23
Orzeꞌ xe miwiꞌ Pab lo rë gustis zeꞌ,
no nzhab Pab lo bixaꞌ:
―Wecha,
dub naban da,
haxta zhë nalzhë,
nambe laxtoꞌn lo Dios.
2 Orzeꞌ nzhab ngulëiꞌ roꞌ,
xaꞌ lë Ananías,
lo rë men nzo gax plo nzo Pab:
—¡Bikëꞌ go tube roꞌ xaꞌ baꞌ!
3 Orzeꞌ nzhab Pab lo Ananías:
―¡Dios zakzil mbël goxa,
chigab walika men wenal!
¿Chi nzobal baꞌ par kubeꞌl,
chi lëꞌda gat nile ley kwaꞌn milaꞌ Dios lo Muisés,
orzeꞌ nzëꞌb xkin?
No chi walika nileꞌl kwaꞌn nzhab ley,
orzeꞌ,
¿chon kileꞌl mandad këꞌ xaꞌi roꞌn?
4 Lëꞌchi mikab rë xaꞌ nzhin zeꞌ,
nzhab xaꞌ:
―¿Chi saꞌ diꞌzhal nazheꞌb lo ngulëiꞌ ro cheꞌn Dios?
5 Orzeꞌ nzhab Pab:
―Wecha,
naneta chi xaꞌ baꞌ nak ngulëiꞌ ro;
porke seꞌ nzobniꞌ lo ley cheꞌn Dios:
“Naketal men nileꞌ mandad lo rë men cheꞌn Dios.”
6 Orzeꞌ une Pab,
chop ben nak rë men zeꞌ;
tu ben bixaꞌ nak men saduceo,
no xtu ben bixaꞌ nak men fariseo,
orzeꞌ naye midiꞌzh Pab lo bixaꞌ:
―¡Wecha,
nu ska da nzhal ben men fariseo!
No nal,
¿chi nigubeꞌ go nzhapa dol,
por ñilan lëꞌ rë men ngut ruban?
7 Or nzhab Pab kureꞌ,
orzeꞌ nguzublo kichëlroꞌ rë men saduceo kun rë men fariseo,
orzeꞌ milëꞌ bixaꞌ,
ngok bixaꞌ chop montón,
8 porke rë men saduceo nidiꞌzh:
“Gat walit ruban rë men ngut,
no gat walit nzho rë ganj cheꞌn Dios,
mbaino ni gat wali nzho rë mbi mal,
mbaino ni sprit cheꞌn men”;
per lëꞌ rë men fariseo xtu mod ñila bixaꞌ,
ke lëꞌ rë men ngut ruban,
no walika nzho rë ganj cheꞌn Dios,
mbaino nzho ka mbi mal no walika nzho sprit cheꞌn men.
9 No di tanta kibizhië men,
orzeꞌ ngwatsuli pla men kwaꞌn nzë xid men fariseo,
xaꞌ niluꞌ ley kwaꞌn milaꞌ Dios lo Muisés,
nzhab bixaꞌ:
―¡Yent ni tu kwaꞌn gat lëꞌ mileꞌ mbe reꞌ;
pas wali ka midiꞌzh tu sprit lo xaꞌ,
o pas tu rë ganj midiꞌzh lo xaꞌ!
10 No di tanta nazheꞌb kileꞌ men,
mizheb komandant,
napaꞌ chix bixaꞌ Pab,
orzeꞌ mileꞌ komandant mandad rë sondad,
nguloꞌ bixaꞌ Pab jwers xid rë men zeꞌ,
orzeꞌ mbiyꞌ bixaꞌ Pab xtu wëlt plo nibin bixaꞌ.
11 No mis zhë zeꞌ or yëꞌl,
ngurulo Jesukrist lo Pab,
nzhab Me:
―Nazhebtal Pab;
nela xmod midiꞌzhal xtizha lo rë men Jerusalén,
seꞌska nakiꞌn diꞌzhle lo rë men yezh Roma.
Kileꞌ men xigab, xmod gut xaꞌ Pab
12 No riyëꞌl,
nguzhin nayax men Israel,
par kikwaꞌn bixaꞌ mod gut bixaꞌ Pab.
Haxta miaꞌn bixaꞌ diꞌzh lo Dios,
zakzi Dios bixaꞌ chi lëꞌ bixaꞌ gao no go bixaꞌ,
no naga gut bixaꞌ Pab.
13 No más di choꞌ men,
xaꞌ miaꞌn diꞌzh leꞌ kureꞌ.
14 Rë xaꞌ reꞌ ngwayab lo rë ngulëiꞌ xaꞌ nileꞌ mandad lo más rë ngulëiꞌ,
no kun lo rë xaꞌ kwaꞌn nzo lo rë men Israel,
nzhab bixaꞌ:
―Lëꞌ no miaꞌn diꞌzh lo Dios,
lëꞌ Dios zakzi no chi lëꞌ no gao,
no go no,
chi naga gut no Pab.
15 Nal,
go kun rë gustis xaꞌ más nileꞌ mandad,
guzh go lo komandant yiꞌdnu xaꞌ Pab lo go,
par nabdiꞌzh go kwan paꞌ más nak xaꞌ.
Orzeꞌ lëꞌ no kwëz la nez,
par gut no xaꞌ.
16 Per mbin tu xgaꞌn bizan Pab kwaꞌn midiꞌzh rë xaꞌ reꞌ,
orzeꞌ lwegaꞌ ngwa mbwin plo kinu sondad Pab,
par nzhab mbwine lo Pab,
17 orzeꞌ ngurezh Pab tu capitán nzo zeꞌ,
nzhab Pab:
―Wanu go mbwin reꞌ lo komandant,
porke lëꞌ mbwin kinu tu kwaꞌn gab mbwin lo xaꞌ baꞌ.
