2 Gunabe̱ꞌ xiche da dxuléꞌe na nape̱ꞌ xel-laꞌ dxenná bea da guꞌe̱ chéaje̱ꞌ xudauꞌ caꞌ zaj nnita xe̱zre Damasco,

chee̱ séquene̱ꞌ cheajxedílaje̱ꞌ benneꞌ caꞌ dxeléajle̱ꞌe̱ chee̱ dizraꞌ chaweꞌ chee̱ Jesús,

ne che̱ꞌe̱ le̱ꞌ,

benneꞌ biu,

ne nuꞌula caꞌ,

chee̱ guzré̱ꞌe̱ le̱ꞌ lizre xia lu xe̱zre Jerusalén.

3 Naꞌ gate ne xuꞌe̱ neza zéaje̱ꞌ,

ne ca ba zua zrine̱ꞌ xe̱zre Damasco,

naꞌ bsaníꞌ tu xiꞌ naga zéaje̱ꞌ da zaꞌ xabáa.

4 Saulo xeajcházie̱ꞌ lu xu,

naꞌ benne̱ꞌ chiꞌi tu benneꞌ dxe̱ꞌe̱ le̱ꞌ:

―Saulo,

Saulo,

¿bizr chee̱ naꞌ nau ziꞌ xuzruꞌ nedaꞌ?

5 Nadxa Saulo bche̱be̱ꞌ:

―¿Nuzra Lueꞌ,

Xran?

Naꞌ bénneaꞌ beche̱be̱ꞌ:

―Nedaꞌ nacaꞌ Jesús,

benneꞌ naꞌ nau ziꞌ xuzruꞌ.

Lueꞌze dxun ziꞌ cuinuꞌ,

ca dxun be̱zre gate dxulíbebaꞌ laweꞌ xágala da dxádue̱ꞌ-baꞌ.

6 Nadxa Saulo dxezrizque̱ꞌ dxezrebe̱ꞌ,

gunné̱ꞌ:

―Xran,

¿bi dxaca lazruꞌ gunaꞌ?

Naꞌ Xránadxu guzre̱ꞌ le̱ꞌ:

―Guxasa,

guxúꞌu lu xe̱zre,

naꞌ xelé̱queze̱ꞌ lueꞌ da dxal-laꞌ gunuꞌ.

7 Benneꞌ caꞌ zjácale̱ Saulo belezrébele̱ꞌe̱ laweꞌ da belenne̱ꞌ chiꞌi benneꞌ naꞌ,

san quebe nu beleléꞌene̱ꞌ.

8 Nadxa Saulo bexase̱ꞌ lu xu naꞌ,

naꞌ gate guxáꞌ lawe̱ꞌ,

quebe guca léꞌene̱ꞌ.

Caꞌ guca,

belequé̱ꞌe̱ ne̱ꞌe̱,

ne guleché̱ꞌe̱ le̱ꞌ lu xe̱zre Damasco.

9 Guzúe̱ꞌ naꞌ chunna zra quebe dxeléꞌene̱ꞌ,

ne quebe bi güeꞌe gudawe̱ꞌ.

10 Lu xe̱zre Damasco naꞌ zua tu benneꞌ dxéajle̱ꞌe̱ chee̱ Jesús le̱ꞌ Ananías,

naꞌ Xránadxu bleꞌe lawe̱ꞌ le̱ꞌ tu lu da bleꞌe le̱ꞌ,

naꞌ guzre̱ꞌ le̱ꞌ:

―Ananías.

Naꞌ le̱ꞌ beche̱be̱ꞌ:

―Nigá zuaꞌ,

Xran.

11 Nadxa gunná Xránadxu,

dxe̱ꞌe̱ le̱ꞌ:

―Guxasa,

guxíaj neza da nazí le na:

Neza Li,

naꞌ lizre Judas guche̱buꞌ chee̱ tu benneꞌ Tarso,

le̱ꞌ Saulo.

Benneꞌ nigá dxuláwizre̱ꞌ Dios.

