Ngwa Pab lazh men Macedonia mbaino lazh men Grecia
20
No or mireꞌchbe rë men nzhin zeꞌ,
orzeꞌ ngurezh Pab rë men cheꞌn Jesukrist xaꞌ nzho yezh reꞌ,
par mizaꞌ xaꞌ konsej rë xaꞌ reꞌ,
orzeꞌ nzhab xaꞌ:
“Lëꞌda ña la”,
orzeꞌ nzha xaꞌ par lazh men Macedonia.
2 No or nded xaꞌ rë yezh zeꞌ,
mileꞌ xaꞌ más mixobla rë men cheꞌn Jesukrist widiꞌzh cheꞌn Dios,
rë xaꞌ kwaꞌn nzho zeꞌ.
No or milox nded Pab rë zeꞌ,
ña xaꞌ par lazh men Grecia,
3 plo kwaꞌn miaꞌn xaꞌ chon mbëoꞌ,
mbaino mer ñen xaꞌ kë xaꞌ bark par nga xaꞌ lazh men Siria,
per or mbin Pab,
lëꞌ rë men Israel kilaꞌch la par gut rë men reꞌ xaꞌ,
orzeꞌ tutsa xigab mileꞌ xaꞌ yëk ska xaꞌ,
par lazh men Macedonia,
per neka niꞌ xaꞌ ya xaꞌ,
nes par zhin xaꞌ lazh men Siria.
4 No or nguio xaꞌ nez par ded xaꞌ lazh men Asia,
nzhanu xaꞌ rë xaꞌ kwaꞌn lë Sópater,
xgaꞌn tu xaꞌ lë Pirro,
tu men yezh Berea;
kun xtu xaꞌ lë Aristarco,
no kun tu xaꞌ lë Segundo,
tu xaꞌ yezh Tesalónica;
mbaino kun xtu xaꞌ lë Gayo,
tu xaꞌ yezh Derbe,
no kun Timoteo;
mbaino kun Tíquico,
no kun Trófimo,
tu xaꞌ kwaꞌn nzë lazh men Asia.
5 Rë miyiꞌ reꞌ nguzhubner lo no,
no ngulëz bixaꞌ yezh Troas.
6 No or nded lani kwaꞌn nzhao men Israel pan kwaꞌn niyent levadur,
orzeꞌ nguroꞌ no yezh Filipos,
par nkë no bark ña no yezh Troas.
Gaiꞌ ngubizh nguio no leꞌn bark,
par mizhin no yezh Troas.
Zeꞌ nguio no gazh ngubizh,
plo mizhëꞌl no rë xaꞌ kwaꞌn nguzhubner lo no zeꞌ.
Lult kwaꞌn midiꞌzh Pab yezh Troas
7 Or ngol primer ngubizh cheꞌn sman,
nguzhin rë no par ndao no pan,
orzeꞌ haxta garol yëꞌl ngulëz midiꞌzh Pab lo rë men cheꞌn Jesukrist kwaꞌn nzho yezh Troas,
porke riyëꞌl lëꞌ xaꞌ roꞌ la,
par ya xaꞌ xtu plo.
8 Leꞌn kwart al ya plo nguzhin no zeꞌ,
nayax biani nikë.
9 Mbaino lëꞌ tu mbwin kwaꞌn lë Eutiko,
nzob roꞌ tu bentán cheꞌn kwart zeꞌ.
No por dox xche kidiꞌzh Pab,
kuzeꞌ nguzen mikaꞌl mbwin reꞌ,
orzeꞌ ngob mbwin lo yuo haxta pis yon,
no or ngwalits men mbwin,
lëꞌ mbwin ngut la.
10 Orzeꞌ ngula Pab lo yuo nguxoꞌb Pab roꞌ laxtoꞌ mbwin,
orzeꞌ ndeꞌx xaꞌ mbwin,
no nzhab xaꞌ lo rë men cheꞌn Jesukrist,
xaꞌ nzhin zeꞌ:
―Nazhebt go.
