22
“Mopu aro raꞌai awepu aro aka nena,
awirai nena nopu rivo veka beya ava rava kanao kotaipo vai.”
2 Yah taim kerivo poa Cha Pol ava kairai roiy poko Hibru,
yah rova kepikimki tah teve keteteiya.
Kairai roiy veka,
3 “Nena Juda.
Moꞌo nena kwavena mataimon Tarsus kwinia provins Silisia.
Toh kanapako mataimon pako Jerusalem yah skul-a kanao mataimon vemona.
Yah Cha Gamaliel skul-a karao rona revo rore lo prumo yei apo memi.
Yah nena inia kana kupuana no revo awirai ya God-a karerero ero,
veka mare kopao emo.
4 Nena inia kanao noiy toro aro prumo kebilip konoi kuiniari revo pina keviri veꞌen emo.
Aro biam tah aro bom minia.
Yah kanako yei kanarairoki kalabus.
5 Hetpris awei kaunsil koka yei hetman kuiniari nirai popu revo rore ao vemona.
Tah pas-a kepeꞌe pona yah kanako kanoni noiy aro memi kekepi mataimon Damaskus.
Yah kanaute kanoni Damaskus,
vora aro bombiam-a nanako yei nakane veka aro kalabus yah va nepao poiy toro mataimon pako Jerusalem.
Aro vemona kebilip pova Jisas tah pava kepekeiya.
Kanao nanako yei nakane va hetman-a nepao poiy toro.
Cha Pol awirai ya kave Kristen ero kairai roiy
6 “Kanaute kanoni kakuke ri mataimon Damaskus yah umo karoiko nana veka belo.
Yah kope bererenki lait pako raꞌa koraro heven tah kobiriri kotoporeri tana.
7 Tah kanaro kareni meꞌri yah awirai raꞌa kanarivo kokai rina tah kwirai rona veka,
‘Mah Sol!
Mah Sol!
Toh karaka rope tah kamao mona toro?’
8 “Kope kanatere noa veka,
‘Biapako,
toh mema nape?’
Kope kairai rona veka,
‘Nena Jisas vo Nasaret,
mema inia kamao mona toro.’
9 Aro vemona kekepi pina emo lait-a kepirikeu,
toh beya awirai vemona kwei kokai rona emo kerivo vai.
10 “Yah kanatere noa veka,
‘Biapako toh va arape nanao?’
Yah kope Biapako kairai rona veka,
‘Nama variko yah nanomi Damaskus.
Kope boko vemona,
va nirai poma po ao arape kanereno va namao.’
11 Lait vemona kobiriri pako tah korao ine kerenarorokeki.
Korao veka tah aro vemona kenopi pona emo,
eno kepenavo yah keko nena kenopi mataimon pako Damaskus.
12 “Bia raꞌa awoꞌo ya Cha Ananaias kakai nayarana.
Bia emo ya keyakeiroko God,
tah pava karekeu revo lo.
Yah aro Juda koka kekepi mataimon pako Damaskus emo keperepova revo.
13 Kakai karoi rina kakuke tah kairai rona veka,
‘Raꞌai nena Mah Sol,
ine nama periki.’
Yah taim vemona,
bererenki ine kerenaperiki yah kanayaraka.
14 “Yah kope kairai rona veka,
‘God yei aro apo memi kamompe mema vora namasave rere ao arape God-a inia karererore.
Yah vora namasave ya Bia Neman Vemona yah va namarivo moa ava nairai roma roo ya veku.
15 Mema va awirai ya namairiraiꞌvo moiy aro bombiam koka rore ao arape kamayarare tah kamarivo ero.
16 Toh mare kakemikekeu arape?
Nama variko yah nanom baptais-a namako,
yah God-a va sin mema naniriki taim awoꞌo ya naminaka.’
God-a kairai roa Cha Pol kanoi awirai-a kairiraiꞌvo roiy aro ovu
17 “Yah taim kanoni varu mataimon pako Jerusalem tah kakeni beten-a kanao tempel are,
yah ava kanapirike veka kana yoyo.
