Miyiꞌxian men Tesalónica
17
No or nded Pab kun Silas yezh Anfípolis kun yezh Apolonia,
orzeꞌ mizhin bixaꞌ yezh Tesalónica.
Leꞌn yezh zeꞌ nzob tu yoꞌ plo nitseꞌd men Israel widiꞌzh cheꞌn Dios.
2 No ngwa Pab leꞌn yoꞌ zeꞌ nela xmod nileꞌ ka xaꞌ,
chon sabd ngwa xaꞌ gazob sman,
no michëlroꞌ xaꞌ por widiꞌzh cheꞌn Dios kun rë xaꞌ nibin zeꞌ.
3 No miluꞌ Pab lo rë men zeꞌ,
nzhab xaꞌ lëꞌ Jesukrist nakiꞌn zakzi,
mbaino gat,
per ngubizh yon,
lëꞌ Jesukrist ruban,
porke seꞌ nzobniꞌ lo Yech cheꞌn Dios.
No nzhab Pab lo rë men zeꞌ:
―Jesús Me kidizha lo go reꞌ,
nak Krist Me mixëꞌl Dios.
4 No pla raꞌ xaꞌ reꞌ ngwayilai,
no nguio bixaꞌ xlad Pab kun Silas.
No nu tu bëd men grieg kwaꞌn nzhon roꞌ Dios,
no kun pla raꞌ unaꞌ kwaꞌn tsak yezh zeꞌ,
nu bixaꞌ nguzhin kun Pab no kun Silas.
5 Per rë men Israel kwaꞌn gat ñilat widiꞌzh cheꞌn Dios por Jesukrist,
dox niyiꞌxian bixaꞌ,
nine bixaꞌ Pab kun Silas,
orzeꞌ mikan bixaꞌ pla rë xaꞌ minu la xmod nak,
par chëldil bixaꞌ Pab kun rë men yezh zeꞌ.
Orzeꞌ jwers nguio bixaꞌ lizh tu xaꞌ lë Jasón,
ngwakwaꞌn bixaꞌ Pab kun Silas,
par chi bixaꞌ rop rë xaꞌ reꞌ lo rë men yezh zeꞌ par zakzi men rë xaꞌ reꞌ.
6 No por nangagaꞌ Pab kun Silas yaꞌ bixaꞌ,
orzeꞌ mizubxax bixaꞌ Jasón kun zipla rë men cheꞌn Jesukrist kwaꞌn nzho zeꞌ,
par michi bixaꞌ rë xaꞌ reꞌ lo gustis kwaꞌn nileꞌ mandad yezh zeꞌ,
orzeꞌ naye kibizhië bixaꞌ,
nzhab bixaꞌ:
―¡Lëꞌ rë miyiꞌ reꞌ kwaꞌn nikizë rë plo,
kileꞌ bixaꞌ par nagon men roꞌ gubier!
¡No nal,
nu lazh be kileꞌ bixaꞌi!
7 No Jasón ngurezh bixaꞌ lizh Jasón.
¡Rë xaꞌ reꞌ kichil ley cheꞌn César,
porke kidiꞌzh bixaꞌ nzho xtu rey xaꞌ lë Jesús!
8 Or mbin rë men widiꞌzh reꞌ kun rë gustis xaꞌ nzhin zeꞌ,
dox gat lëꞌt mizi men,
mizheb bixaꞌ.
9 Orzeꞌ mileꞌ rë gustis ndix Jasón tu mult,
kun rë xaꞌ nichëꞌl xaꞌ,
par ngok ña bixaꞌ.
Pab kun Silas mizhin yezh Berea
10 Lwegaꞌ,
or yëꞌl zeꞌ,
rë men cheꞌn Jesukrist kwaꞌn nzho yezh zeꞌ,
mixëꞌl bixaꞌ Pab kun Silas,
par yezh Berea lo mis orzeꞌ.
No or mizhin Pab kun Silas yezh zeꞌ,
nguio bixaꞌ leꞌn yoꞌ plo nitseꞌd rë men Israel widiꞌzh cheꞌn Dios.
