Awirai neman
Cha Luk
Kareꞌe
Cha Luk awirai ve kareꞌe roa Cha Tiofilus
1
Biabiꞌiy Tiofilus,a
titja beyo prumo ketraim awirai-a kepepeꞌe pore ao prumo God-a karao romomi.
2 Pa kepekeo awirai yei beyo voro ao keyarare ine yei ero,
riu revo ku rere ao vemona kovariko ve.
Aro ve kekepi veka aro wokman vo awirai vemo,
tah awirai ve kirai pomi.
3 Tah nena minia,
kana awirai vemona naneꞌe nokai roma.
Boꞌo inia kanao kakane atoke,
inia autere kanao noꞌo revo ku rere ao vemona.
Tah mare kaneꞌe revo veka,
ao vemona awaka kererao naꞌao.
4 Vora nama yara veka awirai voro kepiritama ero,
ero awaka revo.
Ensel-a kairai roa Cha Sekaraia veka Cha Jon va nakamap
5 Taim Cha Herotb kakei king yei Judia,
pris rava kakei awoꞌo ya Cha Sekaraia.
Ya pris yei aro Abiya.c
Om ya ve,
vo bio raꞌa yei aro ya Cha Aron,d
awoꞌo vo Kwa Elisabet.
6 Yei kerekepi revo ri ine ya God.
Tah pa inia kere pikere revo lo re awirai ya Biapako,
tah beya pasin taipo raꞌa kerepao ri ine ya God vai.
7 Toh meva kobaun reiy,
ku vo koraka Kwa Elisabet beya kuiniari me va noru vai.
Yake kereopu veni.
8 Kope roraꞌa aro ya Cha Sekaraia kenopi boꞌo pris-a nepao,e
yah Cha Sekaraia minia boꞌo pris-a karao ri ine ya God.
9 Yah kope pilai satu kepao vora neore naka pris rope pon va nanoi tempel are ya Biapako,
vora paura ekwiria momoi naki.
Yah pasin vemona kepao,
tah Cha Sekaraia kepao naka vora nanoi tempel are paura naki.
10 Taim paura kaki,
aro bombiam puru pako kekepi tempel upuoꞌo yah inia beten-a kepao.
11 Yah kope ensel ya Biapako raꞌa kararo karoi riya Cha Sekaraia eno paraꞌa awaka vo alta vo paura ekwiria momoi.
12 Yah Cha Sekaraia kayaraka ensel,
ova keyairuko tah kaririko toro.
13 Kope ensel-a kairai roa veka,
“Mah Sekaraia,
beya nama riri vai,
God-a beten mema karivo veꞌen.
Om mema Kwa Elisabet,
va ma biam-a noavia,
yah awoꞌo ya naminaka Cha Jon.
14 Riꞌi mema va noneman yah ova noroma poaka.
Tah aro bombiam prumo minia va ova noroꞌoiy taim bia mentanaka ve nakamap.
15 Yah bia vemo va awoꞌo pako nako ri ine ya Biapako.
Beya kuiniari wain re pi kupuana naton vai.
Taim baunke kakei romoꞌo vo moꞌo,
va rova nare ro Holi Spirit.
16 Bia emo va narao aro bombiam prumo vo Israel romoꞌo nerovoru yah nekape piya Biapako,
God yei.
17 Va pasin re kupuana titja Cha Elaija kako-e,
va nako yah nanoi roa Biapako cha.
Va narao aka awei me nekepi romoꞌo moike.
Va ruru nare rovoru aro voro rova kekoka ero,
yah ruru awaka va neko veka aro kekepi keniniu ri ine ya God.
Va narao bio nekepi ova nekina po raro ya Biapako.”
18 Kope Cha Sekaraia katere roa ensel-a veka,
“Toh korao veka roꞌo tah kuiniari nana yara veka awirai mema ro,
ero awaka?
Yah koranao veꞌen,
om nena minia yah koravo.”
19 Kope ensel-a kairai veka,
“Nena Cha Gabriel,
nena inia karoni niya ine ya God.
God-a veku kairai rona tah kanaro nima vora nanairai noma yah awirai neman ve kanako kanaro noma.
20 Nama rivo!
Awirai nena beya kama bilip vai,
tah mare ro mema va nokumo.
Yah beya kuiniari ava namairai vai,
nonoi nuiniari revo ao vemona awaka norao naꞌao.
Awirai nena emo,
va awaka noranao ri taim ve God-a kamompe emo.”
21 Aro bombiam kekepi keiya Cha Sekaraia yah inia ova kekinakina poꞌo arape raꞌa korao roa,
tah kaitaraki tempel are ya God.
22 Yah kope taim kakai upuoꞌo,
beya kuiniari ava nairai vai.
Yah keyara veka Biapako ao ine maraꞌa kariritaka tempel are,
ao vemo korao veka auyoyo.
Tah rova keria kumo yah ava kairai roiy roꞌo pon eno.
23 Yah taim Cha Sekaraia boꞌo pris ya karao veꞌen,
yah kope kanoi varu oꞌro ya.
