Widiꞌzh kwaꞌn midiꞌzh Teb lo rë xaꞌ nileꞌ mandad
7
Orzeꞌ minabdiꞌzh ngulëiꞌ kwaꞌn más nileꞌ mandad,
nzhab xaꞌ lo Teb:
―¿Chi walika,
saꞌ midiꞌzhal?
2 Orzeꞌ mikab Teb,
nzhab Teb:
―Rë go dad,
mbaino wech,
bin go rë kwaꞌn ganin lo go;
lëꞌ Dios Nazhon,
ngurulo Me lo xuz be Abraham,
or nzho xaꞌ lazh men Mesopotamia,
or antis di yo xaꞌ lazh men Harán.
3 Per nzhab Dios lo Abraham:
“Guroꞌ lazhal no bilaꞌ rë melizhal,
par yal plo ganin.”
4 Orzeꞌ nguroꞌ Abraham lazh men Caldea,
par yo xaꞌ lazh men Harán.
No zeꞌ plo ngut xuz xaꞌ.
Orzeꞌ ñadnu Dios Abraham lo yuo plo nzho be nal reꞌ.
5 Per nangazaꞌt Dios ni tlëꞌ yo ngal Abraham,
ni plo zo tu niꞌ xaꞌ.
Per nzhab Dios,
yuo zeꞌ kaꞌ rë men kwaꞌn gak ben cheꞌn Abraham.
No stubi,
yent xin Abraham orzeꞌ.
6 Per nzhab Dios lo Abraham:
“Lëꞌ rë xaꞌ gak ben cheꞌnal gak men zit,
lazh xtu ben men plo gak bixaꞌ mos nado lo xtu men,
lëꞌ bineꞌ leꞌ zhiꞌn ter nane bineꞌ lo rë men zeꞌ,
no zakzi rë men zeꞌ bixaꞌ,
como tap gayoꞌ liꞌn.”
7 No nu nzhab Dios lo Abraham:
“Per lëꞌda zakzi rë men xaꞌ zakzi rë men kwaꞌn yiꞌd ben cheꞌnal,
no kon bixaꞌ yaꞌ rë xaꞌ zeꞌ,
par zuxib bixaꞌ lon lo yuo reꞌ.”
8 No nzhab Teb:
―Milaꞌ Dios diꞌzh lo Abraham.
Mileꞌ Dios mandad nkë señ kwerp cheꞌn xaꞌ,
no por señ reꞌ niluꞌ,
walika milaꞌ Dios diꞌzh par Abraham.
No or ngol tu xgaꞌn Abraham kwaꞌn ngurulë Isaac,
no or nzhap Isaac xon ngubizh,
mikëꞌ Abraham señ reꞌ kwerp cheꞌn Isaac.
Seꞌska mileꞌ Isaac kun xgaꞌn Isaac kwaꞌn lë Jakob,
no seꞌgaꞌ mileꞌ Jakob kun rë xgaꞌn xaꞌ,
rë xaꞌ kwaꞌn ngok xuz dub tu dusen ben men Israel.
9 ’Per xid xgaꞌn Jakob kwaꞌn ngok rë xuz be,
nguio tu xaꞌ lë Che,
no lëꞌ rë wech xaꞌ ngok mbidios,
mito bixaꞌ Che lo tu xaꞌ mbiyꞌ Che lazh men Egipto;
per Dios nzo kun Che.
10 Or nguzak Che rë kwaꞌn nalats dox lazh men Egipto,
mileꞌ Dios ngok Che tu men dox nzhak,
mbaino tu men kwaꞌn dox wen niwiꞌ Faraón lo,
kuzeꞌ mizo Faraón Che par leꞌ xaꞌ mandad dub lazh men Egipto,
no haxta nu mileꞌ Che mandad rë nak kwaꞌn kinu Faraón.
11 ’No or mizhin tu yalwin dox rë yezh cheꞌn rë men Egipto,
no rë yezh cheꞌn rë men Canaán,
orzeꞌ rë xuz be,
xaꞌ nzhala,
dox nguzakzi bixaꞌ,
yent kwaꞌn gao bixaꞌ.
12 Per or mbin Jakob,
nzho kwaꞌn gao men lazh men Egipto,
orzeꞌ mixëꞌl Jakob pla xgaꞌn xaꞌ zeꞌ,
primer wëlt.
13 No or mirop wëlt ngwa bixaꞌ,
orzeꞌ nzhab Che lo bixaꞌ,
lëꞌ Che nak wech bixaꞌ,
orzeꞌ milibeꞌ Faraón melizh Che.
