Nguio Pab kun Bernabé yezh Iconio
14
No or mizhin Pab kun Bernabé yezh Iconio,
nguio bixaꞌ leꞌn yoꞌ plo nitseꞌd men Israel widiꞌzh cheꞌn Dios,
no miluꞌ bixaꞌ widiꞌzh cheꞌn Dios por Jesukrist lo rë men nzhin zeꞌ.
No zeꞌ nayax bixaꞌ ngwayila widiꞌzh cheꞌn Dios por Jesukrist,
no xid rë xaꞌ reꞌ nzho men Israel,
no dox nayax xaꞌ gat lëꞌt men Israel.
2 Per rë men Israel xaꞌ gat ñilat widiꞌzh cheꞌn Dios por Jesukrist,
mikiꞌl bixaꞌ rë men xaꞌ gat lëꞌt men Israel,
par leꞌ bixaꞌ nakap lo rë men cheꞌn Jesukrist.
3 Kuzeꞌ,
miaꞌn Pab kun Bernabé yezh zeꞌ tu tiemp xche,
yent kwan ngazheb bixaꞌ,
miluꞌ bixaꞌ widiꞌzh cheꞌn Dios por Jesukrist lo rë men yezh zeꞌ.
Por rë señ nazhon kwaꞌn mileꞌ Dios yaꞌ Pab no yaꞌ Bernabé,
rë kwaꞌn mileꞌ miaꞌn men xe tuli,
miluꞌ Dios walika nazhon rë widiꞌzh cheꞌn Dios kwaꞌn niluꞌ Pab no Bernabé.
4 Per rë men yezh zeꞌ,
chop ngok bixaꞌ.
Garol bixaꞌ ño man cheꞌn rë men Israel,
rë xaꞌ gat ñilat widiꞌzh cheꞌn Dios por Jesukrist;
no zigarol bixaꞌ ño man cheꞌn rop apost cheꞌn Jesukrist,
Pab no Bernabé.
5 Orzeꞌ tutsa miaꞌn rë men Israel kun zipla men gat lëꞌt men Israel,
mbaino kun rë xaꞌ nak zhiꞌn yezh zeꞌ,
ngokla bixaꞌ ngazakzi bixaꞌ Pab kun Bernabé,
mbaino ngagoke bixaꞌ rop xaꞌ reꞌ.
6 Per or mbin Pab kun Bernabé kureꞌ,
orzeꞌ mikëꞌ bixaꞌ karre,
ña bixaꞌ par yezh Listra,
no yezh Derbe,
kun más rë yezh kwaꞌn nzhin nakaꞌn zeꞌ;
no rë yezh reꞌ,
yezh Licaonia nileꞌ mandade.
7 No leꞌn rë yezh reꞌ,
miluꞌ bixaꞌ rë widiꞌzh nazhon cheꞌn Dios kwaꞌn nileꞌ,
gax gaꞌ ñëꞌd laxtoꞌ men.
8 No leꞌn yezh kwaꞌn lë Listra zeꞌ,
nzho tu miyiꞌ kwaꞌn nagakt zë dizde or ngol xaꞌ.
9 Xaꞌ reꞌ nzob kiyon widiꞌzh kwaꞌn kidiꞌzh Pab,
no or miwiꞌ Pab xe lo miyiꞌ reꞌ,
ngwanu laxtoꞌ Pab,
lëꞌ miyiꞌ reꞌ ñila widiꞌzh cheꞌn Dios,
no haxta par liwen Dios xaꞌ,
ñila xaꞌ.
10 Orzeꞌ,
naye nzhab Pab lo xaꞌ:
―¡Watsuli,
nali bizo niꞌl!
Orzeꞌ ngwatsuli xaꞌ haxta ngwats xaꞌ,
no nguzë xaꞌ.
11 No or une rë men yezh Licaonia,
xaꞌ nzhin zeꞌ,
seꞌ kwaꞌn mileꞌ Pab,
nguzublo kibizhië rë men,
kun widiꞌzh kwaꞌn nidiꞌzh men Licaonia nzhab bixaꞌ:
―¡Lëꞌ rë dios ngulali lo be nela men gaꞌ!
12 No nguloꞌlë bixaꞌ Bernabé,
dios Júpiter;
no lëꞌ Pab nguloꞌlë bixaꞌ,
dios Mercurio,
porke nab tsa Pab kidiꞌzh lo bixaꞌ.
13 No ngulëiꞌ kwaꞌn nileꞌ rë zhiꞌn leꞌn yadoꞌ cheꞌn Júpiter,
kwaꞌn nzob roꞌ yezh zeꞌ,
nzhanu xaꞌ ngoꞌn no kun bigaꞌ kwaꞌn nak nela yeꞌ gaꞌ,
tutsa junt kun rë men yezh,
par zaꞌ bixaꞌ gon lo Pab no lo Bernabé.
14 Per or une Bernabé kun Pab kureꞌ,
michëzla bixaꞌ xab bixaꞌ,
orzeꞌ nguzëꞌb bixaꞌ xid men,
no naye nzhab bixaꞌ:
15 ―¡Lëꞌ go!
¿Chon kileꞌ go kureꞌ kun no?,
porke,
¡no men nela go ka!
