6 No nangaziyëlt Sprit cheꞌn Dios ngaluꞌ bixaꞌ widiꞌzh cheꞌn Dios rë yezh kwaꞌn ñaꞌn lazh men Frigia,

no rë yezh kwaꞌn ñaꞌn lazh men Galacia mbaino lazh men Asia.

7 No or mizhin bixaꞌ gax plo nak lazh men Misia,

no mileꞌ bixaꞌ xigab,

nga bixaꞌ rë yezh kwaꞌn ñaꞌn lazh men Bitinia,

per nangaziyëlt Sprit cheꞌn Dios nga bixaꞌ.

8 Kuzeꞌ ndedkaꞌn bixaꞌ namás lazh men Misia,

par mizhin bixaꞌ yezh Troas.

9 Zeꞌ une Pab leꞌn mikaꞌl,

tu miyiꞌ yezh Macedonia,

nzuli xaꞌ,

dox kinaꞌb xaꞌ lo Pab,

nzhab xaꞌ:

“Guded par lazh men Macedonia reꞌ par gaknul no.”

10 Riyëꞌl xtu ngubizh or une Pab kureꞌ,

lwegaꞌ nzha no par lazh men Macedonia,

porke nane ka no,

lëꞌ Dios ngurezh no baꞌ,

par yayab no widiꞌzh cheꞌn Dios por Jesukrist lo rë men zeꞌ.

11 Nkë no bark yezh Troas zeꞌ,

par nzha no nali laka tu yezh kwaꞌn lë Samotracia,

kwaꞌn nzhin tsaoꞌ nitsdoꞌ,

no xtu riyëꞌl,

mizhin no yezh Neápolis.

12 No zeꞌ ngwa no par yezh Filipos,

tu yezh kwaꞌn más kwaꞌro,

kwaꞌn nzhin lazh men Macedonia,

mbaino men Roma michaoꞌwe.

No pla raꞌ ngubizh miaꞌn no zeꞌ.

13 No tu zhë Sabd kwaꞌn nileꞌ men diskans,

nguroꞌ no roꞌ yezh zeꞌ par ngwa no roꞌ tu youꞌ plo ninaꞌb xaꞌ lo Dios.

Zeꞌ nguzob no par midiꞌzh no lo pla unaꞌ kwaꞌn nzhin zeꞌ.

14 Xid rë unaꞌ reꞌ nzho tu unaꞌ kwaꞌn lë Lidia,

xaꞌ nzë yezh Tiatira,

tu unaꞌ xaꞌ nito lar morad kwaꞌn tsak dox.

Unaꞌ reꞌ nzhon roꞌ Dios.

No mixaꞌl Dios laxtoꞌ unaꞌ,

mizob yek unaꞌ kwaꞌn midiꞌzh Pab por Jesukrist.

15 Orzeꞌ ngoklëiꞌ unaꞌ kun rë xaꞌ lizh unaꞌ,

mbaino minaꞌb unaꞌ lo no,

ne unaꞌ:

―Chi walika nigobeꞌ go nak da tu men cheꞌn Jesukrist,

chaꞌ go ña be lizha par yaꞌn go.

No mileꞌ unaꞌ miaꞌn no lizh unaꞌ.

16 No tu wëlt,

dub nzha no plo ninaꞌb men lo Dios,

lëꞌchi zhiꞌn mileꞌ tu unaꞌ nileꞌ divín,

mbiꞌdchël-lo unaꞌ no.

Unaꞌ reꞌ por poder cheꞌn Mizhab,

nileꞌ xaꞌ kureꞌ,

no dox nileꞌ xaꞌ gan dimi,

por rë xaꞌ nak xaꞌ mos lo.

