Pacacuna malcacunactam unanchan
20
Chaypïtam Josueta Tayta Dios nin:
2 “Moisesman nishämannu pacacuna malcacunacta unanchapäcunanpäa Israel caśhtacunäta nimuy.
3 Mayanpis mana munayal unꞌaypïta nuna-masinta wañüchiptin wañü nunap ayllun wañuchinanpïtam chay jucnin malcaman pacacü ayinꞌa.
4 Chaynu jucnin malcaman ayilmi puncuman ćhaycul malcap yaśhancunacta niycunꞌa imanuypa wañuchishantapis.
Chayćha puydïcunaca ćhasquiycälil paycunaćhu yaćhananpä awniycälinꞌa.
5 Ñatac wañücäpa ayllun chay malcäcama wañuchinanpä atimuptinꞌa puydïcunaca manam maquinman ćhulaycunanchu.
Pay manamari ćhïnicuyninwanchu nï pinsayninwanpischu wañuchila.
6 Pacacü nunaca imanuypa pasaśhantapis malcantin licaycälinancamam chayćhu caycunꞌa.
Chaynütac licaycünin puydï sasirdütica wañucunancamam chay malcallaćhu caycunꞌa.
Chaypïtalämi malcanman ayllunman cutinꞌa” nil.
7 Niptinmi Israel caśhtacunaca ulꞌucunäćhu cä malcacunacta unanchapäcula:
Galilea lädućhu cä Neftali ayllućhu Cedes malcacta,
Efrain ayllućhu cä Shiquem malcacta,
Juda ayllućhu cä Quiriat-arba malcactapis (Quiriat-arbacta Hebron nipäculatacmi.)
8 Chaynütac Jericopa chimpan Jordan mayup inti ishpimunan lädućhüpis quimsactam aclala:
Beserta,
Ramotta,
Golantapis.
Besermi Ruben ayllup chunyä pampanćhu cayan.
Ramotꞌa Gad ayllup Galaad lädućhümi cayan.
Golanꞌa cayan Manases ayllup Basan lädućhümi.
9 Cay malcacunaman israelcunaca ütac paycunawan yaćhä juc caśhtacunaca pacaculcänanpämi cala.
Chaymanmi mayanpis mana pinsayninwan unꞌaypi wañuchïcunaca ayipäcunman,
wañücäpa ayllun mana wañuchinanpä.
Chayćhümi pacacunꞌa imanuy wañuchishantapis malcap unanchaśhan puydïcunaca licaycunancama.