Cha Pita ava kairai roiy Jerusalem ro boꞌo voro karao ero
11
Aposel awei aro kebilip tah kekepi tintin vere provins Judia, awirai-a kerivo veka aro voro beya kiave Juda minia, awirai ya God-a keko yah kebilip. 2 Yah taim Cha Pita kakoi mataimon pako Jerusalem, yah kope yei aro disaipel voro inia pava kepekeu pasin vo tava neoro ero, ketovia. 3 Yah chirai poa veka, “Mema kanomi oꞌro yei aro voro beya tava keoro ero,a tah kakemi akorom-a kama miꞌiy.”4 Yah kope Cha Pita awirai-a kaveroro roiy ao koka kere kamap riya emo. Yah kairai roiy veka, 5 “Kakeni mataimon Jopa yah beten-a kanao, yah ao raꞌa kana yara veka bo kanayoyo. Ao vemona kana yara koraka aimino pako raꞌa koraro uteno nake. Ao ovu ketroro nao kona 4-pla vo yah kerereru koraro bo vemo karon emo. 6 Yah ao vemona kanaore nono revo tah kuro vou aimino, kana pirikere ame maramaraꞌa veka, ame rere kom 4-pla kereyinia ero yah rere ame voro kererin ro riꞌi ero yah rere ruꞌu. 7 Yah kope kana rivo poko raꞌa kwirai rona veka, ‘Mah Pita! Nama variko, ame vemona namiere nere viri yah nama.’
8 “Yah kope nena kanairai veka, ‘Baun poaka, Biapako. Nena ao voro beya koniniu ri ine mema kana vai, tah ine konana rarimi beya kuiniari nema vai. Lo memi kwirai veka ao vemona kere taipere.’
9 “Toh kope poko raꞌa kwei koraro heven, tare kwirai rona veka, ‘Ao vemona God-a karare rare kere niniu veꞌeni, beya namairai veka ao vemo beya kere niniu vai.’ 10 Ao vemona kokamap 3-pla taim yah kope kokoi varu heven.
11 “Taim vemonamo, aro 3-pla vo mataimon Sisaria, Cha Kornilius kairai roiy kekape revo oꞌro vemona kaken emo. 12 Holi Spirit-a kairai rona va nanoni noꞌoiy, beya nonina vai. Yah aro 6-pla vemona kebilip kekape pona yah kenomi oꞌro are ya Cha Kornilius. 13 Yah Cha Kornilius kairai romi veka kayara ensel-a kararo karoi oꞌro are ya tah ava kairai roa veka, ‘Namairai moiy beyo nenopi mataimon Jopa yah neore naka Cha Saimon, awoꞌo ya raꞌa kepinaka Cha Pita. 14 Bia emo va awirai-a konakai roma. Awirai vemonamo va nairai roma, kokepi kopu neman revo riya ine ya God awei aro koka voro kekepi oꞌro mema ero.’
15 “Kope taim kana variko tah ava inia kanairai, yah kope vo Holi Spirit-a korarotai veka memi korarotami titja ero. 16 Yah kope ova kanakinako noꞌo varu awirai titja Biapako kairai emo. Kairai veka, ‘Cha Jon kabaptaisim yei aro bombiam ro pi kanapo, toh kope mopu va baptais-a nopuko po Holi Spirit.’ 17 Titja kemi bilip mova Krais Jisas tah God-a Holi Spirit-a karomi veka presen. Yah kope mare presen vemo karoi minia aro vemona. Toh nena bia nape, tah boꞌo ya God-a kanake nanao naniu?”
18 Taim awirai ya Cha Pita kerivo, yah beya ova kekinakina po ava nirai warapoa vai. Yah awoꞌo ya God pon kiavoko nake yah chirai veka, “Mare kemi yara veka, God-a karin aro voro beya kiave Juda minia, riva kerovoru yah laip vo nekepi tora tora keko.”
Aro bombiam vo Antiok awoꞌo Kristen-a keko
19 Taim vemona kepieya Cha Stiven karai yah kope pasin taipo kepao poiy aro bombiam vemona kebilip pova Jisas. Yake prumo yei kevereko yah kenopi tintin. Ovu yei kenopi distrik Fonisia, ovu kenopi kekepi mataimon Antiok, yah ovu kenopi kekepi ailan Saiprus yah awirai ya Jisas chiriraiꞌvo konoi roiy aro Juda pon. 20 Toh kope yei aro ve kebilip pova Jisas emo, ovu yei kekape ailan Saiprus re mataimon Sairini. Aro vemona kenopi mataimon Antiok yah awirai neman ya Biapako Jisas-a chiriraiꞌvo poiy aro vo Grik minia. 21 Yah kupuana ya Biapako koraro kwinia riꞌiy tah aro bombiam prumo kebilip yah kerovoruka piya Biapako.
22 Aro bombiam vo sios kwinia Jerusalem awirai vemona kerivo, yah kope chirai poa Cha Barnabas kanoi Antiok. 23 Yah taim kanoi kareiki Antiok, yah kayarai veka God-a kamarimari roiy tah karao roiy revo. Yah Cha Barnabas ova korova yah awirai kupuana kairai roiy vora riꞌi yei nuinia kupuana rova Biapako unake. 24 Cha Barnabas, bia emo bia neman, rova kareu ro Holi Spirit tah kabilip rova revo Jisas. Yah aro bombiam koka kebilip yah kekape piya Biapako.
25 Yah kope Cha Barnabas kanoi Tarsus vora naore naka Cha Sol. 26 Yah taim kapirikeiya Cha Sol, kako ya kanoi varu mataimon Antiok. Yake Cha Barnabas re Cha Sol kerekepi piꞌiy aro bombiam koka vo sios yei Antiok, yah skul-a kere poiy konoi kuiniari revo ainini moike raꞌa. Yah aro vemona kebilip pova Jisas emo, awoꞌo Kristen-a keko titja nini vemo mataimon Antiok.
27 Taim vemona aro profet ovu kepepeu mataimon pako Jerusalem yah kope keparo Antiok. 28 Moike raꞌa yei profet, awoꞌo ya Cha Agabus, kavariko karoi yah ro kupuana vou Holi Spirit, kairai veka boko prumo vo Rom va taim vo akorom-a nobaun va norerekare riꞌiy. (Ao vemona korerekare riꞌiy taim ya Cha Klodius kope kakei king yei Rom.) 29 Kope aro Kristen moike moike vemo, awirai ya Cha Agabus kerivo, tah chirai minia va mani koraꞌa nepoiy aro Kristen kekepi Judia. Yah aro Kristen vemo mani kepoi yaꞌai kuiniari mak yei nepoi ero. 30 Ao vemona kepao yah kope mani kepoa Cha Barnabas re Cha Sol kereko kere nopi tah kere piꞌiy aro hetman vo sios.