Buk Aposel
Boꞌo yei aro Aposel ya Jisas Krais
Jisas-a kapromis va Holi Spirit-a nasalim noraro
1
Mah Tiofilus,
buk voro titja kaneꞌea vero,
ero kaneꞌe nore ao prumo Jisas-a kararerare tah skul-a karoi aro bombiam.
Jisas-a ao vemo kararerare titja veꞌen taim boꞌo ya baunke inia karao.
2 Ao vemona kerekare kuiniari revo taim vemona God-a kako ya kakoi heven.
Yah kope kakai riꞌiy aposel ya veku kamompe veꞌen titja ero.
Taim vemona,
kupuana vo Holi Spirit koalpim ya tah ava kairai roiy aposelb rore boꞌo maramaraꞌa va neparepare,
yah kope God-a kako ya yah kakoi heven.
3 Taim kepieya karai yah kope kavariko varu,
kope kakai riꞌiy varu aposel.
Ao prumo kararerare vora nariritai revo veka,
awaka kakei tare.
Inia keyaraka charara konoi kuiniari revo 40-pla umo,
yah awirai vo kingdom ya God minia inia kairiraiꞌvo roiy.
4 Taim Jisas-a awei aposel ya kiopokeu yah kairai roiy veka,
“Mopu beya Jerusalem-a nopepeu vai.
Mopu va nokepikeke ao neman raꞌa Aka nena kapromis ke naropu wo,
veka titja inia kanairai nopu kopurivo veꞌen ero.
Jesus Ascends to Heaven (Aposel 1:4-11)
5 Cha Jon kabaptaisim yei beyo ro pi kanapo,
kope umo beya koprumo vai va God-a nabaptaisim mopu ro Holi Spirit.”
6 Kope tare vova aposel-a keopokeke piya Jisas tah inia ketere poa veka,
“Biapako,
era mare va namao kantri Israel-a nokupuana varu yah king vo raꞌa nakei vora naorerari o bauni?”
7 Kope Jisas-a kairai roiy veka,
“Ao vemona,
beya ao mopu vai,
tah kopao taim o umo vo nopuyara.
Cha Kan unake taim vemo kayara,
tah ya veku ao vemona kaorerarire.
8 Toh kope va Holi Spirit-a noraro ripu,
yah kupuana vo Holi Spirit-e va nopuko yah awirai-a nopuiriraiꞌvo nonoi mataimon pako Jerusalem awere boko prumo vo distrik Judia re Samaria,
tah boko koka vo meꞌri vemo rore ao koka kopuyarare ero.”
Jisas-a kakoi heven
9 Taim Jisas-a awirai vemo kairaiki naꞌao,
yah baunke inia kekepi ine inia kepirikeiya,
yah God-a kako ya kakoi nake.
Yah kope akron-a raꞌa kokai kopoporariya,
tah beya kuiniari nepirikeiya vova vai.
10 Taim aposel-a keropi yah ine ketropukeya inia kakoi uteno nake,
kope bererenki bia riyempin kerekape kereropi piꞌiy kakuke nao noreka buso buso.
11 Yah keyirai poiy veka,
“Mopu aro vo Galili,
toh koraka rope tah koropi ine inia koporeko uteno nake?
Bia vemona Jisas,
mare God-a kako ya repu yah kakoi heven.
Kope va nopuyaraka nararo varu veka vemona kopuyaraka kakoi heven-e.”
Cha Matias kemompe va boꞌo ya Cha Judas nako
12 Aposel-a kepepeu tou vemona kepina Oliv,
yah keparo varu mataimon pako Jerusalem.
Tou Oliv kwinia kakuke ri Jerusalem,
beya korarapa vai.
