Deuteronomio
Camachicuyta Caśhan Uycuśhanpi Moises Isquirbishan
Tayta Dios limalicuśhantam Moises yalpachin
1
Jordan mayup inti yalamunan lädu Araba nishan chunyäcäćhümi Israel caśhtacunäta Moises limapäla.
Caymi cala Puca Lamarpa chimpanćhu,
jinaman Paran,
Tofel,
Laban,
Hazerot,
Dizahab malcacunap sircanćhu.
2 Má,
Seirman lina caminunninpa lisha,
Horeb ulꞌüpïta aśhta Cades-barneacama ćhunca jucniyu (11) muyun puliycuymi cala.
3 Tawa ćhunca (40) watäćhu,
ćhunca jucniyu quillap wamä muyunninćhümari Tayta Dios nishanta lluy Israel caśhtacunäman Moises willala.
4 Chaynu willala Amhora läducunäpä mandacünin Sehonta llallïlulñam;
paymi Hesbonćhu yaćhala.
Chaynütacmi llallïla Basanpa mandacünin Ogta;
paymi Astarotćhu,
Edreićhu yaćhala.b
5 Chayurá Jordan mayup inti yalamunan lädu Moab lädućhu cayällalmi Israel caśhtacunäta Moises caynu nin:
6 “Quiquin Tayta Diosninchicmi Horeb ulꞌüćhu cayaptinchic caynu limapämälanchic:
‘Cay ulꞌüćhu achca timpuñam cayalcanqui.
7 Canan pasapäcuy Amhor läducunäpa ulꞌuncunaman;
muyülïninćhu lluy cäcunämanꞌari:
Arabaman,
ulꞌucunäman,
pampacunäman,
Neguevman,
lamarpa patanman,
Canaan läducunäpa malcanman,
Libano allpacunäman,
aśhta Eufrates jatun mayücama.
8 Cay allpacunäta ampa maquiquimanmi ćhulaycamú.
Chayurá canan lipäcul duyñuchaculcay.
Caycuna awquilluyqui Abrahamman,
Isaacman,
Jacobman,
lluy milaynincunaman yaꞌa Tayta Dios limalicuśhá allpamari cayan’ nil.
Licaycüninta ćhulaśhanpïtam yalpachin
9 “Chayćhümari amcunacta nipäculac:
‘Yaꞌa japallá amcunawan manam atipämanchu.
10 Sïlüćhu uyllurcunätanüpis quiquin Tayta Diosniqui amcunacta achca-achcamanmi milälächishunqui.
11 ¡Awquilluyquicunap Tayta Diosnin canan capäcuśhayquipïpis mas achca-achcamanlä milaycälichilćha limalicuśhanmannu allinpä licaycälishunqui!
12 ¿Imanuypañamá amcunap sasachacuyniquicunacta,
jucmanyayniquicunacta,
quijacuyniquicunacta japallá apayta atipäman?
13 Chayurá ayllupi-cama allin yaćhayniyüta,
fisyusapacta,
umayu nunacta aclapäcuy.
Paycunactamá licaycüniqui capäcunanpä ćhulaycuśhä’ nil.
14 “Niptïmi amcunañatac:
‘Chaynu nishayqui allinmi’ nil nipämälanqui.
15 “Chaymi ayllupi-cama yaćhayniyüninta,
fisyusapanninta aclalcul amcunap puydïniqui cananpä pudirta uyculá.
Paycunactam ćhulayculá walanga (1,000),
paćhac (100),
picha ćhunca (50),
ćhunca nunacunacta,
jinaman jinantin ayllucunäta licaycälinanpäpis.
16 Jinalculmi chay licäniquicunacta caynu nilá:
‘Israel caśhta-masí captinpis ütac juc caśhta captinpis mayanninmanpis mana śhalcullal cäcällacta niycuy.
17 Amatac mayanninmanpis śhalcuyaychu;
masqui wacchactapis,
rïcuctapis chay cuscacta licaycuy.
Chaycunacta quiquin Tayta Dios licaycüca cayaptinmi mana manchalinayqui canchu.
Mana allichayta atipäśhayquitam ichá yaꞌaman pasamanqui quiquí licaycunäpä’ nil.
18 “Chay timpućhümi amcuna imacta lulapäcunayquipäpis lluy niycälilac.
Licamü lïcunaca willaculcäśhanpïtam yalpachin
19 “Tayta Diosninchicta cäsucuyninchicwanmi Horebpïta yalamulanchic Amhor läducunäpa ulꞌuncunaman.
Chaymi licapäcuśhayqui calu-calu manchanaśh chunyäcäpa lilanchic,
Cades-barneaman ćhänanchiccama.
20 Chayćhümi nipäculac:
‘Tayta Diosninchic umäśhanchic Amhor läducunäpa ulꞌuncunaman ćhämunchicñam.
21 Tayta Diosniquimari cay allpacta maquiquiman ćhulaycamun.
Chayurá awquilluyquicunap Tayta Diosnin nishanmannu duyñuchacalcämunayquipä lipäcuy.
Ama manchaculcaychu nï jucmanyapäcuypischu’ nil.
22 Nipäcuptïmi amcunañatac aśhuycälimul:
‘Chay malcacta licamunanpä waquinninchic puntachun.
