22
―Bin rë go wech,
no dad,
bin go kwaꞌn ganin lo go,
par ne go,
yent kwan nak da.
2 No or mbin bixaꞌ kidiꞌzh Pab lo mis widiꞌzh hebreo kwaꞌn nidiꞌzh bixaꞌ,
más xe nguzhin bixaꞌ,
orzeꞌ sigue kidiꞌzh Pab:
3 ―Na nak tu men Israel xaꞌ ngol yezh Tarso,
lazh men Cilicia,
per miroꞌb da yezh Jerusalén.
Lo Gamaliel mitseꞌda dike xmod nak rë ley cheꞌn rë xuz be,
no mixoꞌbyeka len rë ley cheꞌn Dios,
nela xmod nileꞌ go nal reꞌ.
4 No dox ngok nakap da lo rë xaꞌ ñila widiꞌzh cheꞌn Dios por Jesukrist,
haxta ngoknun ngut pla bixaꞌ.
No nzho bixaꞌ miliꞌbdoꞌn,
par nguio bixaꞌ lizhyiꞌb,
wanei choi,
miyiꞌy no unaꞌi.
5 Lëꞌ ngulëiꞌ ro,
kun rë xaꞌ más nileꞌ mandad leꞌn yadoꞌ,
rë xaꞌ reꞌ gak ne,
lëꞌ rë kwaꞌn kinin lo go,
lëꞌi walika.
Lëꞌ bixaꞌ mineꞌ yech kan,
mileꞌ bixaꞌ mandad da,
mbi̱ña̱ yech lo rë wech be,
men Israel,
xaꞌ nzho yezh Damasco,
par ngaliꞌbdoꞌn rë men cheꞌn Jesukrist kwaꞌn nzho zeꞌ,
orzeꞌ ngayidnun bixaꞌ reꞌ par ngazakzi bixaꞌ.
Pab midiꞌzh xmod ngok xaꞌ men cheꞌn Jesukrist
6 ’Per or mer la nzhazhiꞌna yezh Damasco,
pas mer garol zhë,
lëꞌchi nguroꞌ tu biani ro di lo yibëꞌ,
miziniy nakaꞌn plo nzhazëꞌn,
7 orzeꞌ ngwachin da lo yuo,
mbaino mbina tu widiꞌzh kwaꞌn ne lon:
“¡Saulo,
Saulo!,
¿chon yent por kwan kirukël ticha?”
8 Orzeꞌ nzhapa:
“¿Cho go,
Señor?”
Orzeꞌ ne widiꞌzh zeꞌ:
“Na nak Jesús,
xaꞌ nzë yezh Nazaret,
xaꞌ kirukël tich,
yent por kwan.”
9 No rë men xaꞌ nzha kun na,
nab biani ro zeꞌ une bixaꞌ,
per nangont bixaꞌ widiꞌzh kwaꞌn midiꞌzh lon reꞌ.
10 Orzeꞌ nzhapa:
“Señor,
¿kwan nzhakla go len?”
Orzeꞌ ne Señor lon:
“Waxche no wa yezh Damasco.
Zeꞌ nzho tu xaꞌ ne par kwan ngulen lu.”
11 No por mileꞌ yalnazhon cheꞌn biani reꞌ mikal lon,
kuzeꞌ lëꞌ rë xaꞌ nzha no kun lëꞌ nguzen yaꞌn,
par mizhiꞌna yezh Damasco.
12 ’Zeꞌ nzho tu miyiꞌ xaꞌ lë Ananías,
tu xaꞌ nzhon roꞌ Dios,
no nzhon xaꞌ ley kwaꞌn milaꞌ Dios lo Muisés.
No rë men Israel xaꞌ nzho yezh Damasco reꞌ,
wen ñët xaꞌ reꞌ xid bixaꞌ.
13 Mbiꞌd Ananías plo nzhoꞌn,
orzeꞌ nguzubi xaꞌ lon,
ne xaꞌ:
“¡Wecha Saulo!,
biwiꞌ xtu wëlt”,
orzeꞌ ngulitsa lon,
unen Ananías.
14 Orzeꞌ ne xaꞌ lon:
“Lëꞌ Dios cheꞌn rë xuz be xaꞌ nzhala,
dizde nzhala ngule Me lu,
par nel xmod nak xigab cheꞌn Me kun lu,
no par ne yubal Me nileꞌ rë kwaꞌn nzhakla Dios;
mbaino par gonal yub widiꞌzh cheꞌn Me kwaꞌn kibezhal,
15 porke gakal xaꞌ nidiꞌzh por lëꞌ Me lo rë men,
por rë kwaꞌn unel,
no por rë kwaꞌn mbinal.
