Camachicuyta cäsuculcänanpämi yalpachin
4
“Cananꞌari Israel caśhtacuna,
Tayta Diospa camachicuynin,
nishan yaćhachishäta uyalipäcul lulayman ćhulapäcuy.
Chayćha awquilluyquicunap Tayta Diosnin maquiquiman ćhulaycamuśhan jinantin allpäman yaycul chayćhu yaćhapäcunqui.
2 Cay nishäcunäman amam imactapis yapaycunquichu nïtac juluycunquipischu.a
Aśhwanpam Tayta Diospa camachicuynincunacta cäsuculcanqui.
3 Amcuna tuquictam licapäculanqui Baal-peorćhu Tayta Diosniqui imacta lulaśhantapis.
Chayćhümi taytachacta alawa nunacunäta amcunap ñawquiqui Tayta Dios camacaycüla.b
4 Ñatac amcuna Tayta Diosman lluy chalapacücunämi ichá cawsayalcanquilä.
5 Licapäcuyꞌari,
quiquin Tayta Diosní camachimäśhantam,
nimäśhantam yaćhaycachipäculac.
Caytamari yaycapäcunayqui allpacta duyñuchaculcal lulapäcunqui.
6 Cäsuculcalꞌari lulayman ćhulapäcuy.
Chayćha licaśhüniqui nasyuncunaca yaćhapäcunꞌa amcuna yaćhayniyu,
tantiayniyu capäcuśhayquita.
Paycunam cay camachicuycunacta uyalipäcul nipäcunꞌa:
‘Rasunpa maynu yaćhayniyu tantiayniyümi cay malcaca;
sumämi cay malcaca’ nil.
7 ¿Jatun nasyunpa taytachancuna lädullanćhu cayanchun imatá?
Yaꞌanchicpa Tayta Diosninchicmi ichá lädullanchicćhu cayan mañacuyninchicta uyalimänanchicpä.
8 Canan willaycälishacnuꞌa,
¿mayan jatun nasyunpa,
tincüllanman-cama cä camachicuynin,
yaćhachicuynin cayanchun imatá?
9 Chayurá licaśhayquicunäta unꞌälälinayquipi,
śhunꞌuyquipi yalünanpïpis cuydaculcay.
Aśhwanpa chuliquicunacta,
willcayquicunacta,
yaćhaycachiy.
Horeb ulꞌüćhümi Tayta Dios limapaycuśhanta yalpachin
10 “Horeb ulꞌüćhu Tayta Diosniquipa puntanćhu capäcuśhayqui muyunmi pay nimäla:
‘Jinantin malcäta juntupämuy nishäcunacta uyalipämänanpä,
cay pachäćhu cawsapäcuśhancama manchacuyta yaćhapäcunanpä,
jinaman chulincunactapis yaćhachipäcunanpä’ nil.
11 Chaymi amcuna ulꞌüpa siquinman aśhuycapäculanqui.
Chay ulꞌüpi nina waläca sïlücamaña sumbaypa-sumbal,
yanaypa-yanal tutawyayaptinpis chayćhümari capäculanqui.
12 Chay nina waläcäpa ćhawpinpïmi Tayta Dios limamula.c
Amcuna pay limaśhanta uyaliyalcalpis manamari quiquintá licapäculanquichu.
13 Chaynüpam Tayta Dios lumipi ishcay tablachaman ćhuncantin camachicuy isquirbishanta lisichipäcuśhulanqui.
Caytam lulayman ćhulapäcunayquipä nipäcuśhulanqui.d
14 Chayćhütacmi yaꞌacta nimäla yaćhachicuyninta,
camachicuynintae yaćhaycälichinacpä.
Chayćha Jordan mayucta chimpal chay allpacunäta duyñuchacälälil lulayman ćhulapäcunqui.
Taytachacunacta mana alawananpämi yalpachin
15 “Horeb ulꞌüćhu nina waläcäćhu Tayta Dios limayaptin amcuna manam quiquintá licapäculanquichu.
Chayurá yanꞌalätac,
16 walmictanu ütac umrictanu taytachacunactaf lulacaycälil mana allincäman palpülälinquiman.
17 Chaynütac imaymana uywacunactapis,
pälï uywacunactapis,
18 śhullwaywan pulïcunätapis,
yacućhu cawsäcunätapis taytachacuyalcanquiman.g
19 Yanꞌalätac altu sïlućhu intïta,
quilläta uyllurcunäta,
chaynütac imaymana cäcunäta licalcul aysachicülunquiman;
jinal unꞌulacuycul alawayta ćhapayalcanquiman.
Chaycunacta quiquin Tayta Diosniquim camala jinantin pachäćhu lluy malcacunäpä.
20 Amcunactañatacmi jïrructa fundï Egipto malcapi Tayta Dios julaycälimuśhulanqui,
canan caśhayquinu paypa aclaśhan capäcunayquipä.h
21 Ñatac Tayta Diosniqui amcunap janayqui yaꞌawan piñacülulmi limalicuśhan allin allpaman yaycunäpä,
Jordan mayuctapis manaña chimpanäpä nimäla.i
22 Chaymari Jordan mayüta manaña chimpalña wañucuśhä.
Amcunañatacmi ichá pasapäcul chay allin allpäta duyñuchaculcanqui.
23 Tayta Dios amcunaman limalicuśhanta yanꞌalätac unꞌälälinquiman.
Amamá Tayta Diosniqui mićhacuśhuśhayqui imaymana liccha taytachacunactapis lulayalcanquichu.
24 Tayta Diosniqui silüsu,
nina waläcänu camacaycümi cacullan.j
25 “Sïchuśh cay allpäćhu achca wataña yaćhayal chuliyu,
willcayu cayalña taytachacunacta ama lulapäcuychu nïtac alawapäcuypischu.
