Ngut Jakob, no lëꞌ Per nzho lizhyiꞌb
12
Leꞌn rë ngubizh zeꞌ,
lëꞌ rey Herodes nguzublo kizen pla men cheꞌn Jesukrist par yo bixaꞌ lizhyiꞌb,
nes par zakzi rey Herodes bixaꞌ.
2 Orzeꞌ mileꞌ Herodes mandad ngut Jakob,
wech Juan,
kun spad.
3 No or une Herodes,
dox nguio laxtoꞌ rë men Israel kureꞌ,
kuzeꞌ nu Per mileꞌ xaꞌ mandad,
ngwagaꞌ,
par nguio lizhyiꞌb.
Kureꞌ ngok rë zhë or nzhao rë men Israel pan kwaꞌn niyent levadur,
or nzhal lani Pask.
4 Dispwés di ngwagaꞌ Per,
orzeꞌ ngulo Herodes Per lizhyiꞌb,
plo kikina tap grup sondad,
tap gaꞌ sondad kad grup.
Mileꞌ Herodes xigab chi xaꞌ Per lo rë men,
or lox ded lani Pask.
5 No lëꞌ Per nikë lizhyiꞌb plo dox kikina xaꞌ,
per rë men cheꞌn Jesukrist zilitaꞌ kinaꞌb lo Dios por Per.
Tu ganj ngwaloꞌ Per lizhyiꞌb
6 No mis yëꞌl par yanilyuo xtu ngubizh,
or chi Herodes Per lo rë men,
naxnaa Per lad cheꞌn chop sondad,
naliꞌb xaꞌ kun chop kaden,
no lëꞌ zipla sondad kikina roꞌ pwert lizhyiꞌb.
7 Lëꞌchi ngurulo tu ganj cheꞌn Dios,
orzeꞌ dub leꞌn lizhyiꞌb ngwani,
no migal ganj taꞌ Per,
par nguroꞌ mikaꞌl lo xaꞌ,
orzeꞌ nzhab ganj:
―¡Nayen waxche!
―¡Gok xabal,
no bikëꞌ kwaꞌn niꞌl!
Orzeꞌ,
seꞌ mileꞌ Per,
no nzhab ganj:
―¡Gok kaxkem cheꞌnal,
no dikë ticha!
9 Orzeꞌ nzhakë Per tich ganj,
net Per chi waliy o gat walit kwaꞌn kizak Per;
zak Per ka kichaꞌ laxtoꞌ Per.
10 Nded bixaꞌ tu roꞌ pwert,
no or nded bixaꞌ pwert rop lugar plo kikina sondad;
or mizhin bixaꞌ roꞌ pwert yiꞌb kwaꞌn nina leꞌn nez,
nabe mixaꞌl roꞌi,
nguroꞌ bixaꞌ.
Or zit la ñazë bixaꞌ,
orzeꞌ milaꞌ ganj,
nab Per ña.
11 Orzeꞌ une Per,
walika rë kwaꞌn kizak Per,
orzeꞌ mileꞌ Per xigab leꞌn laxtoꞌ Per:
―Nal unen,
walika lëꞌ Dios mixëꞌl tu ganj cheꞌn par ngoknu da,
par nguroꞌn yaꞌ Herodes,
no lo rë kwaꞌn mileꞌ men Israel xigab ngaleꞌnu xaꞌ da.
12 Or milox une Per,
walika rë kwaꞌn kizak Per,
orzeꞌ ña xaꞌ lizh Mari xnaꞌ Juan Mark,
plo nzhin nayax men cheꞌn Jesukrist,
kinaꞌb bixaꞌ lo Dios.
13 Mikweꞌzh Per roꞌ pwert,
kwaꞌn nina leꞌn nez,
orzeꞌ tu unaꞌ xi kwaꞌn lë Rode,
ngwatsiꞌ nabei choi.
14 Or mbin unaꞌ chi Per,
no por tanta nizak laxtoꞌ unaꞌ,
nangaxaꞌltaꞌ unaꞌi;
karre miëk unaꞌ,
ngwayab unaꞌ,
lëꞌ Per nzo roꞌ pwert.
15 Orzeꞌ nzhab rë men nzhin zeꞌ lo Rode:
―¡Pas nzhak miyizhal!,
¿kwan kidiꞌzhal?
Per gargaꞌl kiyab unaꞌi,
orzeꞌ nzhab bixaꞌ:
―Ka ganj cheꞌn Pere.
16 Per stubi kikweꞌzh Per roꞌ yoꞌ,
no or mixaꞌl bixaꞌ roꞌ yoꞌ,
une bixaꞌ walika lëꞌ Pere,
xe miaꞌn bixaꞌ tuli.
17 Orzeꞌ miluꞌ Per tu señ kun yaꞌ Per lo bixaꞌ,
par yentraꞌ cho diꞌzh tuli,
par nzhab Per xmod nguloꞌ Dios Per lizhyiꞌb,
mbaino nzhab Per lo bixaꞌ:
―Guzh go kureꞌ lo Jakob,
no lo más rë wech be.
Orzeꞌ nguroꞌ Per,
ña xaꞌ xtu plo.
18 Or ngwanilyuo xtu riyëꞌl,
dox mizheb rë sondad,
kichëlroꞌ bixaꞌ por nanet bixaꞌ ma Per.
19 Orzeꞌ lëꞌ Herodes mileꞌ mandad ngwakwaꞌn rë sondad Per;
per nangazhëlt bixaꞌ Per.
Or milox minabdiꞌzh Herodes lo rë sondad ma Per,
orzeꞌ mileꞌ xaꞌ mandad,
ngut rë sondad xaꞌ nkiꞌna zeꞌ.
Orzeꞌ nguroꞌ Herodes yezh kwaꞌn ñaꞌn lazh men Judea,
par ña xaꞌ yezh Cesarea,
zeꞌ miban xaꞌ.
Ngut Herodes
20 Herodes dox niyiꞌ xaꞌ nine xaꞌ rë men yezh Tiro no rë men yezh Sidón.
Rop rë yezh reꞌ,
tutsa miaꞌn rë men reꞌ,
ngwadiꞌzhnu bixaꞌ tu xaꞌ lë Blasto,
tu xaꞌ nak tu zhiꞌn ro lo Herodes.
Por xaꞌ lë Blasto reꞌ,
mileꞌ rë men yezh reꞌ gan kwaꞌn nzhakla bixaꞌ,
diltraꞌ Herodes kun lëꞌ bixaꞌ,
porke lazh Herodes ñaziꞌ bixaꞌ kwaꞌn nzhao bixaꞌ.
21 No or ngol ngubizh kwaꞌn miaꞌn bixaꞌ diꞌzh,
diꞌzh Herodes lo bixaꞌ,
ngok Herodes lar wen kwaꞌn nzhak xaꞌ or nileꞌ xaꞌ yalgustis,
orzeꞌ nguzob xaꞌ plo nileꞌ xaꞌ yalgustis;
no midiꞌzh xaꞌ kwaꞌn nakiꞌn gab xaꞌ,
lo rë men nzhin zeꞌ.
22 Orzeꞌ,
nguzublo kibizhië rë men nzhin zeꞌ,
nzhab bixaꞌ:
―¡Xaꞌ kidiꞌzh reꞌ,
diose,
gat lëꞌt mene!
23 No mis orzeꞌ,
tu ganj cheꞌn Dios mileꞌ nzhakne Herodes,
por nangab Herodes lo rë men:
“Net go nazhon da;
nab tsa lo Dios ñal widiꞌzh baꞌ”;
kuzeꞌ ngut xaꞌ,
maska miyëz nidal xaꞌ.