Cha Herot kayeiya Cha Jems karai yah Cha Pita kalabus
12
Kope taim vemona,
King Herot-aa kavei aro ovu vo sios tah karao roiy toro.
2 Yah awirai kupuana kairai roiy tah kiavia Cha Jems,
raꞌai ya Cha Jon yah opo kepiaoro bainat yah karai.
3 Taim Cha Herot kayara veka aro Juda ova koroiy ro ao vemo karao emo,
yah kairai roiy kiavia Cha Pita.
Ao vemona karao ri taim vo De Pako vo Bret-a Yis-a Kobaun.
4 Taim kaivia Cha Pita,
kako ya yah kareria roki kakei kalabus.
Yah karin Cha Pita kakei eno peꞌe yei soldia ku 4-pla,
yah ku moike moike yei soldia 4-pla kekepi namba yei korao veka 16-pla soldia yah kiore papiya.
Cha Herot kairai Cha Pita va nakei kalabus nonoi nuiniari De Pako vo Bret-a Yis-a Kobaun nobaunki wo,
yah kope va neko ya nekape upuoꞌo yah kot-a narivo roa.
5 Yah Cha Pita kakei roki kalabus tah soldia kekepi inia kiore papiya.
Kope yei aro bombiam vo sios kekupuana po beten vora God-a nalpim ya.
Ensel-a koalpim ya Cha Pita oꞌro kalabus-a karereu
6 Cha Herot de raꞌa kamompe va nako ya Cha Pita nanoi kot.
Yah roro vemo konoi uri vo va Cha Pita nanoi kot emo,
sen riyempin-a kenopi rova yah kainia romoiy soldia riyempin.
Kope kamo vo oꞌro kalabus soldia ovu keropi tah keore papiꞌi revo.
7 Bererenki ensel ya Biapako koraro,
yah lait vo konoi oꞌro kalabus are tah bova ine kuri.
Yah ensel-a kakai tatara ya Cha Pita keria tureriki tah kavariko,
yah kairai roa veka,
“Nama variko bereren.”
Yah kope sen riyempin vemona kepia nopirore eno ya Cha Pita emo veku kere bururu pika.
8 Yah ensel-a kairai roa vova veka,
“Let mema namati yah kanro mema namikoko.”
Yah Cha Pita karao veka ensel-a kairai roa ve.
Yah kope tare ensel-a kairai roa veka,
“Noreka ririva mema namikoko yah pava namikena.”
9 Yake Cha Pita pava karekeiya ensel yah kere nopi upuoꞌo.
Toh kope ya veku,
ao vemo ensel-a karao emo beya kasave vai.
Karitoro veka bo kayoyo.
10 Keriute kere nopi yah keyaviaki bo voro soldia inia kekepi ero,
yah kere nopi vova yah raꞌa vova keyaviaki yah kope kerenopi kere repiki revo kamo ain pako vo mataimon vemona.
Kamo pako vemo vou veku korurikire tah kere nopi upuoꞌo.
Yah keriute kerenopi po rara raꞌa,
yah kope bererenki ensel-a karereiya.
11 Yah kope Cha Pita ruru awaka kako ro ao ve tah kairai veka,
“Mare yah kana yara revo veka ao vemo awaka.
Biapako kairai roa ensel ya kararo tah kako nena varu reiya eno ya Cha Herot yah ao prumo aro Juda ova kekina pore va nepao pona ero.”
12 Ao vemona kayara veꞌen yah kanoi oꞌro vo Kwa Maria,
moꞌo ya Jon.
Awoꞌo ya raꞌa kepinaka minia veka,
Cha Mak.
Oꞌro vo Kwa Maria ve,
aro prumo keopokeu tah beten-a kepao.
13 Cha Pita kamo kakirikiri upuoꞌo,
yah kope wokmeri raꞌa awoꞌo vo Kwa Roda,
kokai vora kamo noruriki.
14 Yah kope taim poko ya Cha Pita keiya rivo,
ova koroꞌo poaka tah beya kamo koruriki roa vai.
Yah koparara konoi varu oꞌro are tah kwirai roiy aro bombiam veka,
“Cha Pita kakai karoi kamo!”
15 Kope aro vemona kekepi oꞌro are vemo,
chiraika po veka,
“Boh ruru kobaun remu o?”
Kope kwirai roiy veka,
“Bauni,
awaka kenirai.”
Kope chirai po veka,
“Awenari ero ensel ya Cha Pita ero?”
16 Toh Cha Pita baunke karoi kamo inia kakirikiri.
Yah kope kenopi kamo kepuriki yah taim kepirikeiya,
keririko toro.
17 Kope Cha Pita eno karao roiy vora rova nepikim.
Yake kairai roiy ro pasin vemona Biapako karao roa emo,
tah kako ya oꞌro kalabus-a karereu.
Yah tare kairai roiy veka,
“Awirai vemona va nopirai poa Cha Jemsb awei aro bombiam ovu kebilip.”
Ava kairai roiy veꞌen yah kope karerei yah kaute kanoi boko raꞌa.
18 Kope uri roronai,
soldia keyara veka Cha Pita beya kakei vai,
tah riva kokokore naꞌaiy,
yah ketere yei veku veka,
“Toh arape korao roa Cha Pita?”
19 Yah kope Cha Herot awirai kupuana kairai naiy soldia tah kenopi keore nanaka Cha Pita,
toh beya kepirikeiya vai.
Yah Cha Herot,
soldia vemona kako yei kenopi kot,
yah kairai roiy veka va nepieiy neviri.
Kope King Herot-a karereu distrik Judia yah kararo kakei mataimon Sisaria.
Cha Herot karai
20 Cha Herot emo ova keyaroro poaka roiy aro bombiam vo mataimon Tair re Saidon.
Korao veka tah kekape kiopoke minia yah kenopi keyaraka.
Titja wo kenopi keyaraka Cha Blastus vora nalpim yei,
bia emo kaore rarire ao koka kerinia oꞌro ya King Herot.
Yah kope kenopi keyaraka Cha Herot vora riꞌi mariri naroiy varu.
Ku vo korao veka,
kantri yei inia akorom-a keko emo,
vemona King Herot-a kaore rari ke.
21 Yah kope Cha Herot umo raꞌa kamompe,
yah umo vemona bilas ya king-a karikoko tah kakeita sia king ya,
yah awirai ipipo kairai roiy aro bombiam.
22 Kope yei aro bombiam-a inia chepi veka,
“Ero poko ya god raꞌa,
beya poko ya bio vai.”
23 Cha Herot awirai vemona karivo tah konia beya karao awoꞌo ya God-a navoko nake vai.
Yah kope bererenki ensel ya God-a koyeya kareiy tah mini memeꞌme romova kepiapa konoi yah karai.
24 Tah awirai ya God-a konoi kopako vovake tah konoi tintin.
25 Kope taim Cha Barnabas re Cha Sol boꞌo ya Biapako kerepao veꞌen ve mataimon pako Jerusalem,
yah kope kerenopi varu Antiok.
Yah kereko ya Cha Jon kanoi roiy minia,
awoꞌo ya raꞌa kepinaka Cha Mak.