Ngwa Pab yezh Jerusalén
21
No or milaꞌ no rë men cheꞌn Jesukrist zeꞌ,
orzeꞌ nkë no bark,
par ngwa no nali laka lazh men Cos,
tu yezh win kwaꞌn nzhin tsaoꞌ nitsdoꞌ.
No xtu riyëꞌl,
mizhin no lazh men Rodas,
xtu yezh win kwaꞌn nzhin ska tsaoꞌ nitsdoꞌ.
No di zeꞌ ngwa no yezh Pátara,
kwaꞌn nzhin roꞌ nitsdoꞌ.
2 No yezh Pátara nkë no xtu bark,
kwaꞌn ña par lazh men Fenicia.
3 No dub nzho no leꞌn bark zeꞌ,
al lad izkierd cheꞌn no miaꞌn yezh Chipre,
kwaꞌn nzhin tsaoꞌ nitsdoꞌ;
orzeꞌ nzha no par lazh men Siria.
No or mizhin no yezh Tiro,
mila bixaꞌ rë kwaꞌn nzho leꞌn bark.
4 Zeꞌ,
mizhëꞌl no pla men cheꞌn Jesukrist kwaꞌn nzho yezh zeꞌ,
no miaꞌn no kun lëꞌ bixaꞌ gazh ngubizh.
No por Sprit cheꞌn Dios,
nzhab rë xaꞌ reꞌ,
nayat Pab yezh Jerusalén.
5 Per or nded gazh ngubizh zeꞌ,
nkaꞌ no nez ña no,
orzeꞌ ngulunez rë men cheꞌn Jesukrist zeꞌ no,
kun rë unaꞌ cheꞌn bixaꞌ no kun rë xmëꞌd bixaꞌ.
No ngulunez bixaꞌ no zit par roꞌ yezh.
No or mizhin no roꞌ nitsdoꞌ,
zeꞌ nguzuxib no,
par gunaꞌb no lo Dios.
6 Orzeꞌ nzhab no lo bixaꞌ:
“Lëꞌ no ña”,
nkili no bark,
orzeꞌ miëk rë xaꞌ kwaꞌn ngulunez no zeꞌ par lizh bixaꞌ.
7 Nguroꞌ no pwert Tiro,
par mizhin no yezh Tolemaida,
zeꞌ ngula no bark,
par ngwatsiꞌ no ma rë men cheꞌn Jesukrist xaꞌ nzho zeꞌ,
orzeꞌ miaꞌn no kun lëꞌ bixaꞌ tu ngubizh.
8 No xtu riyëꞌl,
nguroꞌ no yezh zeꞌ par mizhin no yezh Cesarea,
zeꞌ mizhin no lizh tu men cheꞌn Jesukrist xaꞌ lë Lip,
tu xaꞌ niluꞌ widiꞌzh cheꞌn Dios por Jesukrist lo rë men,
no lëꞌ xaꞌ reꞌ nak tu rë miyiꞌ kwaꞌn nguio xid za gazh miyiꞌ kwaꞌn ndiꞌz kwaꞌn ndao rë men cheꞌn Jesukrist yezh Jerusalén.
Lizh xaꞌ reꞌ miaꞌn no.
9 Mbaino Lip nzhap tap xchaꞌp,
no dap unaꞌ nab;
no rë unaꞌ reꞌ nidiꞌzh por Dios.
10 No pla raꞌ ngubizh nzha nzho no lizh Lip,
no zeꞌ mizhin tu xaꞌ lë Agabo,
xtu xaꞌ nidiꞌzh por Dios;
nzë xaꞌ lazh men Judea.
11 Or mizhin xaꞌ reꞌ lo no,
nguzen xaꞌ sinch kwaꞌn nibin laxtoꞌ Pab,
kun lëꞌi mis yub xaꞌ miliꞌb xaꞌ yaꞌ xaꞌ no niꞌ xaꞌ,
orzeꞌ nzhab xaꞌ:
―Seꞌ ne Sprit cheꞌn Dios:
“Seꞌ liꞌnu rë men Israel kwaꞌn nzho yezh Jerusalén miyiꞌ kwaꞌn nak cheꞌn sinch reꞌ,
mbaino chi bixaꞌ miyiꞌ reꞌ lo xtu ben men,
gat lëꞌt men Israel.”
12 Or mbin no kureꞌ,
kun más rë xaꞌ nzhin zeꞌ,
kwaꞌdox nzhab no lo Pab:
—¡Nayatal yezh Jerusalén!
13 Orzeꞌ seꞌ mikab Pab lo no:
―¿Chon nzhoꞌn go,
nileꞌ go niwin laxtoꞌn?
Lëꞌda nzo la list,
gat lëꞌt nab par liꞌb dai,
sino ke nu haxta par gat da yezh Jerusalén,
por Señor Jesús.
14 Ngaleꞌt no gan,
ngala yek xaꞌ,
kuzeꞌ nzhab no:
―Lëꞌ Señor wane kwan leꞌ Señor kun lëꞌ xaꞌ.
