Israel caśhtacunaca Tayta Diospa waśhantam limapäcun
14
Chaymi tutay-walächi Israel caśhtacunaca apalcaćhaculcan,
waꞌaculcan.
2 Jinantin Israel malcantinmi Moisestawan Aaronta nicuyalcan:
“¡Maylä Egiptoćhu wañüluchwan cala!
¡Maylä chunyä ulꞌüćhu wañucamuchwan cala!
3 ¿Imapäćha caycama Tayta Dios puśhamälanchic?
¿Imapäćha cayćhu ispädawan wañüchimänanchicpä,
jinaman walminchicta,
chulinchicta uywaynin cananpä puśhamälanchic?
Chaypïtá allinćha canman Egiptocta cuticuptinchicpis” nil.
4 Nilculmi:
“Puśhäninchicta ćhulaśhun Egiptocta cutichimänanchicpä” ninacücuyalcan.
5 Chaymi Moiseswan Aaron lluy Israel caśhtacunap puntanman unꞌulacaycälil pampäman uyshucaycälin.
6 Chaynütacmi Nunpa chulin Josuewan,
Jefonep chulin Caleb licamü lïcunaca müdanancunacta llaquicuypi laćhyacuyalcan.
7 Chayćhümi jinantin Israelta nin:
“Chay licapämuśhá allpacunaca sumä tuqui allpam.
8 Tayta Diosninchic llaquipayculꞌa quiquinćha puśhaycamäśhun.
Chaynütac imaypis tuqui-tuquicta wayuycachï allpacta uycamäśhun.
9 Chayurá Tayta Diosninchicpä cuntran ama śhalcapäcuychu.b
Amatac chayćhu yaćhä nunacunätapis manchaculcaychu.
Paycunactá llümillactanümia millpulpüśhun;
manamá mayan yanapäninpis canchu.
Yaꞌanchicwanmi ichá Tayta Diosninchic cayan.
Chayurá amari manchaculcaychu” nil.
10 Ñatac lluy malcaca tamshäluyta munacuyalcaptinmi Tayta Diospa sumä caynin tincuna carpaćhu lluy Israelpa ñawquin licalïlun.
11 Chayćhümi Moisesta Tayta Dios nin:
“¿Imaycamañatá cay malcaca piñayächimanꞌa?
¿Imaycamañatá mana chalapacalcämanquichu ñawquinćhu imaymana milagrucunacta lulaśhäta licayalcalpis?
12 Chaymi cay malcaman camacaycü ishyayta ćhächishä.
Ampa milayniquipïtañatacmi ichá mas jatun malcacta śhalcachishä,
jinaman sumä munayniyu malcactalä canpis” nil.
13 Niptinmi Moises nin:
“Taytay,
anmi Egiptopïta sumä munayniquiwan cay malcäta julamulanqui.
Caynu malcayquiwan lulaśhayquita Egipto nunacunaca yaćhälulćha,
14 Canaan lädu nunacunäta willälälinꞌa.
Paycunapis uyalipäculam,
am Tayta Dios cay malcayquiwan caśhayquita,
malcayquiman licalimuśhayquita,
malcayquiwan cayal muyunpa suytunpäśha pucutaywan caminaycuśhayquita,
tutanpañatac suytunpäśha ninawan puśhaśhayquitapis.
15 Ñatac cay malcayquita juclla camacaycüluptiquiꞌa allin lulaśhayquita yaćhä nasyuncunäćhá limaculcanꞌa:
16 ‘Maytá chay Tayta Diosnin limalicuśhan allpäman malcanta ćhächinchu.
Chay chunyä ulꞌućhuꞌari lluy camacaycülun’ nil.
17 Chayurá Taytallay,
limalicuśhayquimannuꞌari canan sumä munayniquita camalachicuy.
Anmi nilanqui,
18 ñacayta piñacuśhayquita,
cuyacuyniqui sumä jatun caśhanta,
jinaman mana allincätawan cuntrayqui śhalcücätapis pampachäśhayquita.
Ñatac chay mana allinninpïtá chulinćhu,
willcanćhu,
waśha paqui willcancunaćhu asutiycunayquitamaric nilanqui.d
19 Chaynu jatun cuyacuyniqui cayaptinꞌa juchanpïta cay malcacta pampachaycuy;
Egiptopi yalamuśhanpi caycama pampachaycuśhayquinuꞌari cananpis pampachaycuy”e nil.
Israel caśhtacunäta mućhuchinanpämi nin
20 Niptinmi Tayta Dios nin:
“Nimäśhayquimannümi paycunacta pampachaycú.