Rarapa vo korao veka kilomita moikera kanapo.c
13 Taim kerepika Jerusalem,
yah kenopi oꞌro tah kekope rum raꞌa inia kekepi emo,
kwinia nake.d
Aro vemona kekope kekepi rum emo,
awoꞌo yei em:
Cha Pita,
Cha Jon,
Cha Jems yah Cha Andru,
Cha Filip yah Cha Tomas,
Cha Bartolomyu yah Cha Matyu,
tah ya Cha Jems raꞌa (ma biam ya Cha Alfius) yah Cha Saimon (bia raꞌa yei aro Selot).e
Yah Cha Judas,
ma biam ya Cha Jems raꞌa.
14 Aro vemona yei kekepi rimoꞌo moike kanapo taim beten-a inia kepao.
Yah aro bom ovu minia kerekeri riꞌiy,
moꞌo ya Jisas,
Kwa Maria tah yei aro raꞌai ya Jisas kekepi tah beten-a kepao piꞌiy minia.
15-17 Kope taim vemo,
Jisas-a kakoi veꞌen nake vora Holi Spirit-a narao noraro,
yah Cha Pita kavariko yah karoi romoiy aro bombiam kebilip pova Jisas,
namba yei kuiniari veka 120.
Yah kairai roiy veka,
“Aro raꞌai,
titja Holi Spirit korao Cha Devit awirai raꞌa kwinia buk ya God kairai,
tah mare va awaka korao nao.
Awirai emo konoi riya Cha Judas.
Cha Judas,
ya bia raꞌa memi Jisas-a veku kamompe vora boꞌo ya narao,
toh rara pon kariritai bio yah Jisas-a keavia.”
18 (Aro ine kepiatrotropu Jisas ero mani kepoa Cha Judas,
veka pe vo pasin taipo vemona karao vemo.
Yah kanoi meꞌri koraꞌa kako.
Yah kope kareru tah kararo kareita meꞌri vemona yah riꞌi ya kotari tah romoꞌo koka ya kovereka upuoꞌo.f
19 Yah kope aro koka kekepi Jerusalem awirai vo ao vemona kerivo.
Korao veka tah meꞌri vemona,
poko yei kepina veka “Akeldama.”
Ku vo awoꞌo vemona koraka,
“Meꞌri vo Noo.”)
20 Yah Cha Pita kairai vova veka,
“Awirai ya Cha Devit kepeꞌe kwinia Buk Song kwirai veka,
‘Boꞌo voro kakei ero,
va nuinia kanapo,
yah beya kuiniari namin bio raꞌa nakei vai.’g
Yah
‘bio raꞌa va boꞌo ya nako yah nanoi roiy beyo cha.’h
21 “Emo koneman,
mare va aro vemo inia kiute popomi va raꞌa yei nemi mompe.
Aro emo yei inia kekepi pimi taim Biapako memi Jisas kakei rimi,
22 kostat riya Cha Jon taim boꞌo ya karao,
kabaptaisim yei aro bombiam kokai kuiniari revo taim Jisas-a kavariko varu yah God-a kako ya kakoi remi nake.
Bia vekaemo va nemi mompe,
emo koraka,
ao prumo kapirikere ine ya,
vora bova narao rimi yah awirai ya Jisas-a nairiraiꞌvo veka Jisas-a kavariko varu.”
23 Yah kope bio riyempin-a kemompe,
Cha Matias re Cha Josep.
Cha Josep kepinaka minia veka Barsabas,
kope awoꞌo ya raꞌa minia kepinaka veka,
Cha Jastus.
24 Yah beten-a kepao veka,
“Biapako,
mema rimoꞌo kuro yei beyo prumo kamayarare veꞌen.
Mema veku namiritami bia nape kama mompe,
25 vora boꞌo ya Cha Judas nako,
va boꞌo aposel-a narao.
Emo korao veka,
Cha Judas kanoi bo voro karaoke va nakei ero.”i
26 Yake aposel-a satu inia keparai vora neyara nape boꞌo vemona va nako,
yah satu koreita awoꞌo ya Cha Matias.
Yah Cha Matias kemompe tah karoiy riꞌiy minia 11-pla aposel.