Cay libructa Moisesmi isquirbila. Deuteronomio ninanꞌa “camachicuyta caśhan uycuśhan” ninanmi. Cay librućhu achca camachicuycuna, yaćhachicuycunam cayan.

Sinai ulꞌućhu camachicuyta ćhasquïcunaca lipäcuśhan chunyäcäćhümi lluy wañuculcäla. Chaymi ipa wiñaycunäta tantiachinanpä cay libru isquirbisha cala. Cayćhu willapäla, Israel caśhtacunäta imanuypa Tayta Dios Egiptopi julaycamuśhanta, Tayta Dios lluy imactapis lulaycüca caśhanta, Moab lädu chunyäcäpa israelcunaca pasapäcuptin Tayta Dios limalicuśhanmannu lulaycuśhantapis. Chaynütacmi cay librućhu yalpachin imanuypa israelcunaca cawsapäcunanpä, Moisesman Tayta Dios camachicuyninta uycuśhanta, imanuypa alawapäcunanpä caśhanta, quiquinpula imanuypa jawcalla cawsapäcunanpä, jinaman camachicuy nishanmannu mana cawsapäcuptinꞌa Tayta Dios mućhuycachinanpäpis yalpachinmi. Chaynütacmi niycun, Tayta Diospa rasun malcannu israelcunaca cawsapäcunanpä, Tayta Diosta cäsulcaptinꞌa limalicuśhan malcaćhu allin cananpä, mana cäsuculcaptinꞌa mućhuycachinanpäpis.

Cay Israel malcacta Moises limapayal Moab lädućhülämi cayäla. Chayćhu ash timpullamari caycälila.