Awirai Neman Cha Luk kareꞌe kuiniari noalpim memi vora nemi yara veka Jisas ya bia ya nako yei varu Israel awei aro bombiam ovu minia. Taim Jisas-a boꞌo ya karao, kairai roiy aro bombiam veka, Holi Spirit-a koranaka vora navariko yah awirai ya God-a nairai nonoi roiy aro taipo awei aro mererai (nopu yara Luk 4.18). Awirai aka koraka, buk vemona, Cha Luk kairai rova Jisas kaokoku roiy revo aro bombiam nai maramaraꞌa keko tah inia kalpim yei.

Ao vemona Jisas-a karare rare emo, karao aro ya ova koroiy rova revo. Taim Kwa Maria koavia, aro bombiam-a ova koroiy poaka (nopu yara 1.42-48 re 2.10), kope pa vo buk vemona, taim Jisas-a kope kavariko yah kakoi heven, aro bombiam-a ova koroꞌoi rova minia (nopu yara 24.52).

Ao prumo vo laip ya Jisas, Cha Luk unake pon kairai rore, tah awirai vemona beya kerinia buk ovu vai. Cha Luk unake pon kairai rore ao prumo taim Jisas kararo meri vemona. Cha Luk kairai rova Jisas-a awirai bokis-a kairai rova bia Samaria kalpim ya bio raꞌa, aro taipo kepieya tah kainia ro rara. Kope Jisas awirai bokis raꞌa kairai rova ma biam raꞌa karereiya aka yah kanoi kakei boko raꞌa kwinia rarapa yah kope mani ya kobauni, yah awirai bokis ovu vova ya Jisas. Cha Luk unake pon kairai rova bia ya takis-a kako, awoꞌo ya Sakius.

Ao ovu vova Cha Luk inia kairai rore, emo pasin vo beten-a niawo kupuana, boꞌo vo Holi Spirit re pasin God-a inia karao vora ao taipere beyo kepare pare naririkereki.

Awirai ya Cha Luk beya kobaunki buk vemonamo vai, bauni. Ku vo koraka, ya bia vo awirai-a kareꞌe kerinia buk kemina veka Aposel. Buk vemona kwirai rore awirai rere arape aposel kepare pare taim Jisas-a kakoi veꞌen heven.