17 Orzeꞌ nzadkë unaꞌ reꞌ tich no plo nzha no kun Pab,

mbaino tich no,

naye kibizhië unaꞌ lo men,

nzhab unaꞌ:

―¡Lëꞌ rë miyiꞌ reꞌ nak rë men cheꞌn Dios,

Me kwaꞌn nileꞌ mandad dub yizhyuo,

no niluꞌ rë miyiꞌ reꞌ xmod nigoꞌ Dios men lo rë kwaꞌn nzëꞌb xki men!

18 No nayax ngubizh mileꞌ unaꞌ kureꞌ,

haxta ke miyiꞌxian Pab por kureꞌ,

orzeꞌ miëk Pab nzhab Pab lo mbi mal kwaꞌn nzho laxtoꞌ unaꞌ reꞌ:

―¡Por lë Jesukrist kilen mandad,

guroꞌ laxtoꞌ unaꞌ reꞌ!

No mis orzeꞌ,

lwegaꞌ nguroꞌ mbi zeꞌ.

19 Per or une rë xaꞌ kwaꞌn nileꞌ mandad unaꞌ reꞌ,

nagaktraꞌ leꞌ bixaꞌ gan dimi por lëꞌ unaꞌ,

porke ngulëz nileꞌ unaꞌ divín,

orzeꞌ nguzen bixaꞌ Pab kun Silas,

mizubxax bixaꞌ rë xaꞌ reꞌ haxta plo nak xbiꞌ,

par ngwalaꞌ bixaꞌ Pab kun Silas lo gustis.

20 No or michi bixaꞌ Pab kun Silas lo gustis,

orzeꞌ nzhab bixaꞌ:

―Lëꞌ rë miyiꞌ reꞌ,

xaꞌ nak men Israel,

dox kichëldil bixaꞌ men lazh be,

21 kidiꞌzh bixaꞌ leꞌ rë men lazh be xtu rë kostumbr kwaꞌn gat ñalt leꞌ be,

porke lëꞌ be men Roma.

22 Orzeꞌ rë men niyiꞌ lo Pab no lo Silas.

Orzeꞌ jwers nguloꞌ rë gustis xab Pab no xab Silas,

orzeꞌ mileꞌ bixaꞌ mandad ngurële tich rë xaꞌ reꞌ.

23 No dispwés di ngurële tich bixaꞌ,

orzeꞌ ngulo bixaꞌ rop xaꞌ reꞌ lizhyiꞌb,

no nzhab rë gustis lo xaꞌ nikina lizhyiꞌb:

“¡Naye bitsaoꞌyoꞌ go rop xaꞌ reꞌ!”

24 Or mbin xaꞌ nikina lizhyiꞌb kureꞌ;

ngwalaꞌ xaꞌ Pab kun Silas más al xan,

orzeꞌ ngulo xaꞌ niꞌ Pab no niꞌ Silas leꞌn tu ya nzob yeꞌr.

25 No pas como garol yëꞌl,

kinaꞌb Pab kun Silas lo Dios,

no kikëꞌ bixaꞌ kant por tanta nazhon Dios,

no nu más rë xaꞌ nzho lizhyiꞌb zeꞌ kiyone.

26 Lëꞌchi dox tu xo ro miwin,

no dub lizhyiꞌb nguzhibe,

haxta rë simient cheꞌne.

Orzeꞌ lwegaꞌ mixaꞌl rë pwert,

no rë kaden kwaꞌn naliꞌb rë men xaꞌ nzho lizhyiꞌb,

mixëk.

27 No or nguroꞌ mikaꞌl lo xaꞌ nikina lizhyiꞌb reꞌ,

une xaꞌ naxaꞌl rë nak pwert roꞌ lizhyiꞌb,

orzeꞌ nguloꞌ xaꞌ spad cheꞌn xaꞌ par gut yub xaꞌ xaꞌ,

porke mileꞌ xaꞌ xigab:

“Rë nak rë xaꞌ reꞌ,

mikëꞌ karre.”

28 Orzeꞌ naye midiꞌzh Pab lo xaꞌ,

nzhab Pab:

―¡Naleꞌtal ni tu kwaꞌn gat lëꞌ,

porke rë no nzhin ka reꞌ!

