Saulo dxenáu ziꞌ xuzre̱ꞌ benneꞌ caꞌ dxeléajle̱ꞌe̱ chee̱ Jesús
8
Saulo guque̱ꞌ tuze nen benneꞌ caꞌ belutie̱ꞌ Esteban.
Lu zra náꞌqueze gulezú lawe̱ꞌ dxelau ziꞌ xuzre̱ꞌ benneꞌ caꞌ dxeléajle̱ꞌe̱ chee̱ Jesús,
benneꞌ caꞌ zaj zre̱ꞌe̱ xe̱zre Jerusalén.
Xúgute̱ꞌ belexase dínnaje̱ꞌ ca naca xe̱zre caꞌ zaj nababa Judea,
ne xe̱zre caꞌ zaj nababa Samaria.
Benneꞌ gubáz caꞌ belexegáꞌane̱ꞌ xe̱zre Jerusalén naꞌ.
2 Bal-la benneꞌ caꞌ zaj naque̱ꞌ chee̱ Dios bulucache̱ꞌ Esteban naꞌ,
ne gulebézrele̱ꞌe̱ chee̱ꞌ.
3 Dxácate̱ naꞌ Saulo dxenáu ziꞌ xuzre̱ꞌ benneꞌ caꞌ dxeléajle̱ꞌe̱ chee̱ Jesús,
naꞌ guxúꞌe̱ tu tu xuꞌu chee̱ cheajxrube xue̱ꞌ benneꞌ caꞌ,
ne cheajluꞌe̱ le̱ꞌ lizre xia.
Dxuluchálaje̱ꞌ dizraꞌ chaweꞌ chee̱ Jesús naga nababa Samaria
4 Benneꞌ caꞌ chee̱ Cristo,
benneꞌ buluzrúnnuje̱ꞌ Jerusalén,
buluchálaje̱ꞌ dizraꞌ chaweꞌ chee̱ Jesús gátete̱ze naꞌ zjaque̱ꞌ.
5 Felipe,
tue̱ꞌ benneꞌ caꞌ,
guxíaje̱ꞌ tu xe̱zre naga nababa Samaria,
naꞌ guzú lawe̱ꞌ dxuchálajle̱ne̱ꞌ benneꞌ caꞌ ca naca chee̱ Cristo.
6 Benneꞌ caꞌ zaj nazrague̱ꞌ belén xánnene̱ꞌ ca da dxuchalaj Felipe,
ne beleléꞌequezne̱ꞌ ca naca xel-laꞌ waca caꞌ da dxune̱ꞌ.
7 Benneꞌ zan,
benneꞌ zaj xuꞌe̱ beꞌ xriwe̱ꞌ belexexaque̱ꞌ,
naꞌ beꞌ xriwe̱ꞌ caꞌ belexedxúaj na lu xichaj lázrdau benneꞌ caꞌ,
dxelebezre xaꞌa na,
naꞌ benneꞌ zan benneꞌ zaj zua zri niꞌa ne̱ꞌe̱,
ne benneꞌ zrinnaj caꞌ belexexaque̱ꞌ.
8 Caꞌan guca,
gulebéle̱ꞌe̱ xúgute̱ benneꞌ caꞌ lu xe̱zre naꞌ.
9 Zua naꞌ tu benneꞌ le̱ꞌ Simón,
nédxute̱ guque̱ꞌ benneꞌ wazráꞌ,
ne guzí xe̱ꞌe̱ benneꞌ Samaria caꞌ,
dxenné̱ꞌ naque̱ꞌ tu benneꞌ szren.
10 Xúgute̱ꞌ belén xánnene̱ꞌ chee̱ꞌ,
benneꞌ cazraze caꞌ,
ne benneꞌ blau caꞌ,
gulenné̱ꞌ:
―Benneꞌ nigá nape̱ꞌ xel-laꞌ szren chee̱ Dios.
11 Gulape̱ꞌ le̱ꞌ ba láꞌana laweꞌ da lu xel-laꞌ wazráꞌ chee̱ꞌ naꞌ guzí xe̱ꞌe̱ benneꞌ caꞌ zaneꞌ iza.
12 Gate guléajle̱ꞌe̱ chee̱ dizraꞌ chaweꞌ da dxuchalaj Felipe ca dxenná bea Dios,
ne ca naca chee̱ La Jesucristo,
xúgute̱ꞌ,
benneꞌ biu,
ne nuꞌula caꞌ,
beledxúe̱ꞌ nisa.