14 Orzeꞌ dispwés,
mileꞌ Che mandad,
ñëꞌd Jakob,
xuz Che,
no rë melizh xaꞌ,
par Egipto,
no di lo rë bixaꞌ nak bixaꞌ chon gal nzho chiꞌn men.
15 Orzeꞌ ña Jakob lazh men Egipto,
zeꞌ ngut xaꞌ kun más rë xuz be,
xaꞌ tiemp.
16 Orzeꞌ más bixaꞌ mbiyꞌ,
wes cheꞌn rë xaꞌ kwaꞌn ngut reꞌ,
par migaꞌche lo yuo Siquem,
kwaꞌn nguziꞌ Abraham,
lo rë xin Hamor plo nak yezh Siquem.
17 ’No or nzha como tap gayoꞌ liꞌn nzho rë xuz be xaꞌ tiemp lazh men Egipto,
nela xmod milaꞌ Dios diꞌzh par Abraham,
no miar dox bixaꞌ zeꞌ,
18 orzeꞌ nguio xtu rey Egipto xaꞌ gat nilibeꞌt Che,
nanet xaꞌ kwan mileꞌ Dios por Che.
19 Lëꞌ rey reꞌ mileꞌ nakap lo rë xuz be.
Mileꞌ rey mandad,
ngulubi bixaꞌ rë nak mëꞌdoꞌ xibyiꞌ kwaꞌn laore ngol,
par nayar raꞌ bixaꞌ.
20 Leꞌn rë ngubizh zeꞌ ngol Muisés,
no Dios nguio laxtoꞌ mëꞌd.
No chontsa mbëoꞌ mixëꞌn xuz mëꞌd,
mëꞌd.
21 No or milaꞌ nzëꞌb bixaꞌ Muisés,
lëꞌ xchaꞌp Faraón mixëꞌn mëꞌd,
nela tu xmëꞌd xaꞌ gaꞌ.
22 Saꞌ ngok mitseꞌd Muisés rë nak kwaꞌn nzhak men Egipto,
no ngok xaꞌ tu miyiꞌ dox natsin lo rë kwaꞌn midiꞌzh xaꞌ,
no lo rë kwaꞌn mileꞌ xaꞌ.
23 ’No or nzhap la Muisés choꞌ liꞌn,
mbiꞌd yek xaꞌ,
ngwatsiꞌ xaꞌ,
ma rë melazh xaꞌ,
rë men Israel.
24 No or une Muisés,
kizakzi tu men Egipto tu rë men Israel,
orzeꞌ ngwalat xaꞌ xaꞌ zeꞌ,
mbaino migal Muisés xaꞌ reꞌ,
25 porke mileꞌ Muisés xigab,
pas nganu ka laxtoꞌ men Israel,
lëꞌ Dios lat bixaꞌ por Muisés,
per nanganut laxtoꞌ bixaꞌi.
26 No xtu riyëꞌl une Muisés,
kidil chop men Israel,
orzeꞌ nzhab Muisés lo bixaꞌ:
“¿Chon kidil go?,
gat went mis kun wech go dil go.”
27 Orzeꞌ nguzubi xaꞌ nzhap dol reꞌ,
micheꞌp xaꞌ Muisés,
nzhab xaꞌ:
“¿Cho mizol par leꞌl mandad lo no,
no par kubeꞌl xid no?
28 Pas nzhaklal galal da,
nela xmod migalal men Egipto naꞌg zeꞌ.”
29 Or mbin Muisés kureꞌ,
mikëꞌ xaꞌ karre,
ña xaꞌ lazh men Madián;
zeꞌ miban xaꞌ,
no ngok xaꞌ tu men kwaꞌn nzë xtu plo xid rë men zeꞌ,
mbaino ngop xaꞌ chop xgaꞌn xaꞌ zeꞌ.
30 ’Or nded choꞌ liꞌn,
lo yuo bizh cheꞌn mont Sinaí nguruxoꞌb tu ganj leꞌn bël cheꞌn tu ya yich zobyol,
31 no xe miwiꞌ Muisés or une xaꞌ ya nzobyol zeꞌ,
orzeꞌ nguzubi xaꞌ más gax par wiꞌ xaꞌ kwane,
orzeꞌ midiꞌzh Dios lo xaꞌ,
nzhab Dios:
32 “Na nak Dios cheꞌn rë xuzal:
Dios cheꞌn Abraham,
Dios cheꞌn Isaac,
no Dios cheꞌn Jakob.”
Orzeꞌ nguzublo nixiz Muisés di zheꞌb,
nangalistraꞌ xaꞌ lo xaꞌ.
33 Orzeꞌ nzhab Dios:
“Bila xkalyidal niꞌl,
porke plo nzol,
dox nazhone.
