Cay libructa Moisesmi isquirbila. Cayćhümi willamanchic Israel caśhtacunaca chunyä ulꞌunpa lipäcuśhancäta. Ishcay wata liyalcaptinmi Tayta Dios carpaćhu cayalcal sinsananpä Moisesta nila; ayca nunacuna capäcuśhantapis yaćhapäcunanpä, jinaman imacunacta lulay yaćhapäcuśhantapis ćhulananmi cala.

Chaynütacmi Tayta Dios camachila paypa śhunꞌunpänu malcaca imanuy cawsapäcunanpäpis. Chaynütac camachila ishyapäcul imacta lulapäcunanpä, casädu cawsaypi, ima mana allin lulaycunapi, pilyacunapi, juccunapïpis.

Listuña cayalcal Paran läduman liyta allaycapäculmi caśhanñatac quijacuyta allacaycälin: micuy micapäcuśhanpi, Moises puydïnin caśhanpi, Tayta Diospïpis. Egiptop maquinpïta Moises libraycunanpäñatacmi ichá awnipäcula; ñatac chunyä ulꞌucunap puśhaycünin cananpá manamá munapäculachu.

Chaynu lulaynincunamari Tayta Diosta piñachila. Chaymi chay chunyä ulꞌucunäćhu Tayta Dios tawa ćhunca (40) wata pulichila. Chay mana chalapacücunaca, imaypis quijacücunaca, mana cäsucücunaca wañuculcänancamam Tayta Dios chunyäcäćhu cachila.