11 No rë men Israel kwaꞌn nzho yezh zeꞌ,
más naxaꞌl yek bixaꞌ,
ke rë men Tesalónica.
Dub la bixaꞌ nzhon bixaꞌ widiꞌzh cheꞌn Dios kwaꞌn niluꞌ Pab,
no zilitaꞌ nzhoꞌl bixaꞌ kwaꞌn nzobniꞌ lo Yech cheꞌn Dios,
par ne bixaꞌ chi walika nzobniꞌ kwaꞌn nidiꞌzh Pab.
12 Kuzeꞌ,
nayax bixaꞌ ngwayilai,
no nayax rë unaꞌ grieg xaꞌ tsak,
no nu tu bëd miyiꞌ ngwayilai.
13 Per or mbin rë men Israel kwaꞌn nzho yezh Tesalónica,
lëꞌ Pab kun Silas kiluꞌ widiꞌzh cheꞌn Dios por Jesukrist yezh Berea,
orzeꞌ lwegaꞌ micheb bixaꞌ rë men yezh zeꞌ.
14 Per rë men cheꞌn Jesukrist xaꞌ nzho zeꞌ,
lwegaꞌ mixëꞌl bixaꞌ Pab,
par roꞌ nitsdoꞌ,
no lëꞌ Silas kun Timoteo,
miaꞌn bixaꞌ zeꞌ.
15 No rë men xaꞌ nkina Pab,
ngulunez bixaꞌ Pab haxta yezh Atenas.
Orzeꞌ nguiubre ska bixaꞌ par mbiꞌdyab bixaꞌ kwaꞌn nzhab Pab,
par ya Silas kun Timoteo lwegaꞌ plo kimbëz Pab.
Mizhin Pab yezh Atenas
16 No dub kimbëz Pab or zhin Silas kun Timoteo yezh Atenas zeꞌ,
dox miwin laxtoꞌ Pab or une Pab,
lëꞌ rë men yezh zeꞌ,
dox ñakë bixaꞌ tich rë winab,
no nazhiꞌ bixaꞌi.
17 Kuzeꞌ midiꞌzhnu Pab rë men Israel mbaino rë men grieg xaꞌ nzhon roꞌ Dios plo nitseꞌd bixaꞌ widiꞌzh cheꞌn Dios;
mbaino seꞌska,
zilitaꞌ midiꞌzhnu Pab rë men plo nzhin xbiꞌ.
18 Zeꞌ midiꞌzhnu Pab pla maestr cheꞌn men epikúrio xaꞌ niluꞌ,
ngulen yizhyuo nabe,
mbaino gak ban men xmod nzhakla men,
no pla maestr cheꞌn estóiko xaꞌ niluꞌ,
nazakt laxtoꞌ men no ni nawin laxtoꞌ men kwaꞌdox,
mbaino xek men lo rë kwaꞌn nizak men.
Rë xaꞌ reꞌ michëlroꞌ kun Pab.
Tu ben xaꞌ nzhab:
―¿Kwan paꞌ dox kidiꞌzh xaꞌ reꞌ?
Kiluꞌ xaꞌ kwaꞌn pas ni lëꞌ xaꞌ nanet.
Mbaino xtu ben xaꞌ nzhab:
―Xaꞌ reꞌ kiluꞌ kwent cheꞌn rë dios kwaꞌn gat nakbeꞌt.
Seꞌ kidiꞌzh bixaꞌ,
porke lëꞌ Pab kiluꞌ widiꞌzh wen cheꞌn Jesukrist,
mbaino xmod nguruban Me.
19 Orzeꞌ mbiyꞌ bixaꞌ Pab tu lad plo lë Areópago.
Zeꞌ nzob tu yoꞌ nela yalao gaꞌ,
orzeꞌ nzhab bixaꞌ lo Pab:
―¿Chi zak diꞌzhal lo no,
rë kwaꞌn kub kwaꞌn kiluꞌl baꞌ?,
20 porke nel lo no,
rë kwaꞌn nanet no kwan,
no nzhakla no gon no kwane.
