Ensel-a kakai riya Cha Kornilius tah awirai-a kairai roa
10
Bia raꞌa kakei mataimon Sisaria,
awoꞌo ya Cha Kornilius.
Bia emo,
ya kepten yei 100 soldia vo Rom,
kepinai veka,
“Aro soldia vo kantri Itali.”
2 Kepten yei soldia vemona awei famili ya inia pava kepekeu pasin neman God-a karerero.
Yah ya awei aro koka kekepi piya oꞌro ya emo,
kesave kepiakepi roko God.
Bia emo ya beten-a inia karao roa God,
tah ao ya pin-a kavani roiy aro ava kere baun reiy.
3 Umo raꞌa,
korao veka 3 kilok baririki ao veka ao yoyo raꞌa kapirike revo vatiron.
Kayaraka ensel ya God-a kararo riya oꞌro are yah kairai roa veka,
“Mah Kornilius.”
4 Cha Kornilius ine katrorukeiya yah kariri,
yah kairai veka,
“Biapako,
toh arape?”
Yah ensel-a kairai roa veka,
“Beten mema,
yah ao voro inia kamiꞌiy beyo ero koneman veka ofa,
God-a kayara veꞌen tah ova kakina roma.
5 Mare va namairai moiy aro ovu nenopi mataimon Jopa vora nirai poa Cha Saimon,
awoꞌo ya raꞌa kepinaka veka Cha Pita va nakai.
6 Bia vemona kakei oꞌro ya Cha Saimon raꞌa,
boꞌo karao rore ame maramaraꞌa taꞌa veka bulmakau.
Oꞌro ya kwinia ro nao ika.”
7 Ensel-a ava kairai roa veꞌen Cha Kornilius,
yah kope korereiya yah konoi.
Yah kope Cha Kornilius kairiy riyempin yei wokboi ya tah soldia moike raꞌa kekape.
Soldia vemona,
inia kaute roꞌo pasin awaka ya God.
Tah umumoka inia kakei riya revo Cha Kornilius kakuke.
8 Cha Kornilius awirai-a kairai roiy revo ro ao vemona ensel-a kairai roa emo,
yake kairai roiy keparo mataimon Jopa.
Cha Pita ao-a kapirike veka kayoyo
9 Kiute kenopi yah kope uri vou,
kakuke ri 12 kilok,
kekape kakuke ri mataimon Jopa.
Kope Cha Pita,
kakoi kakeita oꞌro vora beten-a narao.
10 Cha Pita koraiyova yah karao akorom-a rava nara.
Toh akorom-a baunke mare inia kereraivi.
Yah ao raꞌa kapirike veka ao yoyo.
11 Kapirikeu uteno koruriki,
yah ao veka aimino pako ao raꞌa koawo kona 4-pla vo tah koreru koraro meꞌri pika.
12 Aimino pako vemona koraro nare ame maramaraꞌa veka,
ame rere kom 4-pla kereyinia ero yah rere ame voro kererin ro riꞌi ero yah rere ruꞌu.
13 Yah kope Cha Pita karivo poko raꞌa kwirai roa veka,
“Mah Pita!
Nama variko,
ame vemona namiere yah nama.”
14 Yah Cha Pita kairai veka,
“Baun poaka,
Biapako.
Nena ao voro beya koniniu ri ine mema kana vai,
tah ine konana rarimi beya kuiniari nema vai.
Lo memi kwirai veka ao vemona kere taipere.”
15 Yah kope poko vemona kwirai roa vova veka,
“Ao vemo God-a karare rare kere niniu,
beya namairai veka kere taipo vai.”
16 Ao vemona kokamap 3-pla taim,
yah kope bererenki aimino pako vemona kokoi varu uteno.
17 Yah Cha Pita kakei yah inia ova kakinakina ro ku vo ao vemona kapirikeu veka ao yoyo ero,
korao veka rope.