34 Walika lëꞌda une xmod kizakzi rë men Egipto rë men da,
no mbina rë yalne kwaꞌn kizakzi bixaꞌ.
Kuzeꞌ nzhala par gaknun bixaꞌ.
Nal,
dëꞌ reꞌ,
par xëla lu Egipto.”
35 ’No Muisés reꞌ,
xaꞌ gat nzhaklat bixaꞌ,
or nzhab bixaꞌ:
“¿Cho mizol par leꞌl mandad lo no,
o par kubeꞌl xid no?”,
no xaꞌ reꞌ,
xaꞌ mixëꞌl Dios como xaꞌ leꞌ mandad no xaꞌ kwaꞌn gaknu bixaꞌ por ganj kwaꞌn nguruxoꞌb leꞌn ya yich nzobyol zeꞌ.
36 No por Muisés,
mileꞌ Dios nayax señ nazhon lazh men Egipto,
mbaino roꞌ nitsdoꞌ Naxne,
mbaino lo yuo bizh plo nded bixaꞌ dub choꞌ liꞌn.
37 No mis Muisés reꞌ nzhab lo rë men Israel:
“Xid go kwe Dios tu miyiꞌ,
xaꞌ gak profet,
diꞌzh xaꞌ por Dios nela da gaꞌ,
no nakiꞌn gon go roꞌ xaꞌ reꞌ.”
38 No Muisés reꞌ,
xaꞌ kwaꞌn nguio xid rë men cheꞌn Dios plo nguzhin bixaꞌ lo yuo bizh,
no midiꞌzhnu xaꞌ ganj yek yiꞌ kwaꞌn lë Sinaí.
Zeꞌ mbin xaꞌ widiꞌzh cheꞌn Dios,
Dios Me niluꞌ xmod ñal ban be,
no widiꞌzh reꞌ miteꞌd xaꞌ lo be.
39 ’Per rë xuz be xaꞌ nzhala,
no maska bixaꞌ ngon roꞌ Muisés,
lëꞌla ngokla bixaꞌ ngayëk bixaꞌ xtu wëlt par lazh men Egipto.
40 Mbaino nzhab bixaꞌ lo Aarón,
or ngwa Muisés xche yek yiꞌ Sinaí:
“Bizuxkwaꞌ go pla dios par luꞌ nez lo no,
porke Muisés reꞌ kwaꞌn nguloꞌ no lazh men Egipto,
nanet no ma xaꞌ.”
41 Orzeꞌ michaoꞌ bixaꞌ tu winab kwaꞌn nak nela tu bicerr gaꞌ,
no mbit bixaꞌ rë ma par mizaꞌ bixaꞌ gon lo winab zeꞌ,
par mileꞌ bixaꞌ tu lani por kwaꞌn michaoꞌ mis lëꞌ bixaꞌ.
42 Kuzeꞌ milaꞌ Dios,
nguzuxib bixaꞌ haxta lo rë kwaꞌn nzho lo yibëꞌ,
nela xmod nzobniꞌ lo yech kwaꞌn mikëꞌ rë profet,
xaꞌ midiꞌzh por Dios,
seꞌ mizobniꞌ bixaꞌ:
Go men Israel,
¿chi mbit go rë ma par Da?
¿Chi mineꞌ go ren cheꞌn rë ma,
dub choꞌ liꞌn kwaꞌn miteꞌd go lo yuo bizh?
43 Per lëꞌla yën go mbiyꞌ go yoꞌ yid plo nzob winab cheꞌn Moloc,
no plo nzob winab cheꞌn mbël kwaꞌn lë Renfán,
rë winab kwaꞌn mis go michaoꞌ par nidiꞌzh go nazhone.
Kuzeꞌ lëꞌda chubla go,
lëꞌ go bi más zit ke lazh men Babilonia.
44 ’No lo yuo bizh plo nzhin bixaꞌ,
kinu rë xuz be,
xaꞌ nzhala,
tu yoꞌ yid,
kwaꞌn ngok yadoꞌ cheꞌn bixaꞌ.
Leꞌn zeꞌ midiꞌzh bixaꞌ lo Dios,
nela xmod nzhab Dios lo Muisés,
leꞌ bixaꞌ.
45 Yoꞌ yid zeꞌ miaꞌnnu rë xuz be,
xaꞌ nzhala,
or nguzhin bixaꞌ lo yuo Canaán.
Orzeꞌ Josué miaꞌn xlugar Muisés,
no por Josué,
ngulat bixaꞌ yuo zeꞌ lo rë men nzhin Canaán.
