Midiꞌzh Pab, yent kwan nak Pab, lo gobiernador Jwels
24
Or nded gaiꞌ ngubizh,
lëꞌchi mizhin Ananías yezh Cesarea,
xaꞌ nak ngulëiꞌ ro,
kun pla rë men Israel xaꞌ nak zhiꞌn ,
mbaino kun tu abogad xaꞌ lë Tértulo.
Rë xaꞌ reꞌ nzadnu Tértulo lo gobiernador,
par gab bixaꞌ kwan nak Pab.
2 No or ngurezh gobiernador Pab,
orzeꞌ kimbëz la abogad Tértulo,
par gab xaꞌ kwan nak Pab lo gobiernador.
Galo laka,
seꞌ midiꞌzh xaꞌ:
―Xkix go,
gobiernador;
por go,
dox wen naban no,
por kizuxkwaꞌ go rë kwaꞌn gat nak wen lazh no,
por dox nane go kwaꞌn nileꞌ go.
3 Dub lazh men Israel,
ñët rë zhiꞌn wen kwaꞌn nileꞌ go,
O Jwels xaꞌ dox tsak.
Kun dub laxtoꞌn,
kinin xkix lo go.
4 No par nadizha beꞌs xche,
kinaꞌba lo go,
por wen laxtoꞌ go,
tu rrat win tsa gon go kwaꞌn ganin lo go,
5 porke une no miyiꞌ reꞌ nak nela tu yalyizh cheꞌn Dios gaꞌ,
rë men kikeꞌd xaꞌi,
porke rë plo nikizë xaꞌ,
kichëldil xaꞌ rë men Israel.
Mbaino lëꞌ xaꞌ nak xaꞌ nileꞌ mandad xid rë xaꞌ lë nazareno.
6 Mbaino haxta nu yadoꞌ lazh no,
ngokla xaꞌ ngatsinu xaꞌ,
par nangakraꞌi nazhon,
kuzeꞌ nguzen no xaꞌ.
7 Lëꞌchi orzeꞌ mizhin komandant Lisias,
ngulutin xaꞌ miyiꞌ reꞌ yaꞌ no,
dub xian xaꞌ,
8 no ne xaꞌ lo no,
zob no demand xaꞌ lo go reꞌ.
Per más wen,
yub go nabdiꞌzh lo xaꞌ,
par ne go,
por kwan nzhab no lëꞌ xaꞌ nzhap dol.
9 No nu rë men Israel xaꞌ nak zhiꞌn,
xaꞌ nzhin zeꞌ nzhab xaꞌ:
―¡Walika kwaꞌn midiꞌzh abogad reꞌ!
10 Or miluꞌ gobiernador yaꞌ lo Pab par diꞌzh Pab,
orzeꞌ nzhab Pab:
―Dub laxtoꞌn dizha lo go,
por rë kwaꞌn kikëꞌ men kixuꞌ da lo go,
dizde nzhala,
nak go gustis xid rë men lazh no.
11 Yub go gak nabdiꞌzh lo men par ne go,
laore nzha tu dusen ngubizh,
ngwan yadoꞌ Jerusalén par ngwazuxiba lo Dios.
12 Or une bixaꞌ da,
yent cho ngane nzon leꞌn yadoꞌ,
kichëlroꞌn kun men,
no ni nangane men kichëldila men leꞌn yadoꞌ,
mbaino ni leꞌn rë yoꞌ plo nitseꞌd men Israel widiꞌzh cheꞌn Dios,
ni xtu rë plo nganet men da,
kilen rë kubaꞌ.
13 No rë men reꞌ,
yent ni tu kwaꞌn gak luꞌ bixaꞌ,
par ne bixaꞌ,
walika nak da rë kwaꞌn kikëꞌ bixaꞌ kixuꞌ da lo go reꞌ.
