Nguzublo Bernabé kun Saulo, kë bixaꞌ zhiꞌn nazhon cheꞌn Dios
13
Xid rë men cheꞌn Jesukrist xaꞌ nzho yezh Antioquía,
nzho xaꞌ nak profet,
xaꞌ kwaꞌn nidiꞌzh por Dios,
no nzho xaꞌ nak maestr,
xaꞌ kwaꞌn niluꞌ widiꞌzh cheꞌn Dios lo men.
Tu rë xaꞌ reꞌ nak Bernabé,
no Simón Triyeñ,
no Lus,
xaꞌ nzë yezh Cirene,
mbaino xaꞌ lë Manaén,
xaꞌ kwaꞌn mixen tutsa kun gobiernador Herodes,
xaꞌ kwaꞌn mileꞌ mandad lazh men Galilea,
mbaino nu Saulo nzho xid rë xaꞌ reꞌ.
2 No ngol tu ngubizh,
dub kileꞌ bixaꞌ kult lo Dios,
mbaino kinaꞌb bixaꞌ lo Dios dub xlats bixaꞌ,
orzeꞌ nzhab Sprit cheꞌn Dios lo bixaꞌ:
―Guloꞌ go Bernabé kun Saulo part,
par kë bixaꞌ zhiꞌn da,
porke par kureꞌ ngulen bixaꞌ.
3 No or milox minaꞌb bixaꞌ lo Dios dub nzo bixaꞌ xlats bixaꞌ,
mixoꞌb rë xaꞌ reꞌ yaꞌ bixaꞌ yek Bernabé no yek Saulo,
orzeꞌ nzhab bixaꞌ,
leꞌ Bernabé no Saulo,
kwaꞌn nzhab Sprit cheꞌn Dios ñal leꞌ bixaꞌ.
Kiluꞌ Bernabé kun Saulo widiꞌzh cheꞌn Dios por Jesukrist lazh men Chipre, kwaꞌn nzhin tsaoꞌ nitsdoꞌ
4 Orzeꞌ Bernabé no Saulo nzhanu Sprit cheꞌn Dios bixaꞌ,
par yezh Seleucia kwaꞌn nzhin roꞌ nitsdoꞌ,
no zeꞌ nkë bixaꞌ bark par nzha bixaꞌ Chipre,
kwaꞌn nzhin tsaoꞌ nitsdoꞌ.
5 No or mizhin bixaꞌ pwert plo lë Salamina,
zeꞌ nguzublo miluꞌ bixaꞌ widiꞌzh cheꞌn Dios por Jesukrist,
leꞌn rë yoꞌ plo nitseꞌd rë men Israel widiꞌzh cheꞌn Dios.
No nu Juan Mark,
nzha kun lëꞌ bixaꞌ,
par gaknu bixaꞌ.
6 Orzeꞌ nguroꞌ bixaꞌ pwert Salamina par nkizë bixaꞌ dub lazh men Chipre,
haxta mizhin bixaꞌ xtu yezh kwaꞌn lë Pafos.
Zeꞌ mizhëꞌl bixaꞌ tu men Israel xaꞌ lë Barjesús,
tu xaꞌ bruj kwaꞌn nikide men;
nzhab xaꞌ nidiꞌzh Dios por lëꞌ xaꞌ,
per gat walite.
7 Bruj reꞌ nichëꞌl kun gobiernador Sergio Paulo,
xaꞌ nileꞌ mandad lazh men Chipre.
No dox natsin gobiernador reꞌ.
Or mbin xaꞌ,
lëꞌ Bernabé kun Saulo nikizë zeꞌ,
orzeꞌ ngurezh xaꞌ rop xaꞌ reꞌ,
por nzhakla xaꞌ gon xaꞌ widiꞌzh cheꞌn Dios por Jesukrist.
8 Per Barjesús kinu xtu lë,
lë xaꞌ Elimas (widiꞌzh kwaꞌn gab bruj);
gat lëꞌt midiꞌzh xaꞌ por widiꞌzh cheꞌn Dios por Jesukrist,
porke gat nzhaklat xaꞌ yila gobiernadore.