No dub nguio rë xuz be lo yuo Canaán,
gunaꞌb bixaꞌ lo Dios leꞌn yoꞌ yid zeꞌ,
haxta or ngok Dabi rey lo bixaꞌ,
une gunaꞌb bixaꞌ lo Dios leꞌn yoꞌ yid zeꞌ.
46 Por wen miwiꞌ Dios lo rey Dabi,
kuzeꞌ,
nzhab Dabi lo Dios:
“Nzhaklan kuxkwaꞌn tu lugar par lu,
Dios cheꞌn Jakob.”
47 Per Salomón mizuxkwaꞌ yadoꞌ cheꞌn Dios,
48 ter yoꞌ kwaꞌn nichaoꞌ men,
gat nakiꞌntaꞌ Diose par yo Dios,
nela xmod nzhab ka tu profet,
xaꞌ midiꞌzh por Dios:
49 Yibëꞌ nak plo nzoꞌba,
par nilen mandad,
no lo yizhyuo nak plo nizo niꞌn.
¿Xmod nak yoꞌ kwaꞌn kuxkwaꞌ go par da?
O,
¿ma lugar kwaꞌn neꞌ go par len diskans?,
50 porke na mizuxkwaꞌ rë kureꞌ,
yizhyuo no yibëꞌ.
51 No nu nzhab Teb:
—Per go,
¡zheꞌb nad yek go!
Nangont go widiꞌzh cheꞌn Dios,
porke nayaoꞌ nzha go no laxtoꞌ go.
Dubtaꞌ gat nzhont go kwaꞌn nidiꞌzh Sprit cheꞌn Dios,
no nak go nela ngok rë xuz go,
xaꞌ nzhala.
52 Mizakzi rë xuz go rë profet,
xaꞌ midiꞌzh por Dios.
Haxta mbit rë xuz go rë xaꞌ kwaꞌn milaꞌ widiꞌzh reꞌ:
“Lëꞌ Dios xëꞌl tu Xaꞌ kwaꞌn leꞌ rë kwaꞌn gab Dios.”
No nal,
Xaꞌ reꞌ mbiꞌd la,
¡per michi go Xaꞌ lo rë xaꞌ kwaꞌn mbit Xaꞌ!
53 No go reꞌ,
xaꞌ kwaꞌn miaꞌnnu ley kwaꞌn mizaꞌ ganj cheꞌn Dios lo Muisés,
per nangaleꞌt go kwaꞌn nzhakla ley.
Mbit bixaꞌ Teb
54 Or mbin bixaꞌ widiꞌzh reꞌ,
dox niyiꞌxian bixaꞌ,
haxta mitaoꞌ lëi bixaꞌ por kwaꞌn nzhab Teb.
55 Per lëꞌ Teb,
nzho dox Sprit cheꞌn Dios laxtoꞌ xaꞌ,
no miwiꞌ xaꞌ lo yibëꞌ,
une xaꞌ biani cheꞌn Dios,
maska ñaꞌzbële,
no Jesukrist nzo lad direch cheꞌn Xuz Me Dios,
56 orzeꞌ nzhab Teb lo bixaꞌ:
―¡Biwiꞌ go!,
lëꞌda niwiꞌ lëꞌ lo yibëꞌ naxaꞌl;
no lëꞌ Xgaꞌn Dios Me kwaꞌn nak ska tu men yizhyuo,
nzo la direch cheꞌn Dios.
57 Orzeꞌ,
naye ngurezhië rë men nzhin zeꞌ,
no mitsaoꞌ bixaꞌ nzha bixaꞌ,
orzeꞌ rë bixaꞌ tutsa mileꞌ bixaꞌ xigab,
nguxoꞌb bixaꞌ tich Teb,
58 orzeꞌ nguloꞌ bixaꞌ Teb roꞌ yezh,
par nguluke bixaꞌ Teb;
no rë xaꞌ kwaꞌn mbin kwaꞌn nzhab Teb reꞌ,
nguloꞌ bixaꞌ kaxkem cheꞌn bixaꞌ,
no ngwalaꞌ bixaꞌi lo tu miyiꞌ xi xaꞌ lë Saulo.
59 No dub kigo ke bixaꞌ Teb,
naye midiꞌzh Teb lo Dios,
nzhab Teb:
―O Señor Jesús,
biꞌy alm da.
60 Orzeꞌ nguzuxib Teb,
nzhab Teb naye:
―¡O Señor,
nanaꞌbtal kwent lo bixaꞌ por rë yalki kwaꞌn kileꞌ bixaꞌ nal reꞌ!
Or milox midiꞌzh Teb kureꞌ,
ngut xaꞌ.