―Chi lëꞌ kwerp cheꞌn rë miyiꞌ nakë señ kwaꞌn lë circuncisión nela xmod nzobniꞌ lo ley kwaꞌn milaꞌ Dios lo Muisés,

nazubchit Dios rë kwaꞌn nzëꞌb xki go lo Dios.

2 Or mbin Pab kun Bernabé kureꞌ,

dox michëlroꞌ bixaꞌ kun rë miyiꞌ zeꞌ.

Orzeꞌ mizo rë men cheꞌn Jesukrist Pab kun Bernabé,

no kun zipla men,

par ya bixaꞌ yezh Jerusalén,

yadiꞌzh bixaꞌ kureꞌ lo rë apost no lo rë xaꞌ nzo lo rë men cheꞌn Jesukrist,

xaꞌ nzho yezh Jerusalén.

3 No dub nzha bixaꞌ nez kun más rë men cheꞌn Jesukrist,

nded bixaꞌ rë yezh kwaꞌn ñaꞌn lazh men Fenicia no rë yezh kwaꞌn ñaꞌn lazh men Samaria,

no dub rë zeꞌ midiꞌzh bixaꞌ lo rë men cheꞌn Jesukrist,

nzhab bixaꞌ:

―Nu nayax men gat lëꞌt men Israel,

milaꞌ bixaꞌ rë kwaꞌn nazuꞌt,

rë kwaꞌn ñila bixaꞌ,

par ngwayila bixaꞌ widiꞌzh cheꞌn Dios por Jesukrist.

Orzeꞌ dox nizak laxtoꞌ rë men cheꞌn Jesukrist mbin kureꞌ.

4 No or mizhin Pab kun Bernabé yezh Jerusalén,

orzeꞌ rë apost kun rë xaꞌ nzo lo rë men cheꞌn Jesukrist,

kun más rë men cheꞌn Jesukrist xaꞌ nzhin zeꞌ;

dox wen miwiꞌ bixaꞌ lo rë xaꞌ reꞌ,

orzeꞌ mizaꞌ Pab kwent kun Bernabé,

rë kwaꞌn mileꞌ Dios por lëꞌ bixaꞌ.

5 Per ngwatsuli pla men fariseo kwaꞌn ñila widiꞌzh cheꞌn Dios por Jesukrist,

par nzhab bixaꞌ lo rë nak xaꞌ nzhin zeꞌ:

―Nakiꞌn kë señ kwaꞌn lë circuncisión kwerp cheꞌn rë men cheꞌn Jesukrist,

rë xaꞌ kwaꞌn gat lëꞌt men Israel,

xaꞌ miyiꞌ,

mbaino rë men cheꞌn Jesukrist nakiꞌn leꞌ rë kwaꞌn nzobniꞌ lo ley kwaꞌn milaꞌ Dios lo Muisés.

6 Orzeꞌ migan rë apost kun rë xaꞌ nzo lo rë men cheꞌn Jesukrist,

par leꞌ bixaꞌ xigab xmod gak rë kureꞌ.

7 No guzhël-la di michëlroꞌ bixaꞌ por kureꞌ,

lëꞌchi ngwatsuli Per,

nzhab Per lo rë men zeꞌ:

―Biwiꞌ go wech,

lëꞌ go nane,

dizde nzhala ngule Dios da xid go,

par lun widiꞌzh nazhon cheꞌn Dios por Jesukrist lo rë men xaꞌ gat lëꞌt men Israel,

par nu bixaꞌ yilai.

8 Lëꞌ Dios,

Me nilibeꞌ laxtoꞌ rë men,

lëꞌ Me miluꞌ ke nu bixaꞌ niwiꞌ Dios wen lo,

nizaꞌ Dios Sprit cheꞌn Dios yo laxtoꞌ bixaꞌ,

nela xmod mineꞌ Dios Sprit cheꞌn Dios nguio laxtoꞌ be.

9 Tutsa mod nileꞌ Dios kun be,

no kun rë men xaꞌ gat lëꞌt men Israel,

porke nitsumbe Dios laxtoꞌ rë men,

xaꞌ ñila widiꞌzh cheꞌn Dios por Jesukrist.

10 No nal,

¿chon kikixian go Dios?

¿Chon kileꞌ go,

par leꞌ rë men cheꞌn Jesukrist rë kwaꞌn nzobniꞌ ley,

kwaꞌn milaꞌ Dios lo Muisés,

no per ni rë xuz be xaꞌ tiemp nangakt ngaleꞌi;

mbaino ni be?

