3 Chaymi Tayta Dios nishanmannu Paran lädu chunyäcäpi Moises caćhala.

Cay caćhaśhancunaca ayllunćhu puydïcunam cala.

4 Caycunamari ayllunpi-cama śhutincuna:

Ruben ayllupi Zacurpa chulin Samua.

5 Simeon ayllupïñatacmi Horipa chulin Safat;

6 Juda ayllupïñatacmi Jefonep chulin Caleb;

7 Isacar ayllupïñatacmi Josepa chulin Igal;

8 Efrain ayllupïñatacmi Nunpa chulin Oseas;

9 Benjamin ayllupïñatacmi Rafupa chulin Palti;

10 Zabulon ayllupïñatacmi Sodip chulin Gadiel;

11 Josepa chulin Manases ayllupïñatacmi Susip chulin Gadi;

12 Dan ayllupïñatacmi Gemalipa chulin Amiel;

13 Aser ayllupïñatacmi Micaelpa chulin Setur;

14 Neftali ayllupïñatacmi Vapsip chulin Nahbi;

15 jinaman Gad ayllupïñatacmi Maquip chulin Geuel cala.

16 Lluy caycunamari Moises caćhaśhan puydïcunäpa śhutincuna.

Nunpa chulin Oseasta Moisesmi śhutichäla Josue śhutiwan.

17 Chay Canaan malcäta licamü lïcunätam Moises nin:

“Caypïta Neguev läduman lipäculmi ulꞌüman ishpipäcunqui.

18 Chaypïtam malcaca imanuy caśhantapis licapämunqui,

jinaman nunancuna callpayu ütac mana callpayu caśhantapis,

chaynütac ashlla ütac achca capäcuśhantapis.

19 Jinaman yaćhapäcuśhan allpacunaca allin ütac mana allin caśhantapis licapämunqui,

chaynütac malcaca muralläśha ütac mana murälläśha caśhantapis.

20 Chaynütacmi jundu tuqui allpa ütac mana jundu amya caśhantapis licapämunqui,

jinaman lantayu ütac mana lantayu caśhantapis.

Jinaman callpanchacul chayćhu imapis wiñäcunäta apapämunqui” nil.

Canan má,

caynu lipäcula üba cusicha wamä allaycunan timpućhümi.

21 Chaymi paycuna ishpipäcul licapämula chunyä Zin ulꞌupi allacuycul aśhta Hamat ulꞌucunap sircan Rehobcama.

22 Chay Neguev lädup ishpipäculmi Hebronman ćhälälin.

Cay Hebron malcam Egiptoćhu cä Zoan malcäpïpis anćhish wata mas puntactalä śhalcachisha cala.

Chayćhümi Anacpa milaynin Ahiman,

Sesai,

Talmaipis yaćhapäcula.

23 Chay Escol nishan yacu patanman ćhälälilmi talïlälin übacta.

Chaypa pallaynintam cuchulcul caśhpiwan ishcay umri umrupämula.

Jinamanꞌa ïgustapis,

granadillactapis apapämulatacmi.

24 Chaynu übacta Israel caśhtacunaca cuchupämuśhanpam chay sityucta “Escol pampa”^a nil śhutichapäcula.

25 Chaynu tawa ćhunca (40) muyun chay allpacunäta licä lipäcuśhanpïmi cutïlälimun.

26 Moisesñatacmi Aaronwan jinantin Israel caśhtacunäwan chunyä Paran lädu Cades malcäćhu cayalcäla.

Chayćhümi licamuśhancunacta lluyman willapäcula;

jinaman micuypa wayuynincuna apamuśhancunätapis uycapäculam.

27 Chayćhümi willapäcula cay nil:

“Caćhapämäśhayqui malcäman ćhälälïmi.

Rasunpa imaypis tuqui-tuquicta wayuycachï allpam caculläña.

Caycunamari wayuynincuna.

28 Ñatac nunancuna alli-camam caculcälläña.

Malcancunapis jatućhä masïsu-camam caña;

Anacpa caśhtancunam chayćhu yaćhapäcuña.

29 Neguev lädućhümi Amalec caśhtacuna yaćhapäcuña;

ulꞌucunäćhüñatacmi Het,

Jebus,

Amhor läducunaca yaćhapäcuña.

Lamarcäpa chimpanćhu,

Jordan mayup patanćhüñatacmi Canaan caśhtacunaca yaćhapäcuña” nil.

30 Calebñatacmi Israel caśhtacunäta upällalcachil Moisespa ñawquin nin:

“Taytacuna,

chay allpaman yaycuycul pudiracuycuśhunmi.

Yaꞌanchic sumä cayalꞌa llallïshunmá” nil.

31 Ñatac Calebwan waquin lïcunäñatacmi:

“Manam-manam,

chay nunacunäta llallichwanchu.

Paycuna yaꞌanchicpïtá sumä-camam cacuyalcan” nin.

32 Chaymi paycuna licamü lishanpi mana allinta limayta allacaycälin:

“Canaan allpa licapämuśhäcunaca nunancunacta micuñämi.

Chayćhu yaćhä nunacunaca jatućhäćhä-camam caculcälläña.

33 Chaynütacmi Anacpa^b milaynin jatućhaćhä callwan-cama nunacunäpis yaćhapäcuña.

Paywan tincuyculꞌa yaꞌanchic usa-yupayllamá cañanchic;

paycunapis chaytanümari licamäñanchic” nil.