Nabtsa nzë no namás par nzadiꞌzh no widiꞌzh nazhon por Jesukrist,
par laꞌ go rë kwaꞌn nazuꞌt reꞌ,
no yila go Dios,
Me kinu yalnaban par dubtaꞌ,
Dios kwaꞌn mizuxkwaꞌ yibëꞌ no yizhyuo,
no nitsdoꞌ,
no rë kwaꞌn nzhin loi.
16 Dios galo milaꞌ,
mileꞌ rë men nzhala,
rë xaꞌ gat lëꞌt men Israel,
rë kwaꞌn nzhakla bixaꞌ.
17 No ter saꞌ ngok bixaꞌ,
per nangayot ngalaꞌ Dios,
ngaleꞌ Dios rë kwaꞌn wen,
par ne be,
xmod nak Dios.
Dios nila yiu par nzhak rë kwaꞌn,
par ño nayax kwaꞌn nzhao men,
no par nizak laxtoꞌ men.
18 No ter seꞌ midiꞌzh Pab kun Bernabé lo rë men zeꞌ,
per peꞌn mileꞌ bixaꞌ gan,
par nangut rë men zeꞌ ngoꞌn como tu gon gaꞌ lo Pab no lo Bernabé.
19 Lëꞌchi mis orzeꞌ mizhin pla men Israel kwaꞌn nzë yezh Antioquía,
mbaino yezh Iconio.
Mikiꞌl bixaꞌ rë men xaꞌ ngokla ngazaꞌ gon zeꞌ,
par ngulo ke bixaꞌ Pab,
no mizubxax bixaꞌ Pab haxta roꞌ yezh.
Mileꞌ bixaꞌ xigab,
ya ngut la Pab.
20 Per or miza rë men cheꞌn Jesukrist nakaꞌn plo naꞌxbi Pab,
lwegaꞌ ngwaxche xaꞌ,
no miëk xaꞌ yezh zeꞌ xtu wëlt.
No or ngwanilyuo,
nguroꞌ Pab zeꞌ,
kun Bernabé,
par ña bixaꞌ yezh Derbe.
Ña Pab kun Bernabé yezh Antioquía kwaꞌn ñaꞌn lazh men Siria
21 No or milox miluꞌ bixaꞌ widiꞌzh nazhon cheꞌn Dios por Jesukrist lo rë men yezh Derbe,
nayax rë men zeꞌ ngwayila widiꞌzh wen reꞌ.
Orzeꞌ miëk Pab kun Bernabé xtu wëlt par yezh Listra,
yezh Iconio,
mbaino kun yezh Antioquía kwaꞌn ñaꞌn lazh men Pisidia,
22 par midiꞌzhnu Pab kun Bernabé rë men cheꞌn Jesukrist kwaꞌn nzho rë yezh zeꞌ,
par más ngop bixaꞌ jwers lo widiꞌzh cheꞌn Dios por Jesukrist,
par nalaꞌ bixaꞌ Dios.
No nzhab Pab kun Bernabé lo bixaꞌ:
―Nakiꞌn zo be wen lo widiꞌzh cheꞌn Dios kwaꞌn ñila be,
ter dox zakzi be,
par gal be rë kwaꞌn wen kwaꞌn kinu Dios par be.
23 Mbaino nu ngule Pab kun Bernabé,
pla rë men par gak zhiꞌn xid rë men cheꞌn Jesukrist kwaꞌn nzho kad yezh zeꞌ.
No or midiꞌzh Pab kun Bernabé xlats bixaꞌ lo Dios,
orzeꞌ ngulo bixaꞌ rë xaꞌ zeꞌ yaꞌ Dios,
Dios kwaꞌn ngwayila bixaꞌ.
Miëk Pab kun Bernabé yezh Antioquía kwaꞌn ñaꞌn lazh men Siria
24 Or nded Pab kun Bernabé lazh men Pisidia,
orzeꞌ mizhin bixaꞌ rë yezh kwaꞌn ñaꞌn lazh men Panfilia.
25 No or milox midiꞌzh Pab kun Bernabé widiꞌzh cheꞌn Dios por Jesukrist lo rë men yezh Perge,
orzeꞌ nzha bixaꞌ yezh Atalia.
26 Or mizhin bixaꞌ,
zeꞌ nkë bixaꞌ bark par ña bixaꞌ yezh Antioquía kwaꞌn ñaꞌn lazh men Siria,
plo kwaꞌn gunaꞌb rë men cheꞌn Jesukrist lo Dios,
par kë Pab kun Bernabé zhiꞌn nazhon cheꞌn Dios,
no nal,
zhiꞌn reꞌ mileꞌ la bixaꞌ.
27 No or mizhin bixaꞌ yezh Antioquía kwaꞌn ñaꞌn lazh men Siria,
mikan bixaꞌ rë men cheꞌn Jesukrist kwaꞌn nzho yezh zeꞌ,
par midiꞌzh bixaꞌ kwan paꞌ mileꞌ Dios kun lëꞌ bixaꞌ,
no xmod mileꞌ Dios,
nayax xaꞌ gat lëꞌt men Israel ngwayila widiꞌzh cheꞌn Dios por Jesukrist.
28 No yezh zeꞌ,
xche miaꞌn Pab kun Bernabé,
lo rë men cheꞌn Jesukrist kwaꞌn nzho zeꞌ.