌ.
6 No rë men yezh zeꞌ,
tutsa plo nigan bixaꞌ par nzhon bixaꞌ rë widiꞌzh kwaꞌn nidiꞌzh Lip,
por rë señ nazhon kwaꞌn nine bixaꞌ nileꞌ Dios por Lip.
7 Miak nayax xaꞌ nzho mbi mal laxtoꞌ,
no or niroꞌ rë mbi zeꞌ,
haxta naye nibizhyëi;
no nayax men xaꞌ nagakt win ñak bixaꞌ,
mbaino nayax men xaꞌ nagakt zë nizë bixaꞌ.
8 Kuzeꞌ dox nizak laxtoꞌ rë men yezh zeꞌ.
9 No yezh Samaria reꞌ,
nzho tu miyiꞌ xaꞌ lë Simón,
dizde nzhala,
nzhak xaꞌ kwaꞌn mal,
no nikide xaꞌ rë men yezh reꞌ,
nidiꞌzh xaꞌ lëꞌ xaꞌ dox nzhak.
10 Rë men yezh zeꞌ,
dizde mëꞌd win haxta rë mengol,
xe nine bixaꞌ kwaꞌn nileꞌ Simón,
no nidiꞌzh bixaꞌ:
―Xaꞌ reꞌse,
kinu poder cheꞌn Dios.
11 No dizde nzhala,
nazheꞌb nileꞌ rë men lo xaꞌ,
por rë señ kwaꞌn nileꞌ xaꞌ por nzhak xaꞌ kwaꞌn mal,
12 per or midiꞌzh Lip lo rë men,
xmod yo bixaꞌ yaꞌ Dios,
mbaino xmod ban bixaꞌ bid kwaꞌn nizaꞌ Jesukrist,
no ngwayila bixaꞌi,
ngoklëiꞌ bixaꞌ leꞌn nits,
miyiꞌy no unaꞌi.
13 No nu ska Simón,
xaꞌ nzhak kwaꞌn mal reꞌ,
ngwayila widiꞌzh reꞌ,
orzeꞌ ngoklëiꞌ xaꞌ leꞌn nits,
no ñakë xaꞌ tich Lip rë plo ña Lip,
mbaino xe ñaꞌn xaꞌ tuli or nine xaꞌ rë kwaꞌn nazhon kwaꞌn nileꞌ Dios por Lip.
14 Or mbin rë apost,
rë xaꞌ kwaꞌn miaꞌn yezh Jerusalén,
lëꞌ nu rë men Samaria ñila widiꞌzh cheꞌn Dios por Jesukrist,
orzeꞌ mixëꞌl bixaꞌ Per kun Juan yezh Samaria reꞌ.
15 Or mizhin Per kun Juan zeꞌ,
minaꞌb bixaꞌ lo Dios por rë xaꞌ nzhin zeꞌ,
xaꞌ ñayila widiꞌzh cheꞌn Jesukrist,
par yo Sprit cheꞌn Dios laxtoꞌ bixaꞌ,
16 porke stubi gat yo Sprit cheꞌn Dios laxtoꞌ bixaꞌ,
nab tsa ngoklëiꞌ bixaꞌ leꞌn nits nela xmod mileꞌ ka Señor Jesús mandad.
17 Orzeꞌ mixoꞌb Per kun Juan yaꞌ bixaꞌ,
yek rë xaꞌ reꞌ,
par nguio Sprit cheꞌn Dios laxtoꞌ bixaꞌ.
18 No or une Simón,
ka nixoꞌb rop apost,
yaꞌ bixaꞌ yek rë men zeꞌ,
orzeꞌ ño Sprit cheꞌn Dios laxtoꞌ rë xaꞌ reꞌ,
orzeꞌ mizëꞌb Simón dimi lo rë apost,
19 no nzhab xaꞌ:
―To go poder baꞌ kan,
nes par nu da,
or xoꞌba yaꞌn yek rë men,
yo Sprit cheꞌn Dios laxtoꞌ men.
20 Per nzhab Per lo xaꞌ:
―¡Lox xtimil kun lu!
¿Kwan gabal,
kun dimi ziꞌl kwaꞌn nizaꞌ Dios?
21 Gat ñaltaꞌl leꞌl kwaꞌn nileꞌ no,
porke gat nambet laxtoꞌl lo Dios.
22 Nakiꞌn laꞌl,
naleꞌtraꞌl xigab mal baꞌ,
no binaꞌb lo Dios,
pas kinkitla nabei,
cheꞌ Dios rë kwaꞌn nzëꞌbxkil,
por rë xigab kwaꞌn nzho laxtoꞌl baꞌ.
23 Nal niwiꞌn,
nagakt laꞌl,
rë kwaꞌn gat lëꞌ kwaꞌn nzho laxtoꞌl baꞌ.
24 Orzeꞌ nzhab Simón lo bixaꞌ:
―Gunaꞌb go lo Dios por da,
par nazhin ni tu rë kwaꞌn ne go baꞌ lon.