15 No or nded rë kureꞌ,
mizuxkwaꞌ no rë cheꞌn no,
orzeꞌ nguroꞌ no yezh Cesarea,
par nzha no yezh Jerusalén.
16 No nu pla men cheꞌn Jesukrist kwaꞌn nzho yezh Cesarea,
ngulunez bixaꞌ no,
par lizh tu xaꞌ lë Mnasón,
tu xaꞌ kwaꞌn nzë tu yezh win lë Chipre,
no dizde nzhala nak xaꞌ reꞌ tu men cheꞌn Jesukrist.
Ngwatsiꞌ Pab ma Jakob
17 No or mizhin no yezh Jerusalén lo rë men cheꞌn Jesukrist xaꞌ nzho zeꞌ,
dox wen mileꞌ bixaꞌ kun no.
18 No xtu riyëꞌl,
ngwa no kun Pab,
ngwatsiꞌ no ma Jakob,
no nu zeꞌ une no,
nzhin rë xaꞌ nzo lo rë men cheꞌn Jesukrist,
xaꞌ nzho yezh Jerusalén.
19 No or milox minabdiꞌzh Pab chi wen ka bixaꞌ,
orzeꞌ nzhab Pab lo bixaꞌ,
tugaꞌ rë zhiꞌn nazhon kwaꞌn mileꞌ Dios xid rë men gat lëꞌt men Israel.
20 No or milox mbin bixaꞌ rë kureꞌ,
orzeꞌ nzhab bixaꞌ:
“¡Dox nazhon Dios!”,
no nzhab bixaꞌ lo Pab:
―Lëꞌ wech,
lëꞌl nane ka,
xid rë men Israel,
nzho nayax men xaꞌ ñila widiꞌzh cheꞌn Dios por Jesukrist,
per dox nguloyek bixaꞌ leꞌ bixaꞌ ley kwaꞌn milaꞌ Dios lo Muisés.
21 Per nzho men nzhab lo bixaꞌ,
lu niluꞌ lo rë men Israel,
rë xaꞌ kwaꞌn nzho lazh men gat lëꞌt men Israel,
nzhabal naleꞌtraꞌ bixaꞌ kwaꞌn nzobniꞌ lo ley kwaꞌn milaꞌ Dios lo Muisés;
mbaino nzhabal nakëꞌt bixaꞌ señ kwerp cheꞌn rë xgaꞌn bixaꞌ,
mbaino ni naleꞌ bixaꞌ rë kostumbr cheꞌn rë men Israel.
22 ¿Xmod leꞌ be nal,
par ne men,
gat lëꞌt saꞌ niluꞌl lo rë men?,
porke rë men gon ka,
lëꞌl mizhin reꞌ.
23 Nal leꞌl kwaꞌn ne no lol reꞌ:
Nzho tap miyiꞌ xid no,
xaꞌ milaꞌ diꞌzh leꞌ tu kwaꞌn lo Dios.
24 Wanu bixaꞌ,
no bileꞌ nela xmod leꞌ bixaꞌ kwaꞌn nzobniꞌ lo ley kwaꞌn milaꞌ Dios lo Muisés,
par mbe laxtoꞌ rë go lo Dios.
Gudix rë nak gaxt cheꞌn bixaꞌ,
no or milox mileꞌ goi,
orzeꞌ gak zhiꞌb yek go.
Chi leꞌl seꞌ,
rë men gab,
gat walit kwaꞌn nidiꞌzh men por lu,
nes par gab men,
lëꞌ nukal nileꞌ ley kwaꞌn milaꞌ Dios lo Muisés.
25 No lu nane ka,
mixëꞌl no yech lo rë men cheꞌn Jesukrist,
rë xaꞌ gat lëꞌt men Israel,
par nzhab no:
Nagaotraꞌ bixaꞌ kwaꞌn nixoꞌb lo winab,
no ni nagao bixaꞌ rë ma ngut di miziꞌyen,
mbaino ni nagao bixaꞌ ren,
no ni nakaꞌ bixaꞌ men kwaꞌn gat lëꞌt tsaꞌ bixaꞌ.
Ngwagaꞌ Pab yaꞌ rë men Israel
26 Orzeꞌ ngwanu Pab dap miyiꞌ zeꞌ,
no xtu riyëꞌl ngwa Pab kun lëꞌ bixaꞌ par mbe bixaꞌ nela xmod nzobniꞌ lo ley kwaꞌn milaꞌ Dios lo Muisés,
orzeꞌ lwegaꞌ nguio Pab leꞌn yadoꞌ Jerusalén,
par ngwayab xaꞌ lo rë ngulëiꞌ pok za zhë kwaꞌn mbe bixaꞌ,
nez weiꞌ kad bixaꞌ tu gon lo Dios.
27 Per ya mer la lox za gazh ngubizh par mbe bixaꞌ,
lëꞌchi une pla men Israel,
rë xaꞌ kwaꞌn nzë lazh men Asia,
lëꞌ Pab nzo leꞌn yadoꞌ Jerusalén.
