Gavana Cha Feliks kot ya Cha Pol karivo
24
Taim umo 5-pla konoiki veꞌen,
hetpris vo tempel awoꞌo ya Cha Ananaias tah yei aro biꞌiy ovu,
yah saveman vo lo awoꞌo ya Cha Tertulus.
Kepepeu mataimon pako Jerusalem yah keparo mataimon Sisaria.
Beyo vemona kenopi va neyaraka gavana vora kot-a nepiapao Cha Pol.
2 Kope taim chipia Cha Pol kanoi are,
Cha Tertulus kavariko karoi yah kairai roa Gavman-a veka,
“Biabiꞌiy,
mema inia kanomi momi cha tah ao prumo kamao koneman romi revo kokai kuiniari mare.
Yah kemiyara veka ao koka inia kamao ero,
ao taipere titja beya kereneman rimi revo ero,
kamarovoru kereneman varu tah riꞌi memi komariri.
3 Ao emo kemiyarare tah ova koromi poaka,
rore boko koka yah pasin koka maramaraꞌa,
kemake oꞌti pako nemoma.
4 Toh beya kuiniari nanavema nakemiki revo vai.
Toh kanao nanatere noma riꞌi mariri mema namomi yah awirai korama memi namarivo.
5 “Bia emo kemiyaraka veꞌen veka nai prumo inia kararerare.
Yah inia roma karao vararoiy aro Juda vo boko koka vo meꞌri.
Yah memi ao vemona kemiyara veꞌen.
Bia emo ya inia kanoi roiy cha aro pava inia kepekeya bia vo Nasaret.a
6-8 Yah kope karake narao tempel-a notaipo ri ine ya God,
tapara vemo kemavia emo.b
Yah mare mema veku kuiniari namatere moa Cha Pol ro awirai rere ao koka kararerare.
Yah kope awirai yah nairai roma,
kope va ku vo awirai vemona kot-a kemiamao mo emo va namayara.”
9 Aro Juda awirai koraꞌa ya Cha Tertulus keko tah chirai veka,
“Awirai ya kairai ro ero,
ero awaka.”
Cha Pol awirai ya karoa Cha Feliks
10 Kope taim namba wan Gavman eno-a karoro vora noriritaka Cha Pol veka kuiniari awirai ya nairai,
yah Cha Pol kairai veka,
“Kanayara veka ainini prumo kerenoriki veꞌen,
mema kakemi veka jas yei aro bombiam vo kantri vemona.
Korao veka tah riꞌi nena konenam revo va awirai nena nanairai noma.
11 Boh namatere moiy aro ovu,
va namayara veka,
umo 12-pla konoiki veꞌen,
kakone mataimon pako Jerusalem va lotu nanao.
12 Aro voro awirai-a kevitikena ero,
beya keyarana awirai-a rava kanairai varanoa bia raꞌa tempel are vai,
tah beya keyarana awirai-a rava kanairai varanoiy aro bombiam oꞌro lotu are vai,
o boko ovu vo mataimon pako vemona.
Baun poaka!
13 Yah beya kuiniari ku vo awirai kot-a kepena pao po ero,
nepiritama vai.
14 Toh nena va nanairai revo veka nena bia emo inia lotu kanao nova God,
aro apo memi lotu inia kepao pova.
Yah kakeni veka bia ya pava kanekeu Rara ya Biapako.c
Yah aro Juda emo chirai veka ao vemona komara revo.
Nena kanabilip nore awirai koka vo lo yah awirai yei profet-a kepeꞌe ero minia.
15 Yah nena inia kanabilip minia veka God-a va nairiy beyo keviri veꞌen ero va neverekope varu.
Yah kope taim vemona beyo God-a kayarai veka keniniu piya ine ya ero tah yei beyo voro kayarai veka ketaipo ero,
va nevereko minia.
Aro voro kot-a kepina pao ero minia kebilip tah kekepi keiya God va narao veka emo.
16 Korao veka tah umumoka inia karoni kupuana vora ava nanao noneman ri ine ya God.
Yah kope ri ine yei aro bombiam minia va neyara veka nena ava ina kanarenare kereneman.
17 “Kope ainini ovu konoiki veꞌen mataimon pako Jerusalem emo kaneneu yah kanoni boko ovu.
Korao veka tah mare aka kakane varu va mani pina naniꞌiy aro ava kerebaun reiy.
Yah kanao ofa nena pina nanao minia.
18 Kope kakeni ofa nena kanao tempel are,
yah pa kanekeu pasin vo nana niniu ri ine ya God.
Yah taim ofa kanao kobaunki,
kekape kevakakena.
Yah aro bombiam prumo beya kekepi pina vai,
tah beya ririvakeko vai.
19 Toh ovu yei Juda vo provins Esia emo,
kekape kiavena.
Korao veka tah,
yei veku va nekape neropi ine mema yah kot-a nepenapao boh awirai-a nuinia riꞌiy.
20 Boh nobauni,
aro kekepi vemo,
va awaka nirai pore ao arape aro vo kot pako yei Juda keyara pina ero taim karoni ine yei tah awirai nena kanairiraiꞌvo.
21 Era ku vo korao veka,
ao vo moikera kanapo kanao taim karoni ine yei tah awirai nena kanairiraiꞌvo.
Taim vemona,
kaiꞌen pako tah kanairai veka,
‘Nena kanabilip revo veka God-a va narao beyo keviri veꞌen ero va nevereko varu.
Korao veka tah mare karoni ine mopu tah kot-a kepenapao.’ ”
22 Kope Cha Feliks kasave revo ro bilip na pasin yei aro bombiam pa kepekeu Rara ya Biapako.
Yah kope kairai roiy veka,
“Kope awirai vemona va nuinia wo,
Cha Lisias nararo yah kope awirai nena nanairai nopu.”
23 Yah awirai kupuana kairai roa namba wan ofisa ero va naorerariya revo Cha Pol.
Toh beya narao Cha Pol nakei veka kalabus vai,
yah raꞌa minia beya narao rariꞌiy aro ya nekape neyaraka tah ava pina nialpim ya vai.
Cha Pol kiorepapiya revo oꞌro kalabus
24 Umo ovu kerenoriki veꞌen yah kope Cha Feliks re om ya Kwa Drusila kerekape kereyaraka Cha Pol.
Kwa Drusila emo vo Juda bom.
Yah kerekape tah Cha Feliks kairia Cha Pol kakai yah ava kairai roiy ro rara vo pa nepekeiya Krais Jisas.
25 Kope taim Cha Pol kakei awirai-a inia kairai roiy ro pasin neman yah niore pariꞌiy yei veku ri ine ya God,
yah awirai vo God-a va kot-a nareirao beyo minia kairai roiy.
Yah awirai vemona korao Cha Feliks kariri poaka yah kairai roa Cha Pol veka,
“Yake.
Taim-a raꞌa nana mompe vo yah kope va nainima nakame vova.
Mare nanomi vo.”
26 Kope taim Cha Feliks re om ya inia kerekape tah kereyaraka Cha Pol,
Cha Feliks emo inia karitoro veka Cha Pol va mani nabaim ya vora narokoreria nanoi.
Korao veka tah umumoka inia kairia tah ava inia keyiriraiꞌvo.
27 Kope taim ainini riyempin konoiki veꞌen Cha Porsius Festus bopo ya Cha Feliks kako.
Korao veka tah Cha Feliks karao va narao riꞌi yei Juda noneman tah beya ao rava karao roa Cha Pol vai.
Kariꞌin Cha Pol kakei pon oꞌro kalabus.