Chayćha cutimul willamäśhun mayninpa linanchictapis,
may malcacunaman yaycunapäpis’ nil nipämälanqui.
23 “Chay nipämäśhayquica allin captinmi ćhunca ishcayniyu (12) ayllupïta jucta-cama aclayculá.
24 Paycunam ulꞌucuna caśhan läduman lipäcul Escol pampaman ćhälälila.
Chaypïtam chay allpacta lluy licapämula.
25 Jinalmi chayćhu talpuycunap wayuyninta apapämula:
‘Tayta Diosninchic umäśhanchic allpaca sumä allinmi’ nil.
26 Amcunañatacmi mana liyta munätuculcal Tayta Diospa nishanta jalutaculcälanqui.c
27 Chucllayquicunaćhüpis jamuyaytam allacaycälilanqui:
‘Tayta Dios ćhïnicamanchicmi.
Chaymi Egiptopïta julamälanchic Amhor läducunäpä maquinman ćhulaycul camacaycämänanchicpä.
28 ¿Cananꞌa maytamá lishun?
Licamü lïcunäpis manchalpaycächimanchicmi:
“Nunancuna alli-cama jatućhämi caña,
malcancunapis jatućhäcamam,
murällanpis altu-altucamam cacuña,
Anacpa caśhtancunapis chayćhümi yaćhapäcuña” ’ nil.
29 “Nipämaptiquim nipäculac:
‘Ama chucchupäcuychu,
nïtac manchaculcaychu.
30 Egiptoćhu quiquin Tayta Dios lulaśhanta licaśhayquinümi puntayquita ñawpal amcunapïta pilyamunꞌa.d
31 Chaynütacmi am licapäculanqui juc tayta chulinta cuyacuywan caminaycücänu quiquin Tayta Diosniqui jinantin chunyä śhamuśhayquićhu caycama caminaycamuśhuśhayquita’ nil.
32 Chaynu lulayaptinpis amcuná Tayta Diosniquiman manamá chalapaculcälanquichu,e
33 masqui mayćhu jamapäcunayquipä ashishtin puntayaptinpis.
Pay mayninpä lipäcunayquipä tutanpa ninawan,
muyunpañatac pucutaywan caminaycuyalcäśhuptiquipis manamá chalapaculcälanquichu.
Israel caśhtacunäwan Tayta Dios piñacuśhanpïtam yalpachin
34 “Chaynu nipäcuśhayquita Tayta Dios uyalïlulmi anchap piñaculcul caynu limalicula:
35 ‘Awquilluncunaman limalicuśhá allin allpacta manam juc nunallapis cay juyu-cama milaycunäpïta licaycälinꞌachu.f
36 Ñatac Tayta Diosman chalapacuśhanpam Jefonep chulin Caleblla licaycunꞌa;
chaynu chalapacuśhanpatacmi licamuśhan allpäta payman,
lluy milaynincunamanpis uycuśhä’ nil.
37 “Amcunap juchayquipïtam yaꞌawanpis Tayta Dios piñacülul limalicula:
‘Cay allpäman ampis manam yaycunquichu.
38 Nunpa chulin yanapäniqui Josuemi ichá yaycunꞌa.
Chayurá payta callpanchaycuy.
Paymari Israel caśhtacunäman allpäta uycüca cayan.
39 Ñatac mayannin allin ütac mana allin caśhantapis manalä lisï iñacha chuliquicuna,
uywaynin licalinanpä nishayqui chuliquicunam yaycapäcunꞌa.
Paycunaman uycuptïmi duyñuchacaycälinꞌa.
40 Amcunañatac Puca Lamarman caminu lïcäpä chunyäcäman wayra cutipäcuy’ nil.
Horma lädućhu llallichicuśhanpïtam yalpachin
41 “Chayta nipäcuptïmi amcunañatac nipämälanqui:
‘Tayta Diostam jalutacälälillá.
Ñatac Tayta Dios nimäśhanchicmannüćha lipäcul pilyapämuśhä’ nil.
Nilmi chay ulꞌüllaman ishpiy ushyalla caśhanta pinsayniquiwan pilyapämunayquipä allichacälälinqui.
42 Tayta Diosñatacmi nimäla:
‘Nimuy:
pilyamü ama ishpipäcuchunchu;
yanꞌalmi ćhïnicünincuna camacaycälälinman.
Yaꞌa manam paycunawanchu cayá’ nil.
43 “Chay nimäśhanta yaꞌa willaycälilacmi.
Ñatac amcuna cullu linlicuyculmi Tayta Diosta jalutaculcul nunatucüśha ulꞌucunäman liculcälanqui.
44 Chaymi chay ulꞌucunäćhu yaćhä Amhor läducunaca yalalcälimul Seirćhu llallïlälishulanqui.
Jinalmi urunwaynu Horma läducama aticaćhälälimuśhulanqui.
45 Chaypi cutilcamulmi Tayta Diospa ñawpäninćhu waꞌaculcälanqui.
Ñatac paytá manam imapis uculachu nïtac uyalipäcuśhulanquipischu.
46 Chaymari amcuna Cades lädućhu una-unay capäculanqui.