12 Tu lu da bléꞌene̱ꞌ,

ba bléꞌene̱ꞌ tu benneꞌ le̱ꞌ Ananías chuꞌe̱ guzé̱ ne̱ꞌe̱ le̱ꞌ chee̱ xeléꞌene̱ꞌ.

13 Gate benne̱ꞌ da nigá,

naꞌ gunná Ananías:

―Xran,

benneꞌ zan ba buluzenne̱ꞌ nedaꞌ chee̱ benneꞌ nigá,

ne chee̱ xúgute̱ da cale̱la da dxune̱ꞌ chee̱ benneꞌ caꞌ dxeléajle̱ꞌe̱ chiuꞌ Lueꞌ lu xe̱zre Jerusalén.

14 Naꞌa ble̱ꞌe̱ nigá nape̱ꞌ xel-laꞌ dxenná bea chee̱ benneꞌ xíchaje̱ caꞌ chee̱ bxruze caꞌ,

chee̱ che̱ꞌe̱ lizre xia xúgute̱ benneꞌ dxelenné̱ꞌ Dios lu Lauꞌ Lueꞌ.

15 Naꞌ Xránadxu guzre̱ꞌ le̱ꞌ:

―Guxíaj.

Nedaꞌ ba gucáꞌa benneꞌ naꞌ chee̱ cheajzenne̱ꞌ benneꞌ xe̱zr la xu caꞌ,

ne benneꞌ wenná bea caꞌ,

ne benneꞌ Israel caꞌ,

ca naca chiaꞌ nedaꞌ.

16 Nedaꞌ guléꞌedaꞌ le̱ꞌ ca naca da zante̱ da saque̱ꞌe̱ ne̱ chiaꞌ nedaꞌ.

17 Nadxa Ananías guzé̱ꞌe̱ zéaje̱ꞌ xuꞌu naga zua Saulo.

Gate guxúꞌe̱ naꞌ,

guxrúa ne̱ꞌe̱ laweꞌ le̱ꞌ,

naꞌ guzre̱ꞌ le̱ꞌ:

―Saulo,

bichaꞌ.

Xránadxu Jesús,

Bénneaꞌ bleꞌe lawe̱ꞌ lueꞌ la neza naga zaꞌu,

nasel-le̱ꞌ nedaꞌ chee̱ xeléꞌenuꞌ,

ne chee̱ súale̱ Beꞌ Láꞌazxa lueꞌ.

18 Caꞌ guca beléxrujte̱ lu xiaj lawe̱ꞌ da zaj naca ca xrlacu bela,

naꞌ beléꞌene̱ꞌ.

Naꞌ bexasa Saulo,

ne gudxúate̱ꞌ nisa.

19 Gudé naꞌ gudawe̱ꞌ,

ne bedipe̱ꞌ.

Begáꞌane̱ꞌ tu chupa zra nen benneꞌ Damasco caꞌ dxeléajle̱ꞌe̱ chee̱ Jesús.

20 Nadxa guzú lau Saulo dxuchálaje̱ꞌ chee̱ Jesús lu xuꞌu ga dxelezraga judío caꞌ zaj nnite̱ꞌ Damasco,

dxenné̱ꞌ Jesús naque̱ꞌ Zriꞌine Dios.

21 Xúgute̱ benneꞌ belénene̱ꞌ chee̱ꞌ belexebánene̱ꞌ,

dxelenné̱ꞌ:

―¿Quegá benneꞌ nigá bénneaꞌ gudáu ziꞌ xuzre̱ꞌ benneꞌ caꞌ zaj zre̱ꞌe̱ Jerusalén,

benneꞌ caꞌ dxelenné̱ꞌ Dios lu La Jesús?

¿Quegá lé̱queze̱ꞌ naꞌ ble̱ꞌe̱ nigá chee̱ che̱ꞌe̱ benneꞌ caꞌ xe̱zre Jerusalén chee̱ gudée̱ꞌ le̱ꞌ lu naꞌ benneꞌ xíchaje̱ caꞌ chee̱ bxruze caꞌ?