Lëꞌ mbwin naban ka.
11 Lwegaꞌ miëk Pab leꞌn kwart al ya xtu wëlt,
no or ndiꞌz xaꞌ pan par ndao bixaꞌ,
orzeꞌ haxta ngwanilyuo une midiꞌzh Pab,
orzeꞌ ña xaꞌ.
12 Mbaino mbwin reꞌ,
ngwalaꞌ bixaꞌ mbwin lizh mbwin,
naban mbwin,
kureꞌ mileꞌ más ngop rë men zeꞌ jwers lo cheꞌn Dios.
Nguroꞌ bixaꞌ yezh Troas par nzha bixaꞌ yezh Mileto
13 Orzeꞌ nkë no bark,
par nguzhubner no lo Pab par nzha no yezh Asón,
zeꞌ ngulëz no,
porke lëꞌ Pab mileꞌ la xigab,
zhin xaꞌ niꞌ xaꞌ yezh zeꞌ.
14 No or mizhin xaꞌ plo kimbëz no,
orzeꞌ nkë no bark kun lëꞌ xaꞌ,
par ngwa no yezh Mitilene.
15 No or nguroꞌ no plo nkë no bark,
xtu riyëꞌl nded no kun bark taꞌ tu yezh win kwaꞌn lë Quío,
kwaꞌn nzhin tsaoꞌ nitsdoꞌ,
no lëꞌ xtu riyëꞌl,
nded no pwert Samos.
No or nded no yezh Trogilio,
zeꞌ mileꞌ no tu diskans tu rrat,
no haxta xtu riyëꞌl,
mizhin no yezh Mileto.
16 Seꞌ ngokla Pab,
porke net xaꞌ kwëz xaꞌ xche lazh men Asia,
ni yezh Efeso nangat xaꞌ,
porke dox ñen laxtoꞌ xaꞌ zhin xaꞌ yezh Jerusalén,
par gal xaꞌ lani kwaꞌn lë Pentecostés kwaꞌn nzhazhin la.
Lult konsej kwaꞌn milaꞌ Pab lo rë xaꞌ nizo dilant xid rë men cheꞌn Jesukrist, yezh Efeso
17 Or nzho Pab yezh Mileto,
ngurezh xaꞌ rë xaꞌ nizo dilant,
xid rë men cheꞌn Jesukrist yezh Efeso.
18 No or mizhin bixaꞌ lo Pab,
nzhab Pab lo bixaꞌ:
―Lëꞌ go nane ka xmod miban da xid go lazh men Asia.
19 Aunke ter dox bid ndeꞌda,
mbaino mbina por rë kwaꞌn mileꞌ men lazha kun na,
no kun yalnadoꞌ milen rë kwaꞌn mileꞌ Señor mandad da,
or nguioꞌn xid go.
20 Rë go nane ka,
nangakachta ni tu kwaꞌn wen lo go.
Dilant lo rë go midizhai,
mbaino nu lizh go mbidnine.
21 Dub lan minen konsej go,
gat lëꞌt nab rë men Israel mizane,
sino ke nu rë men gat lëꞌt men Israel mizane,
par laꞌ go rë kwaꞌn gat lëꞌ kwaꞌn nak go,
mbaino yila go Señor Jesukrist.
22 No biwiꞌu nal,
lëꞌ Sprit cheꞌn Dios mileꞌ mandad da,
lëꞌ da ya yezh Jerusalén,
no naneta kwan paꞌ zaka baꞌ,
23 per lëꞌda nane la,
lëꞌ Sprit cheꞌn Dios ya ne la lon,
kad yezh kwaꞌn yan,
lëꞌda yoꞌ lizhyiꞌb,
mbaino dox zakzi men da.