9 Per Saulo,
xaꞌ nu kinu xtu lë,
lë Pab;
mileꞌ Sprit cheꞌn Dios ngwani laxtoꞌ Pab,
orzeꞌ xe miwiꞌ xaꞌ lo bruj reꞌ,
10 nzhab Pab lo xaꞌ:
―¡Mbël goxa,
kwaꞌn mal laxtoꞌ,
xin Mizhaba,
kwaꞌn niyiꞌ nine rë nak kwaꞌn wen cheꞌn Dios!
¡Zilitaꞌ nikwaꞌnal mod,
par tsinul rë nez nali cheꞌn Dios!
11 Nal nel kwan liꞌnu Diosal,
lëꞌ lol kal,
nanetraꞌl biani cheꞌn ngubizh tu tiemp.
Mis orzeꞌ,
lwegaꞌ mikal lo xaꞌ,
orzeꞌ maska nzha yaꞌ xaꞌ,
kikwaꞌn xaꞌ cho zen yaꞌ xaꞌ par weiꞌ xaꞌ.
12 Or une gobiernador kureꞌ,
ngwayila xaꞌ widiꞌzh cheꞌn Dios por Jesukrist,
xe miaꞌn xaꞌ tuli or une xaꞌ xmod nak widiꞌzh cheꞌn Jesukrist.
Mizhin Pab kun Bernabé yezh Antioquía kwaꞌn ñaꞌn lazh men Pisidia
13 Orzeꞌ nkë Pab bark,
kun más rë xaꞌ nzha kun lëꞌ xaꞌ;
orzeꞌ nguroꞌ bixaꞌ yezh Pafos kwaꞌn nzhin lazh men Chipre,
par nded bixaꞌ xtu lad roꞌ nits par nzha bixaꞌ yezh Perge,
kwaꞌn ñaꞌn lazh men Panfilia.
Zeꞌ milaꞌ Juan Mark bixaꞌ,
ña Juan par yezh Jerusalén.
14 Orzeꞌ nguroꞌ Pab kun Bernabé yezh Perge par nzha bixaꞌ yezh Antioquía kwaꞌn ñaꞌn lazh men Pisidia.
Zeꞌ mizhin bixaꞌ tu zhë sabd,
zhë kwaꞌn nileꞌ men Israel diskans.
Nguio bixaꞌ plo nitseꞌd rë xaꞌ reꞌ widiꞌzh cheꞌn Dios,
orzeꞌ nguzob bixaꞌ.
15 No or milox mbiꞌl men widiꞌzh kwaꞌn nzobniꞌ lo ley,
no lo yech kwaꞌn mikëꞌ rë profet,
rë xaꞌ kwaꞌn midiꞌzh por Dios,
orzeꞌ mixëꞌl xaꞌ nileꞌ mandad leꞌn yoꞌ zeꞌ,
pla xaꞌ kwaꞌn ngwayab lo Pab no lo Bernabé:
―Wech;
chi kinu go tu widiꞌzh wen par rë men reꞌ,
gak diꞌzh goi nal reꞌ.
16 Orzeꞌ ngwatsuli Pab,
no mileꞌ xaꞌ señ kun yaꞌ xaꞌ lo rë men nzhin zeꞌ,
par gon bixaꞌ kwan diꞌzh Pab,
orzeꞌ nzhab Pab:
―Bin goi rë men Israel,
no rë go xaꞌ nzhon roꞌ Dios,
ter gat lëꞌt men Israel go:
17 Lëꞌ Dios cheꞌn be ngule rë xaꞌ kwaꞌn ngok xuz be nzhala,
mileꞌ Dios miar dox bixaꞌ or miban bixaꞌ lazh men Egipto,
ngok bixaꞌ men zit lo rë xaꞌ zeꞌ,
per ngol ngubizh nguloꞌ Dios bixaꞌ lazh men Egipto kun poder cheꞌn Dios.
18 No dub choꞌ liꞌn mixek Dios nangont bixaꞌ roꞌ Dios,
ngok nayiꞌlazh bixaꞌ or nguzhin bixaꞌ lo yuo bizh.