18 Orzeꞌ ngwanu capitán mbwin reꞌ lo komandant,
nzhab capitán:
―Lëꞌ Pab xaꞌ nzho lizhyiꞌb reꞌ,
ne lon:
“Wanu mbwin reꞌ lo komandant”,
porke lëꞌ mbwin reꞌ kinu tu kwaꞌn ne lo go.
19 Orzeꞌ nguzen komandant yaꞌ mbwin reꞌ,
ñanu xaꞌ mbwin tu lad,
orzeꞌ nzhab komandant:
―¿Kwan nzhaklal nel lon?
20 Orzeꞌ nzhab mbwin reꞌ:
―Lëꞌ rë men Israel tutsa miaꞌn bixaꞌ diꞌzh,
par ne bixaꞌ lo go,
xëꞌl go Pab yëꞌ lo rë gustis xaꞌ más nileꞌ mandad,
par rël bixaꞌ,
kwan paꞌ más nak Pab.
21 Per nalaꞌt go,
kide bixaꞌ go,
porke más di choꞌ bixaꞌ,
miaꞌn bixaꞌ diꞌzh lo Dios,
zakzi Dios bixaꞌ chi lëꞌ bixaꞌ gao no go bixaꞌ,
no naga gut bixaꞌ Pab.
No nal,
lëꞌ bixaꞌ kimbëz la nez,
namás xëꞌl go Pab.
22 Orzeꞌ nzhab comandant lo mbwin reꞌ:
―Bizë,
no yent cho lo gabal kureꞌ.
Mixëꞌl komandant Pab lo gobiernador Jwels
23 Orzeꞌ ngurezh komandant chop capitán cheꞌn xaꞌ,
nzhab xaꞌ:
―Bikan go chop gayoꞌ sondad kwaꞌn ya niꞌ,
mbaino chon gal nzho chiꞌ sondad kwaꞌn ya kun kabai,
no chop gayoꞌ sondad xaꞌ ya kun lans,
par ya go yezh Cesarea nal guxin reꞌ,
a las nueve.
24 No zaꞌ go tu kabai zob Pab,
par yent kwaꞌn zak xaꞌ nez,
no zhin xaꞌ wen lo Jwels,
xaꞌ nak gobiernador.
25 Orzeꞌ mixëꞌl komandant zeꞌ tu yech kwaꞌn nzhab seꞌ:
26 “Lëꞌda lë Claudio Lisias,
mixëla yech reꞌ lo go,
go gobiernador Jwels,
xaꞌ dox tsak.
Kinin lo go ya go wen.
27 Lëꞌ miyiꞌ reꞌ,
rë men Israel nguzen bixaꞌ miyiꞌ,
mbaino mer ngut bixaꞌ miyiꞌ,
per or unen,
lëꞌ miyiꞌ reꞌ tu men Roma,
orzeꞌ ngwalata miyiꞌ reꞌ kun rë sondad da.
28 No por nzhaklan nganen,
por chon nzhab bixaꞌ,
nzhap miyiꞌ reꞌ dol,
kuzeꞌ mbi̱ña̱ miyiꞌ reꞌ lo rë gustis xaꞌ más nileꞌ mandad xid rë men Israel.
29 Orzeꞌ mbina,
por ley cheꞌn bixaꞌ,
nzhab bixaꞌ lëꞌ miyiꞌ reꞌ nzëꞌb xki;
per por ley cheꞌn be yent kwaꞌn nak xaꞌ,
mbaino ni gat ñal gat xaꞌ,
no ni lizhyiꞌb gat ñalt yo xaꞌ.
30 Per or mbina xlaꞌn,
lëꞌ rë men Israel kilaꞌch par gut bixaꞌ miyiꞌ reꞌ,
kuzeꞌ lwegaꞌ mixëla miyiꞌ reꞌ lo go.
No milen mandad,
yiꞌd rë xaꞌ kwaꞌn nzhab,
lëꞌ miyiꞌ reꞌ nzëꞌb xki,
par ne bixaꞌ lo go por kwan nzhap miyiꞌ reꞌ dol.
Rëtsa kubaꞌ nin lo go.
Baꞌ zhëꞌl be.”
31 Orzeꞌ mileꞌ rë sondad zeꞌ nela xmod mileꞌ komandant mandad.
Mis yëꞌl zeꞌ,
mbiyꞌ bixaꞌ Pab tu yezh kwaꞌn lë Antípatris.
32 No xtu riyëꞌl,
rë sondad kwaꞌn nzha niꞌ,
nguiubre bixaꞌ plo nibin bixaꞌ;
no lëꞌ rë xaꞌ kwaꞌn nzha kun kabai,
nzhalaꞌ bixaꞌ Pab yezh Cesarea.
33 Or mizhin bixaꞌ yezh Cesarea,
orzeꞌ mizaꞌ bixaꞌ yech kaꞌ Jwels,
xaꞌ nak gobiernador;
mbaino nu Pab ngwalaꞌ bixaꞌ.
34 No or milox mbiꞌl gobiernador yech reꞌ,
orzeꞌ minabdiꞌzh xaꞌ plo nzë Pab.
Or mbin xaꞌ lëꞌ Pab nzë tu rë yezh lazh men Cilicia,
35 orzeꞌ nzhab xaꞌ lo Pab:
―Or zhin rë xaꞌ kwaꞌn nidiꞌzh,
lëꞌl nzëꞌb xki,
orzeꞌ gona kwan diꞌzhal.
Orzeꞌ mileꞌ xaꞌ mandad rë sondad cheꞌn xaꞌ,
par kina bixaꞌ Pab leꞌn yalao cheꞌn Herodes.