13 Cáꞌanqueze Simón naꞌ guxéajle̱ꞌe̱ chee̱ Jesús,
ne gudxúe̱ꞌ nisa,
naꞌ guzú lawe̱ꞌ zéajle̱ne̱ꞌ Felipe,
naꞌ dxexebánene̱ꞌ ca naca xel-laꞌ waca da za xabáa da dxun Felipe.
14 Gate benneꞌ gubáz caꞌ chee̱ Jesús,
benneꞌ zaj zre̱ꞌe̱ Jerusalén,
belenne̱ꞌ gulezíꞌ lu naꞌ benneꞌ Samaria caꞌ xrtizraꞌ Dios,
naꞌ gulesel-le̱ꞌ Pedro ne Juan naꞌ.
15 Gate belezrine̱ꞌ naꞌ,
naꞌ belenabe̱ꞌ law Dios chee̱ benneꞌ Samaria caꞌ dxeléajle̱ꞌe̱ chee̱ Jesús chee̱ xelezíꞌe̱ Beꞌ Láꞌazxa.
16 Quebe ne xida Beꞌ Láꞌazxa súale̱ne̱ꞌ netú benneꞌ caꞌ.
Tuze beledxúaze̱ꞌ nisa lu La Xránadxu Jesús.
17 Nadxa Pedro ne Juan buluzé̱ ne̱ꞌe̱ laweꞌ benneꞌ caꞌ,
naꞌ gulezíꞌe̱ Beꞌ Láꞌazxa.
18 Gate bleꞌe Simón blaꞌ Beꞌ Láꞌazxa gate gubáz caꞌ buluzé̱ ne̱ꞌe̱ benneꞌ caꞌ,
naꞌ guca lazre̱ꞌ gunézruje̱ꞌ gubáz caꞌ dumí,
19 gunné̱ꞌ:
―Le gunna nedaꞌ xel-laꞌ waca nigá chee̱ gate guzéaꞌ naꞌa laweꞌ nútete̱ze benneꞌ,
naꞌ siꞌe̱ Beꞌ Láꞌazxa.
20 Nadxa guzre Pedro le̱ꞌ:
―Wabía xiꞌ dumí chiuꞌ naꞌ nen lueꞌ laweꞌ da dxéquenuꞌ wazéquenuꞌ gaꞌu nen dumí ca da dxúnnaze Dios.
21 Quebe naca chiuꞌ,
ne quebe napuꞌ lataj lu da nigá laweꞌ da quebe naca xrlátaje xichaj lázrdaꞌu lau Dios.
22 Bsan ca naca da cale̱la chiuꞌ nigá,
ne gutaꞌ xue Dios chee̱ gunite lawe̱ꞌ chiuꞌ ca da gúquenuꞌ lu xichaj lázrdaꞌu.
23 Dxeque beꞌedaꞌ nazrate̱ xichaj lázrdaꞌu da cale̱la,
naꞌ da cale̱la naꞌ nuchéaj na lueꞌ.
24 Naꞌ beche̱be Simón:
―Le gataꞌ xue Xránadxu chiaꞌ nedaꞌ,
chee̱ quebe gaca chiaꞌ ca da gunnáuꞌ.
25 Ca gudé belexeche̱be̱ꞌ chee̱ Jesús,
ne buluchálaje̱ꞌ dizraꞌ chee̱ Dios,
naꞌ benneꞌ gubáz caꞌ buluzenne̱ꞌ bénneache dizraꞌ chaweꞌ chee̱ Jesús lu xé̱zredu caꞌ zaj nababa Samaria,
naꞌ ca gudé naꞌ belexezrine̱ꞌ Jerusalén.
Felipe dxuchálajle̱ne̱ꞌ tu benneꞌ chee̱ xe̱zr la xu Etiopía
26 Gudé naꞌ guzre tu gubáz chee̱ xabáa chee̱ Xránadxu Felipe:
―Guxasa,
guxíaj chaláꞌa naga dxedé gubizra beuꞌ zaga caꞌ,
naga zrua neza chee̱ Jerusalén da zeaj xe̱zre Gaza,
da dxedé na le̱ꞌe̱ xixreꞌ laweꞌ lataj.
27 Felipe guxase̱ꞌ,
naꞌ guzé̱ꞌe̱ zéaje̱ꞌ,
naꞌ la neza naꞌ bezrague̱ꞌ tu benneꞌ Etiopía.