29 Orzeꞌ gunaꞌb xaꞌ nikina lizhyiꞌb reꞌ tu biani,

orzeꞌ karre nguio xaꞌ,

no dub nixiz xaꞌ di yalzheꞌb,

nguzuxib xaꞌ lo Pab no lo Silas,

30 orzeꞌ nguloꞌ xaꞌ Pab kun Silas,

no nzhab xaꞌ:

―Lëꞌo,

¿kwan nakiꞌn len par cheꞌ Dios rë kwaꞌn nzëꞌbxkin lo Dios?

31 Orzeꞌ nzhab Pab kun Silas:

―Wayila Señor Jesukrist,

par cheꞌ Dios rë kwaꞌn nzëꞌb xkil,

no rë kwaꞌn nzëꞌb xki rë xaꞌ lizhal lo Dios.

32 Orzeꞌ miluꞌ bixaꞌ widiꞌzh cheꞌn Dios por Jesukrist lo xaꞌ nikina lizhyiꞌb reꞌ,

mbaino lo rë xaꞌ lizh xaꞌ.

33 No mis yëꞌl zeꞌ,

mbiyꞌ xaꞌ nikina lizhyiꞌb reꞌ,

Pab kun Silas,

par mizët xaꞌ plo miweꞌ rë xaꞌ reꞌ,

orzeꞌ ngoklëiꞌ xaꞌ nikina lizhyiꞌb reꞌ,

kun rë xaꞌ lizh xaꞌ.

34 Orzeꞌ mbiyꞌ xaꞌ Pab kun Silas al lizh xaꞌ,

no mizaꞌ xaꞌ kwaꞌn ndao rë xaꞌ reꞌ.

No dox nizak laxtoꞌ xaꞌ kun rë xaꞌ lizh xaꞌ,

por ngwayila bixaꞌ Dios.

35 Xtu riyëꞌl,

mixëꞌl rë gustis pla xpen xaꞌ,

lo xaꞌ nikina lizhyiꞌb zeꞌ,

par liyaꞌ xaꞌ Pab kun Silas,

36 orzeꞌ nzhab xaꞌ nikina lizhyiꞌb reꞌ lo Pab no lo Silas:

―Lëꞌ rë gustis,

mixëꞌl pla xpen bixaꞌ lon,

par liyan go,

nal gak bi go,

yentraꞌ kwan nak kun go.

37 Per nzhab Pab lo rë xpen gustis:

―No nak men Roma,

porke ñal ngawiꞌ bixaꞌ chi walika kinu no dol,

lëꞌla michël bixaꞌi tich no lo rë men,

ngulo xaꞌ no lizhyiꞌb.

No nal,

¿koꞌ xaꞌ no xlaꞌn nzhakla xaꞌ?

Per nagakte.

Mejor yiꞌd yub bixaꞌ,

par liyaꞌ bixaꞌ no.

38 No or mbin rë gustis kureꞌ,

lëꞌ Pab no lëꞌ Silas men Roma,

orzeꞌ dox mizheb bixaꞌ.

39 Orzeꞌ ngwa rë gustis lo Pab no lo Silas,

par ngwatsiyal bixaꞌ laxtoꞌ rë xaꞌ reꞌ,

orzeꞌ miliyaꞌ bixaꞌ Pab no Silas,

no nzhab rë gustis:

“Bizë go,

no guroꞌ go yezh reꞌ.”

40 No or nguroꞌ bixaꞌ lizhyiꞌb,

ña bixaꞌ lizh Lidia.

No rë men cheꞌn Jesukrist kwaꞌn nzhin zeꞌ,

midiꞌzhnu Pab bixaꞌ kun Silas,

par más mixubla bixaꞌ Dios.

Orzeꞌ nkaꞌ Pab nez,

ña xaꞌ kun Silas xtu plo.