Chaynu lulayniquiwan millachicuy lulayta lulayalcalmi Tayta Diosta piñachipäcunqui.
26 Chaynu mana cäsuculcaptiquiꞌa cay pachätawan janay pachätam licäniquipä śhaycaycachí,
Jordan mayucta pasälälil duyñuchacuśhayqui allpaćhu manapis unayta camacapäcunayquipä.
Chay allpaćhu manamá unaypischu cawsapäcunqui.
27 Quiquin Tayta Diosninchicmi jinantin malcacunäman chiꞌichishunqui;
chay malcacunäćhu ash-ashllañam cawsapäcunqui.
28 Chayćhümi amcuna nunacunap luläśha cullupi,
lumipi,k
mana licä,
mana uyalï,
mana micü ni aśhnaytapis sintï taytachacunacta alawapäcunqui.
29 Ñatac chay caśhayquićhu Tayta Diosniquita tucuy śhunꞌuyquiwan,
llapan callpayquiwan ashiptiquiꞌa talinquim.l
30 Imaymana sasachacuyćhu,
llaquicuyćhu cayalcal Tayta Diosniquiman licaćhaculcaptiquiꞌa,
shiminta uyaliculcaptiquiꞌa,
31 allin llaquipayniyu caśhanpam mana unꞌapäcuśhunquichu nïtac camacaycüśhunquipischu;
manatacmi awquilluyquicunaman limalicuśhantapis unꞌaycunꞌachu.
32 “Má,
punta timpucunacta licaycuy imanuy caśhantapis;
Tayta Dios wamä nunäta cay allpäćhu camaśhan muyunpïta caycama manam imaypis caynu pasalachu.
Cay jinantin pachäćhu manamá caynu mayllaćhüpis pasalachu.
33 Mayan malcamá Tayta Dios nina waläcäpi limapäśhanta uyaliyalpis cawsanman.
34 ¿Tayta Dios lulaycuśhannu mayan taytachamá juc nasyunta quiquinpä japächacuycul sasachacuycunawan,
siñalcunawan,
milagrucunawan,
gïrracunawan,
sumä manchaycunawan aclaycula?
Tayta Diosllam Egipto nasyunćhu yaꞌanchicpa ñawquinchic,
chaynütac yaꞌanchic-laycu sumä munayninwan,
nana-nanay mućhuchicuyninwan,
manchachicuypa cäcunacta lulala.
35 Caycunacta licaycachishulanqui quiquin Tayta Dios rasunpa pay caśhanta,
jinaman juc mana caśhanta yaćhanayquipämi.m
36 Janay pachäpïmi shiminta uyalichishulanqui caminaycuśhunayquipä.
Cay pachäćhüñatacmi nina waläcäta licachil,
chay ninapïta limapaycuśhulanqui.
37 Paymi awquilluyquicunacta cuyal milaynincunacta aclaycula.
Chaymi Egiptopïta sumä munayninwan juluycuśhulanqui.
38 Amcunap puntayquipïmi achca nunayu,
sumä-cama nasyuncunäta alapacüla.
Chaynu lulaycula canan pasaśhannu amcuna nasyunniquiman yaycaycälil chay allpacta tücäniquipäña ćhasquiycälinayquipämari.
39 “Chayurá cananꞌari śhunꞌuyquiman ćhulapäcuy janay pachäćhüpis cay pachäćhüpis quiquin Tayta Dioslla caśhanta.
Paypïta juc manamari canchu.
40 Camachicuyninta,
nishanta,
yaćhachicuyninta cäsuculcayꞌari.
Chayćha amcuna,
milayniquicuna Tayta Diosniqui uycuśhuśhayqui allpäćhu wiña-wiñaypä allin capäcunqui” nil.
Pacaculcänanpä unanchaśhan malcacuna caśhanta yalpachin
41 Chaypïtam inti yalamunan Jordan mayu lädućhu quimsa malcacta Moises laquila.
42 Chay malcaman linꞌa cawsayninta ayichinanpä mana ćhïnicul ütac mana pinsal nuna-masinta wañuchïcällam.
43 Chay malcacunam caycuna:
Ruben ayllupä chunyä pampaćhu cä Beser malcam cala.
Gad ayllucunapäñatacmi Galaad lädu Ramot malca cala.
Manases ayllucunapäñatacmi Basan lädućhu Golan malca unanchaśha cala.n
Camachicuytam Moises yalpalcachin
44 Cay camachicuytam israelcunäman Moises uycula.
45 Egiptopïta yaläläliptinñamari camachicuyta,
nishanta,
yaćhachicuyta Moises yaćhaycachila.
46 Chaynu nila Jordan mayucta manalä chimpal,
Bet-peor malcap chimpan Hesbon pampäćhu cayalcaptinmi.
Cay malcaćhümi Amhor läducunäpä mandänin Sehon yaćhala.
Paytam Moiseswan Israel caśhtacunaca Egiptopi yalapämul camacaycüla.
47 Jinalmi duyñuchacaycälila;
jinaman mandacü Ogpa Basan allpantapis duyñuchacaycälilamari.
Cay Amhor läducunäpa ishcay mandacünincunaca Jordan mayunpa inti ishpimunan lädućhümi cayalcäla.
48 Paycunap culindancunam Arnon mayup patanćhu cä Aroer malcapïta aśhta Sion ulꞌücama cala;
cay ulꞌucta Hermon nipäculatacmi.
49 Paycunapatacmi cala Jordan mayup chimpan inti ishpimunan lädućhu jinantin Araba lädupis aśhta Puchucu Lamar nishancama;
chay lamar cayan Pisga ulꞌup saytanćhümari.