Ananías no Safira
5
Per nguio tu miyiꞌ xaꞌ lë Ananías,
no tsaꞌ xaꞌ lë Safira,
no mito bixaꞌ tlëꞌ yuo cheꞌn bixaꞌ.
2 Per miaꞌnnu bixaꞌ xcheꞌp dimi cheꞌn yuo,
no nane lo unaꞌ cheꞌn xaꞌ kureꞌ,
lëꞌ más dimi ngwalaꞌ xaꞌ lo rë apost.
3 Orzeꞌ nzhab Per lo xaꞌ:
―Ananías,
¿chon milaꞌl ngulo Mizhab xigab gat lëꞌt yekal?
¿Chon nzhaklal ngakidel Sprit cheꞌn Dios?,
miaꞌnal kun xcheꞌp dimi kwaꞌn mitol yuo,
4 porke antis dike ngatol yuo,
¿chi gat lëꞌt cheꞌnle?
No or nguzenal dimi,
¿chi gat lëꞌt lu nileꞌ mandade?
Orzeꞌ,
¿chon milaꞌl mbiꞌd xigab reꞌ yekal,
kikëꞌl mbël?,
porke gat lëꞌt men kikidel,
sino Diose.
5 Or mbin Ananías widiꞌzh reꞌ,
kwaꞌn nzhab Per,
orzeꞌ ngwachin xaꞌ no ngut xaꞌ tuli.
No rë men kwaꞌn mbin kureꞌ,
rë bixaꞌ mizheb.
6 Lwegaꞌ nguzubi pla miyiꞌ xi,
no michël bixaꞌ lar xaꞌ ngut reꞌ,
orzeꞌ ngwakaꞌch bixaꞌ xaꞌ reꞌ.
7 Nzha como chon or di ngok kureꞌ,
lëꞌchi mizhin tsaꞌ xaꞌ,
xaꞌ lë Safira,
net xaꞌ kwan ngok.
8 Orzeꞌ nzhab Per lo unaꞌ:
―Bine lon,
¿chi saꞌka mito go yuo cheꞌn go,
nela xmod ne xmiyiꞌl?
Orzeꞌ nzhab unaꞌ:
―Saꞌ kai.
9 Orzeꞌ nzhab Per:
―¿Chon tutsa miaꞌn go par kide go Sprit cheꞌn Dios?
Biwiꞌ,
lëꞌ rë xaꞌ kwaꞌn ngwakaꞌch xmiyiꞌl ñëꞌd la roꞌ pwert baꞌ.
No nal,
nuskal yakaꞌch bixaꞌ.
10 No mis orzeꞌ ngwachin Safira xan niꞌ Per,
ngut unaꞌ.
No or mizhin rë xaꞌ xi reꞌ,
une bixaꞌ lëꞌ unaꞌ reꞌ ngut la,
orzeꞌ ngwakaꞌch bixaꞌ unaꞌ lo mis plo migaꞌch xmiyiꞌ xaꞌ.
11 Orzeꞌ rë men cheꞌn Jesukrist dox mizheb bixaꞌ,
no kun rë men yezh,
or mbin bixaꞌ kureꞌ.
Mileꞌ Dios nayax rë kwaꞌn nazhon, kwaꞌn mileꞌ miaꞌn men xe
12 Por rë apost,
mileꞌ Dios nayax señ nazhon kun rë kwaꞌn mileꞌ miaꞌn men xe.
No migan rë men cheꞌn Jesukrist leꞌn corredor cheꞌn Salomón.
13 Nzho nayax men yezh Jerusalén kwaꞌn nangayet laxtoꞌ ngabin kun rë men cheꞌn Jesukrist,
ter dox wen nidiꞌzh rë men yezh tich rë xaꞌ reꞌ.
14 No leꞌn rë ngubizh zeꞌ,
mileꞌ Dios niza nayax xaꞌ ñila widiꞌzh cheꞌn Dios por Jesukrist,
miyiꞌy no unaꞌi.
15 No haxta nguloꞌ men,
rë xaꞌ nzhakne lo loꞌn par leꞌn nez,
par gal namás xkal cheꞌn Per lo bixaꞌ,
or ded Per,
par yak bixaꞌ.
