8
Cha Sol minia karoi taim vemona kepieya Cha Stiven karai ye,
yah kayara veka ao vemona kepao poa vemo,
koneman.
Cha Sol kayeiy Kristen-a keviriviri yah karao ovu kevereko kenopi tintin
Umo vemona kepieya Cha Stiven karai emo,
yah kestat kepao poiy toro aro bombiam vo sios kekepi mataimon pako Jerusalem.
Yah aro koka kebilip ketamotamoro kenopi tintin yah kenopi kekepi distrik Judia re Samaria.
Toh kope yei aposel baunke kekepi Jerusalem.
2 Yah aro ovu pava kepekeu pasin God-a karerero ero,
Cha Stiven keko ya kenopi kepere matmat yah aro koka kero pova.
3 Toh ya Cha Sol baunke inia karao roiy toro aro biam tah rere aro bom vo sios minia.
Inia kanoi roroiy oꞌro moike moike yei yah karaipaiy kanoi karereiroki kalabus.
Cha Filip kanoi Samaria yah awirai neman ya Jisas-a kairiraiꞌvo
4 Aro bombiam vemona keruriko ketamotamoro kenopi boko koka,
awirai neman ya God-a chiriraiꞌvo boꞌo voro kekepi ero.
5 Cha Filip kanoi mataimon raꞌa vo distrik Samaria yah awirai neman ya Krais-a kairai roiy.
6 Taim aro bombiam koka awirai ya Cha Filip kerivo yah mirakol ipipo kepirikere kararerare,
yah teve ketete revo ro awirai ya.
7 Kepirikeiya Cha Filip spirit taipere karirikeiki reiy aro bombiam prumo,
tah spirit taipo vemona poko pako kererao yah kererereiy.
Yah aro kom taipei prumo awei aro rika yei kereviri karao keneman varu.
8 Ao vemo korao tah oꞌto pako aka kwinia mataimon vemona.
9 Taim vemona,
bia raꞌa kakei mataimon vemona awoꞌo ya Cha Saimon.
Bia vemona pasin marela inia karao veꞌen ato tah inia kariritaiy veka kupuana kwinia riya.
Yah karao aro prumo vo distrik Samaria ova kekinakina pako tah awoꞌo ya veku kaireko varu veka ya bia biꞌiy.
10 Yah aro koka,
aro yei awoꞌo ipipo keko awei aro bombiam kanapo,
teve keteteiya revo yah chirai veka,
“Kupuana ya God-e,
kepina veka Kupuana Pako,
kwinia riya bia vemona.”
11 Kekupuana po awirai ya nerivo,
ku vo korao veka,
ao maramaraꞌa kararerare veꞌen ato yah inia kokai tah ova kekinakina pako po kupuana ya.
12 Kope taim Cha Filip awirai neman vo kingdom ya God re awoꞌo ya Jisas Krais-a kairiraiꞌvo,
kope aro bom awei aro biam koka kebilip yah baptais-a keko.
13 Cha Saimon minia kabilip,
yah baptais-a kako.
Yah inia kautute rorova Cha Filip yah kapirikere mirakol ipipo maramaraꞌa Cha Filip kararerare emo,
tah Cha Saimon ova kakinakina rore pako.
14 Taim aposel-a kekepi mataimon pako Jerusalem awirai-a kerivo veka aro vo Samaria awirai ya God-a keko,
yake chirai poa Cha Pita re Cha Jon va nerenopi piꞌiy.
15 Yah taim kerenopi kererepiki Samaria,
yah kope beten-a kerepao poꞌoiy vora Holi Spirit-a neko.
16 Ku vo korao veka,
Holi Spirit baunke beya koraro riꞌiy vai,
baptais pon keko po awoꞌo ya Biapako Jisas.
17 Yah Cha Pita re Cha Jon beten-a kerepao veꞌen yah kope eno kereperetai,
yake Holi Spirit-a keko.
18 Taim Cha Saimon kapirikeiy veka aposel riyempin-a eno kereperetai tah Holi Spirit-a keko,
yake mani kako kakai yah karao naroiy aposel riyempin.
19 Yah kairai roiy aposel riyempin veka,
“Mopu kupuana voronaro norupona minia,
vora eno naneretaka bia nape va Holi Spirit-a nako.”
20 Toh kope Cha Pita kairai roa Cha Saimon veka,
“Mani mema kuiniari nobagarap roma minia.
Mema kamitoro veka mema kuiniari ao vemona God-a veku karoiy aro bombiam va nama baim,
era vai?
21 Mema beya kuiniari nakemi rovo imi boꞌo ya God nemao vai,
ku vo korao veka,
romoꞌo mema beya koniniu riya ine ya God vai.
