Miluꞌ Per kun Juan widiꞌzh cheꞌn Dios lo rë gustis xaꞌ más nileꞌ mandad
4
No stubi kidiꞌzh Per kun Juan lo rë men nzhin zeꞌ,
lëꞌchi mizhin pla ngulëiꞌ,
no kun rë xaꞌ nikina yadoꞌ,
no kun zipla xaꞌ lë saduceo.
2 Niyiꞌ bixaꞌ por kiluꞌ Per kun Juan lo rë men,
lëꞌ rë men ngut ruban,
porke Jesukrist nguruban.
3 Kuzeꞌ nguzen bixaꞌ Per kun Juan,
par ngulo bixaꞌ rë xaꞌ reꞌ lizhyiꞌb haxta xtu riyëꞌl,
porke orzeꞌ nzhazhëlalyuo.
4 Per dox nayax men kwaꞌn mbin widiꞌzh cheꞌn Dios por Jesukrist kwaꞌn midiꞌzh Per,
no ngwayila bixaꞌi.
Nabtsa men miyiꞌ miza como gaiꞌ mil bixaꞌ zhë zeꞌ.
5 Xtu riyëꞌl,
yezh Jerusalén nguzhin rë xaꞌ nileꞌ mandad,
kun rë xaꞌ kwaꞌn nak zhiꞌn,
mbaino rë xaꞌ niluꞌ ley;
6 no Anás xaꞌ nileꞌ mandad lo rë ngulëiꞌ,
kun Caifás,
no Juan,
no Jand,
no rë nak melizh ngulëiꞌ roꞌ;
nguzhin bixaꞌ zeꞌ.
7 Orzeꞌ mileꞌ bixaꞌ mandad ñëꞌd Per kun Juan,
no miyiꞌ kwaꞌn miak reꞌ,
par nguzo yon xaꞌ reꞌ,
garol tsaoꞌ plo nzhin bixaꞌ.
Orzeꞌ nzhab bixaꞌ lo Per no lo Juan:
―¿Cho cheꞌn mandad kileꞌ go rë kureꞌ?,
o,
¿cho mixëꞌl go par kileꞌ goi?
8 Orzeꞌ midiꞌzh Per lo bixaꞌ por Sprit cheꞌn Dios,
nzhab Per:
―Nin lo rë go,
xaꞌ nileꞌ mandad no,
no lo rë go xaꞌ nak zhiꞌn:
9 Lëꞌ go kinabdiꞌzh xmod uniwen xaꞌ ngokne reꞌ par ne go,
xmod ngokwen xaꞌ.
10 Lëꞌ no nei lo go,
no lo rë men Israel.
Mikëꞌ go Jesukrist Me nzë yezh Nazaret lo krus,
per mileꞌ Dios nguruban Me.
Por lë Jesukrist,
miak xaꞌ reꞌ,
xaꞌ nzo lo go reꞌ,
yent kwaꞌn nizak xaꞌ nal.
11 Gat ñilat go Jesukrist.
Lëꞌ Me nak nela tu ke gaꞌ,
kwaꞌn nibe men kwaꞌn nichaoꞌ yoꞌ.
Lëꞌ go ngulubi ke reꞌ,
per lëꞌ Dios mileꞌ nak Jesukrist nela primer ke cheꞌn simient gaꞌ.
12 Yent cho xtu xaꞌ gak liwen be;
xid rë xaꞌ kwaꞌn mixëꞌl Dios,
nab tsa xaꞌ reꞌ,
xaꞌ ngule Dios par gak koꞌ be lo rë kwaꞌn nzëꞌb xki be.
13 Or mbin bixaꞌ kwan midiꞌzh Per,
xe miaꞌn bixaꞌ,
porke nangazhebt Per kun Juan,
midiꞌzh bixaꞌ rë widiꞌzh reꞌ.