11 Per be,

men Israel,

ñila be,

namás por wen laxtoꞌ Señor Jesukrist,

mizubchi Me rë kwaꞌn nzëꞌb xki be lo Dios.

Seꞌska nileꞌ Dios kun rë men,

xaꞌ gat lëꞌt men Israel,

chi lëꞌ bixaꞌ yila Jesukrist.

12 No or midiꞌzh Per kureꞌ,

xe nguzhin men,

mbin bixaꞌi.

Orzeꞌ midiꞌzh Bernabé kun Pab xmod mileꞌ Dios rë kwaꞌn nazhon no rë kwaꞌn mileꞌ ñaꞌn xe men.

Mileꞌ Diose xid rë men gat lëꞌt men Israel por Pab no por Bernabé.

13 No or milox midiꞌzh bixaꞌ kureꞌ,

orzeꞌ nzhab Jakob:

―Wech,

bin go rë kwaꞌn ganin.

14 Midiꞌzh Simón Per lo be,

xmod dizde galo miwiꞌ Dios lo xtu ben xaꞌ gat lëꞌt men Israel,

par ngule Me cho gak men cheꞌn Me xid rë xaꞌ reꞌ,

15 nela xa mizobniꞌ ka rë profet,

rë xaꞌ midiꞌzh por Dios,

or mizobniꞌ bixaꞌ kureꞌ:

19 No nzhab Jakob:

―Kuzeꞌ,

nilen xigab:

Naleꞌt be zi rë men baꞌ gat lëꞌ,

rë xaꞌ gat lëꞌt men Israel,

rë xaꞌ ñila Dios.

20 Neka xëꞌl be tu yech lo bixaꞌ,

par nagao bixaꞌ rë kwaꞌn nixoꞌb lo gaim.

No gat ñalt kaꞌ bixaꞌ men gat lëꞌt tsaꞌ bixaꞌ,

no ni nagao bixaꞌ rë ma ngut nab,

nangaxot ren,

mbaino ni nagao bixaꞌ ren;

21 porke dizde nzhala,

rë yezh,

leꞌn rë yoꞌ plo nitseꞌd rë men Israel widiꞌzh cheꞌn Dios,

niluꞌ men ley kwaꞌn milaꞌ Dios lo Muisés,

rë zhë kwaꞌn nileꞌ men Israel diskans.

22 No widiꞌzh reꞌ,

nguio laxtoꞌ rë apost,

no rë xaꞌ nzo lo rë men cheꞌn Jesukrist,

kun más rë men cheꞌn Jesukrist kwaꞌn nzhin zeꞌ.

Orzeꞌ ngule bixaꞌ Judas Barsabás,

kun Silas,

par weiꞌ rë xaꞌ reꞌ,

Pab kun Bernabé,

par yezh Antioquía.

No Judas kun Silas,

dox menaye rë xaꞌ reꞌ,

xid rë men cheꞌn Jesukrist,

xaꞌ nzho yezh Jerusalén.

23 No mixëꞌl rë xaꞌ nzo lo rë men cheꞌn Jesukrist,

rë xaꞌ nzho yezh Jerusalén,

tu yech weiꞌ Pab no Bernabé;

seꞌ nzobniꞌ loi:

“No xaꞌ nak rë apost,

no kun rë wech be xaꞌ nak zhiꞌn,

no kun más rë wech be;

mixëꞌl no tu widiꞌzh wen par rë go,

wech,

xaꞌ gat lëꞌt men Israel,

xaꞌ nzho yezh Antioquía;

no par rë go,

xaꞌ nzho lazh men Siria,

mbaino par rë go,

xaꞌ nzho lazh men Cilicia.

Ne no lo rë go bizak laxtoꞌ go.

24 Mbin no,

nguroꞌ pla bixaꞌ lareꞌ,

mbaino gat lëꞌt no mixëꞌl bixaꞌ lo go,

mikixian bixaꞌ go por kwaꞌn ne bixaꞌ.

Miluꞌ bixaꞌ lo go,

nikiꞌn kë señ kwaꞌn lë circuncisión kwerp cheꞌn go,

nela xa nzobniꞌ ka lo ley kwaꞌn milaꞌ Dios lo Muisés,

mbaino ne bixaꞌ,

leꞌ go rë kwaꞌn nzhab ley zeꞌ.

25 Kuzeꞌ,

miaꞌn no tutsa,

ngule no pla xaꞌ mileꞌ kumpañ rop wech nazhiꞌ be reꞌ,

Bernabé no Pab,

par nzë bixaꞌ lo go,

26 porke rop miyiꞌ reꞌ,

gat nizhebt gat por Señor Jesukrist.