24 Per yent kwaꞌn lëꞌi,
zaka rë kubaꞌ;
ter haxta gat da;
per nakiꞌn loxa rë zhiꞌn kwaꞌn mineꞌ Jesukrist len yizhyuo reꞌ,
porke nileꞌ Dios nizak laka laxtoꞌn,
or nidizha lo rë men,
lëꞌ Jesukrist nizaꞌ xtu mod ban men chul lo Dios,
por nazhiꞌ Dios men.
25 ’No nal biwiꞌu,
rë go xaꞌ mbin,
or milun rë wëlt,
xmod ban men kun Dios,
porke lëꞌ da nane la,
ya nayotraꞌ ne go da.
26 Kuzeꞌ,
nal kinin lo go,
nagaptaꞌ dol lo Dios chi lëꞌ go yitlo par dubtaꞌ lo Dios,
27 porke yent kwan ngazheb da por men;
rë kwaꞌn nzhakla Dios midizha lo go.
28 Kuzeꞌ,
mis go bikina go go,
no bikina go rë men cheꞌn Jesukrist kwaꞌn mikaꞌb Sprit cheꞌn Dios lo go,
par kina go rë xaꞌ kwaꞌn mixo Jesukrist ren por lëꞌ,
nela xmod nileꞌ rë baxtor nikina ma gaꞌ.
29 Lëꞌda nane la,
or yubchin lo go,
orzeꞌ lëꞌ xtu ben men yiꞌd xid go,
nela rë ma nazheꞌb kwaꞌn nzhao ma gaꞌ,
par loꞌx bixaꞌ rë men nikina go.
30 Mis xid go yo rë xaꞌ kiꞌl rë xaꞌ nikina go,
par yakë bixaꞌ tich rë xaꞌ reꞌ.
31 Kuzeꞌ biwiꞌ go no bitsila go,
lëꞌda dub chon liꞌn,
zhë-yëꞌle dubtaꞌ minen konsej go,
haxta mbina por kad go.
32 ’No nal wecha,
lëꞌda la go yaꞌ Dios par kina Me go,
no bitsila go rë widiꞌzh cheꞌn Dios kwaꞌn nidiꞌzh,
nazhiꞌ Dios men,
par xobyek go Dios;
mbaino par neꞌ Dios rë kwaꞌn wen kaꞌ go,
nela xmod milaꞌ Dios diꞌzh zaꞌ Diose,
kaꞌ rë men cheꞌn Dios,
rë xaꞌ kwaꞌn nambe laxtoꞌ.
33 ’No na,
nangaklata ngayix go ngakan,
no ni nangaklan nganeꞌ go lar gaka,
34 sino ke kun yub yaꞌn nkën zhiꞌn,
par ngopa rë kwaꞌn nakiꞌn da,
no par mizan rë kwaꞌn nakiꞌn rë xaꞌ kwaꞌn nkizë kuda lo zhiꞌn nazhon cheꞌn Dios.
35 Seꞌ milun lo go,
par leꞌ go zhiꞌn,
no par gaknu go rë xaꞌ kwaꞌn nakiꞌn gaknu go,
no par tsila go rë widiꞌzh kwaꞌn midiꞌzh Señor Jesús or nzhab Me:
“Más wen nzha men xaꞌ zaꞌ kwaꞌn kaꞌ men,
ke xaꞌ zaꞌ mene kaꞌ.”
36 No or milox midiꞌzh Pab rë kureꞌ,
orzeꞌ nguzuxib Pab kun más rë men par minaꞌb bixaꞌ lo Dios.
37 Orzeꞌ rë bixaꞌ nzhoꞌn,
mbaino ndeꞌzh bixaꞌ Pab,
no michiroꞌ bixaꞌ taꞌ kwats Pab,
por tanta nazhiꞌ bixaꞌ wech bixaꞌ.
38 No dox miwin laxtoꞌ bixaꞌ,
por kwaꞌn nzhab Pab:
“Ya nayotraꞌ ne go da xtu wëlt.”
No ngulunez bixaꞌ Pab,
haxta nkili Pab bark.