19 No miloꞌx Dios za gazh ben men,
kwaꞌn nguzhin lo yuo cheꞌn men Canaán,
par ndiꞌz Dios rë yuo cheꞌn rë men zeꞌ,
par nkaꞌ rë xaꞌ nzhala,
xaꞌ ngok ben cheꞌn be.
20 Rë kureꞌ midiꞌy como tap gayoꞌ garol liꞌn.
Dispwés,
ngulo Dios rë xaꞌ ngok jwes lo bixaꞌ,
no haxta zhë cheꞌn profet Samuel,
une nguio jwes xid bixaꞌ.
21 Orzeꞌ minaꞌb men Israel tu rey lo Samuel,
par leꞌ mandad lo bixaꞌ.
Kuzeꞌ mileꞌ Dios ngok Saúl rey lo bixaꞌ;
no xuz Saúl ngurulë Kis,
xaꞌ kwaꞌn nzë ben cheꞌn Benjamín;
choꞌ liꞌn midiꞌy liꞌn cheꞌn Saúl.
22 No or ngulutin Dios Saúl,
orzeꞌ mileꞌ Dios ngok Dabi rey lo bixaꞌ.
No por Dabi reꞌ midiꞌzh Dios seꞌ:
“Lëꞌda ngule Dabi xgaꞌn Isaí,
porke lëꞌ Dabi tu miyiꞌ kwaꞌn naban nela xmod nzhaklan,
mbaino tu xaꞌ kwaꞌn leꞌ rë kwaꞌn gapa.”
23 No mis tu rë xaꞌ kwaꞌn nzë ben cheꞌn Dabi ngok Jesús,
Me kwaꞌn mixëꞌl Dios par cheꞌ rë kwaꞌn nzëꞌb xki men Israel lo Dios,
nela xmod milaꞌ ka Dios diꞌzh gaꞌ.
24 No antis di xëꞌl Dios Jesús,
lëꞌ Juan midiꞌzh la widiꞌzh cheꞌn Dios lo rë men Israel,
nzhab Juan:
“Bichëꞌ go xmod nileꞌ go xigab,
no xmod naban go lo Dios,
naleꞌtraꞌ go kwaꞌn gat lëꞌ lo Dios,
no goklëiꞌ go leꞌn nits.”
25 No or mer milox la nkë Juan zhiꞌn nazhon cheꞌn Dios,
nzhab Juan lo rë men:
“¿Cho nileꞌ go xigab nak da?
Gat lëꞌt da nak Krist,
per ticha nzë xtu xaꞌ más tsak lon,
per ni gat ñal da gak da tu mos cheꞌn xaꞌ.”
26 Orzeꞌ nzhab Pab:
―Wecha,
rë go xaꞌ nzë ben cheꞌn Abraham,
no rë go xaꞌ nzhon roꞌ Dios,
ter gat lëꞌt men Israel go:
Par be mixëꞌl Dios widiꞌzh reꞌ,
par cheꞌ Dios rë kwaꞌn nzëꞌb xki be lo Dios,
mbaino par ban be nela xmod nzhakla Dios.
27 Pwes rë men xaꞌ nzho Jerusalén,
kun rë xaꞌ kwaꞌn nileꞌ mandad lo bixaꞌ,
nangalibeꞌt bixaꞌ cho nak Jesús,
mbaino ni nangazobyekt bixaꞌ rë widiꞌzh cheꞌn rë profet kwaꞌn nzhoꞌl men rë zhë kwaꞌn nileꞌ men Israel diskans.
Kuzeꞌ,
mis lëꞌ bixaꞌ mileꞌ ngok rë kwaꞌn nzobniꞌ la,
or michi bixaꞌ Jesús lo rë men par ngut Jesús.
28 No ter yent cho dol nzhap Jesukrist,
par gat Me,
per minaꞌb bixaꞌ lo Pilat,
rutin Jesús yizhyuo reꞌ.
29 No or ngok rë kwaꞌn nzobniꞌ lo yech por Jesukrist,
orzeꞌ mila bixaꞌ kwerp cheꞌn Me lo krus,
orzeꞌ mikaꞌch bixaꞌ Me.
