23
Yah kope Cha Pol kaoreki katrorukei kaunsil,
tah kairai veka,
“Aro raꞌai,
nena kanautute niya ine ya God,
tah rimoꞌo nena koneman rore pasin voro inia kanao ero,
kokai kuiniari revo mare.
Kanayara veka beya ava raꞌa kanao kotaipo vai.”
2 Awirai vemona kairai tah hetpris Cha Ananaias awirai kupuana kairai roiy beyo keropi piya Cha Pol kakuke emo rova nepiakuku.
3 Kope Cha Pol kairai roa veka,
“God-a va neyiema,
ku vo korao veka,
kamaveka rei raꞌa maka buso keprete,
vora bio beya kuiniari ao taipo kwinia kuro neyara vai.
Mema kamitoro veka pava kamekeu lo tah kakame kakemi vora kot-a nemenamao.
Toh mema veku,
beya pava kamekeu lo vai,
tah kamairai moiy kepiena.”
4 Aro vemo keropi piya Cha Pol kakuke emo awirai vemona kerivo yah ketere poa veka,
“Koraka rope,
era mema kamao poko taipo namairai moa hetpris ya God vai?”
5 Kope Cha Pol kairai veka,
“Aro raꞌai,
beya kanayara revo veka bia emo ya hetpris vai.
Nena pasin taipo kanao,
ku vo korao veka,
buk ya God kwirai veka,
‘Beya poko taipo nopirai poa hetman mopu vai.’ ”a
6 Cha Pol kayara veka kaunsil ovu,
yei Sadyusi yah ovu yei Farisi.
Yah kope kaꞌai roiy kaunsil kairai veka,
“Aro raꞌai,
nena bia yei aro Farisi,
tah nena ma yei Farisi.
Nena kanabilip veka,
aro voro keviri veꞌen ero,
kope va nevereko varu.
Emo ku vo,
tapara vemo mare kot-a kepenapao ke.”
7 Cha Pol awirai vemona kairaiki romoiy aro Sadyusi awei Farisi,
tah ketove tove varuvaru yah aro vemo kot-a kerivo emo,
kiavetari paraꞌa riyempin.
8 Aro Sadyusi,
yei inia chirai veka aro keviri veꞌen beya kuiniari nevereko varu matmat vai,
yah ensel awere spirit-a beya kerekeri vai.
Toh kope yei Farisi,
kebilip pore ao vemona.
9 Awirai vemo chirai tah poko keprapari pakoki vova ke.
Kope saveman ovu vo lo,
yei aro yei Farisi,
kevereko keropi yah chirai pako veka,
“Memi kemi yaraka bia vemona rong ya kobaun.
Avenari awaka kairai,
spirit raꞌa o ensel raꞌa,
ava kwirai roa ke.”
10 Kope namba wan ofisa yei soldia kayara veka ketovetove konoi yah kopakoki,
tah kariri.
Avenari inia keraipaka Cha Pol va nawetari yah narai.
Yake kairai roiy soldia va neparo yah Cha Pol neko ya peiy aro Juda,
yah neko ya nenopi boꞌo yei kekepi ero.
11 Yah kope roro,
Biapako kararo karoi riya Cha Pol kakuke yah kairai roa veka,
“Mema va narom kupuana,
beya namariri vai.
Mema bo pako kamao,
awirai nena kamairiraiꞌvo vere Jerusalem,
yah kope va nonom minia Rom yah awirai nena va namairiraiꞌvo.”
Aro Juda awirai-a ketiti moike va Cha Pol nepieya narai.
12 Kope roronai,
aro Juda ovu awirai-a ketiti moike va nepieya Cha Pol narai.
Yah promis kupuana kepao veka,
beya kuiniari akorom-a nepa tah piva neton vai,
nonoi nuiniari revo taim Cha Pol nepieya narai wo.
13 Namba yei beyo promis-a kepao va Cha Pol nepieya narai emo,
kotawoki 40.
14 Aro vemona kenopi piꞌiy bikpris awei aro hetman yah chirai poiy veka,
“Memi promis kupuana kemao veka,
beya kuiniari akorom rava nema vai,
nonoi nuiniari revo taim Cha Pol nemieya narai.
15 Korao veka tah mopu awepu kaunsil,
va awirai-a kononopi nopirai poa namba wan ofisa vora Cha Pol nako ya nararo ropu.
Kuiniari nopu ropopeiya veka,
‘Kemao aotere nemao moa vora ku vo awirai ya nemorena revo.
Yah taim baunke beya kakamap ripu,
memi va nemieya narai.’ ”
16 Kope ma biam vo rou ya Cha Pol awirai vemona karivo.
Yah kope kanoi boꞌo yei soldia kekepi ero tah kanoi are yah kairai roa Cha Pol.
