Cha Stiven awirai-a kairai roiy kaunsil
7
Yah kope hetpris-a katere roa Cha Stiven veka,
“Awirai vemona kevitikema emo,
era awaka vai?”
2 Kope Cha Stiven kairai roiy veka,
“Aro raꞌai awepu aro aka nena Israel,
nopurivo pona!
Taim apo memi Cha Abraham kakei Mesopotemia,
baunke beya kanoi mataimon Haran vai tah ya God vo heven,
kupuana kwinia riya kakamap riya.
3 Yah God-a kairai roa veka,
‘Meꞌri vemona namemeu awei aro raꞌai mema yah namaute nanom boko raꞌa va naniritama.’ a
4 “Yake Cha Abraham meꞌri vo Kaldia karereu yah kaute kanoi kakei Haran.
Kope taim aka ya karai veꞌeni,
yah kope God-a kairai roa kakai kakei meꞌri vemona mare kokape kokepi emo.
5 Toh taim vemona,
God-a beya meꞌri korama karoa Cha Abraham awei aro ya vai,
vora niave aka vo.
Toh God-a promis-a karao roa Cha Abraham veka,
kope pa va meꞌri vemona naroa nuinia enopeꞌe ya awei aro apo ya tah niave aka vo meꞌri vemona.
Toh taim vemona,
Cha Abraham veku beya meva karu vai.
6 Yah God-a kairai roa veka,
‘Aro apo mema va nenopi nekepi kantri yei aro ovu.
Yah aro aka vo kantri vemo va nepao poiy toro,
tah nepaonai niave wokboi kanapob nonoi nuiniari 400 ainini.
7 Toh kope nena va kot-a nanenao aro vemona pasin vemo kepao poiy aro apo mema ero.
Yah kope aro apo mema va kantri vemona nepepeu,
yah nekape varu boko vemona tah lotu nepao pona.’c
8 Kope God-a kairai roa Cha Abraham va tava naoro vora naririta veka kontrak vemona God-a karoa.
Yah kope Cha Abraham ma biam-a raꞌa kareriao,
yah awoꞌo karinaka Cha Aisak.
Yah kope umo 8-pla konoiki nao veꞌen umo vemo mova koavia emo,
yah Cha Abraham tava keyaoro.
Yah kope Cha Aisak kave aka ya Cha Jekop,
kope Cha Jekop kave aka yei aro apo 12-pla memi.
9 “Cha Josep emo,
aka ya karererova revo,
toh aro apo ovu kekunakuna naka,
aro emo aro raꞌai ya veku.
Yah kesalim ya poiy Isip-a keko ya va nave wokboi yei.
Toh ya God-a baunke kakei riya kakuke,
10 yah kalpim ya tah nai koka vemona kapoi emo kapereuki reya.
Yah save neman-a God-a karoa tah korao king-a karererova revo.
Yake king-a karao Cha Josep kave bia namba wan vo gavman vo kantri Isip tah ao koka vo bo ya king emo,
kaorerarire.
11 “Yah kope taim vo raiyo pako korereka riꞌiy kantri Isip re Kenan.
Tah taim vemona,
emo taim taipo aka,
yah aro apo memi beya kuiniari akorom-a raꞌa neko vora nepa vai.
12 Kope taim Cha Jekop karivo veka wit-a kwinia Isip,
tah kairai roiy aro apo memi kenopi vora akorom-a pina neko.
Emo taremare yei kenopi kantri Isip.
13 Kope tarevova kiute kenopi yah Cha Josep kairai roiy veka,
‘Nena Cha Josep.’
Yah kope king vemona minia kasave yei aro ya Cha Josep.
14 Yah kope Cha Josep kairai roiy aro raꞌai ya kenopi chirai poa aka ya,
Cha Jekop awei aro ya kekape piya Isip.
Aro vemona namba yei kuiniari veka 75.
15 Yah Cha Jekop awei aro apo memi kenopi kekepi tirin vere Isip konoi yah kope yei minia keviri vere.
16 Yah kope pa rika yei aro vemo keviri emo kepuna kenopi varu yah kepere kerinia matmat kwinia mataimon Sekem.
Cha Abraham matmat vemona kako riꞌiy aro mevova ya Cha Hamor.
17 “Kope taim ya God-a kamompe va nainapim promis titja karao riya Cha Abraham yake kokai kakuke,
yah namba yei aro bombiam memi Israel yake kokoi kopako.
18 Kope konoi yah bia raꞌa vova kave king vo Isip.
Bia emo beya kasave ya Cha Josep vai.
19 King vemona karoporeiy aro apo memi tah beya pasin neman-a karao roiy vai.
Yah karao me biam mova keyavei ero,
va nererereiy upuoꞌo vora neviri.