25 No or milox midiꞌzh rop apost rë kureꞌ,
nazheꞌbe chi nayo men yaꞌ Dios,
mbaino or milox midiꞌzh bixaꞌ kwaꞌn miluꞌ Señor Jesukrist,
orzeꞌ ña bixaꞌ par Jerusalén,
mbaino biña bixaꞌ nez,
kidiꞌzh bixaꞌ widiꞌzh cheꞌn Dios por Jesukrist rë yezh kwaꞌn ñaꞌn lazh men Samaria.
Lip no tu xaꞌ nak zhiꞌn lazh men Etiopía
26 Dispwés di kureꞌ,
nzhab tu ganj cheꞌn Dios lo Lip:
―Nayen wa nez kwaꞌn niroꞌ nali laka yezh Jerusalén no yezh Gaza.
No nez reꞌ nided plo nak pura yuo bizh.
27 Orzeꞌ nzha Lip,
lëꞌchi mizhëꞌl xaꞌ tu men nzë lazh men Etiopía,
tu xaꞌ nagakt gap unaꞌ.
No xaꞌ reꞌ nakaꞌ kwent niguchaoꞌ dimi cheꞌn rreyna Candace,
tu unaꞌ kwaꞌn nileꞌ mandad lo rë men etiope.
No lëꞌ miyiꞌ reꞌ,
ngwa yadoꞌ Jerusalén,
par ngwazuxib xaꞌ lo Dios.
28 No seꞌ ñëꞌd la xaꞌ par ña xaꞌ lazh xaꞌ,
nzob xaꞌ leꞌn karret cheꞌn xaꞌ,
no kiyoꞌl xaꞌ yech kwaꞌn mikëꞌ profet Isaías,
tu xaꞌ kwaꞌn midiꞌzh por Dios.
29 Orzeꞌ nzhab Sprit cheꞌn Dios lo Lip:
―Guzubi taꞌ karret baꞌ.
30 No or nguzubi Lip taꞌ karret reꞌ,
orzeꞌ mbin Lip,
lëꞌ xaꞌ etiope reꞌ kiyoꞌl yech kwaꞌn mikëꞌ Isaías,
orzeꞌ nzhab Lip lo xaꞌ reꞌ:
―¿Chi kizobyek ka go kwaꞌn kiyoꞌl go baꞌ?
31 Orzeꞌ nzhab xaꞌ reꞌ:
―¿Xmod ganen kwan nzhabe chi niyent cho luꞌi lon?
Orzeꞌ nzhab xaꞌ lo Lip,
kili Lip plo nzob xaꞌ,
par zob Lip taꞌ xaꞌ.
32 No yech kwaꞌn kiyoꞌl xaꞌ,
nzhab seꞌ:
Ngut xaꞌ,
nela nzhat tu mbëkxiꞌl gaꞌ,
no or mizakzi men xaꞌ,
ni tu widiꞌzh nangabt xaꞌ lo rë xaꞌ mbit xaꞌ.
33 Mileꞌ men kwaꞌn nzhakla men kun lëꞌ xaꞌ,
no yent cho ngadiꞌzh por lëꞌ xaꞌ,
mbaino nalaꞌt xaꞌ ben cheꞌn xaꞌ,
porke lëꞌ bid cheꞌn xaꞌ ngulubchi men yizhyuo reꞌ.
34 Orzeꞌ minabdiꞌzh men etiope reꞌ lo Lip,
nzhab xaꞌ:
―Leꞌl jabor nel,
¿cho xaꞌ kizeꞌt profet,
xaꞌ kwaꞌn nzob lo yech reꞌ?
¿Chi mis lëꞌ profet nguzake,
o xtu mene?
35 Orzeꞌ nguzublo Lip,
kiluꞌ kwaꞌn nzob lo yech zeꞌ,
no miluꞌ Lip rë widiꞌzh nazhon cheꞌn Dios por Jesukrist lo xaꞌ reꞌ.
36 No or nded bixaꞌ tu plo nikë nits,
nzhab xaꞌ reꞌ lo Lip:
―Reꞌ nikë nits.
¿Chi zak gaklëiꞌ da reꞌ?
37 Orzeꞌ nzhab Lip:
―Chi lëꞌl walika ñilai,
gak gaklëiꞌyal reꞌ.
Orzeꞌ nzhab xaꞌ reꞌ:
―Na ñila,
lëꞌ Jesukrist nak Xgaꞌn Dios.
38 Orzeꞌ mikwëꞌz xaꞌ karret cheꞌn xaꞌ,
no ngula rop bixaꞌ leꞌn nits,
orzeꞌ mililëiꞌ Lip xaꞌ reꞌ.
39 No or nguroꞌ bixaꞌ leꞌn nits,
di repent ñanu Sprit cheꞌn Dios Lip,
no nganetraꞌ xaꞌ reꞌ Lip,
orzeꞌ ña xaꞌ,
no nizak laxtoꞌ xaꞌ.
40 Mbaino nguruxoꞌb Lip haxta yezh Azoto,
kidiꞌzh xaꞌ widiꞌzh nazhon cheꞌn Dios por Jesukrist lo rë men,
haxta or mizhin xaꞌ yezh Cesarea.