24 Yah kope Kwa Elisabet,
om ya Cha Sekaraia ve,
riva koꞌma.
Yah kokei pon oꞌro konoi kuiniari veka ura 5-pla,
yah kwirai veka,
25 “Biapako kamarimari roni tah ao vemona karao roni,
vora beya reka noyoni riy ine yei aro bombiam.”f
Ensel-a kairai ro Kwa Maria va Jisas-a noavia
26 Ura 6-pla vo Kwa Elisabet mava kakei ro ve,
God-a kairai roa ensel Gebriel kararo mataimon raꞌa vo distrik Galili,
awoꞌo vo Nasaret.
The birth of Jesus foretold (Luk 1:26-38)
27 Kanoi ri bia bom raꞌa beya kwinia riya biam raꞌa vai.
Bia bom ve kemompe poa bio raꞌa yei aro ya King Devit vora nako.
Awoꞌo ya bia vemona,
Cha Josep.
Kope awoꞌo vo bia bom vemona,
Kwa Maria.
28 Yah ensel Gabriel-a kararo ri oꞌro are yah kairai ro veka,
“Umo nai namu,
bia bom.
Biapako kakei rimu,
tah kablesim momu yah karao romu revo.”
29 Kwa Maria awirai vemona korivo,
tah koririko toro yah veku inia ova kokinakina veka,
“Awirai emo awirai arape?”
30 Kope ensel-a kairai rou veka,
“Om Maria,
beya nonriri vai.
God-a ova korova romu.
31 Non rivo!
Momu va riva nomoma yah ma biam-a rava nomawia.
Yah awoꞌo ya nominaka Jisas.
32 Va nakei veka biapako,
yah va nepinaka Ma ya God Bia Nake.
Yah God-a va narao naka nakei king veka raiyao ya,
Cha Devit.
33 Va nakei toratora veka king yei aro ya Cha Jekop,
tah kingdom ya beya kuiniari nobaunki vai.”
34 Tah Kwa Maria kope kotere roa ensel veka,
“Ao voro va norao roni veka rope?
Beya am-a kenko vai.”
35 Yah kope ensel-a kairai rou veka,
“Holi Spirit va noraro rimu yah kupuana ya God Bia Nake va noririmu.
Kope ma vemo va nomawia,
va nakei naholi,
tah nepinaka veka Ma ya God.
36 Non rivo.
Naꞌai momu Kwa Elisabet yah koravo ven,
toh riꞌi va koꞌma va ma biam-a rava noavia.
Titja kirai veka beya kuiniari me noru vai.
Tah mare riva koꞌma yah ura 6-pla konoi naꞌao veꞌen.
37 God-a kuiniari ao prumo narare rare,
tah beya kuiniari ava raꞌa nokunaki naka vai.”
38 Kope Kwa Maria kwirai veka,
“Nama rivo.
Neni bia boꞌo kenao noa Biapako,
kuiniari ao ero narao roni veka kamairai ero.”
Yah kope ensel-a karereu yah kakoi varu.
Kwa Maria konoi koyara Kwa Elisabet
39 Kope taim vemona Kwa Maria kovariko yah kobereren konoi mataimon raꞌa vo distrik Judia kwiniata tou memeꞌme.
40 Yah konoi oꞌro are ya Cha Sekaraia yah umo nai neman kwirai ro Kwa Elisabet.
41 Yah Kwa Elisabet umo nai neman vo Kwa Maria korivo,
tah ma kakei rimoꞌo vo ve,
kapukore.
Yah Kwa Elisabet rokore ro Holi Spirit,
42 yah kweꞌei pako tah kwirai,
“God-a blesim-a karomu kotawo aro bom ovu.
Yah ma voro kakei rimoꞌo momu ero,
ya minia Blesim ya God-a kako.
43 Neni bia veka rope,
tah moꞌo ya Biapako neni kokai rini?
44 Non rivo.
Taim teve neni korivo umo nai momu,
yah ma kakei rimoꞌo neni ve,
ova korova tah kapukore.
45 Momu kom bilip veka Biapako karao narao romu veka kairai romu ero,
tah kuiniari ova noromu.”
Monrai vo Kwa Maria
46 Yah kope Kwa Maria kwirai veka,
“Riꞌi neni,
awoꞌo ya Biapako koavokore nake.
47 Yah spirit neni ova koroꞌo rova God,
bia vo nako neni varu.
48 Kayarani neni bia kanapo,
neni bia boꞌo ya kenao.
Mare yah taim inia kokai pa minia va aro bombiam va nirai veka God-a blesim-a karoni.
49 God-a kupuana kwinia riya,
ao pako aka karao roni,
tah awoꞌo ya koholi.
50 Inia kamarimari roiy aro bombiam awirai ya kerivo tah inia pa kepikeiya ve.
Ao vemona va inia narao roiy aro bombiam vo mare awei aro apo ti yei inia kekape pa ro.