30 Per mileꞌ Dios nguruban Jesukrist,
31 no nayax ngubizh,
ngurulo Jesús lo rë xaꞌ kwaꞌn nguzukë tich Me,
or naban Me,
dizde lazh men Galilea,
haxta mizhin Me yezh Jerusalén.
No rë xaꞌ reꞌ nzhudiꞌzh lo rë men,
lëꞌ Jesús nguruban.
32 ’No nal,
nu no nzadnu rë widiꞌzh nazhon rë lo go,
widiꞌzh kwaꞌn milaꞌ Dios lo rë xuz be xaꞌ nzhala.
33 Rë kureꞌ ngok la,
une la be,
rë be kwaꞌn nak ben cheꞌn men milaꞌ Dios diꞌzh reꞌ,
or mileꞌ Dios nguruban Jesús,
nela xmod nzobniꞌ ka lo Salmo kwaꞌn mirop kwaꞌn nzhab seꞌ:
“Lu nak Xgaꞌna.
Nalzhë reꞌ Na mizol,
par nakal Xaꞌ nileꞌ mandad lo rëi.”
34 No más plo midiꞌzh Dios nzobniꞌ,
lëꞌ Dios leꞌ ruban Jesukrist,
mbaino nzhab Dios nayotraꞌ gat Jesukrist xtu wëlt,
no ni nayëb kwerp cheꞌn Me leꞌn baꞌ,
porke seꞌ nzhab Dios:
“Lëꞌda le rë kwaꞌn milan diꞌzh lo Dabi,
rë kwaꞌn wali no rë kwaꞌn nazhon”,
35 nela xmod nzob ska xtu plo lo Salmos,
kwaꞌn nzhab:
“Nalaꞌtal yëb kwerp cheꞌn Me Nazhon cheꞌnal”,
36 porke walika lëꞌ Dabi,
dispwés di mileꞌ Dabi zhiꞌn nazhon cheꞌn Dios xid rë men tiemp cheꞌn xaꞌ,
nela xmod mileꞌ Dios mandad,
orzeꞌ ngut xaꞌ,
ña xaꞌ plo nzho rë xuz xaꞌ,
no miëb kwerp cheꞌn xaꞌ.
37 Per lëꞌ kwerp cheꞌn Me kwaꞌn mileꞌ Dios nguruban,
nangayot ngayëbe.
38 No rë go wech,
nal nakiꞌn ne go,
kidiꞌzh no lo go:
Por Jesukrist nizheꞌ rë kwaꞌn nzëꞌb xki men lo Dios,
rë men kwaꞌn ñila Jesukrist.
39 Gat lëꞌtaꞌ por gon men ley kwaꞌn milaꞌ Dios lo Muisés nizheꞌ rë kwaꞌn nzëꞌb men lo Dios,
sino ke nab tsa por ñila men Jesukriste.
40 Biwiꞌ gox,
par nazakt go,
rë kwaꞌn midiꞌzh rë profet,
rë xaꞌ kwaꞌn midiꞌzh por Dios or nzhab bixaꞌ:
41 Biwiꞌ rë gox kwaꞌn nixizhnu Da.
Per ni nagakraꞌ diꞌzh go di zheꞌb,
lëꞌ go yaꞌn xe,
haxta lox go tuli,
porke rë ngubizh cheꞌn go,
lëꞌ Da le tu zhiꞌn nazhon,
mbaino ter zaꞌ men kwente lo go,
per nayot yila goi.
42 No or nguroꞌ Pab kun Bernabé leꞌn yoꞌ zeꞌ,
nzhab men lo bixaꞌ:
―Sabd xtu sman,
nzhakla no diꞌzh go kureꞌ lo no xtu wëlt.
43 No or milox nguzhin xaꞌ leꞌn yoꞌ zeꞌ,
nayax rë men Israel no nayax rë men xaꞌ gat lëꞌt men Israel per nzhon bixaꞌ ley kwaꞌn milaꞌ Dios lo Muisés,
orzeꞌ ngwayila bixaꞌ widiꞌzh cheꞌn Dios por Jesukrist,
nzhakë bixaꞌ tich Pab no tich Bernabé.
