Cha Sol riꞌi karovoru
9
Taim vemona,
Cha Sol inia kairai veka va nayeiy disaipel ya Biapako neviri.
Yah kanoi riya hetpris vo tempel,
The Conversion of Saul (Aposel 9:1-19)
2 yah katere roa pas-a nareꞌe nerenori roiy aro hetman rere oꞌro lotu yei aro Juda kerinia mataimon pako Damaskus.
Yah kope hetpris-a pas-a karereꞌe yah kope kariya varu Cha Sol.
Awirai vemona kerinia pas emo,
kwirai veka,
“Boh Cha Sol nayarai aro biam ovu o aro bom ovu inia pava nepekeu Rara ya Biapako,a
va nako yei nekape mataimon pako Jerusalem veka kalabus.”
3 Yake Cha Sol karereu mataimon pako Jerusalem yah kanoi Damaskus.
Kope taim karoika kakuke ri Damaskus,
bererenki lait vo heven raꞌa kobriri koraro korokoraka.
Lait vemona koplenki poaka,
4 yah kope Cha Sol kararo karei meꞌri,
yah karivo bia raꞌa ava kairai roa.
Bia emo ava kairai roa veka,
“Mah Sol,
Mah Sol!
Toh koraka rope tah mema inia nai-a kamona?”
5 Kope Cha Sol katere roa veka,
“Biapako,
toh mema bia nape?”
Yah kope bia vemona kairai roa veka,
“Nena Jisas,
mema inia nai-a kamona.
6 Nama variko yah nanomi mataimon pako,
va kope bia raꞌa va nairai roma arape va namao.”
7 Aro vemona kenopi pova Cha Sol emo,
keririko toro yah rova kobaunkire reiy.
Poko ya bio kerivo,
toh beya keyaraka vai.
8 Yah kope Cha Sol kavariko.
Yah taim ine kaperiki,
beya kuiniari ao rava nayara vai,
ine yake keria taipo veni.
Yah eno pon keraniaka yah kiute kenopi naka Damaskus.
9 Kakei nao ine taipo ya konoi kuiniari umo 3-pla,
yah beya piva katon vai tah akorom minia beya kara vai.
10 Kope mataimon pako Damaskus emo,
disaipel raꞌa kakei,
awoꞌo ya Cha Ananaias.
Kayoyo naka Biapako kairai roa veka,
“Mah Ananaias.”
Yah kope Cha Ananaias kairai roa veka,
“Biapako,
kakeni emo.”
11 Yah kope Biapako kairai roa veka,
“Nama variko yah namomi oꞌro ya Cha Judas kwinia rara voro kepina veka Rara Niniu.
Yah kope nama tere moiy mova bia raꞌa vo mataimon Tarsus,
awoꞌo ya Cha Sol.
Mare kakei beten-a inia karao ere. b
12 Cha Sol kayoyo veka bia raꞌa awoꞌo ya Cha Ananaias,
kakai yah eno riyempin kareretaka yah ine va kaperiki varu.”
13 Kope Cha Ananaias kairaiki roa veka,
“Biapako,
bia voro,
kana rivo beyo prumo chirai pova veka pasin taipo maramaraꞌa karare rare roiy aro bombiam mema kekepi Jerusalem-e.
14 Bia emo,
aro bikpris-a chirai poa kakai va nako yei aro voro lotu na beten-a inia kepao po awoꞌo mema ero,
yah narerei roki kalabus.”
15 Toh kope Biapako kairai roa Cha Ananaias veka,
“Nanomi!
Mare bia emo kana mompe ya veꞌen veka wokman nena,
yah awoꞌo nena va nairiraiꞌvo nanoi riꞌiy aro voro beya kiave Juda vai,
awei king yei yah yei aro Israel minia.
16 Nena va naniritaka veka nai pako va napoi taim awoꞌo nena nairiraiꞌvo nonoi roiy aro bombiam.”
17 Yah kope Cha Ananaias kaute kanoi yah kanoi oꞌro are ya Cha Judas.
Yah eno paraꞌa riyempin karereta Cha Sol,
yah kairai roa veka,
“Raꞌai Sol,
Biapako Jisas kakamap rima rara taim inia kamaute kakame.
Yah mare kairai rona kakane nima vora kuiniari ine nama periki varu yah rova name moho Holi Spirit.”
18 Taim Cha Ananaias awirai-a kapikimko,
bererenki ao veka ba biri kwinia ine ya Cha Sol koraro korei,
yah kope ava kayara varu.
Yah kope kavariko yah baptais-a kako.
19 Yah kope Cha Sol akorom-a kara yah kope kakupuana varu.
Cha Sol awirai neman ya God-a kairiraiꞌvo Damaskus
Yah Cha Sol baunke kakei riꞌiy disaipel umo ovu vovake vemo mataimon Damaskus.
20 Kope bererenki kavariko yah kanoi rorore oꞌro lotu yei aro Juda tah awirai-a kairiraꞌvo veka,
“Jisas ya Ma ya God”.
21 Aro koka awirai ya Cha Sol kerivo,
yah keririko toro.
Yah chirai veka,
“Bia ero inia karao roiy toro aro bombiam-a beten re lotu inia kepao po awoꞌo ya Jisas.
Inia karao karara mataimon pako Jerusalem,
yah kope mare kakai vora nakalabusim yei yah nako yei nenopi piꞌiy bikpris.”
22 Tah kope ya Cha Sol kakupuana ro revo awirai ya tah kairai roiy revo aro Juda kekepi mataimon Damaskus vora nariritai veka,
Jisas-e ya Krais.
Kope aro Juda kekepi Damaskus awirai ya Cha Sol kerivo tah beya kuiniari awirai rava nirai vora niaveyaka po awirai ya vai.