Yah kope aro vemona Cha Kornilius kasalim yei kekape emo,
yake kekape veni.
Yah ketere poiy bio ro oꞌro ya Cha Saimon kwinia rope,
yah kekape keropi kamo.
18 Yah kope kiepi veka,
“Cha Saimon,
awoꞌo ya raꞌa kepinaka veka Cha Pita,
era kakei vai?”
19 Yah taim Cha Pita inia ova kakinakina ro ao vemo kapirikeu veka ao yoyo ve,
yah kope Holi Spirit-a kwirai roa veka,
“Mah Saimon!
Beyo 3-pla keore nanama.
20 Nama variko namaro pika yah nanomi moiy.
Beya ova nama kinakina pako vai,
aro vemona nena veku kanairai noiy tah kekape.”
21 Yah Cha Pita kararo riꞌiy pika tah kairai roiy aro 3-pla veka,
“Nena bia voro inia kopore nana ero.
Toh kokape vora arape nopao?”
22 Yah chirai poa veka,
“Kepten yei 100 soldia Cha Kornilius,
kairai romi tah kekame mima.
Bia emo,
ya bia neman tah inia kariri roa God.
Aro Juda inia awoꞌo ya kiavoko nake.
Ensel raꞌa ya God-a kwirai roa va nairima vora nanomi oꞌro ya vora awirai mema pina narivo roma.”
23 Yah kope Cha Pita kako yei kenopi oꞌro are tah kaore rariy,
yah roro chinia piya.
Kope uri roronai kavariko yah kanoi roꞌoiy,
yah aro ovu kesave kebilip pova Jisas kekepi mataimon Jopa minia kenopi poꞌoiy.
Cha Pita kanoi oꞌro ya Cha Kornilius
24 Kope umo raꞌa vova kiute kenopi yah kerepiki mataimon Sisaria.
Cha Kornilius kakei kekeiy yah kairiy aro noo ya awei aro kura ya minia kekape tah keopokeu kekeiy.
25 Yah taim Cha Pita kakai oꞌro are ya Cha Kornilius,
kope Cha Kornilius kakai yah oku katureriki ri kom ya Cha Pita yah lotu karao roa.
26 Toh kope Cha Pita karaipakako varu yah kairai roa veka,
“Nama variko!
Nena minia bia kanapo.”
27 Taim kereropi ava baunke inia kereyirai,
yah kope Cha Pita kanoi are tah kapirikeiy aro bombiam koka keopokeu veꞌen oꞌro are.
28 Yah kairai roiy veka,
“Mopu veku kopu yara veꞌen veka lo memi Juda kwirai veka,
memi beya kuiniari nenomi nerom nemarara o nenomi nekem miꞌiy aro beya kiave Juda vai.
Toh God-a kariritana veka,
beya nanairai noa bia raꞌa veka beya kaniniu ri ine ya God vai.
29 Korao veka tah taim awirai mopu kanako veka kopere pona,
tapara ve kakane ke.
Beya ava kana pana vai.
Yah kope kana tere nopu,
toh koipina kakane no arape?”
30 Kope Cha Kornilius kairai roa veka,
“Umo 4-pla yake konoiki nao veni taim kakeni oꞌro nena yah kana beten,
taim veka vemona mare vemo,
3 kilok baribariri.
Beten-a inia kanao,
kope bererenki bia raꞌa karoi ine cha nena,
tah noreka ya koplenki poaka.
31 Yah kope kairai veka,
‘Mah Kornilius,
God-a beten mema karivo veni tah ova kakina ro minia pasin inia kamao ero.
Mema inia ava kama vani konoi roiy aro bombiam ava kere baun reiy.
32 Namairai moiy aro ovu nenopi Jopa yah niypia Cha Saimon,
awoꞌo ya raꞌa kepinaka veka Cha Pita.
Bia vemona kakei oꞌro ya Cha Saimon raꞌa.