Orzeꞌ nzhab Pab kun Bernabé lo bixaꞌ:
―Nayaꞌlt laxtoꞌ go xmod ngurezh Dios go,
por nazhiꞌ Dios go.
44 Or ngol zhë Sabd zeꞌ,
zhë kwaꞌn nileꞌ men Israel diskans,
nilaꞌ dub yezh zeꞌ nguzhin par mbin bixaꞌ widiꞌzh cheꞌn Dios por Jesukrist.
45 Per or une rë men Israel xaꞌ nak zhiꞌn ,
lëꞌ dox men miza,
orzeꞌ dox niyiꞌxian bixaꞌ,
no nakap midiꞌzh bixaꞌ tich kwaꞌn nidiꞌzh Pab,
no unde bixaꞌ Pab,
46 per yent kwan ngazheb Pab kun Bernabé,
sino ke nzhab bixaꞌ:
―Galo laka lo go,
nakiꞌn diꞌzh no widiꞌzh cheꞌn Dios por Jesukrist,
porke go men Israel.
Per nal,
mis go nzhap dol,
porke mis go nileꞌ nayaꞌ,
ban go bid kwaꞌn nizaꞌ Dios par dubtaꞌ.
Per nal nzho raꞌ xaꞌ nzhaklai,
kuzeꞌ lëꞌ no yaluꞌ widiꞌzh cheꞌn Dios lo xtu ben men,
xaꞌ gat lëꞌt men Israel,
47 porke seꞌ mileꞌ Dios mandad no,
Dios Me kwaꞌn naban par dubtaꞌ,
ne Me:
Lëꞌl xëlaa rë plo kwaꞌn nzhin men dub yizhyuo,
par gakal nela tu biani gaꞌ lo xtu ben men zit,
par roꞌ bixaꞌ lo kwaꞌn nzëꞌb xki bixaꞌ lo Dios.
48 Or mbin rë men zit kureꞌ,
dox nizak laxtoꞌ bixaꞌ,
orzeꞌ nzhab bixaꞌ:
“Dox nazhon widiꞌzh cheꞌn Dios”;
no ngwayila rë mene,
xaꞌ kwaꞌn ngule la Dios,
par ban bid kwaꞌn nizaꞌ Dios par dubtaꞌ.
49 Seꞌ ngok mireꞌch widiꞌzh cheꞌn Dios por Jesukrist rë yezh kwaꞌn nzhin nakaꞌn zeꞌ,
50 per rë men Israel xaꞌ nak zhiꞌn kwaꞌn nzho yezh zeꞌ,
mikiꞌl bixaꞌ rë unaꞌ kwaꞌn más nzhon ley cheꞌn Muisés,
rë unaꞌ xaꞌ más tsak yezh zeꞌ,
no kun rë miyiꞌ kwaꞌn nileꞌ mandad yezh zeꞌ.
Seꞌ mileꞌ rë men Israel yezh zeꞌ,
par tutsa miaꞌn bixaꞌ diꞌzh,
orzeꞌ ngurukë bixaꞌ tich Pab no tich Bernabé yezh zeꞌ,
no par nayaraꞌ Pab kun Bernabé rë yezh kwaꞌn nzhin nakaꞌn zeꞌ.
51 Orzeꞌ lëꞌ Pab kun Bernabé,
nguzhib bixaꞌ niꞌ bixaꞌ,
nela tu señ gaꞌ,
par ne rë men Israel zeꞌ,
lëꞌ bixaꞌ mileꞌ nayaꞌ lo Dios.
Orzeꞌ nguroꞌ bixaꞌ zeꞌ,
Pab kun Bernabé,
par ña bixaꞌ yezh Iconio.
52 No rë men cheꞌn Jesukrist kwaꞌn nzho yezh Antioquía zeꞌ,
dox nizak laxtoꞌ bixaꞌ,
no dox nzho Sprit cheꞌn Dios laxtoꞌ bixaꞌ.