Pab nzho yezh Corinto
18
Orzeꞌ nguroꞌ Pab yezh Atenas,
par ña xaꞌ yezh Corinto.
2 Zeꞌ mizhëꞌl xaꞌ tu miyiꞌ tu xaꞌ Israel xaꞌ lë Aquila,
tu xaꞌ nzë lazh men Ponto;
nzëꞌb ñëꞌd xaꞌ di Italia kun tsaꞌ xaꞌ unaꞌ lë Priscila,
porke lëꞌ rey ro Claudio mileꞌ mandad,
roꞌ rë men Israel kwaꞌn nzho yezh Roma.
Orzeꞌ ngwatswiꞌ Pab lo rop tsaꞌ xaꞌ reꞌ.
3 No lëꞌ zhiꞌn kwaꞌn nzhak Pab nizuxkwaꞌ xaꞌ yoꞌ yid,
no mis zhiꞌn ska reꞌ nileꞌ rop tsaꞌ xaꞌ reꞌ,
kuzeꞌ junt nkë bixaꞌ zhiꞌn.
4 No kad ngubizh kwaꞌn nileꞌ men Israel diskans,
ñaluꞌ Pab widiꞌzh cheꞌn Dios por Jesukrist leꞌn yoꞌ plo nitseꞌd bixaꞌ widiꞌzh cheꞌn Dios,
par la Pab yek bixaꞌ yila bixaꞌi,
no nzho men ngwayila kwaꞌn miluꞌ Pab,
men Israel no men grieg.
5 Or nguroꞌ Silas kun Timoteo yezh Macedonia,
par zhin bixaꞌ yezh Corinto,
orzeꞌse nguzublo Pab,
zilitaꞌ niluꞌ Pab widiꞌzh cheꞌn Dios lo rë men Israel,
nidiꞌzh Pab:
“Lëꞌ Jesús nak Krist,
Me kwaꞌn más tsak lo rë xaꞌ kwaꞌn mixëꞌl Dios xid rë men Israel.”
6 Per mileꞌ rë men Israel zeꞌ nakap lo Pab,
mbaino nde bixaꞌ Pab,
orzeꞌ nguzhib Pab xab Pab nela tu señ gaꞌ ke nzëꞌb xki rë xaꞌ zeꞌ lo Dios,
orzeꞌ nzhab Pab:
―Lëꞌo lox lo Dios,
mis go nzhap dol por kubaꞌ.
No nal,
lëꞌda yalu widiꞌzh cheꞌn Dios por Jesukrist lo xtu ben men,
xaꞌ gat lëꞌt men Israel.
7 Orzeꞌ nguroꞌ Pab leꞌn yoꞌ zeꞌ,
no ngwa xaꞌ lizh tu xaꞌ lë Ticio Justo,
tu xaꞌ nzhon roꞌ Dios,
no lizh xaꞌ zeꞌ nzob gax taꞌ yoꞌ plo nitseꞌd men Israel widiꞌzh cheꞌn Dios.
8 No Crispo,
xaꞌ kwaꞌn nileꞌ mandad leꞌn yoꞌ plo nitseꞌd men Israel widiꞌzh cheꞌn Dios;
nu xaꞌ ngwayila widiꞌzh cheꞌn Dios por Jesukrist,
kun dub lizh xaꞌ.
Mbaino nu pla rë men Corinto ngwayilai,
or mbin bixaꞌ widiꞌzh reꞌ,
ngoklëiꞌ rë bixaꞌ leꞌn nits.
9 No tu yëꞌl,
ngurulo Jesukrist lo Pab,
nzhab Me:
―Pab,
nazhebtal;
bidiꞌzh xtizha zilitaꞌ,
natsaoꞌtal roꞌl;
10 porke na nzo kun lu,
yent cho gak galal,
porke dox men kinun yezh reꞌ.
11 Kuzeꞌ miaꞌn Pab tu liꞌn garol yezh Corinto zeꞌ,
par miluꞌ xaꞌ widiꞌzh cheꞌn Dios xid rë men zeꞌ.
12 Per or ngok Galión gobiernador lazh men Acaya,
orzeꞌ tutsa midiꞌzh nayax men Israel,
par mbiyꞌ bixaꞌ Pab yalao plo nzob gobiernador Galión.
13 Orzeꞌ nzhab bixaꞌ lo Galión:
―Miyiꞌ reꞌ kikiꞌl men par zubi men lo Dios xtu mod,
per gat lëꞌt nela xmod nzob lo ley cheꞌn noi.
14 Laore nzhakla Pab ngadiꞌzh Pab tu kwaꞌn,
lëꞌchi nkab Galión lo rë men Israel zeꞌ,
nzhab xaꞌ:
―Chi mileꞌ xaꞌ reꞌ tu kwaꞌn gat lëꞌ,
o mileꞌ xaꞌ tu kwaꞌn nazheꞌb dox,
orzeꞌse gak diꞌzh go rë kwaꞌn nzhakla go,
mblëgo men Israel;
15 per go,
dox rë kwaꞌn kinabdiꞌzh go por rë kwaꞌn miluꞌ rë xpen go,
kwent cheꞌn cho paꞌ ngok rë men cheꞌn go,
mbaino kwent cheꞌn rë kwaꞌn nzobniꞌ lo ley cheꞌn go.
Kuzeꞌ,
go wane kuxkwaꞌ go kubaꞌ,
porke na,
gat lëꞌt kwent da kubaꞌ,
par len yalgustis.