16 No nal,
¿chon kimbëzal?
Watsuli,
no goklëiꞌ leꞌn nits,
no binaꞌb lo Señor par kubchi Me rë kwaꞌn nzëꞌb xkil.”
Midiꞌzh Pab, lëꞌ Dios mixëꞌl xaꞌ lo rë men gat lëꞌt men Israel
17 ’No or nguiubren yezh Jerusalén,
orzeꞌ nguioꞌn leꞌn yadoꞌ reꞌ,
no dub kinaꞌba lo Dios,
miluꞌ Dios tu kwaꞌn lon,
18 ne Me:
“¡Karre guroꞌ yezh Jerusalén!,
porke nayilat men yezh reꞌ kwaꞌn gabal lo bixaꞌ por da.”
19 Orzeꞌ nzhapa lo Me:
“Señor,
rë men yezh reꞌ nane,
xmod nigotina rë xpenal leꞌn rë yoꞌ plo nitseꞌd men widiꞌzh cheꞌn Dios,
par nigon bixaꞌ lizhyiꞌb,
no niyina bixaꞌ.
20 No or mbit men Teb xaꞌ midiꞌzh xtiꞌzhal lo rë men,
mbaino mis na nzo orzeꞌ,
mbaino mis na nzhap ñal ka xaꞌi,
no haxta xab rë xaꞌ mbit Teb,
mikinan.”
21 Orzeꞌ ne Señor lon:
“Wa,
porke lëꞌda xëꞌlal zit lo xtu ben men,
gat lëꞌt men Israel.”
Nzho Pab yaꞌ komandant
22 No lult kureꞌ mixek men midiꞌzh Pab,
orzeꞌ nguzublo,
ngurezhië bixaꞌ xtu wëlt,
nzhab bixaꞌ:
―¡Gat ñaltraꞌ ban miyiꞌ reꞌ yizhyuo reꞌ!
¡Bit go xaꞌ tuli!
23 No dub kibizhië bixaꞌ,
nguloꞌ bixaꞌ lar kwaꞌn nak bixaꞌ al tich,
orzeꞌ kichoꞌn bixaꞌ yuo al ya.
24 No or une komandant seꞌ kileꞌ bixaꞌ,
orzeꞌ mileꞌ xaꞌ mandad,
ñanu sondad Pab plo nibin bixaꞌ,
par rële tich Pab,
no par gab Pab chon niyiꞌ rë men,
nine men Pab.
25 Per or naliꞌb la Pab par rële tich xaꞌ,
orzeꞌ nzhab Pab lo tu capitán xaꞌ nzo zeꞌ:
―¿Chi zak chël goi tich tu men Roma,
tu xaꞌ naga ne go kwan nak?
26 Or mbin capitán kwaꞌn midiꞌzh Pab,
orzeꞌ ngwayab xaꞌi lo komandant:
―Nal,
¿kwan leꞌ go kun miyiꞌ baꞌ?,
porke lëꞌ xaꞌ ne,
nak xaꞌ tu men yezh Roma.
27 Orzeꞌ nguzubi komandant reꞌ lo Pab,
nzhab xaꞌ:
―Bine lon,
¿chi walika,
men Roma lu?
Orzeꞌ nzhab Pab:
―Lëꞌi walika.
28 Orzeꞌ nzhab komandant:
―Nayax dox dimi milen gaxt par ngok da tu men Roma.
Orzeꞌ nzhab Pab:
―Per na,
nake dizde ngol da.
29 No rë sondad kwaꞌn nzhakla ngachële tich Pab,
or mbin bixaꞌ,
lëꞌ Pab men Roma,
lwegaꞌ nguibchi bixaꞌ lo Pab;
orzeꞌ haxta nu komandant mizheb or mbin xaꞌ kureꞌ,
porke lëꞌ xaꞌ mileꞌ mandad miliꞌb Pab.
Nzo Pab plo nzhin rë gustis xaꞌ más nileꞌ mandad
30 No xtu riyëꞌl zeꞌ,
stubi nzhakla komandant zeꞌ ne xaꞌ,
chon nzhakla rë men Israel,
gat Pab.
Orzeꞌ ngurezh xaꞌ rë ngulëiꞌ ro,
no kun rë gustis xaꞌ más nileꞌ mandad,
orzeꞌ nguloꞌ komandant Pab al tich zeꞌ,
mizo xaꞌ Pab tsaoꞌ cheꞌn rë xaꞌ nileꞌ mandad zeꞌ.