16 No nayax men kwaꞌn nzë rë yezh kwaꞌn nzhin nakaꞌn yezh Jerusalén,
mizhinnu bixaꞌ men nzhakne,
no rë xaꞌ nzho mbi mal laxtoꞌ.
No rë bixaꞌ miak.
Per no Juan xtu wëlt ndil men bixaꞌ
17 Orzeꞌ ngulëiꞌ ro kun rë xaꞌ nichëꞌl xaꞌ,
rë xaꞌ kwaꞌn lë saduceo,
dox niyiꞌxian bixaꞌ por ¿chon ñakë dox men tich rë apost?
18 Kuzeꞌ nguzen bixaꞌ rë apost,
par mikëꞌ bixaꞌ rë xaꞌ reꞌ lizhyiꞌb.
19 Per or yëꞌl zeꞌ,
ngwa tu ganj cheꞌn Dios mixaꞌl roꞌ lizhyiꞌb,
par nguroꞌ rë apost,
orzeꞌ nzhab ganj lo bixaꞌ:
20 ―Wa go lo rë men yadoꞌ,
par wadiꞌzh go lo bixaꞌ,
lëꞌ Dios nichëꞌ mod niban men.
21 Or mbin bixaꞌ kureꞌ,
garziꞌl laka ngwa bixaꞌ yadoꞌ par ngwadiꞌzh bixaꞌ widiꞌzh cheꞌn Dios por Jesukrist lo rë men nzhin zeꞌ.
No ngulëiꞌ roꞌ,
no kun rë xaꞌ kwaꞌn nichëꞌl xaꞌ,
ngurezh bixaꞌ rë xaꞌ nak gustis kwaꞌn más tsak par mizhin bixaꞌ tu junt.
Orzeꞌ mileꞌ bixaꞌ mandad lo rë xaꞌ nikina lizhyiꞌb,
par yakaꞌ bixaꞌ rë apost,
rë xaꞌ nzho lizhyiꞌb reꞌ.
22 Per or mizhin bixaꞌ roꞌ lizhyiꞌb,
une bixaꞌ yentraꞌ cho nak;
orzeꞌ nguiubreꞌ bixaꞌ,
mileꞌ bixaꞌ abis,
nzhab bixaꞌ:
23 ―Or mizhin no roꞌ lizhyiꞌb,
no roꞌ pwert cheꞌne naye ka nayaoꞌ,
no rë sondad kwaꞌn nikina,
lëꞌ bixaꞌ nzhin ka;
or mixaꞌl no roꞌ pwert,
yentraꞌ cho nak.
24 Or mbin ngulëiꞌ roi,
kun rë xaꞌ nileꞌ mandad lo rë xaꞌ nikina yadoꞌ,
mbaino kun más rë ngulëiꞌ xaꞌ nileꞌ mandad lo xtu ben rë ngulëiꞌ;
orzeꞌ net bixaꞌ haxta plo zhin rë kureꞌ,
25 orzeꞌ mizhin tu miyiꞌ,
nzhab:
―Lëꞌ rë xaꞌ kwaꞌn ngulo go lizhyiꞌb zeꞌ,
lëꞌ bixaꞌ nzo la leꞌn yadoꞌ,
kiluꞌ bixaꞌ xtiꞌzh Jesús lo rë men.
26 Orzeꞌ xaꞌ kwaꞌn nileꞌ mandad,
ngwa xaꞌ yadoꞌ kun rë sondad cheꞌn xaꞌ,
par ngwakaꞌ bixaꞌ rë apost.
Per nangayint bixaꞌ rë xaꞌ reꞌ,
porke nizheb bixaꞌ,
napaꞌ ko men ke bixaꞌ.
27 No or ñëꞌdnu bixaꞌ rë apost,
mizo bixaꞌ rë xaꞌ reꞌ lo rë gustis xaꞌ más nileꞌ mandad,
orzeꞌ nzhab ngulëiꞌ roꞌ:
28 ―¿Chi nangont go kwaꞌn ne no,
nadiꞌzhtraꞌ go xtiꞌzh Jesús lo rë men?
Mbaino nal,
¡lo rë men yezh Jerusalén kiluꞌ go xtiꞌzh Jesús!
No nikëꞌ go kixuꞌ no,
nidiꞌzh go,
¡no mbit Jesús!