16 Orzeꞌ ngulutin Galión rë bixaꞌ leꞌn yalao.
17 Orzeꞌ nguzen rë men zeꞌ Sóstenes,
xaꞌ nileꞌ mandad leꞌn yoꞌ plo nitseꞌd rë men Israel widiꞌzh cheꞌn Dios,
par mizaꞌ bixaꞌ laoꞌ Sóstenes,
roꞌ yalao lo Galión,
no per ni kas nangaleꞌt Galión kureꞌ.
Nguiubre Pab yezh Antioquía
18 Per Pab miaꞌn pla raꞌ ngubizh yezh Corinto.
Orzeꞌ nzhab xaꞌ lo rë men cheꞌn Jesukrist:
“Lëꞌda ña xtu plo.”
Orzeꞌ nkë xaꞌ bark kun Priscila no kun Aquila,
par nzha bixaꞌ rë yezh cheꞌn men Siria.
Orzeꞌ mizhin bark yezh Cencrea,
zeꞌ ngula Pab bark par mizhiꞌb yek xaꞌ,
par mileꞌ xaꞌ tu kwaꞌn miaꞌn xaꞌ diꞌzh lo Dios.
Orzeꞌ nkë xaꞌ bark xtu wëlt par nzha xaꞌ nez cheꞌn xaꞌ.
19 No or mizhin bark yezh Efeso,
zeꞌ milëꞌ Pab kun Priscila no kun Aquila,
orzeꞌ ngwa xaꞌ leꞌn yoꞌ plo nitseꞌd men Israel widiꞌzh cheꞌn Dios.
Zeꞌ midiꞌzh xaꞌ lo rë men Israel kwaꞌn nibin zeꞌ par ngala Pab yek bixaꞌ,
par gon bixaꞌ widiꞌzh cheꞌn Dios por Jesukrist.
20 No dox ngokla bixaꞌ ngayaꞌn Pab xche kun lëꞌ bixaꞌ zeꞌ,
per nangaziyëlt Pab,
21 sino ke ña Pab,
no nzhab Pab:
―Lëꞌda nzha lani kwaꞌn mer gal yezh Jerusalén,
per chi ziyël Dios,
lëꞌda yubre ska reꞌ xtu wëlt.
Orzeꞌ nkë xaꞌ bark xtu wëlt,
nguroꞌ xaꞌ yezh Efeso.
22 Or mizhin Pab yezh Cesarea,
orzeꞌ ngwatswiꞌ xaꞌ ma rë men cheꞌn Jesukrist kwaꞌn nzho zeꞌ.
Orzeꞌ nguzen xaꞌ nez xtu wëlt par yezh Antioquía,
kwaꞌn ñaꞌn lazh men Siria.
23 No pla raꞌ ngubizh miaꞌn Pab yezh Antioquía,
orzeꞌ ngwa xaꞌ xtu wëlt pla raꞌ yezh kwaꞌn nzhin lazh men Galacia no lazh men Frigia,
par ngwadiꞌzh Pab lo rë men cheꞌn Jesukrist rë xaꞌ nzho zeꞌ,
par más mixoꞌb yek bixaꞌ Dios.
Miluꞌ Pol widiꞌzh cheꞌn Dios por Jesukrist yezh Efeso
24 Leꞌn rë ngubizh zeꞌ,
mizhin tu men Israel xaꞌ lë Pol yezh Efeso.
Xaꞌ reꞌ ngol yezh Alejandría,
dox nix nidiꞌzh xaꞌ par la xaꞌ yek men,
mbaino dox nzhak xaꞌ widiꞌzh cheꞌn Dios.
25 Xaꞌ reꞌ nilibeꞌ la cheꞌp widiꞌzh cheꞌn Dios por Jesukrist,
no dubla xaꞌ nidiꞌzh xaꞌi,
mbaino lëꞌtsa lëꞌ widiꞌzh cheꞌn Jesukrist niluꞌ xaꞌ or nidiꞌzh xaꞌ lo rë men,
no ter nab tsa xmod mililëiꞌ Juan men kun nits,
nane xaꞌ.
26 No yent kwan nizheb xaꞌ,
nguzublo kidiꞌzh xaꞌ widiꞌzh cheꞌn Dios,
leꞌn yoꞌ plo nitseꞌd men Israel widiꞌzh cheꞌn Dios.
Per or mbin Priscila kun tsaꞌ xaꞌ Aquila xmod kidiꞌzh xaꞌ reꞌ,
orzeꞌ mbiyꞌ bixaꞌ Pol tu lad,
par miluꞌ bixaꞌ más widiꞌzh cheꞌn Dios por Jesukrist nela xmod nzhakla Dios.
27 No or ngokla Pol ya Pol par lazh men Acaya,
orzeꞌ mixëꞌl men cheꞌn Jesukrist xaꞌ nzho yezh Efeso,
tu yech par luꞌ Pol lo más rë men cheꞌn Jesukrist,
xaꞌ nzho lazh men Acaya,
par wiꞌ bixaꞌ wen lo Pol or zhin Pol zeꞌ.
No or mizhin Pol zeꞌ,
dox ngoknu Pol rë men cheꞌn Jesukrist xaꞌ nzho zeꞌ,
par más mixoꞌbyek bixaꞌ Dios,
rë xaꞌ kwaꞌn ngwayila widiꞌzh cheꞌn Dios por nilats laxtoꞌ Dios bixaꞌ.
28 Seꞌ mileꞌ Pol,
porke lo nayax men,
dox naye midiꞌzh Pol,
mileꞌ Pol gan une rë nak men Israel kwaꞌn michëlroꞌ xaꞌ kun lëꞌ,
lëꞌ Jesús walika nak Krist,
nela xmod nzobniꞌ lo Yech cheꞌn Dios.