Ngule bixaꞌ pla miyiꞌ par gaknu rë men yadoꞌ
6
Leꞌn rë ngubizh zeꞌ,
miza nayax men cheꞌn Jesukrist.
Per nguzublo kichëlroꞌ rë men cheꞌn Jesukrist,
xaꞌ nidiꞌzh widiꞌzh grieg,
lo xtu ben xaꞌ kwaꞌn nidiꞌzh widiꞌzh hebreo,
nzhab rë xaꞌ grieg reꞌ:
―¿Chon lëꞌ rë unaꞌ hebreo xaꞌ ngut xmiyiꞌ,
más nayax kwaꞌn nzhao biunaꞌ nigaꞌz,
no lëꞌ rë unaꞌ grieg,
xaꞌ ngut ska xmiyiꞌ,
más cheꞌpe nzhal bixaꞌ?
2 Orzeꞌ dub tu dusen apost,
mikan bixaꞌ rë men cheꞌn Jesukrist,
orzeꞌ nzhab bixaꞌ:
―Gat lëꞌt laꞌ no,
yadiꞌzh no widiꞌzh cheꞌn Dios por Jesukrist,
par kiꞌz no kwaꞌn gao rë men.
3 Kuzeꞌ,
nakiꞌn kwe go gazh miyiꞌ xid go,
rë xaꞌ nidiꞌzh men wen tich,
no rë xaꞌ kwaꞌn niluꞌ ka nzho Sprit cheꞌn Dios laxtoꞌ,
mbaino rë xaꞌ nzhak par leꞌ bixaꞌ zhiꞌn reꞌ.
4 Mbaino lëꞌ no zilitaꞌ naꞌb no lo Dios,
no yaluꞌ no widiꞌzh cheꞌn Dios por Jesukrist lo rë men.
5 No nguio laxtoꞌ rë men cheꞌn Jesukrist kureꞌ,
orzeꞌ ngule bixaꞌ tu miyiꞌ xaꞌ lë Teb.
Miyiꞌ reꞌ,
dox ñila xaꞌ widiꞌzh cheꞌn Jesukrist,
mbaino dox nzho Sprit cheꞌn Dios laxtoꞌ xaꞌ.
No ngule bixaꞌ xtu xaꞌ lë Lip,
kun Prócoro,
mbaino Nor,
no Timón,
no xtu xaꞌ lë Parmenás,
no Kulás.
Xaꞌ reꞌ nzë yezh Antioquía,
gat lëꞌt men Israel xaꞌ,
per nzhon xaꞌ ley kwaꞌn milaꞌ Dios lo Muisés antis di gak xaꞌ tu men cheꞌn Jesukrist.
6 Orzeꞌ ngwanu men cheꞌn Jesukrist rë miyiꞌ reꞌ lo rë apost,
par gunaꞌb bixaꞌ lo Dios par gaknu Dios rë miyiꞌ reꞌ,
orzeꞌ mixoꞌb rë apost yaꞌ bixaꞌ yek kad rë xaꞌ reꞌ,
par gaknu Dios bixaꞌ.
7 Mbaino más men kiyon widiꞌzh cheꞌn Dios por Jesukrist,
no más nayax men cheꞌn Jesukrist miza yezh Jerusalén,
no nayax ngulëiꞌ ngok men cheꞌn Jesukrist.
Michi bixaꞌ Teb lo rë gustis, xaꞌ más nileꞌ mandad
8 No dox niluꞌ nzo Dios kun Teb;
por Teb,
nileꞌ Dios dox kwaꞌn nazhon xid rë men,
rë kwaꞌn nileꞌ ñaꞌn men xe,
mbaino por rë kwaꞌn nileꞌ xaꞌ,
niluꞌ lëꞌ Dios nzo kun lëꞌ xaꞌ.
9 Per michëlroꞌ pla rë men kun Teb,
no rë men reꞌ nak xaꞌ nzë plo lë Kapi cheꞌn rë men libr la.
Xid rë men reꞌ nzho xaꞌ nzë yezh Cirene,
no nzho xaꞌ nzë yezh Alejandría,
mbaino nzho xaꞌ nzë lazh men Cilicia kun zipla bixaꞌ kwaꞌn nzë lazh men Asia.
10 No ni tu kwaꞌn nagakt kab bixaꞌ lo Teb,
porke dox nzhak Teb nidiꞌzh por Sprit cheꞌn Dios.
11 Orzeꞌ ndix rë men reꞌ,
kaꞌ pla miyiꞌ par mikëꞌ bixaꞌ kixuꞌ Teb,
nzhab bixaꞌ midiꞌzh Teb tu kwaꞌn gat lëꞌ por ley kwaꞌn milaꞌ Dios lo Muisés,
no por Dios.
12 Seꞌ mileꞌ bixaꞌ par miyiꞌxian rë men yezh zeꞌ.
Orzeꞌ mizhin pla xaꞌ nak zhiꞌn kun zipla xaꞌ niluꞌ ley cheꞌn Muisés,
par nguzen bixaꞌ Teb.
Orzeꞌ ngwalaꞌ bixaꞌ Teb plo nzhin rë gustis xaꞌ más nileꞌ mandad.
13 No lo rë gustis reꞌ mizo bixaꞌ pla miyiꞌ kwaꞌn mikëꞌ kixuꞌ Teb,
nzhab rë miyiꞌ reꞌ:
―Xaꞌ reꞌ,
zilitaꞌ dox nakap nidiꞌzh xaꞌ tich yadoꞌ nazhon cheꞌn Dios,
mbaino nidiꞌzh xaꞌ gat lëꞌ tich ley kwaꞌn milaꞌ Dios lo Muisés.
14 No mbin no midiꞌzh miyiꞌ reꞌ:
“Lëꞌ Jesús xaꞌ nzë Nazaret,
chil yadoꞌ reꞌ,
mbaino kubchi xaꞌ rë kostumbr kwaꞌn milaꞌ Muisés lo be.”
15 Orzeꞌ,
rë xaꞌ kwaꞌn nileꞌ mandad zeꞌ,
xe miaꞌn bixaꞌ,
niwiꞌ bixaꞌ lo Teb,
no niluꞌ lo Teb nela lo tu ganj cheꞌn Dios gaꞌ.