29 Orzeꞌ nzhab Per,
kun más rë apost,
lo bixaꞌ:
―Nakiꞌn gon be roꞌ Dios,
más ke roꞌ men.
30 Dios,
Me ngwayila rë xtit be,
me tiemp,
mileꞌ nguruban Jesukrist,
mis Me kwaꞌn mbit go,
mileꞌ go nkë Me lo krus.
31 No mizo Dios Jesukrist lad direch cheꞌn Dios,
par leꞌ Jesukrist mandad lo rë be,
no par nguloꞌ Jesukrist be lo rë kwaꞌn nzëꞌb xki be,
no par yëk rë men Israel lo Dios,
nes par cheꞌ Dios rë kwaꞌn nzëꞌb xki be.
32 Une no rë kwaꞌn mileꞌ Dios,
kuzeꞌ nidiꞌzh noi lo rë men.
No Sprit cheꞌn Dios nileꞌ kwaꞌn nazhon kun rë señ por no.
No men xaꞌ nzhon roꞌ Dios,
nizaꞌ Dios Sprit cheꞌn Dios,
yo laxtoꞌ bixaꞌ.
33 Or mbin rë ngulëiꞌ,
kun rë xaꞌ nak zhiꞌn,
widiꞌzh reꞌ,
dox miyiꞌxian bixaꞌ,
no haxta ngokla bixaꞌ gut bixaꞌ rë apost reꞌ.
34 Per orzeꞌ ngwatsuli tu miyiꞌ xaꞌ lë Gamaliel,
tu xaꞌ fariseo kwaꞌn niluꞌ ley kwaꞌn milaꞌ Dios lo Muisés,
no rë men nidiꞌzh:
“Dox nzhak xaꞌ reꞌ.”
Orzeꞌ nzhab Gamaliel:
“Roꞌ rë apost tu rrat al tich.”
35 Orzeꞌ nzhab Gamaliel lo rë ngulëiꞌ,
no lo más men xaꞌ nzhin zeꞌ:
―Rë go,
men Israel;
bileꞌ go xigab xmod leꞌ go kun rë miyiꞌ reꞌ,
36 porke bitsila go,
nzhala,
nguio tu miyiꞌ xaꞌ lë Teudas;
nzhab xaꞌ nak xaꞌ tu men xaꞌ nileꞌ mandad,
ngop xaꞌ como tap gayoꞌ men,
xaꞌ nguzukë tich xaꞌ,
per or ngut xaꞌ,
rë xpen xaꞌ mireꞌch,
milox bixaꞌ.
37 No leꞌn rë ngubizh cheꞌn sens,
seꞌska nguio xtu xaꞌ lë Judas kwaꞌn nzë Galilea.
Nuska xaꞌ ngop nayax xaꞌ nguzukë tich xaꞌ,
per or ngut xaꞌ,
rë ska xpen xaꞌ mireꞌch,
orzeꞌ milox bixaꞌ.
38 Kuzeꞌ nin lo go;
bilaꞌ go nzhin rë miyiꞌ reꞌ,
yent kwan leꞌ go lo bixaꞌ,
porke chi yek bixaꞌ nguroꞌ rë kubaꞌ,
lëꞌi yitlo.
39 Per chi zhiꞌn nazhon cheꞌn Dios kileꞌ bixaꞌ,
nagakt kwëꞌz goi,
neu namás,
nzha ska kun Dios kidil go.
40 No rë bixaꞌ mbin roꞌ Gamaliel.
Orzeꞌ ngurezh bixaꞌ rë apost,
no mileꞌ bixaꞌ mandad ngurële tich rë apost,
mbaino mileꞌ bixaꞌ mandad,
ke ya nadiꞌzhtraꞌ bixaꞌ widiꞌzh cheꞌn Jesús.
Orzeꞌ miliyaꞌ bixaꞌ rë apost.
41 Or nguroꞌ rë apost xid rë xaꞌ nak zhiꞌn zeꞌ,
no por ngurële tich bixaꞌ por Jesukrist,
dox nizak laxtoꞌ bixaꞌ.
42 No zilitaꞌ,
leꞌn yadoꞌ,
no rë lizh men,
ñadiꞌzh bixaꞌ widiꞌzh nazhon cheꞌn Dios por Jesukrist rë plo.