27 Kuzeꞌ,

mixëꞌl no Judas kun Silas,

par ne yub bixaꞌi lo go,

28 porke lëꞌ Sprit cheꞌn Dios miluꞌ lo no,

gat ñalt ne no,

leꞌ go rë kwaꞌn nzobniꞌ lo ley kwaꞌn milaꞌ Dios lo Muisés.

Nabtsa kureꞌ bin go no bileꞌ go:

29 Nagaot go rë bëꞌl cheꞌn rë ma kwaꞌn nzhat plo nileꞌ men lani cheꞌn winab,

mbaino ni nagao go rë ma kwaꞌn nzhat nab,

gat nigoꞌt ren;

no ni nagao go ren,

no nakaꞌt go xaꞌ gat lëꞌt tsaꞌ go.

Chi lëꞌ go leꞌ rë kureꞌ,

dox wen leꞌ go.

Rëtsa kureꞌ ne no leꞌ go.

Mbaino ne no,

bizak laxtoꞌ go.”

30 Or milox nzhab bixaꞌ kureꞌ,

orzeꞌ mixëꞌl rë men cheꞌn Jesukrist Judas kun Silas,

par leꞌ bixaꞌ kumpañ Pab kun Bernabé yezh Antioquía.

Or mizhin bixaꞌ zeꞌ,

mikan bixaꞌ rë men cheꞌn Jesukrist kwaꞌn nzho yezh zeꞌ,

par mizaꞌ bixaꞌ yech zeꞌ,

kwaꞌn mixëꞌl rë apost xaꞌ nzho yezh Jerusalén.

31 Or mbiꞌl rë xaꞌ reꞌi,

dox nizak laxtoꞌ bixaꞌ,

porke dox wen widiꞌzh kwaꞌn nzobniꞌ lo yech reꞌ.

32 No como lëꞌ Judas kun Silas nak bixaꞌ profet,

xaꞌ kwaꞌn nidiꞌzh por Dios,

xche midiꞌzh bixaꞌ par mizaꞌ bixaꞌ konsej rë men cheꞌn Jesukrist,

par más ngop bixaꞌ jwers lo widiꞌzh cheꞌn Dios por Jesukrist.

33 Orzeꞌ miaꞌn bixaꞌ tu tiemp yezh Antioquía zeꞌ.

No or nguiubre bixaꞌ par yezh Jerusalén,

orzeꞌ rë men cheꞌn Jesukrist kwaꞌn nzho yezh Antioquía zeꞌ,

nzhab bixaꞌ:

“Bizë go kun Dios.”

34 Per lëꞌ Silas mileꞌ xigab yaꞌn xaꞌ yezh Antioquía.

35 Nu Pab kun Bernabé miaꞌn bixaꞌ yezh Antioquía zeꞌ,

par miluꞌ bixaꞌ widiꞌzh cheꞌn Dios por Jesukrist lo rë men nzho zeꞌ.

36 No or nded pla ngubizh,

nzhab Pab lo Bernabé:

―Chaꞌ nzhatsiꞌ be ma rë wech be,

rë yezh plo midiꞌzh be widiꞌzh cheꞌn Dios,

par ne be xmod nzhin bixaꞌ zeꞌ.

37 No lëꞌ Bernabé ngokla ngweiꞌ Juan Mark par ngaleꞌ kumpañ bixaꞌ,

38 per net Pab nga xaꞌ reꞌ,

porke milaꞌ nzëꞌb xaꞌ reꞌ Pab kun Bernabé or nzho bixaꞌ lazh men Panfilia,

nangaknut Juan Mark,

ngakë bixaꞌ zhiꞌn nazhon cheꞌn Dios zeꞌ.

39 Dox michëlroꞌ bixaꞌ por kureꞌ,

haxta mileꞌi milëꞌ bixaꞌ.

Lëꞌ Bernabé nzhanu Juan Mark,

nguzen bixaꞌ bark par nzha bixaꞌ lazh men Chipre,

40 no lëꞌ Pab ngule Silas,

par leꞌ kumpañ xaꞌ,

orzeꞌ rë men cheꞌn Jesukrist gunaꞌb lo Dios por rop xaꞌ reꞌ,

par gaknu Dios bixaꞌ,

orzeꞌ nzha bixaꞌ.

41 Orzeꞌ nded bixaꞌ rë yezh cheꞌn men Siria,

kun rë yezh cheꞌn men Cilicia,

par mizaꞌ rop xaꞌ reꞌ konsej rë men cheꞌn Jesukrist xaꞌ nzho kad yezh zeꞌ,

par ngop rë xaꞌ zeꞌ más jwers lo cheꞌn Dios.