Buk Aposel emo, kwirai rore awirai kwinia awirai neman Cha Luk kareꞌe veꞌen ero. Buk Aposel, Cha Luk kareꞌe minia. Buk vemona kuiniari nemi yara veka, Holi Spirit-a rara koriritaiy aposel tah awirai ya Jisas-a chiriraiꞌvo mataimon pako Jerusalem tah Judia tah Samaria yah boko maomao vo meꞌri vemona minia (nemiyara 1.8).

Buk vemona kwirai ro sios ya Jisas kostat Juda tah kopako yah konoi rorore boko maomao vo meꞌri, Cha Luk karerero revo va boꞌo ya Jisas-a nariritami tah laip memi aro bombiam pava inia kepekeya ero. Ao vemona emo awaka koranao revo veka promis titja God-a karao riꞌiy aro bombiam yei Israel.

Ao pako aka raꞌa buk Aposel-a inia kwirai ro, boꞌo vo Holi Spirit. Emo Spirit ya veku God. Titja taim vo Pentikos, Holi Spirit-a koraro riꞌiy disaipel ya Jisas yah kupuana re save neman-a koroiy.

Buk vemona emo, kuiniari nemi pirike awirai ririva aposel-a chirirai poiy aro bombiam taim awirai neman ya Jisas-a chiriraiꞌvo. Kuiniari nemi yara veka aro bombiam maomao pava kepekeu awirai neman ya God yah sios maomao kerekamap tah kererori revo kupuana.

Buk Aposel awirai maomao yei aposel koka kwavo. Toh awirai prumo, ero vo ao voro Cha Pita re Cha Pol kerepao ero. Cha Pita ya aposel raꞌa inia kautute rorova Jisas. Kope Cha Pol, titja beya kakei riya Jisas vai, ya inia aro bombiam vo sios ya Jisas-a inia kayei keviri. Jisas-a kairia Cha Pol yah karao naka kave bia ya boꞌo karao roa.

Korakoraꞌa vo buk vemona emo, taim Cha Luk karao stori narao rore ava kerekamap riya Cha Pol, awirai vemona inia kairirai, “Memi” kemao. Saveman prumo chirai veka Cha Luk veku kautute rorova Cha Pol taim ovu. Korao veka tah awirai vemona inia kairirai “memi”.