Benneꞌ nigá naque̱ꞌ wizre,
ne naque̱ꞌ benneꞌ szren xuꞌu lu neꞌe̱ xel-laꞌ gunníꞌa chee̱ Candace,
nuꞌula naꞌ dxenná béꞌene̱ꞌ xe̱zr la xu Etiopía.
Ba guxíaj benneꞌ nigá Jerusalén chee̱ be̱ láꞌane̱ꞌ Dios.
28 Naꞌa zexíaje̱ꞌ Etiopía naꞌ,
dxeꞌe̱ lu carreta chee̱ꞌ da dxelecáꞌa bzrinaꞌ,
ne dxulabe̱ꞌ xiche naga zaj naxúaj xrtizraꞌ Isaías,
benneꞌ bchálaje̱ꞌ waláz chee̱ Dios.
29 Nadxa gunná Beꞌ Láꞌazxa,
guzre̱ꞌ Felipe:
―Gubiga gagu cuita carreta naꞌ.
30 Gate gubiga Felipe naꞌ benne̱ꞌ dxulaba bénneaꞌ xiche chee̱ Isaías,
naꞌ bche̱be̱ꞌ le̱ꞌ:
―¿Dxéajniꞌinuꞌ ca naca da dxulabuꞌ?
31 Benneꞌ biu naꞌ guzre̱ꞌ le̱ꞌ:
―¿Ájazra gaca chéajniꞌidaꞌ che quebe nu chiláꞌ guzéajniꞌi nedaꞌ?
Naꞌ guzre̱ꞌ Felipe cuene̱ꞌ cuéꞌle̱ne̱ꞌ le̱ꞌ.
32 Naga dxulabe̱ꞌ lu xiche chee̱ Dios dxenná na caní:
Beleché̱ꞌe̱ Le̱ꞌ naga gatie̱ꞌ ca tu zrílaꞌdauꞌ,
naꞌ ca zrilaꞌ naꞌ dxátabaꞌ zrize lau benneꞌ caꞌ dxuluchibe̱ꞌ zrabaꞌ,
caꞌ bé̱nqueze Le̱ꞌ,
quebe bi gunné̱ꞌ.
33 Bulucáꞌana ditje̱ꞌ Le̱ꞌ,
ne quebe belúꞌe̱ lataj nu guchiꞌa chee̱ꞌ,
ne quebe nu gaca guchálaje̱ꞌ ca naca chee̱ zriꞌine zre sue̱ꞌ,
laweꞌ da belutie̱ꞌ Le̱ꞌ.
34 Naꞌ benneꞌ Etiopía naꞌ bche̱be̱ꞌ Felipe:
―Gunná,
¿nuzra chee̱ dxenná benneꞌ nigá,
cheé̱queze̱ꞌ naꞌ,
che chee̱ xetú benneꞌ xula?
35 Nadxa guzú lau Felipe bzéajniꞌine̱ꞌ le̱ꞌ ca naca naga dxulabe̱ꞌ,
ne bchálajle̱ne̱ꞌ le̱ꞌ dizraꞌ chaweꞌ ca naca chee̱ Jesús.
36 Gate guledée̱ꞌ tu naga de̱ nisa,
naꞌ gunná benneꞌ Etiopía naꞌ:
―Nigá de̱ nisa.
¿Quebe gaca chuaꞌ nisa,
zra?
37 Felipe guzre̱ꞌ le̱ꞌ:
―Che dxéajle̱ꞌu dute̱ lázrdaꞌu,
waca.
Benneꞌ naꞌ beche̱be̱ꞌ:
―Dxéajle̱ꞌa naca Jesucristo Zriꞌine Dios.
38 Nadxa gunná béꞌene̱ꞌ guleza carreta naꞌ,
naꞌ dxúpate̱ꞌ guluꞌe̱ lu nisa,
naꞌ Felipe bchue̱ꞌ le̱ꞌ nisa.
39 Gate belexedxúaje̱ꞌ lu nisa naꞌ,
naꞌ Beꞌ chee̱ Xránadxu beche̱ꞌe̱ Felipe naga xula.
Benneꞌ Etiopía naꞌ québedxa bléꞌene̱ꞌ le̱ꞌ,
naꞌ bexuꞌe̱ neza chee̱ꞌ dute̱ xel-laꞌ dxebé.
40 Felipe naꞌ guque béꞌene̱ꞌ ba zue̱ꞌ xe̱zre Azoto,
naꞌ gudée̱ꞌ tu tu xe̱zre dxuchálaje̱ꞌ dizraꞌ chaweꞌ ca naca chee̱ Jesús cadxa bezrine̱ꞌ Cesarea.