20 “Kope taim vemona,
Cha Moses mova koavia.
Bia mentanaka vemona kaneman poaka tah God-a karererova revo.d
Yah kereriꞌin kainia oꞌro are ya aka ya tah inia keyorerariya pon konoi kuiniari ura 3-pla.
21 Yah kope keperiaka kainia upuoꞌo yah ma bom ya king-a koyaraka,
tah koavia komamaka veka ma vou.
22 Cha Moses save neman neman yei Isip-a kako,
tah kainiari awirai ipipo nairai yah boꞌo ipipo maramaraꞌa nararerare.
23 “Taim ainini ya Cha Moses kuiniari veka 40,
yah ovakakinako veka karao nanoi nayarai aro raꞌai ya,
aro Israel.
24 Kayaraka Isip raꞌa karao roa toro bia raꞌa vo Israel,
yah kanoi kalpim ya bia Israel emo tah kayeiya bia vo Isip emo karai.
25 Cha Moses karitoro veka aro raꞌai ya va neyara veka God-a kasalim ya vora nalpim yei aro ya veku Israel,
toh yei beya keyara vai.
26 Kope umo raꞌa,
Cha Moses kayarai Israel riyempin-a roma kerepao yah kakai karao naveiki tah kairai roiy veka,
‘Ei!
Mopu raꞌai veku.
Toh koraka rope,
tah roma korupupao?’
27 “Toh bia vemona inia kayeiya raꞌa vemo,
katurakaki Cha Moses tah kairai roa veka,
‘Bia nape karaonama kamave hetman tah jas memi?
28 Era mema kamao namiena narani vai,
veka bariri Isip raꞌa kamieya karai ero vai?’e
29 Yah taim Cha Moses awirai emo karivo,
kariri yah kanoi kakei Midian veka bia ya kantri raꞌa.
Yah kope om-a kako boko vemona yah me biam riyempin-a karereiyo.
30 “Kope 40-pla ainini konoiki veꞌen,
ensel raꞌa koraro riya Cha Moses veka aikera tah kobiririta aꞌai mentanaka raꞌa.
Aꞌai mentanaka vemo koroi boꞌo ramata kanapo beyo kebaun kakuke riꞌi tou Sainai.
31 Yah kope taim ao vemona kayara tah kaririko toro.
Yah kanoi ri kakuke,
karao napirike revo,
yah kope karivo Biapako kairai roa veka,
32 ‘Nena God yei aro apo mema.
Nena God ya Cha Abraham,
Cha Aisak yah Cha Jekop.’f
Yah Cha Moses kariri tah karereꞌre beya karao ao vemona napirike vova vai.
33 “Kope Biapako kairai roa vova veka,
‘Mema su mema namataimuki,
boꞌo vemona karomita ve,
emo boꞌo nena tah koholi.
34 Kanayara veꞌen pasin taipere maramaraꞌa inia kepao poiy aro bombiam nena kekepi Isip emo.
Kanarivo veꞌen kero tah awoꞌo nena kepinana,
yah mare kanaro niꞌiy vora nanako yei neiy varu enopeꞌe yei Isip.
Yah mare nakame,
kanerenoma va nanomi varu Isip.’ ”g
35 Cha Stiven baunke inia ava kairirai.
Kairai veka,
“Bia vemona Cha Moses emo,
titja,
Israel-a kioniy pova beya ava nerivo poa vai,
tah chirai poa veka,
‘Bia nape karao nama tah kamave hetman memi re jas vo kot-a narivo romi?’
God veku kairai roa bia vemona Cha Moses kave hetman re bia ya nako yei varu aro bombiam.
Taim vemona ensel-a koraro riya veka aikera tah kobiririta aꞌai mentanaka,
yah God-a kupuana karoa.
36 Yah kope Cha Moses kako yei tah kantri Isip-a kepepeu yah kenopi.
Yah mirakol maramaraꞌa kararerare verenare Isip,
Retsi yah boꞌo ramata kanapo bio kebaun,
konoi kuiniari 40-pla ainini.
37 “Cha Moses kairai roiy Israel veka,
‘God-a va raꞌa mopu veku namompe yah nave profet veka nena veku.’h
38 Kope aro apo memi kenopi kekepi boꞌo ramata kanapo bio kebaun,
yah Cha Moses karerei kekepi yah kakoi tou Sainai nake.
Yah ensel raꞌa awirai ya God laip-a kwiniari karoa vora nairai romi.
39 “Toh yei aro apo memi kioniy tah beya awirai ya Cha Moses kerivo poa vai.
Awirai ya kioniy tah riꞌi yei korerero revo va nenopi varu kantri Isip.
40 Chirai poa Cha Aron veka,
‘Beya kemiyara revo vai,
ao arape mare kokamap riya Cha Moses,
bia vemona kako memi tah kememeu Isip-e.