Cha Saimon vemo boꞌo vo ame taꞌa maramaraꞌa karao,
oꞌro ya kwinia ro nao ika.’
33 Tapara vemona kanairai noiy aro ovu kenopi nama bereren ke,
tah mema pasin neman-a kamao yah kakame.
Yah mare wo,
memi aro koka vemona kekame kekemi ine ya God,
kemeremo awirai prumo Biapako kairai roma va nemi rivo.”
Cha Pita awirai-a kairiraiꞌvo oꞌro ya Cha Kornilius
34 Yah kope Cha Pita ava kairai veka,
“Awaka revo,
mare kana save,
God-a pasin vemona karao roiy aro bombiam koka,
yah yei aro raꞌa tirin minia.
35 God-a karere roꞌoi aro bombiam koka voro kepiakepi roko tah pasin neman-a inia kepao ero.
36 Mopu awirai vemona God-a karoi aro vo Israel kopu yara veꞌen,
awirai neman ya Jisas-a kairiraiꞌvo veka,
Jisas Krais ya Biapako memi aro bombiam koka.
Yah karao kekame romoꞌo moikera riya God.
37 Mopu veku kopu yara veꞌen arape kokamap provins Galili titja wo,
yah kope konoi boko koka vo Juda.
Ao vemona pava kererekeiya Cha Jon Baptais taim kairai roiy aro bombiam-a va baptais-a neko.
38 Mopu kopu yara veꞌen God-a kamakim ya Jisas vo Nasaret,
yah Holi Spirit re kupuana pako karoa.
Yah Jisas-a kanoi rorore boko maomao yah kalpim yei aro bombiam Satan-a karao ketaipei ero.
Ku vo korao veka God-a kakei riya.
39 “Yah memi aro vo ava kemi pirikere yah kemirai more ao vemona Jisas-a karare rare Juda re mataimon pako Jerusalem.
Yah kope ketutari naka aꞌai raꞌa yah karai.
40 Kope umo namba 3,
God-a karao kavariko varu,
yah kakai riꞌiy ine yei aro bombiam-a kepirikeiya.
41 Aro Juda koka beya kepirikeiya vai.
Kakai rimi aro memi God-a kamompe pon,
yah awirai ya kemiriraiꞌvo.
Memi aro vemona,
akorom-a kema yah piva kemiton miya minia.
42 Yah awirai kupuana karomi va awirai ya nemiriraiꞌvo novatiron veka God-a bia vemona pon kamompe va nakei veka jas yei aro vemo kekepi tare tah aro voro keviri veꞌen ero.
43 Profet prumo awirai-a ya chiriraiꞌvo rore arape va narare rare.
Korao veka tah aro voro kebilip pova ero,
va God-a sin yei napereuki reiy ro awoꞌo ya Jisas.”
Aro yei raꞌa tirin-a Holi Spirit-a keko
44 Taim Cha Pita karoi yah inia ava kairai,
kope Holi Spirit-a korarotai aro maomao vemona kekepi yah awirai-a inia kerivo emo.
45 Aro Juda voro kebilip tah kekape pova Cha Pita emo keririkope toro,
keyara veka,
God-a Holi Spirit-a karoiy veka presen yei aro voro beya kiave Juda ero.
46 Ku vo korao veka,
aro vemona Holi Spirit-a keko emo ava chirai poko maramaraꞌa yah awoꞌo ya God-a kiavoko nake.
Yah kope Cha Pita kairai veka,
47 “Aro vemona Holi Spirit-a keko veꞌen veka memi veku.
Toh bia nape kainiari narao rarimi vora beya piva nemi baptaisim yei vai?”
48 Yah Cha Pita awirai kupuana kairai roiy aro bombiam vemona va baptais-a neko po awoꞌo ya Jisas Krais.
Yah kope ketere poa Cha Pita va nakeiki riꞌiy umo ovu vova ke.