51 Boꞌo ipipo karare rare eno ya.
Aro voro kepitoro yei veku keneman revo tah awoꞌo yei kiavoko nake,
karirikeꞌiy kenopi tintin.
52 King kupuana kaveiyo pika yah sia king yei kepepere,
yah kope aro voro beya awoꞌo ipipo keko ero,
kaveiko nake.
53 Ao neman neman prumo inia kariꞌiy aro koraiyoiy ero,
tah rova komoiy.
Kope aro ao prumo kerinia riꞌiy ero,
karirikeꞌeiy kenopi kanapo.
54-55 Kalpim yei aro wokboi ya Israel,
tah baunke ova inia kakina ro promis-a karao roa Cha Abraham awei aro raiyau memi,
va tora tora inia namarimari roꞌoiy aro voro inia kekape pa ve.”g
56 Kwa Maria kokei ri Kwa Elisabet konoi kuiniari veka ura 3-pla,
yah kope konoi varu oꞌro vo.
Kwa Elisabet Cha Jon koavia
57 Ura vo Kwa Elisabet yah korereka ri yah korao mava noavia,
yah ma biam-a koavia.
58 Aro boko vo veku awere aro noo vo Kwa Elisabet awirai ve kerivo Biapako kamarimari roꞌo revo,
tah yei minia ova koroꞌoiy.
59 Kope kekepi konoi umo 8-pla ya ma Kwa Elisabet koavia emo,
yah aro bombiam-a kekape vora taꞌa nepiauro.
Yah kepao awoꞌo Sekaraia nepoa,
veka awoꞌo ya aka ya.
60 Kope moꞌo ya ma ve kwirai veka,
“Bauni.
Awoꞌo ya va neminaka Cha Jon.”
61 Yah kope kirai po veka,
“Bia raꞌa move beya awoꞌo vemona kako vai.”h
62 Yah eno pon inia kepao poa aka,
awoꞌo veka rope pon karao naoroa ma.
63 Cha Sekaraia baunke rova keria kumo,
tah eno pon karao roiy vora ai to peri koraꞌa nekoka poa.
Yah awirai-a kareta veka,
“Awoꞌo ya Cha Jon.”
Yah ao vemona keyara tah keririko toro.
64 Bererenki,
Cha Sekaraia rova keyararaki,
yah kuiniari ava nairai varu.
Tah ava kairai,
yah awoꞌo ya God-a kavoko nake.
65 Yah aro bombiam koka vo boko ya Cha Sekaraia ve,
keyara amaraꞌa vemona kokamap emo tah keriri.
Yah awirai rere ao vemona kotamo tamoro konoi rorore boko maomao kerinia tata tou memeꞌme vo Judia.
66 Beyo koka awirai vemona kerivo,
tah ova kekinakina poꞌo pako yah atere kepao veka,
“Kope pa,
bia mentanaka vemona napako va naraka bia vekarope?”
Keyara veka kupuana ya Biapako kwinia riya.
Cha Sekaraia awirai profet-a kairai
67 Yah kope Cha Sekaraia,
aka ya bia mentanaka vemona,
rova kare roꞌo Holi Spirit,
tah awirai profet ve kairai,
68 “Awoꞌo ya Biapako nemawoko nake,
God yei Israel.
Ku vo koraka,
kararo yah kalpim memi aro bombiam ya,
tah kako memi varu.
69 Tah aro ya Cha Devit,
bia ya boꞌo karao roa God,
Biapako raꞌa yei karao naka bia kupuana vo nako memi varu,
70 veka titja kairai veꞌen roo yei holi profet ya.
71 Kairai va nako memi rei varu aro ine kepimitroputropu
awei aro voro beya keperepomi revo ero.
72 Kamarimari roꞌoiy aro apo memi,
yah baunke ova kakina roꞌo holi kontrak titja ya veku karao ero.
73 God-a promis-a karao riya apo memi Cha Abraham.
Kope mare,
karao narao romi veka titja kairai ero.
74 Karao nako memi varu reiy eno peꞌe yei aro birua yah kuiniari boꞌo ya nemao,
yah beya nemi riri vai.
75 Koraka tah umumoka baunke kekemi tare,
va nemute moho rara vo pasin koholi tah koniniu ri ine ya God.
76 Toh mema,
ma nena,
kope pa va nepinama profet ya God Bia Nake.
Va nanom moa Biapako cha,
vora rara nemia manao.
77-78 Tah mema va namiritaiy aro bombiam ya,
vora neyara marimari pako ya God.
Karao sin yei naririkeki yah nako yei varu.
Yah bo uri vo heven va narao noraro rimi,
79 vora bova nuri roiy beyo voro kekepi bo roroke
tah keriri revo veka va neviri ero,
yah rara vo riꞌi mariri noriritami.”
80 Kope taim bia mentanaka ve napako yah spirit ya nokupuana,
yah va nanoi nakei bo yin kanapo beyo kebaun nonoi nuiniari revo taim nakai vatiroꞌon riꞌiy ine yei Israel.