Beyo 7-pla kemompe vora nialpim yei aposel
6
Taim vemona,
disaipel-a yake keprumoa tah namba yei kokoi kopako.
Yah aro Juda ovu poko Grik-a chirai emo,
inia ketovenaiy aro Juda ovu poko Aram inia chirai ye.b
Ku vo korao veka,
taim vo akorom-a kevani,
aro bombiam voro inia akorom-a kevani ero kepao aro bom poko Grik-a keyirai am-a keviripere veꞌen akorom-a koreirorire.
2 Yah kope aposel 12-pla keipiy disaipel koka kekape yah chirai poiy veka,
“Beya koneman vai,
boh boꞌo ya God-a orevanemo yah kope boꞌo vo akorom nemivani pon inia nemao.
3 Aro raꞌai,
mopu beyo 7-pla noporenai romopu rovakepeu po Holi Spirit yah awoꞌo yei koneman romoi aro bombiam tah ruru neman-a kwinia riꞌiy ero.
Yah boꞌo vemona kuiniari nemoiy.
4 Yah memi va beten-a inia nemao yah awirai ya God-a inia nemiriraiꞌvo nonoi roiy aro bombiam.”
5 Awirai vemona korao aro bombiam koka ovakoroiy.
Yah Cha Stiven kemompe,
bia emo ya bilip kupuana kwinia riya tah rovakareu ro Holi Spirit.
Yah aro vemona kemompe,
Cha Filip,
Cha Prokorus,
Cha Nikanor,
Cha Timon,
Cha Parmenas yah Cha Nikolas.
Cha Nikolas ya bia Antiok,
beya Juda vai,
toh pava karekeu lotu yei.
6 Yah aro 7-pla vemona kepereikipe poiy enopeꞌe yei aposel yah kebeten poiy yah eno neperetai vora boꞌo vemo nepao.
7 Yah awirai ya God-a kotamotamoro konoi boko koka.
Yah namba yei disaipel vo mataimon pako Jerusalem kokoi kopako vova ke.
Yah kope yei pris minia awirai ya God-e kerivo,
yah prumo yei kebilip yah pava kepekeu awirai ya God.
Juda kot-a kepiapao Cha Stiven
8 Yake Cha Stiven God-a blesim pako karoa yah kupuana minia karoa vora mirakol ipipo maramaraꞌa nararerare romoiy aro bombiam.
9 Kope bio ovu yei mataimon Sairini,
mataimon Aleksandria,
provins Silisia yah ovu yei provins Esia,
kevereko yah ketove warapoa Cha Stiven.
Aro emo yei aro oꞌro lotu raꞌa yei aro Juda,
kepina veka,
Oꞌro Lotu yei Aro Kekepi Fri.c
10 Yah kope vo Holi Spirit-a ruru neman-a koroa Cha Stiven yah ava kairai roiy,
tah beya kuiniari awirai ya nepievope vai.
11 Korao veka tah,
kekepirokipe yah ruru kepoiy aro ovu va aotore nirai veka,
“Memi kemirivo moa Cha Stiven piakarari roa Cha Moses re God.”
Kiavia Cha Stiven
12 Pasin vemona kepao tah aro bombiam,
yah yei saveman vo lo tah yei aro hetman riꞌi kokokore naiy.
Yah kope kevereko yah kenopi Cha Stiven kiavia kenopi poiy kaunsil yei Juda.
13 Yah aro ovu kemompe vora neropopeiy kaunsil,
yake kekape yah keropopeiy veka,
“Umumoka,
bia emo inia piakarari ro tempel ya God re lo ya Cha Moses.
14 Kemirivo moa bia vemo kairai veka Jisas vo Nasaret va tempel vemona napereu yah pasin titja Cha Moses karomi emo va narovoru.”
15 Kope aro koka kekepi bo yei kaunsil,
ine ketropukeya Cha Stiven,
tah kepirike ine ya korao veka ine vo ensel raꞌa.