17 Yah kope Cha Pol kairia kepten raꞌa kakai yah kairai roa veka,
“Bia yangpla vemona nopuko ya nonopi poa namba wan ofisa,
awirai raꞌa kwinia riya va nairai roa.”
18 Yah kepten-a kako ya kanoi riya namba wan ofisa tah kairai roa veka,
“Bia kalabus awoꞌo ya Cha Pol kairina kanoni niya yah kairai rona bia yangpla vemona nanako ya nakane noma.
Awirai-a raꞌa kwinia riya karao nairai roma.”
19 Yah kope namba wan ofisa eno keriawo yah unake kerenopi kereropiki ikaki.
Yah katere roa bia yangpla veka,
“Awirai arape kamao namairai mona?”
20 Kope bia yangpla kairai veka,
“Aro Juda,
awirai-a ketiti moikera veka uri va neterepoma Cha Pol namako ya nararo riꞌiy kaunsil.
Kepao neropopema veka kepao niorenao revo ku vo awirai ya.
21 Toh mema beya awirai yei namarivo moiy vai.
Aro yei ovu namba yei kotawo 40,
promis kupuana kepao beya kuiniari akorom-a nepa yah piva neton vai,
nonoi nuiniari revo taim nepieya Cha Pol narai wo.
Mare kekepikekema pon ke,
boh ava nama rivo moiy.”
22 Yah kope ofisa kairai roa bia yangpla vemona yah kope naute nanoi varu tah awirai kupuana kairai naka veka,
“Beya namairai moa bio raꞌa veka kakame tah awirai vemona kamairai mona vai.”
Keko ya Cha Pol kanoi riya namba wan gavana Cha Feliks
23 Kope namba wan ofisa kairiy kepten riyempin yei soldia kekape yah kairai roiy veka,
“200-pla soldia va norupuko yei awei 70-pla soldia kesave kekepitatare hos,
yah 200-pla soldia kesave aura kiawere ero va nopuko yei minia.
Yah kope 9 kilok roro va nonopi Sisaria.
24 Hos ya Cha Pol minia nepia redim,
yah noporepapiya revo nanoi riya revo gavana Cha Feliks.”
25 Yah kope namba wan ofisa pas-a rava kareꞌe veka,
26 “Umo nai neman.
Nena Cha Klodius Lisias,
pas vemona kaneꞌe konoi roa bia biꞌiy,
namba wan gavana Cha Feliks.
27 Aro Juda bia vemona kiavia tah kepao nepieya narai.
Kope kanarivo veka bia emo ya kantri Rom,
tah nena awei soldia nena kenomi kemiko ya meiy varu eno peꞌe yei aro Juda.
28 Kanao ku vo awirai vemona kevitikeiya bia vemona nanayara wo,
yah kope nanako ya nararo riꞌiy kaunsil yei.
29 Kanatere noiy tah awirai rere lo yei chirai pona,
yah awirai vemona kevitikeiya.
Toh kanayara veka beya kot-a kepia pao po ao raꞌa vai,
vora kuiniari nemieya narai o nemeriaroki kalabus.
30 Kope mare awirai-a raꞌa kanarivo chirai rokipe veka va nepieya bia vemona narai.
Tah vemona kana bereren kaneriaka kakai rima emo.
Yah awirai kupuana va kanairai noiy aro vemo kevitikeiya emo,
va nenopi awirai-a nirai poma revo ine mema,
vora kuiniari namayara revo arape kot-a kepia pao po.”
31 Yah kope soldia kepao veka namba wan ofisa kairai emo,
yah roro keko ya Cha Pol tah kenopi keperiaki mataimon Antipatris.
32 Kope uri roronai,
soldia vemona kekepitatare hos keko ya Cha Pol tah kenopi keperiaki mataimon Sisaria.
Yah yei soldia ovu kenopi varu Jerusalem boꞌo yei kekepi ero.
33 Aro soldia vemona kekepitatare hos emo,
taim kenopi kerepiki mataimon Sisaria,
yah pas-a kepoa namba wan gavana,
Cha Feliks.
Yah Cha Pol minia keko ya kakai karoi ine ya.
34 Yah namba wan gavana pas-a kayara,
tah katere roa Cha Pol veka,
“Mema kakame provins rope?”
Kope Cha Pol kairai roa veka,
“Nena kakane provins Silisia.”
35 Yah namba wan gavana kairai roa veka,
“Taim beyo voro awirai-a kevitikema ero,
nekape vemo,
yah kope va kot mema nanarivo noma.”
Yah awirai kupuana kairai roiy soldia va Cha Pol neko ya nenopi neperiaroki oꞌro gavman titja Cha Herot karao ero.