Orzeꞌ kidiꞌzh rë xaꞌ nileꞌ mandad zeꞌ lo rë wech bixaꞌ:
“Per nane be,
nangat rë xaꞌ reꞌ skwel,
no men seꞌga bixaꞌ.”
Orzeꞌ mitsila bixaꞌ lëꞌ rë xaꞌ reꞌ nkiꞌzë kun Jesukrist,
14 kuzeꞌ nangadiꞌzhtraꞌ bixaꞌ,
porke une bixaꞌ,
lëꞌ miyiꞌ reꞌ miak.
15 Orzeꞌ mileꞌ rë ngulëiꞌ mandad,
nguroꞌ Per tu lad kun Juan,
no kun miyiꞌ xaꞌ miak reꞌ,
par midiꞌzh nab bixaꞌ.
16 Orzeꞌ kidiꞌzh entre lëꞌ bixaꞌ,
nzhab bixaꞌ:
―¿Kwan leꞌ be nal kun rë mbe reꞌ?,
porke rë men Jerusalén mbin la yalnazhon kwaꞌn mileꞌ Dios kun miyiꞌ reꞌ.
No nagakt gab be:
“Gat walite”,
porke lëꞌ rë men mbin lai.
17 Per par nareꞌchraꞌ xtiꞌzh Jesús xtu plo,
mejor lëꞌ be cheꞌb yon bixaꞌ,
par nadiꞌzhraꞌ bixaꞌi ni xtu plo.
18 Orzeꞌ ngurezh bixaꞌ Per kun Juan,
nzhab bixaꞌ:
―Nadiꞌzhtraꞌ go xtiꞌzh Jesús,
no ni nazeꞌt go lë Jesús ni xtu plo.
19 Per nzhab Per kun Juan lo rë ngulëiꞌ zeꞌ:
―Bine go lo no,
¿cho roꞌ más ñal gon no?
¿Chi roꞌ goi,
o roꞌ Diose?,
20 porke no nakaꞌcht no kwaꞌn une no,
mbaino kwaꞌn mbin no.
21 No une rë ngulëiꞌ zeꞌ,
yentraꞌ kwan ngak ngaleꞌ bixaꞌ kun Per no kun Juan.
Orzeꞌ midiꞌzh bixaꞌ nayiꞌ par ngazheb yon xaꞌ reꞌ.
Orzeꞌ miliyaꞌ bixaꞌ Per no Juan,
mbaino xaꞌ miak reꞌ,
porke rë men yezh Jerusalén nidiꞌzh dox nazhon Dios,
por kwaꞌn mileꞌ Dios kun miyiꞌ reꞌ.
22 No miyiꞌ kwaꞌn miliwen Dios reꞌ,
nzhap la xaꞌ más di choꞌ liꞌn.
Minaꞌb men cheꞌn Jesukrist gaknu Dios bixaꞌ
23 No or miliyaꞌ rë xaꞌ nak zhiꞌn Per no Juan,
mbaino xaꞌ miak reꞌ,
orzeꞌ ña bixaꞌ plo nibin más rë men cheꞌn Jesukrist.
Zeꞌ midiꞌzh bixaꞌ rë kwaꞌn midiꞌzh rë ngulëiꞌ ro,
no rë kwaꞌn midiꞌzh más rë xaꞌ nak zhiꞌn,
lo bixaꞌ.
24 Or mbin rë men cheꞌn Jesukrist rë widiꞌzh reꞌ,
orzeꞌ junt gunaꞌb bixaꞌ tutsa kwaꞌn lo Dios,
nzhab bixaꞌ:
―O Dios Señor cheꞌn no,
Lu kwaꞌn mizuxkwaꞌ yibëꞌ,
no yizhyuo,
mbaino nitsdoꞌ,
no rë kwaꞌn nzhin loi.
25 Lu mileꞌ midiꞌzh Dabi xtiꞌzhal por Sprit cheꞌnal,
kuzeꞌ mikëꞌ xaꞌ widiꞌzh reꞌ:
¿Chon tatu nazheꞌb nileꞌ rë men gat lëꞌt men Israel,
niyiꞌ bixaꞌ nine bixaꞌ Dios?