21 Seꞌ nzhab bixaꞌ lo Pab,
porke rë men yezh Atenas kun rë xaꞌ zit kwaꞌn nzho zeꞌ,
dox ño laxtoꞌ bixaꞌ,
diꞌzh bixaꞌ o gon bixaꞌ tu kwaꞌn laore nzhak.
22 Orzeꞌ ngwatsuli Pab xid rë xaꞌ nzhin zeꞌ,
nzhab Pab:
―Rë go men Atenas,
bin go widiꞌzh reꞌ.
Niwiꞌn xmod nak go,
nazhiꞌ go rë winab cheꞌn go,
como nela tu dios gaꞌ.
23 No or nikizëꞌn leꞌn yezh reꞌ,
unen nayax plo kinu go,
nileꞌ go lani par winab cheꞌn go,
no xid rë kureꞌ,
unen nzobniꞌ widiꞌzh reꞌ:
“Kureꞌ tu dios Me gat nakbeꞌt.”
No nal,
Dios Me gat nilibeꞌt go nidiꞌzh go nak dios cheꞌn go,
mbaino Dios reꞌ kidizha lo go nal reꞌ.
24 ’Dios reꞌ mizuxkwaꞌ dub yizhyuo,
kun rë kwaꞌn nzhin loi.
No Dios reꞌ nileꞌ mandad lo yibëꞌ mbaino lo yuo;
no gat nzhot Dios reꞌ leꞌn yadoꞌ kwaꞌn nizuxkwaꞌ men.
25 Lëꞌ Dios reꞌ gat nakiꞌn leꞌ men ni tu kwaꞌn,
par gaknu men Dios,
sino ke Dios reꞌ nizaꞌ yalnaban kaꞌ rë men,
nikina Dios men,
mbaino nizaꞌ Dios rë kwaꞌn par men.
26 ’No kun tutsa miyiꞌ mileꞌ Dios miar xaꞌ yizhyuo reꞌ,
par mireꞌch men rë plo;
no ngulo Dios tiemp par yo kad ben men,
mbaino plo ban bixaꞌ.
27 Kureꞌ mileꞌ Dios par kwaꞌn bixaꞌ Dios,
no ter nadiꞌb lo men,
lëꞌ men yazhël ka Dios.
No nzhapa segur,
gat zit nzo Dios lo kad be.
28 No por yalnazhon cheꞌn Dios naban be,
mbaino nizë be,
no nzhin be yizhyuo reꞌ,
como lëꞌla midiꞌzh ka pla rë xaꞌ kwaꞌn nzhak nizuxkwaꞌ diꞌzh chul xid go,
midiꞌzh bixaꞌ:
“Lëꞌ be nzë ben cheꞌn Dios.”
29 No chi lëꞌ be nzë ben cheꞌn Dios,
gat ñalt leꞌ be xigab,
lëꞌ Dios nak nela rë winab kwaꞌn nizuxkwaꞌ men kun or,
no kun plat,
o kun ya,
o kun ke,
nela xmod nzë yek bixaꞌ.
30 Per Dios nangaleꞌt kas rë kwaꞌn nileꞌ men,
rë tiemp kwaꞌn nangaleꞌ men kwaꞌn wen,
por nagane men cho Dios.
Per nal,
mileꞌ Dios mandad lo rë nak men yizhyuo rë plo,
laꞌ bixaꞌ rë kwaꞌn nakap kileꞌ bixaꞌ lo Dios,
par leꞌ bixaꞌ kwaꞌn wen lo Dios,
31 porke kinu Dios tu ngubizh,
lëꞌ Jesukrist gab xmod gak kun kad men,
por kwaꞌn nileꞌ xaꞌ,
wanei choi.
Mileꞌ Dios nguruban Jesukrist,
par ne be,
lëꞌ nab Jesukrist nileꞌ mandad lo rë kwaꞌn nzho.
32 Or mbin rë men nzhin zeꞌ,
lëꞌ Jesukrist nguruban,
nzho xaꞌ mixizhnu Pab no nzho xaꞌ nzhab lo Pab:
―Baꞌ poktaꞌ nel kureꞌ lo no xtu wëlt.