22 Saulo bchálajdxe̱ꞌ du lazre̱ꞌ chee̱ Jesús,

ne dxuléꞌene̱ꞌ Jesús naque̱ꞌ Cristo chee̱ Dios,

naꞌ bzua zrie̱ꞌ benneꞌ judío caꞌ zaj zre̱ꞌe̱ Damasco.

23 Ca gudé zaneꞌ zra,

benneꞌ judío caꞌ belune̱ꞌ tuze dizraꞌ xelútie̱ꞌ Saulo.

24 Gunezne̱ꞌ le̱ꞌ da nigá.

Te zra ne chizrela gulebeza benneꞌ judío caꞌ dxuꞌa dxa xuꞌu caꞌ naga dxelexedxúaj bénneache xe̱zre naꞌ,

chee̱ xelútie̱ꞌ le̱ꞌ.

25 Nadxa benneꞌ caꞌ dxeléajle̱ꞌe̱ chee̱ Jesús gulegúꞌe̱ Saulo tu lu xcuite lba zren,

naꞌ buluxulétaje̱ꞌ le̱ꞌ chizrela le̱ꞌe̱ zeꞌe da naxechaj na xe̱zre.

Caꞌ guca,

gulá Saulo.

26 Gate bezrín Saulo Jerusalén,

guca lazre̱ꞌ gune̱ꞌ tuze benneꞌ caꞌ dxeléajle̱ꞌe̱ chee̱ Jesús,

san benneꞌ caꞌ dxelezrebe̱ꞌ le̱ꞌ laweꞌ da quebe dxeléajle̱ꞌe̱ ba dxéajle̱ꞌe̱ Saulo chee̱ Jesús.

27 Bernabé guché̱ꞌe̱ Saulo,

ne bze̱ꞌ le̱ꞌ lau benneꞌ gubáz caꞌ chee̱ Jesús.

Naꞌ bchálajle̱ Bernabé gubáz caꞌ ca bleꞌe Saulo Xránadxu la neza,

ne ca be̱n Xránadxu bchálajle̱ne̱ꞌ Saulo,

ne ca bchalaj Saulo du lazre̱ꞌ lu xe̱zre Damasco nen xel-laꞌ dxenná bea chee̱ La Jesús.

28 Nadxa Saulo begáꞌane̱ꞌ Jerusalén,

dxedále̱ne̱ꞌ benneꞌ caꞌ.

29 Bchalaj Saulo du lazre̱ꞌ lu La Xránadxu,

dxuchálajle̱ne̱ꞌ benneꞌ caꞌ dxelenné̱ꞌ dizraꞌ griego,

san benneꞌ caní gulaca lazre̱ꞌ xelútie̱ꞌ le̱ꞌ.

30 Gate guleque beꞌe biche ljwézredxu da caní,

naꞌ guleché̱ꞌe̱ Saulo lu xe̱zre Cesarea,

naꞌ lu xe̱zre naꞌ gulesel-le̱ꞌ le̱ꞌ xe̱zre Tarso.

31 Nadxa benneꞌ caꞌ dxelezrague̱ꞌ lu La Jesús tu tu xe̱zre zaj nababa Judea,

ne Galilea,

ne Samaria,

gulebeza zri lazre̱ꞌ,

ne beledipa lazre̱ꞌ.

Xel-laꞌ dxelezrebe gulaque̱ꞌ Xránadxu tuze,

naꞌ laweꞌ da gúcale̱ Beꞌ Láꞌazxa le̱ꞌ,

gulane̱ꞌ.

32 Gate dxedá Pedro dxeajnné̱ꞌe̱ biche ljwézredxu caꞌ,

naꞌ guxíajqueze̱ꞌ xeajnné̱ꞌe̱ benneꞌ caꞌ dxeléajle̱ꞌe̱ chee̱ Jesús lu xe̱zre Lida.

33 Naꞌ bezrague̱ꞌ tu benneꞌ le̱ꞌ Eneas,

bache guca xrunuꞌ iza de̱ꞌ lu daꞌa laweꞌ da naque̱ꞌ benneꞌ zrinnaj.