22 Mema va riva nama rovoru yah pasin taipere namemereki.
Yah nama beten yah nama tere moa Biapako naoukoku roma vora ruru taipo vemona kwinia rimoꞌo mema emo napereuki rema.
23 Kanapirikema kama ririke moho ao neman,
God-a karao va naroiy aro bombiam namako.
Toh kope pasin vemona kama ririke moho ao neman emo korao ruru mema kotaipo yah kakemi veka kalabus vo sin.”
24 Yah kope Cha Saimon kairai roiy bia riyempin veka,
“Mopu va norupu beten poa Biapako vora riꞌi mariri narona yah ao vemona korupirai po vemo beya kuiniari nokai rina vai.”
25 Kope aposel riyempin emo,
awirai ya Biapako re awirai vo ao prumo karao roiy riyempin-e keyirai poiy aro bombiam.
Yah kope keriute kerenopi varu Jerusalem.
Taim inia keriute kerenopi,
awirai neman ya God-a inia keyiriraiꞌvo konoi boko prumo vo Samaria.
Cha Filip awirai neman ya God-a kairiraiꞌvo roa bia Itiopia
26 Ensel raꞌa ya Biapako kairai roa Cha Filip veka,
“Nama variko namaro saut,
rara koraro Jerusalem yah kope koraro mataimon Gasa.”
Rara vemona kwinia bo ramata kanapo tah beyo beya kekepi vai.
27 Yah Cha Filip kavariko yah kaute kanoi.
Taim kaute kanoi,
kavakakeiya bia raꞌa vo meꞌri koraꞌa kepina Itiopia.a
Bia vemona kasave boꞌo pako kako yah kaore rari revo ao neman neman vo kwin vo Itiopia,
awoꞌo vo Kwa Kandasi.
Bia vemona kararo mataimon pako Jerusalem vora lotu narao.
28 Yah kope taim kanoi varu oꞌro ya,
kakeita karisb ya tah buk ya profet Aisaia inia karitim kanoi.
29 Yah kope Holi Spirit-a kwirai roa Cha Filip veka,
“Namaute namom kakuke ri karis.”
30 Yah Cha Filip kaprara kanoi ri karis vemona tah karivo roa bia emo buk ya profet Aisaia karitim.
Tah Cha Filip katere roa veka,
“Era ku vo awirai vemona kama ritim emo kama yara o bauni?”
31 Tah kope bia emo kairai roa veka,
“Toh ku vo va nana save vekarope?
Boh bia raꞌa nariritana va nana yara.”
Korao veka tah kairia Cha Filip kakoi kakeita riya karis.
32 Bia vemona awirai koraꞌa ya profet Aisaia karitim kwirai veka,
“Keko ya kenopi veka sipsip raꞌa kepao nepieya narai,
yah karoi rova kapikim veka sipsip ma raꞌa
kepao peꞌe va nepiapu.
33 Piakepari poa yah ava chavo poa minia.
Yah kope kot-a kepiapao,
toh beya kot ya kerivo revo vai.
Yah kope karai,
Korao veka tah yei aro mevova ya beya kekepi vai,
vora beyo va nirai poiy.
Laip ya kechoki naka veꞌen,
yah beya kakei vova meꞌri vai.”c
34 Yah kope bia vemona awirai-a karitim emo katere roa Cha Filip veka,
“Namairai mona revo,
profet emo kairai rova bia nape,
ya veku o bia raꞌa tirin?”
35 Yah kope Cha Filip kairai roa bia vemona.
Titja wo,
ku vo awirai ya profet Aisaia kairai roa,
awirai vemona kwirai rova Jisas.
Yah kope awirai ovu vo awirai neman ya Jisas Krais minia kairai roa.
36-37 Taim inia kereparara kerenopi po rara,
kerenopi yah kererepiki raka raꞌa,
yah bia emo kairai roa Cha Filip veka,
“Nama yara,
piva vemona kwinia emo.
Era ao raꞌa kotire rarina tah beya kuiniari nana baptais vai?”d
38 Yah kope bia emo kairai roa draiva karao hos-a kereriraki nao karis.
Yah Cha Filip re bia vemona kereparo kereropi pi yah Cha Filip kabaptaisim ya.
39 Kope taim raka kerepepeu yah kerekope nake,
yah kope bererenki Holi Spirit-a koraro yah koko ya Cha Filip.
Yah bia emo beya kayaraka vova Cha Filip vai.
Toh kope ya bia emo,
ova korova yah kanoi kararo karis yah kaprara kanoi.
40 Kope Cha Filip kayara veka kanoi kakei mataimon Asdot,
yah awirai neman ya Jisas-a kairiraiꞌvo konoi rorore mataimon kanoi yah kareiki revo mataimon Sisaria.