18 Yah kanapirikeiya Biapako,
ava kairai rona veka,
‘Mare akai nama variko yah namemeu Jerusalem.
Aro vemona,
taim awirai nena namairiraiꞌvo,
beya kuiniari nerivo vai.’
19 “Yah kanairai noa veka,
‘Biapako,
aro vemona yei veku keyarana veꞌen veka,
titja kanoni nonore oꞌro lotu yei Juda tah aro kebilip poma ero,
kaniey yah kanarairoki kalabus.
20 Cha Stiven bia ya awirai mema kairiraiꞌvo,
yah kepieya karai.
Yah taim kepieya karai,
nena minia karoni niꞌiy kakuke tah no yei aro vemona kepieya emo,
kanaore nanire.’
21 “Yah kope Biapako kairai rona veka,
‘Nanomi,
nena va nanasalim mema nanomi miꞌiy aro beya kiave Juda kekepi revo rarapa.’ ”
Cha Pol kairai roiy veka ya bia Rom
22 Yah aro bombiam koka awirai ya Cha Pol kerivo veꞌen konoi kuiniari taim awirai vemona kairaikore,
kevereko tah poko keparokeya yah chirai poa veka,
“Nopieya narai,
bia emo beya kaneman va nakeiy meꞌri vemona emo vai.”
23 Yah noreka va ketaitai peiy tah keprupi tintin.
Kepao veka tah umoi-a kokeikei roiy poaka.
24 Korao veka tah,
ofisa kanoi roiy soldia cha ero,
awirai kupuana kairai roiy soldia tah keko ya Cha Pol kanoi bo yei kekepi ero.
Yah ofisa kanoi cha emo,
kairai roiy soldia va wip-a nepieya Cha Pol yah netere poa,
ku vo aro bombiam-a ereva kepukeya ero.
25 Kope taim kom-a re eno tiva kepiapo veꞌen yah kepao nepieya,
tah Cha Pol kayaraka kepten yei soldia karoi yah kairai roa veka,
“Era lo va kwirai ropu va pasin vemona nopao poa bia vo kantri Rom,
yah kot-a nepiapao taim kot ya beya kopurivo,
tah naiy ya koporenao revo vai?”a
26 Kope taim kepten yei soldia awirai vemona karivo,
yah kanoi riya ofisa kanoi roiy soldia va cha ero tah kairai roa veka,
“Toh va arape namao moa?
Bia emo ya kantri Rom.”
27 Yah kope ofisa kanoi roiy soldia va cha ero kakai yah katere roa Cha Pol veka,
“Namairai mona,
era mema bia Rom vai?”
Yah Cha Pol kairai roa veka,
“Aꞌho.”
28 Yah kope ofisa kanoi roiy soldia cha ero kairai roa Cha Pol veka,
“Mani pako aka kanoiy vora nakeni niꞌiy veka bia ya Rom.”
Kope Cha Pol kairai roa veka,
“Nena beya mani kanoiy vai.
Taim moꞌo nena kwavena,
nena kakeni veꞌen veka bia yei aro Rom.”
29 Yah soldia vemo kepao nepieya Cha Pol yah taim awirai vemona kerivo,
yah keturepiki.
Yah ofisa kanoi roiy soldia va cha ero kariri.
Ku vo korao veka,
kayara veka ao taipo karao,
kairai roiy soldia sen-a kenopirova bia vo mataimon pako Rom.
Cha Pol kanoi karoi revo riꞌiy ine yei kaunsil
30 Kope umo raꞌa,
ofisa kanoi roiy soldia va cha ero,
karao ku kot-a kepiapao Cha Pol ero naorenao.
Korao veka tah,
karokoreriaki Cha Pol kanoi yah awirai kupuana kairai roiy bikpris awei kaunsil yei Juda kekape keopoke.
Yah kope karainiaka Cha Pol kakai karoiy riꞌiy revo ine yei.