Orzeꞌ ngulo rë men reꞌ diꞌzh lo más rë men nzhin zeꞌ,
par mileꞌ bixaꞌ nazheꞌb,
orzeꞌ nguzen rë xaꞌ nzë Asia zeꞌ Pab,
28 naye kibizhië bixaꞌ:
―¡Rë go men Israel,
goknu go zakzi be miyiꞌ reꞌ!,
porke rë plo nikizë xaꞌ,
kiluꞌ xaꞌ lo rë men,
nidiꞌzh xaꞌ gat lëꞌt kwaꞌn nileꞌ rë men Israel,
no nu ley kwaꞌn milaꞌ Dios lo Muisés gat ñalt leꞌ be,
mbaino nu yadoꞌ cheꞌn be,
nazuꞌt nidiꞌzh xaꞌ.
¡No haxta nu ngulo xaꞌ pla men grieg,
xaꞌ gat nambet,
leꞌn yadoꞌ cheꞌn be,
par mitsinu xaꞌ lugar nazhon reꞌ!
29 Kureꞌ midiꞌzh bixaꞌ,
porke lëꞌ bixaꞌ une la,
nikizë Pab kun Trófimo yezh Jerusalén,
no lëꞌ Trófimo nzë yezh Efeso,
kuzeꞌ mileꞌ bixaꞌ xigab,
lëꞌ Pab mbiyꞌ rë xaꞌ reꞌ yadoꞌ Jerusalén.
30 No rë nak xaꞌ nzho yezh Jerusalén,
nazheꞌb mileꞌ bixaꞌ,
orzeꞌ karre migan rë men,
nguzen bixaꞌ Pab,
no mizubxax bixaꞌ Pab dizde leꞌn yadoꞌ haxta al tich,
orzeꞌ lwegaꞌ mitsaoꞌ bixaꞌ roꞌ yadoꞌ.
31 No rë men reꞌ,
mer ñen bixaꞌ gut bixaꞌ Pab,
lëꞌchi karre ngwayab tu men lo komandant cheꞌn rë sondad Roma,
kwaꞌn nzhin yezh Jerusalén,
lëꞌ rë men yezh Jerusalén kileꞌ nazheꞌb.
32 No lwegaꞌ nzhanu komandant reꞌ rë sondad cheꞌn xaꞌ,
kun pla capitán,
karre mizhin bixaꞌ xid rë men zeꞌ.
Or une rë men kileꞌ nazheꞌb zeꞌ lëꞌ komandant nzhazhin lo bixaꞌ kun rë sondad,
orzeꞌ milaꞌ bixaꞌ nangayintraꞌ bixaꞌ Pab.
33 No nguzubi komandant lo Pab,
nguzen xaꞌ Pab,
orzeꞌ mileꞌ xaꞌ mandad,
miliꞌb Pab kun chop kaden,
orzeꞌ minabdiꞌzh xaꞌ lo rë men nzhin zeꞌ:
“¿Cho xaꞌ reꞌ,
mbaino kwan mileꞌ xaꞌ?”
34 Per tu xaꞌ nibizhyë tu kwaꞌn,
no xtu xaꞌ xtu kwaꞌn,
kuzeꞌ nangont komandant kwane por dox kibizhië men,
orzeꞌ mileꞌ komandant mandad,
mbiyꞌ sondad Pab plo nibin bixaꞌ.
35 No or mizhinnu sondad Pab plo nikë skaler par kili bixaꞌ al ya,
orzeꞌ mixoꞌb yën sondad Pab,
par mbiyꞌ bixaꞌ Pab al nez plo nibin bixaꞌ,
por dox nazheꞌb kileꞌ rë men zeꞌ,
36 mbaino rë men nzadkë tras kibizhië bixaꞌ:
―¡Bit go xaꞌ baꞌ tuli!
Midiꞌzh Pab lo rë men, yent kwan nak xaꞌ
37 No or mer nzhayo bixaꞌ al leꞌn,
orzeꞌ nzhab Pab lo komandant:
―¿Chi zak ganin tu kwaꞌn lo go?
Orzeꞌ nzhab komandant:
―¿Chi nzhak nidiꞌzhal widiꞌzh grieg?
38 Orzeꞌ nzhab komandant xtu wëlt:
―¿No chi gat lëꞌt lazh men egipto nzël,
xaꞌ mileꞌ nangont men roꞌ gubier,
nkizë xaꞌ leꞌn yuo bizh,
kun tap mil miyiꞌ kwaꞌn nzhut men?
39 Orzeꞌ nzhab Pab:
―Na nak tu men Israel,
xaꞌ nzë yezh Tarso,
tu yezh kwaꞌn nakbeꞌ kwaꞌn ñaꞌn lazh men Cilicia,
kuzeꞌ kinin lo go,
chi ziyël go dizha lo rë men reꞌ.
40 No or nguziyël komandant,
orzeꞌ nguzo Pab plo nikë skaler,
no mileꞌ Pab tu señ kun yaꞌ Pab,
par nachaoꞌ men rruid,
rë xaꞌ nzhin zeꞌ.
No or nguzhin men xe,
orzeꞌ nguzublo midiꞌzh Pab lo bixaꞌ kun widiꞌzh hebreo: