―¿Chi nguio Sprit cheꞌn Dios laxtoꞌ go,

or ngwayila go Jesukrist?

Orzeꞌ nzhab bixaꞌ:

―Per ni naga gon no chi nzho Sprit cheꞌn Dios.

3 Orzeꞌ nzhab Pab:

―¿Xmod ska ngoklëiꞌ go?

Orzeꞌ nzhab bixaꞌ:

―Ngoklëiꞌ no nela xmod miluꞌ Juane.

4 Orzeꞌ nzhab Pab:

―Walika,

Juan mililëiꞌ men leꞌn nits,

par miluꞌ walika mizi bixaꞌ rë mod gat lëꞌ nak bixaꞌ lo Dios par ban bixaꞌ xtu mod;

per nzhab ska Juan:

“Nakiꞌn yila go Me kwaꞌn nzadkë ticha.”

No Me kwaꞌn mizeꞌt Juan reꞌ,

nak Jesús.

5 No or mbin bixaꞌ kureꞌ,

lwegaꞌ ngoklëiꞌ bixaꞌ leꞌn nits,

nela xmod mileꞌ ka Jesukrist mandad,

6 orzeꞌ mixoꞌb Pab yaꞌ Pab yek rë men zeꞌ,

mbaino nguio Sprit cheꞌn Dios laxtoꞌ rë bixaꞌ,

no midiꞌzh bixaꞌ xtu ben widiꞌzh kwaꞌn yent cho nane,

mbaino midiꞌzh bixaꞌ por Dios.

7 Di lo rë miyiꞌ reꞌ,

nak bixaꞌ tu dusen men.

8 No zeꞌ,

dub chon mbëoꞌ miluꞌ Pab widiꞌzh cheꞌn Dios por Jesukrist leꞌn yoꞌ plo nitseꞌd men widiꞌzh cheꞌn Dios,

no nangazhebt xaꞌ midiꞌzh xaꞌi,

no mileꞌ xaꞌ por ngala xaꞌ yek rë men zeꞌ,

par gak bixaꞌ men cheꞌn Dios por Jesukrist.

9 Per nzho pla xaꞌ nad dox,

gat nzhont xaꞌi,

dox nakap nidiꞌzh bixaꞌ tich widiꞌzh cheꞌn Dios por Jesukrist lo rë nak men nzhin zeꞌ.

Orzeꞌ nguiubchi Pab zeꞌ,

kun zipla men xaꞌ ñila widiꞌzh cheꞌn Dios por Jesukrist,

orzeꞌ ngwanu Pab bixaꞌ leꞌn tu yoꞌ skwel cheꞌn tu xaꞌ lë Tirano,

no zeꞌ,

zilitaꞌ ñadiꞌzh Pab widiꞌzh cheꞌn Dios lo rë xaꞌ zeꞌ.

10 Seꞌ mileꞌ Pab dub chop liꞌn,

par mbin rë xaꞌ nzho lazh men Asia,

rë men Israel kun rë men grieg,

xmod nak widiꞌzh cheꞌn Dios por Jesukrist.

11 No por Pab,

mileꞌ Dios rë kwaꞌn nazhon kwaꞌn nagat ne men.

12 Haxta mbiyꞌ men pañit o tlëꞌ lar lo Pab par nzhale taꞌ Pab,

orzeꞌ nzhuweiꞌ mene lo rë xaꞌ nzhakne,

no niwen men,

mbaino rë mbi mal nirutine laxtoꞌ men.

13 Per nzho pla miyiꞌ Israel,

xaꞌ nikizë yezh por yezh,

nu bixaꞌ nzhakla kutin mbi mal laxtoꞌ rë men por lë Jesukrist,

nela Pab gaꞌ.

Seꞌ midiꞌzh bixaꞌ lo rë xaꞌ nzho mbi mal laxtoꞌ:

―Por lë Jesús kwaꞌn nidiꞌzh Pab lo rë men,

lëꞌda ni,

¡guroꞌtin baꞌ!

14 Seꞌ mileꞌ gazh xgaꞌn tu xaꞌ lë Esceva,

tu men Israel,

tu xaꞌ nileꞌ mandad lo pla ngulëiꞌ.

15 Per tu wëlt,

seꞌ mikab mbi mal lo rë miyiꞌ zeꞌ:

―Nilibeꞌn Jesukrist no nanen cho Pab,

per go,

¿cho gox?

16 Mbaino miyiꞌ kwaꞌn nzho mbi mal laxtoꞌ zeꞌ,

nguxoꞌb xaꞌ tich rë xaꞌ reꞌ,

no mizaꞌ xaꞌ laoꞌ rë miyiꞌ reꞌ,

haxta michëz xaꞌ xab rë xaꞌ reꞌ,

orzeꞌ mikëꞌ rë miyiꞌ reꞌ karre;

nzho xaꞌ miweꞌ,

no nzho xaꞌ ña kacheꞌ.

17 Kuzeꞌ,

rë men nzho yezh Efeso,

men Israel no kun rë men grieg,

or mbin bixaꞌ kwan nguzak rë miyiꞌ reꞌ,

orzeꞌ rë men dox mizheb bixaꞌ,

no rë plo midiꞌzh men:

“Dox nazhon Jesukrist.”

18 No por kwaꞌn ngok reꞌ,

nayax men ngwayila widiꞌzh cheꞌn Dios por Jesukrist,

no nu ngwa bixaꞌ lo rë men cheꞌn Jesukrist par mixëlroꞌ bixaꞌ rë kwaꞌn mal no rë yalbruj kwaꞌn nzhak bixaꞌ.

19 No nu nayax xaꞌ mitseꞌd yech cheꞌn Mizhab,

mbiyꞌ bixaꞌi par mizëꞌk bixaꞌi lo rë men.

No nguloꞌ bixaꞌ kwent plak tsak rë yech zeꞌ,

orzeꞌ nzhab bixaꞌ tsake como choꞌ bi chiꞌ mil dimi kwaꞌn nakxaoꞌ kun plat.

20 Por rë kureꞌ,

más mireꞌch widiꞌzh cheꞌn Dios por Jesukrist rë plo,

por une men dox nazhon Dios,

mbaino más miar men xaꞌ ñila widiꞌzh cheꞌn Dios por Jesukrist.

21 No or milox ngok rë kureꞌ,

midiꞌzh Sprit cheꞌn Dios lo Pab,

ya xaꞌ lazh men Macedonia,

mbaino lazh men Acaya.

No or gat ya Pab zeꞌ,

nzhab Pab:

—Or lox yan yezh Jerusalén,

nakiꞌn yan,

nu yezh Roma.

22 Orzeꞌ mixëꞌl Pab chop men xaꞌ nzhaknu Pab,

par ya bixaꞌ rë yezh kwaꞌn nzhin lazh men Macedonia.

Tu xaꞌ reꞌ lë Timoteo,

mbaino xtu xaꞌ lë Rast.

No miaꞌn Pab zipla ngubizh lazh men Asia.

23 Leꞌn rë ngubizh zeꞌ,

rë men yezh Efeso,

dox nazheb mileꞌ bixaꞌ por widiꞌzh cheꞌn Dios por Jesukrist kwaꞌn niluꞌ Pab,

gat nzhaklat bixaꞌ reꞌche lazh bixaꞌ.

24 Xid rë xaꞌ reꞌ nzho tu xaꞌ más nichëldil men,

tu xaꞌ lë Met.

Xaꞌ reꞌ nichaoꞌ rë nich yeꞌn kwaꞌn nakxaoꞌ kun pura yiꞌb de plat,

kwaꞌn nak nela yadoꞌ cheꞌn winab cheꞌn bixaꞌ kwaꞌn lë Diana.

Lëꞌ Met kun más rë xaꞌ kwaꞌn nichaoꞌ rë nich yeꞌn reꞌ,

nayax dimi nileꞌ bixaꞌ gan por zhiꞌn reꞌ.

25 Orzeꞌ mikan Met rë xaꞌ nikë zhiꞌn reꞌ,

par nzhab xaꞌ lo rë xaꞌ reꞌ:

―Rë be nane,

por zhiꞌn reꞌ,

rrik be.

26 Lëꞌ go nane la,

no nzhon la go,

lëꞌ xaꞌ lë Pab reꞌ kila yek rë men,

ke rë winab kwaꞌn nichaoꞌ yaꞌ men,

gat lëꞌt Diose.

Mbaino gat lëꞌt nab yezh reꞌ kileꞌ xaꞌi,

sino ke dub lazh men Asia kileꞌ xaꞌ saꞌ.

No dox men mileꞌ la xaꞌ gan ngula yek.

27 Dox nazheꞌb kureꞌ.

Paste lëꞌ zhiꞌn cheꞌn be lox.

No gat lëꞌt nab kureꞌi,

nu naleꞌtraꞌ men lani cheꞌn naxnax Diana cheꞌn be,

Me kwaꞌn nazhon par rë men.

¡Mbaino,

gat lëꞌt nab yezh reꞌ gake seꞌ,

no nu dub lazh men Asia,

no pas haxta dub yizhyuo jwals gak rë kureꞌ!