14 Per kwaꞌn nin lo go walika nak da,
na nile rë kwaꞌn nzobniꞌ lo Yech cheꞌn Dios kwaꞌn milaꞌ Me lo rë xuza xaꞌ tiemp,
lo mis kwaꞌn nak Nez Kub cheꞌn Jesukrist,
kwaꞌn nidiꞌzh men gat went.
Lo mis seꞌska nilen rë kwaꞌn nzobniꞌ lo yech cheꞌn ley,
mbaino rë widiꞌzh kwaꞌn midiꞌzh rë profet,
xaꞌ kwaꞌn midiꞌzh por Dios chi tiemp.
15 Mbaino na,
ñila nela xmod ñila bixaꞌ,
ke lëꞌ rë men ngut ruban,
xaꞌ wene mbaino xaꞌ gat nileꞌt kwaꞌn wene;
rë men ruban.
16 Kuzeꞌ,
dox niwiꞌn xmod nikizëꞌn,
nela xmod nikizë rë xaꞌ reꞌ,
par yaꞌn da wen lo rë kwaꞌn nilen,
nes par nambe laxtoꞌn lo Dios,
mbaino lo rë men.
17 ’No pla raꞌ liꞌn ngwan lazh xtu ben men,
orzeꞌ nguiubren lazha,
ñadnun nayax dimi,
par rë men prob nzho lazha,
mbaino mizan rë ma,
par gon lo Dios.
18 Kureꞌ kilen leꞌn yadoꞌ or une pla men Israel da,
xaꞌ nzë lazh men Asia.
Orzeꞌ laore mitsa laka rë zhë kwaꞌn ngok nambe da lo Dios,
milen nela xmod nzobniꞌ lo ley cheꞌn rë men Israel.
No ni nangane bixaꞌ da kun tu bëd men,
mbaino ni nangane bixaꞌ da kilen tu kwaꞌn nazheꞌb.
19 Per nal,
ñal yid yub rë men nzë Asia zeꞌ,
rë xaꞌ kwaꞌn une da,
par ne yub bixaꞌ chi nzho tu kwan nizak bixaꞌ kuda.
20 O ne yub rë xaꞌ nzhin reꞌ,
chi une bixaꞌ nzhapa dol por tu kwaꞌn gat lëꞌ,
or mbiyꞌ bixaꞌ da lo rë gustis xaꞌ más nileꞌ mandad.
21 O pas por midizha naye xid rë xaꞌ nzhin zeꞌ,
nzhab bixaꞌ nzhapa dol por nzhapa:
“¡Lëꞌ rë men ngut ruban!”
22 Or mbin gobiernador Jwels rë widiꞌzh reꞌ,
porke lëꞌ xaꞌ ya nane la,
xmod nak Nez Kub cheꞌn Jesukrist,
kuzeꞌ nzhab xaꞌ:
―Or yiꞌd komandant Lisias,
orzeꞌ ganin xmod gak kwent cheꞌnal.
23 Orzeꞌ mileꞌ Jwels mandad tu capitán,
par kina xaꞌ Pab,
per gat lëꞌtraꞌ naliꞌb Pabe,
mbaino gak yatsiꞌ rë men nichëꞌl Pab,
lo Pab.
24 No or nded pla ngubizh,
nguiubre Jwels xtu wëlt kun tsaꞌ xaꞌ,
unaꞌ kwaꞌn lë Drusila,
tu unaꞌ Israel.
Orzeꞌ ngurezh xaꞌ Pab par diꞌzh Pab lo rop tsaꞌ xaꞌ reꞌ,
xmod paꞌ nak ñila men widiꞌzh cheꞌn Jesukrist.
25 Per or midiꞌzh Pab,
xmod nzhakla Dios ban men,
mbaino midiꞌzh Pab naleꞌtraꞌ men kwaꞌn nzhakla kwerp cheꞌn men,
porke lëꞌ Dios gab xmod gak kun kad men por rë kwaꞌn nileꞌ men yizhyuo reꞌ,
orzeꞌ mizheb Jwels,
no nzhab Jwels lo Pab:
―Bizë;
baꞌ or gapa tiemp,
kwezha lu xtu wëlt.