34 Naꞌ gunná Pedro,

dxe̱ꞌe̱ le̱ꞌ:

―Eneas,

Jesucristo ba bexune̱ꞌ lueꞌ.

Bexasa,

ne butube daꞌa chiuꞌ.

Naꞌ bexásate̱ Eneas naꞌ.

35 Beleléꞌe xúgute̱ benneꞌ le̱ꞌ,

benneꞌ zaj zre̱ꞌe̱ xe̱zre Lida,

ne xe̱zre Sarón,

naꞌ belexaque̱ꞌ chee̱ Xránadxu.

36 Lu zra naꞌ zua tu nuꞌula le̱ꞌ Tabita lu xe̱zre Jope.

Dxéajle̱ꞌe̱ chee̱ Jesús.

Lu dizraꞌ griego le̱ꞌ Dorcas.

Nuꞌula nigá dxúnqueze̱ꞌ da xrlátaje,

ne dxácale̱ne̱ꞌ benneꞌ xacheꞌ caꞌ.

37 Lu zra caꞌ guxúꞌu Dorcas xel-laꞌ we̱ꞌ,

naꞌ gutie̱ꞌ.

Naꞌ bulugazje̱ꞌ le̱ꞌ,

ne belexrue̱ꞌ le̱ꞌ tu lu xuꞌu naga zua gudxupeꞌ cuía dxala.

38 Xe̱zre Jope naꞌ zua na gagu naga zua xe̱zre Lida naga zua Pedro,

naꞌ laweꞌ da zaj neze benneꞌ Jope caꞌ zue̱ꞌ naꞌ,

naꞌ gulesel-le̱ꞌ chupa benneꞌ biu cheajlegue̱zre̱ꞌ le̱ꞌ:

―Gudázega xe̱zre Jope.

39 Nadxa Pedro guxíajle̱ne̱ꞌ benneꞌ caꞌ.

Gate bzrine̱ꞌ naꞌ,

naꞌ beleché̱ꞌe̱ le̱ꞌ naga zrua Dorcas naꞌ,

naꞌ xúgute̱ nuꞌula caꞌ ba zaj nate benneꞌ chie̱ꞌ zaj naxéchaje̱ꞌ Pedro dxelebezre̱ꞌ,

ne dxululéꞌene̱ꞌ le̱ꞌ zra nuꞌula,

ne zra benneꞌ biu,

da caꞌ be̱n Dorcas naꞌ gate ne zue̱ꞌ nen benneꞌ caꞌ.

40 Nadxa guleaj Pedro xúgute̱ benneꞌ caꞌ,

naꞌ bzu zribe̱ꞌ bchálajle̱ne̱ꞌ Dios.

Naꞌ gunné̱ꞌe̱ nuꞌula gate naꞌ,

gunné̱ꞌ:

―Tabita,

bexasa.

Nadxa nuꞌula naꞌ bexáꞌ lawe̱ꞌ,

naꞌ gate bléꞌene̱ꞌ Pedro,

bexase̱ꞌ gudxéꞌe̱.

41 Naꞌ Pedro bequé̱ꞌe̱ ne̱ꞌe̱,

bechise̱ꞌ le̱ꞌ.

Nadxa gunné̱ꞌ biche ljwézredxu caꞌ,

ne nuꞌula caꞌ ba gute benneꞌ biu chee̱ꞌ,

naꞌ bléꞌene̱ꞌ benneꞌ caꞌ le̱ꞌ naca bane̱ꞌ.

42 Ca guca da nigá belén ca naca benneꞌ zaj zre̱ꞌe̱ xe̱zre Jope,

naꞌ benneꞌ zan guléajle̱ꞌe̱ chee̱ Xránadxu.

43 Pedro begáꞌane̱ꞌ zaneꞌ zra lu xe̱zre naꞌ lizre Simón,

tu benneꞌ dxucáꞌana chaweꞌ xide zra be̱ xixreꞌ.