¿Chon nileꞌ rë men Israel xigab kwaꞌn niyent yek,
dil bixaꞌ kun Dios?
26 Migan rë rey yizhyuo,
kun rë xaꞌ nak zhiꞌn rë yezh,
tutsa nguzhin bixaꞌ par dil bixaꞌ kun Lu Señor,
no kun Krist,
Me kwaꞌn mixëꞌl Señor.
27 ’Lëꞌ widiꞌzh reꞌ ngok,
porke yezh reꞌ,
lëꞌ Herodes no kun Pons Pilat,
no kun rë men Israel,
mbaino kun rë xaꞌ gat lëꞌt men Israel,
migan bixaꞌ reꞌ par dil bixaꞌ kun Lu Dios,
no kun Xgaꞌn nazhonal kwaꞌn mixëꞌlal,
28 nes par mileꞌ bixaꞌ rë kwaꞌn mileꞌlal xigab gak,
porke seꞌ ngoklal.
29 Nal biwiꞌ,
O Señor,
rë kwaꞌn gat lëꞌ kwaꞌn midiꞌzh bixaꞌ,
zakzi bixaꞌ no.
Per lëꞌ no leꞌ zhiꞌn cheꞌnal.
Kuzeꞌ,
kinaꞌb no lol,
gaknul no,
par xek no,
no nazhebt no diꞌzh no xtiꞌzhal lo rë men.
30 No biluꞌ yalnazhon cheꞌnal,
par gak wen men nzhakne,
como tu señ lëꞌl nzo kun no;
no bileꞌ rë kwaꞌn ñaꞌn men xe,
por lë Xgaꞌnal Jesús,
Me nambe laxtoꞌ no nazhon.
31 Or milox minaꞌb bixaꞌ lo Dios,
miwin tu xo dub leꞌn yoꞌ plo nzhin bixaꞌ.
Orzeꞌ más nguio Sprit cheꞌn Dios laxtoꞌ bixaꞌ,
no dubtaꞌ nangazhebt bixaꞌ midiꞌzh bixaꞌ widiꞌzh cheꞌn Dios por Jesukrist rë plo.
Junt kinu bixaꞌ rë kwaꞌn
32 Rë bixaꞌ kwaꞌn ñila widiꞌzh cheꞌn Dios por Jesukrist,
tutsa nizi bixaꞌ,
no tutsa nileꞌ bixaꞌ xigab.
Yent cho gab:
“Cheꞌn naba kureꞌ”,
sino ke cheꞌn rë bixaꞌ tu kwaꞌn.
33 Ngoknu Dios rë apost par midiꞌzh bixaꞌ walika nguruban Jesukrist,
no dox ngoknu Dios rë bixaꞌ.
34 No yent cho tu xaꞌ kwaꞌn ngok jwalt tu kwaꞌn lo,
porke rë xaꞌ kwaꞌn kinu yuo o yoꞌ,
mito bixaꞌi,
35 orzeꞌ dimi zeꞌ nzhuweiꞌ bixaꞌi lo rë apost,
orzeꞌ rë xaꞌ reꞌ niyiꞌze lo kad xaꞌ nakiꞌne.
36 No nguio tu miyiꞌ xaꞌ lë Che,
tu xaꞌ nzë lazh men Chipre,
kwaꞌn nzhin tsaoꞌ nitsdoꞌ.
Nak xaꞌ tu men Levita,
no rë apost nguloꞌlë xaꞌ Bernabé;
widiꞌzh reꞌ gab:
Men nitsiyal laxtoꞌ men.
37 No lëꞌ Bernabé mito tlëꞌ yuo cheꞌn xaꞌ,
orzeꞌ ngwalaꞌ xaꞌ dimi kwaꞌn midoi lo rë apost.