Holi Spirit koraro taim vo Pentikos
2
Taim vo Pentikos-aa korereka,
yah aro vemona kebilip pova Jisas kekape tah keopoke minia oꞌro moike raꞌa.
2 Yah kope bererenki,
ao raꞌa kweꞌei kokai veka puꞌu pako.
Ao emo koraro heven.
Yah koririkire oꞌro vemona kekepi emo,
yah inia kowowo roroiy.
3 Yah kepirikere ao veka aikera,
korao veka piarutu yei bio prumo.
Yah piarutu vemona keyavetari yah kerenori kerebiriri taiy moike moike yei.
4 Yah kope aro bombiam koka rovakepeu po Holi Spirit tah korao poko maramaraꞌa va chirai.
Ao emo,
Spirit ya God veku korao tah kuiniari poko mara vemona nirai.
5 Taim vemona,
aro Juda ovu kekape kekepi mataimon pako Jerusalem,
aro emo yei keropi kupuana tah lotu inia kepao pova God.
Aro vemona kekape kantri prumo vo meꞌri vemo.
6 Taim aweꞌei pako vemona kweꞌei,
aro bombiam koka kekape keopokeu minia bo moike raꞌa.
Yah kerivo poiy aro vemona kebilip ava chirai poko yei,
tah korao keririko toro.
Ku vo korao veka,
moike moike yei aro biam tah rere aro bom kerivo poiy ava chirai poko yei.
7 Aro Juda vemona keririko toro tah chirai veka,
“Aro vemona poko memi inia chirai emo,
era aro emo yei Galili unake vai?
8 Korao veka rope tah memi aro koka kekemi vemo,
awirai-a kemi rivo moiy chirai poko memi moike moike?
9 Memi aro kekame kantri Partia,
Midia re Elam.
Yah ovu memi kekame distrik Mesopotemia yah ovu memi kekame distrik Judia.
Yah ovu memi kekame provins Kapadosia,
Pontus re Esia.
10 Yah ovu memi kekape distrik Frigia re Pamfilia.
Kope ovu memi kekape kantri Isip awere boko ovu vo distrik Libia kwinia kakuke ri mataimon Sairini.
Yah ovu memi minia kekame kantri Rom,
11 yah kope ovu memi,
yei aro Juda,
tah yei aro ovu beya kiave Juda ero lotu inia kepao pimi.
Yah ovu memi aro yei ailan Krit re distrik Arebia.
Memi aro bombiam koka vemona,
awirai-a kemirivo moiy chirai poko memi rore ao ipipo God-a kararerare.”
12 Keririko toro tah ova inia kekinakina po pako.
Yah ketere yei veku veka,
“Ao vemona mare kopuyara emo,
ero arape?”
13 Kope ovu yei veku ava chavo poiy yah chirai poiy veka,
“Aro verenare pi kupuana keton tapara vere keraipari ere.”
Cha Pita awirai ya God-a kairiraiꞌvo
14 Yah kope Cha Pita kavariko karoi riꞌiy 11-pla aposel,
tah kaꞌai pako roiy aro bombiam yah kairai roiy veka,
“Mopu aro Juda awepu aro koka kokepi Jerusalem,
awirai nena nopu rivo,
yah kuiniari ku vo ao vemona nopu yara.
15 Aro vemona beya pi kupuana keton vai,
veka mare kopuirai emo,
baun poaka.
Bo mare 9 kilok roronai.b
16 Ao vemona mare inia kopuyarare emo,
titja profet Joel kairai rou veni,
kairai veka:
17 ‘God-a kairai veka,
“Taim meꞌri vemona korao nobaunki,
Spirit nena va nanaveretai aro bombiam koka vo meꞌri.
Aro mevova biam awere mevova bom mopu,
va ava niriraiꞌvo veka profet.
Aro biam yangpla mopu,
va ava nepirikere veka keyoyo,
Kope aro biꞌiy mopu,
va nevovo yah ava neyoyo nare.
18 Aro wokman tah wokmeri boꞌo nena kepao ero,
va Spirit nena nanaveretai
yah awirai nena niriraiꞌvo veka profet.
19 Nena ao maramaraꞌa va nanare nerinia uteno nake,
kope meꞌri pika va mirakol ipipo maramaraꞌa va nanarenare.
Aikera re noo yah boho va nuwo pako.
20 Umo va nakiyo,
Kope ura va nabririna veka noo.
Ao vemo va nere kare titja wo,
yah kope de pako ya Biapako va nokai pa re kupuana yah lait ya.
21 Yah aro bombiam koka voro awoꞌo ya Biapako inia kepinaka ero,
Taim vemona,
Biapako va nalpim yei yah nako yei varu.” ’c
22 “Mopu aro Israel,
awirai vemona nopu rivo.
Jisas vo mataimon Nasaret,
boꞌo kupuana ya kokai vatiron yah mirakol ipipo karare kopuyarare veꞌen.
God-a ao prumo vemona kararerare eno ya vora noriritapu veka God-a veku kairai roa tah kararo.
23 God-a veku bia vemona kareriaka ropu enopeꞌe mopu,
veka titja ya veku kairai veꞌen veka ao vemo namo va narao.
Yah kope aro taipei ovu eno kepopu yah kopututarinaka kruse yah karai.
24 Yah kope God-a karao kavariko varu yah nai pako vo rai-a karereu,
ku vo korao veka kupuana vo rai beya kuiniari noavia vai.