Juda ine kepia trotropu Cha Sol tah karereiy
23 Kope umo kere prumoki veꞌen,
yah kope aro Juda awirai-a ketiti moike veka va nepieya Cha Sol naraiy.
24 Tah kope Cha Sol awirai vo ao vemona kepao nepao poa emo,
karivo veni.
Umo nai re roro,
ine inia keore papiya revo kamo koka vo mataimon vemo vora nepieya naraiy.
25 Kope yei aro inia kiute popova Cha Sol-e,
keko ya roro tah kekope naka kamo pako raꞌa kwinia romonrora vo rei kworoka rari mataimon vemona.
Yah chirai poa kakei rovo baranja pako yah kereru koraro naka upuoꞌo vo rei pako vo mataimon vemona.
Cha Sol kakei Jerusalem
26 Kope taim Cha Sol kanoi kareiki Jerusalem,
yah karao nanoi naroroiko disaipel ovu.
Toh yei disaipel-a keriri poa yah beya kebilip veka ya kave disaipel vai.
27 Toh Cha Barnabas kako ya Cha Sol yah kanoi naka riꞌiy aposel.
Yah kope awirai ya Cha Sol pon kairai roiy veka,
“Cha Sol kayaraka Biapako yah kope Biapako ava kairai roa taim kaute ro rara koraro mataimon pako Damaskus.
Yah taim Cha Sol kakeiy Damaskus,
kakupuana ro awirai pon kairiraiꞌvo ro awoꞌo ya Jisas tah beya kariri vai.”
28 Yake Cha Sol kakei riꞌiy aposel ve mataimon pako Jerusalem tah katova roroiy.
Yah kakupuana ro revo awirai pon kairiraiꞌvo ro awoꞌo ya Biapako.
29 Yah ava inia kairai wararoiy aro Juda ovu inia poko Grik-a chirai ero.
Toh yei baunke,
rara inia keore nana vora nepieya naraiy.
30 Taim aro inia kebilip pova Jisasc ero ao vemona keyara,
keko ya Cha Sol kararo mataimon Sisaria,
yah kesalim ya kanoi mataimon Tarsus.
31 Korao veka tah aro bombiam vo sios kekepi provins Judia,
distrik Galili re distrik Samaria kekepi naꞌa riꞌi mariri tah kekupuana.
Holi Spirit veku koalpim yei tah kupuana koroi yah namba yei kokoi kopako.
Yah pava kepekeu pon pasin vo nepiakepi roko Biapako.
Cha Pita karao Cha Ainias kaneman varu
32 Kope Cha Pita katova kanoi rorore boko koka,
yah kope kararo kayarai aro bombiam ya God kekepi mataimon Lida.
33 Boko verenare,
kayaraka bia raꞌa awoꞌo ya Cha Ainias.
Kom-a keriaraiy yah inia kainia pon bet konoi kuiniari ainini 8-pla.
34 Yah kope Cha Pita kairai roa veka,
“Mah Ainias!
Mare Jisas Krais karao kama neman varu.
Nama variko yah bet mema nama roroko.”
Yah bererenki Cha Ainias kavariko karoi nake.
35 Yah aro koka kekepi mataimon Lida awei aro kekepi bo meꞌri Saron emo,
kepirikeiya Cha Ainias kaneman varu.
Yah riva kerovoru yah kekape piya Biapako.
Cha Pita karao Kwa Tabita kovariko varu
36 Kope mataimon Jopa,
disaipel bom-a rava kokei,
awoꞌo vo Kwa Tabita.
(Poko Grik,
kepina veka Kwa Dorkas.)
Bia bom vemona,
inia pasin neman-a korao yah inia koalpim yei aro bombiam ava kerebaun reiy ero.
37 Taim vemona ah va korao tah koraiyi.
Yah piva kereniri yah kere rere kwinia oꞌro rum raꞌa kwinia nake.
38 Mataimon Lida kwiniaka kakuke ri revo mataimon Jopa,
tah disaipel-a kerivo veka Cha Pita kakai kakei mataimon Lida.
Yah kope chirai poiy bia riyempin-a kerenopi piya yah keyirai poa veka,
“Ei,
kemere moma nakame momi bereren!”
39 Kope Cha Pita kavariko yah kanoi roꞌoiy bia riyempin.
Yah taim kenopi kerepiki mataimon Jopa,
yake kekope kekepi naka oꞌro rum vemona kwiniata nake.
Aro bom am-a keviri pere veꞌen ero,
kerekare kererori kakuke riya Cha Pita tah aro kerero.
Yah aimino re noreka vo Kwa Dorkas korare rare taim baunke kokei tare,
kere riritaka Cha Pita.
40 Kope Cha Pita kairai roiy aro bombiam koka kenopi naꞌao upuoꞌo,
yah ouku katureriki yah beten-a karao.
Yah kope karovoruki ri bia rai vemona yah kairai rou veka,
“On Tabita,
nom variko.”
Yah ine koperiki yah koyaraka Cha Pita yah kovariko kokei nake.
41 Yah Cha Pita eno karuavo yah kawoko koroi nake.
Yah kope kaiki roiy aro bombiam ya God awere aro bom am rere keviri pere veꞌen ero,
kekape.
Yah kariritai veka Kwa Tabita kokei tare.
42 Awirai vo ao vemona Cha Pita karao emo,
kwavetari konoi rorore boko koka kerinia mataimon Jopa,
yah kope prumo yei kebilip pova Biapako.
43 Cha Pita baunke kakei mataimon Jopa umo kere prumoki naka.
Kakei riya bia raꞌa awoꞌo ya Cha Saimon.
Bia emo,
bulmakau taꞌa kaririru yah kaore rarire kerinia revo vora beyo neko piya yah ao maramaraꞌa nepare pare.