Cha Moses ao ve karao tah mare va god memi pina nemaremare vora nenopi pomi cha.’i
41 Taim vemo,
god giaman-a raꞌa kepaonao koraveka bulmakau ma raꞌa,
yah ofa kepao po giaman god vemona.
Yah ova koroꞌoi rore boho vemona yei veku keparepare enopeꞌe yei veku emo.
42 Ao vemona kepao tah God-a oreva karoiy tah kariꞌin lotu inia kepao pore ao veka umo,
ura tah rere kamoꞌo,
veka awirai-a kwinia buk yei profet,
‘Mopu aro Israel!
Taim kokepi boꞌo ramata kanapo konoi kuiniari ainini 40-pla,
bulmakau awere sipsip-a kopiere yah ofa kopao,
era mopu ofa ero kopao pona vai?
Baun poaka.
43 Mopu oꞌro sel anayaka kopao yah kopupoi vora lotu nopao poa god Molek re kamoꞌo vo god mopu Refan.
Awawa yei god giaman-a kopaonai tah lotu inia kopao poiy.
Ao vemona kopao tah nena va nanaririkepu nopepeu kantri mopu yah nonopi nokepi paraꞌa vo kantri Babilon.’ j
44 “Taim aro apo memi kekepi boꞌo ramata kanapo beyo kebaun,
yah oꞌro sel ya God-a kerira.
Oꞌro sel vemo,
God-a kasave awirai awaka ya inia kairai roiy,
ao koka kepao veka God-a kairai roa Cha Moses ero.
Oꞌro vemo kepao korao ri minia veka awawa vo Cha Moses kapirike ero.
45 Kope taim Cha Josua kanoi roiy cha,
oꞌro sel vemona keko kiutenao vora meꞌri yei aro ovu neko.
God-a kalpim yei aro apo memi tah karirikeiy aro vo meꞌri vemona keturepi.
Yah oꞌro sel vemona kiavo kupuana kokai kuiniari revo taim ya Cha Devit.
46 Bia emo,
God-a karererova revo.
Yah kope Cha Devit katere roa God-a nariꞌin oꞌro awaka rava narira vora aro apo ya Cha Jekob lotu nepao poa.
47 Toh kope ya Cha Solomon oꞌro vemona karira roa.
48 “Toh kope ya God Bia Nake,
beya kakei oꞌro voro beyo kepao ero vai,
veka voro profet-a kairai ye.
49 “ ‘Biapako kairai veka,
“Heven,
ero sia king nena,
Kope meꞌri ve,
emo boꞌo vo kom-a kanereta.
Toh kope kopao oꞌro vekarope nopurira pona?
Yah bo vekarope va noave bo malolo nena?
50 Nena veku ao koka vemona kanarenare.” ’ ”k
51 Yah Cha Stiven kairai roiy veka,
“Mopu aro bikhet,
ruru re rimoꞌo mopu kokupuana veka yei aro haiden.
Teve mopu kokapura tah beya awirai ya God-a kopurivo vai.
Umumoka awirai vo Holi Spirit-a beya kopurivo po vai,
kopaka aro apo mopu titja inia kepao ero.
52 Aro apo mopu nai pako kepoiy profet koka.
Kepao poiy toro aro titja kekape tah awirai ya Bia vo Pasin Niniu chiriraiꞌvo veka va nararo.
Yah mare bia emo kararo veꞌen tah mopu koperiakipe poiy eno yei aro taipo yah kopieya karai.
53 Ensel ya God-a lo vemona kereroiy aro apo mopu,
toh beya inia pava kopekeu vai.”
Akairi kepieya Cha Stiven yah karai
54 Taim kaunsil-a awirai ya Cha Stiven kerivo poa,
ova kereiroro poaka tah evakiya.
55 Toh kope Cha Stiven rovakare ro Holi Spirit,
tah ineva kaoreko heven.
Yah kayara lait pako ya God,
yah kayaraka Jisas-a karoi eno paraꞌa awaka ya God.
56 Yah kope kairai roiy veka,
“Noporeko nake.
Kanayara heven-a koruriki yah Ma Biam ya Bio karoi eno paraꞌa awaka ya God.”
57 Taim awirai vemona kerivo,
teve yei eno kekapupa papire yah poko kepuru pakoki vovake,
yake keverekope minia yah keprara kenopi piya Cha Stiven.
58 Yah keraipaka kenopi mataimon upuoꞌo,
yah akairi keprupitaka vora nepieya narai.
Taim vemona aro titja kevitikeiya ero,
noreka ririva yei ketaipari yah kepere kerinia kakuke ri kom ya bia yangpla raꞌa,
awoꞌo ya Cha Sol.