21 Chaynu captinpis quiquïta,
jinantin pachäćhu sumä caynïta śhaycaycachilmi limalicú:
22 Masqui sumä caynïta,
milagru lulaśhäcunacta Egiptoćhu ütac chunyä ulꞌucunäćhu licayalcalpis mana cäsumäcunaca,
jinaman cutipalcul-cutipalcul cunträman śhalcücunaca,
23 awquilluncunaman limalicuśhá allpacta manamari licaycälinꞌachu.
Manamá mayan piñachimänïcunapis licaycunꞌachu.f
24 Ñatac uywayní Calebmi ichá callpanchacul cäsucamäla.
Chaymi licamü lishan allpäman yaycuycunꞌa;
milaynincunapämi canꞌapis.g
25 Amalec,
Canaan caśhtacunämari jinantin pampäćhu yaćhayalcan.
Chaymi wala muyun yalapäcunqui chunyäcäman Puca lamar läduman” nil.
26 Nilculmi Moisestawan Aaronta Tayta Dios nin:
27 “¿Imaycamatan cay pasaypi Israel malcaca waśhäta limacamanꞌa?
Israel caśhtacunaca yaꞌapa cunträ limaśhanta uyalïlüñam.
28 Chayurá canan nimuy:
‘Chay limapäcuśhanmannümi paycunawan lulaycuśhä.
Yaꞌa quiquí Tayta Diosmari chaynu lulaycunäpä limalicú.
29 Cay chunyäcäćhümi wañüśha jitalapäcunqui.
Ishcay ćhunca (20) watayüpi janaman lluy sinsaśha cuntrá cäcunaca,h
30 maquïta chacchalcul limalicuśhá allpäman manam yaycapäcunꞌachu.
Jefoneppa chulin Calebwan,
Nunpa chulin Josuellamari yaycapäcunꞌa.
31 Chaynütacmi ćhïnicüniquip uywaynin licalinanpä nishayqui chuliquicuna yaycapäcunꞌa.
Paycunamari jamuyapäcuśhayqui allpaćhu capäcunꞌa.
32 Amcuná cay chunyä ulꞌućhümi wañupäcunqui.
33 Chuliquicunañatacmi chunyä ulꞌüćhu tawa ćhunca (40) watai uwishta michishtin pulipäcunꞌa.
Ipanchapäcuśhayquipïtamari chaynu ñacapäcunꞌa,
chunyäcäćhu lluy camacapäcunayquicama.
34 Amcuna tawa ćhunca (40) muyunmi allpäta licamú lipäculanqui.
Chaynümi tawa ćhunca (40) wata mana allin lulayniquipi ñacapäcunqui;
juc muyunpïmari juc wata ñacapäcunqui.
Chayćhümi yaćhapäcunqui cuntrá śhalcuyca imanuy caśhantapis.
35 Yaꞌa quiquí Tayta Diosmi niyá,
cay pasaypi malcäta yaꞌap cuntrá śhalcücunäta;
cay chunyäcäćhümari camacapäcunꞌa,
wañupäcunꞌa’ ” nil.
36 Canaan allpäta licamunanpä Moises caćhaśhanca cutilälimulmi chay allpaca mana allin caśhanta jinantin malcäwan jamuyächila.
37 Chay allpapi mana allinta limäcunaca Tayta Diospa ñawpäninćhu juyu ishyaywanmi wañülälila.
38 Ñatac Nunpa chulin Josuewan Jefonep chulin Calebmi ichá lluy licä lïcunäpïta cawsayniyu quïdapäcula.
Canaan läducunämi Israel caśhtacunäta llallin
39 Caycunacta lluy Israel caśhtacunäman Moises willaycuptinmi alli-allicta waꞌaculcan.
40 Chaymi chay walantin wäla-wälalla lluypis śhalcacalcälil ulꞌup puntanman ishpipäcula:
“Mana allintam lulälunchic.
Tayta Dios limalicamäśhanchic sityumanmi ishpinanchic” nil.
41 Niptinmi Moises nin:
“¿Imapïtá Tayta Diospa nishanta cäsucuyta mana munapäcunquichu?
¡Cay lulaśhayquipis manamá allinchu yalupäcuśhunqui!
Ama ishpipämuychu.
42 Amcunawanñachu Tayta Dios manamá cayan.
Chaymi lipäcuptiquiꞌa ćhïnicüniquicuna camacaycälälishunqui.
43 Chayćhu Amalec lädu,
Canaan caśhta alcayalcäśhüniquim ispädanwan camacaycälälishunqui.
Tayta Diospi japächacüläliptiquimari pay manaña yanapapäcuśhunquiñachu” nil.