28 Or mbin men kureꞌ,

rë xaꞌ kwaꞌn nikë Met zhiꞌn kun lëꞌ,

orzeꞌ dox niyiꞌxian bixaꞌ,

kibizhië bixaꞌ,

nzhab bixaꞌ:

―¡Dox nazhon naxnax Diana cheꞌn men yezh Efeso!

29 Orzeꞌ rë men yezh zeꞌ,

dox miyiꞌxian bixaꞌ;

orzeꞌ tutsa nguxoꞌb rë bixaꞌ tich Gayo no tich Aristarco,

rop miyiꞌ kwaꞌn nzë lazh men Macedonia,

xaꞌ kwaꞌn nikizë tich Pab;

orzeꞌ mbiyꞌ bixaꞌ rop xaꞌ reꞌ,

haxta plo nibin bixaꞌ,

nileꞌ bixaꞌ junt.

30 Lëꞌ Pab ngokla ngazubi xid rë xaꞌ zeꞌ,

per rë men xaꞌ nikizë kun Pab,

ngalaꞌt bixaꞌ.

31 No pla gustis,

xaꞌ nzë lazh men Asia,

rë xaꞌ kwaꞌn nichëꞌl Pab,

mileꞌ bixaꞌ abis,

gunaꞌb bixaꞌ jwers nayat Pab plo nzhin junt zeꞌ.

32 No lo junt zeꞌ,

dox nazheꞌb kileꞌ men.

Xid rë xaꞌ zeꞌ,

nzho xaꞌ kibizhië naye tu kwaꞌn,

no nzho xaꞌ kibizhië naye xtu kwaꞌn,

no más bixaꞌ ni nane chon nguzhin junt zeꞌ.

33 Orzeꞌ,

pla rë men nzhin lo junt zeꞌ,

nguloꞌ bixaꞌ tu miyiꞌ lë Jand tu lad,

par mbin miyiꞌ reꞌ,

cho nzhap dol ngulen rë kureꞌ;

orzeꞌ micheꞌp pla rë men Israel Jand,

tsaoꞌ plo nzhin rë xaꞌ kizhin junt zeꞌ.

Orzeꞌ miluꞌ Jand tu señ kun yaꞌ xaꞌ par nachaoꞌ men rruid,

par diꞌzh xaꞌ ke yent cho dol nzhap rë men Israel,

rë xaꞌ kwaꞌn nzho yezh reꞌ,

por rë kwaꞌn nzhak reꞌ.

34 Per or une rë men nzhin zeꞌ,

lëꞌ nu Jand nak men Israel,

orzeꞌ tutsa kwaꞌn midiꞌzh rë bixaꞌ,

seꞌ nguruzhië bixaꞌ pas chop or:

―¡Dox nazhon naxnax Diana cheꞌn men yezh Efeso!

35 Per haxta xaꞌ nak sekretar mileꞌ ngulëz nguruzhië men,

nzhab sekretar:

―Bin goi men Efeso,

rë men yizhyuo nane,

lëꞌ yezh Efeso nikina yadoꞌ cheꞌn naxnax Diana,

me dox nazhon,

mbaino winab cheꞌn Diana kwaꞌn ngulali yibëꞌ.

36 Nal,

rë be nane,

kureꞌ walika.

Bilaꞌ go,

naleꞌtraꞌ go nazheꞌb,

mbaino biwiꞌ go kwan leꞌu,

par naleꞌu tu kwaꞌn nayen.

37 ¿Chon nguzen go rop miyiꞌ reꞌ?

Yent ni tu kwaꞌn gat lëꞌ mileꞌ bixaꞌ leꞌn yadoꞌ cheꞌn be,

mbaino ni nangadiꞌzh bixaꞌ ni tu kwaꞌn nakap tich naxnax cheꞌn be.

38 No nal,

chi nzhakla Met,

kun rë xaꞌ nikë xaꞌ zhiꞌn kun lëꞌ,

yiꞌd bixaꞌ gake,

chi nzho tu kwaꞌn nak tu men,

lëꞌ rë yalao naxaꞌl ka,

no lëꞌ rë gustis nzhin ka,

nes par rubeꞌ cho nzhap dol.

39 No chi nzho xtu kwaꞌn nakiꞌn kuxkwaꞌ go,

nakiꞌn leꞌ goi xtu ngubizh,

per leꞌ goix nela xmod nidiꞌzhka ley cheꞌn be,

40 porke jwals gab gobier,

nzhap be dol por kwaꞌn ngok nalzhë reꞌ,

no orzeꞌ yent kwan gak diꞌzh be por kubaꞌ.

41 Or milox midiꞌzh sekretar kureꞌ,

orzeꞌ mileꞌ xaꞌ,

ña rë men.