Baun poaka!
25 Titja Cha Devit kairai rova veka,
‘Kana yaraka Biapako inia kakei rina toratora revo kakuke
tah beya ava raꞌa korao kanaririno vai.
26 Korao veka tah riꞌi nena ovakoroꞌo yah roo nena awirai neman neman kwirai yah ovakorona poaka.
Yah nena va nakeni toropo yah nakenikere pon ao neman God-a karao narina.
27 Emo korao veka,
mema beya kuiniari namiꞌin inia nakeni bo yei aro viri vai.
Yah mema beya kuiniari namiꞌin bia mema veku kama mompe napiroto bo yei aro viri vai.
28 Mema rara neman vo nakeni tare kamiritana,
Mema veku va nakemi mina kakuke yah namao ovanorona poaka.’ ”d
29 “Aro raꞌai,
kanake nanairai nopu revo veka,
apo memi Cha Devit,
karai veꞌen yah kepere.
Kope matmat ya,
baunke kwinia kokai kuiniari taim mare.
30 Cha Devit ya profet.
Kayara veꞌen veka God-a promis-a karoa va bia raꞌa yei aro noo ya veku va boho ya nako rova yah nakei veka king.
31 Cha Devit kayara veꞌen arape God-a karao narao,
yah kope kairai rova Krais va kope navariko varu.
Kairai veka,
God-a beya kuiniari nariꞌin nainia yah napiroto matmat vai.
32 God-a karao Jisas-a kavariko veꞌen,
yah memi aro bombiam koka ao vemona kemi yara veꞌen.
33 God-a karao awoꞌo ya kopako yah karao keyakei eno paraꞌa awaka ya.
Yah Cha Taita God-a Holi Spirit-a karoa veka titja kairai roa veꞌen ero.
Yah mare Holi Spirit-a kasalim veꞌen veka mare kopu rivo tah kopu yara ero.
34 Cha Devit beya kakoi heven vai,
tah vo kairai pon veka,
‘Biapako kairai roa Biapako nena veka,
e
“Nakemo eno paraꞌa awaka nena,
35 Taim vemona va nanao aro birua mema va nepemakepiroko kompeꞌe mema.” ’ ”f
Aro bombiam prumo riva kerovoru yah baptais-a keko
36 Kope Cha Pita tare kairai roiy vova veka,
“Mopu aro koka vo Israel,
ao vemona va nopuyara revo veka,
Jisas voro kopututarinaka kruse ero,
God-a karao naka kakei veka Biapako,
tah bia ya nako yei varu aro bombiam ya.”
37 Taim aro bombiam koka awirai ya Cha Pita kerivo,
yah kope riꞌi va kokokore naiy.
Yah ketere poa Cha Pita awei aposel ovu veka,
“Aro raꞌai!
Toh memi va arape nemao?”
38 Yah kope Cha Pita kairai roiy veka,
“Mopu va riva nopu rovoru yah pasin taipere kopare va nopepereki,
yah mopu moike moike va baptais-a nopuko poꞌo awoꞌo ya Jisas Krais vora sin mopu napereki.
Yah God-a va Holi Spirit-a naropu.
39 Promis emo mopu awei mevova mopu na yei aro bombiam kekepi rarapa.
God,
Biapako memi kapromis va Holi Spirit-a naroi aro bombiam koka voro ya veku kairiy ero.”
40 Yah Cha Pita awirai prumoki ovu minia kairai roiy.
Yah awirai kupuana kairai roiy veka,
“Ova nopu kinake,
mopu nopore papipu revo mopu veku,
vora nokepi nopu neman peiy aro pasin maramaraꞌa taipere inia kepare pare ero.”
41 Aro prumo kebilip poꞌo awirai ya Cha Pita,
yah kekape baptais-a keko.
Yah umo vemona,
korao veka 3,000 bombiam-a kekape taiy aro bombiam vemona kebilip pova Jisas emo.
Aro bombiam kebilip kekepi romoꞌo moike raꞌa
42 Aro bombiam kebilip revo,
kepere poꞌo revo skul yei aposel,
na nekepi minia yah nialpim yei veku.
Kepere poꞌo minia veka,
nekepi akorom-a nepa minia yah nebeten.g
43 God-a mirakol ipipo karare rare eno peꞌe yei aposel ya Jisas,
yah aro bombiam koka mirakol-a kepirikere tah keririko toro.
44 Aro kebilip pova Jisas,
kekepi rimoꞌo moike raꞌa kanapo.
Yah ao prumo yei keyarare veka ao yei aro koka kebilip pova Jisas.
45 Yah meꞌri koraꞌa yei kesalim tah ao yei ovu minia kesalim rere poiy beyo ovu keko.
Yah kope mani vemo keko yah kevani konoi roiy aro ava kere baun reiy ero.
46 Umumoka aro vemona inia keopoke minia tempel,
yah akorom-a kepa minia oꞌro moike moike yei tah ova koroꞌoi yah riꞌi yei inia koneman poaka.
47 Umumoka awoꞌo ya God-a kiavoko nake,
yah riꞌi yei aro bombiam koka oꞌto koteiy roiy revo aro kebilip pova God.
Umo moike moike Biapako inia kako yei varu aro bombiam ovu,
tah korao namba yei aro bombiam kebilip inia kokoi kopako.