2 “Tayta Diosninchicmi Horeb ulꞌüćhu yaꞌanchicman limalicula.

3 Manamá awquillunchiccunallapächu limalicula,

sinuꞌa canan cayćhu yanꞌanchic cawsäcunäpäpis limaliculam.

4 Amcunacta ulꞌüćhu nina waläcäpa ćhawpinpi cära-cäram Tayta Dios limapäśhulanqui.

5 Chay nina latäcäta manchaculcal mana ishpipäcuptiquim yaꞌallaña ulꞌüman ishpilá Tayta Dioswan limamunäpä.

Cutilpaycamulñam imacta nimäśhantapis amcunacta willapäculac.

Chayćhümi Tayta Dios nimäla:

6 ‘Egiptop maquinćhu uyway nuna caśhayquipïta yaꞌa Tayta Diosniquim julaycälimulac.

7 Yaꞌapïtá amam juc taytachacunactá uywapäcunquichu.

8 Amam imanilä taytachacunactapis lulapäcunquichu;

nï janay pachäćhu,

nï cay pachäćhu,

nï allpa lulićhu,

nï yacu lulićhu cäcunäman licchätapis.

9 Amam taytachacunaman unꞌulaycälinquipischu nï alawaycälinquipischu.^b

Yaꞌa Tayta Diosniqui silüsum cacullá.

Chaymi mana uyalicuycul lulayta ćhapäcunätá chulincunaćhüpis,

willcancunaćhüpis,

chulinpa willcancunaćhüpis mućhuycachishä.^a

10 Ñatac cuyamänïtawan camachicuynïta cäsucücunätam ichá lluy-lluy milaynincunactapis cuyaywanlä licaycuśhä.^c

11 “ ‘Amatacmi Tayta Diosniquip śhutintá yanꞌal mana allinpä licayalcächinquichu.^d

Śhutïta yanꞌal limäcunätá allinpachu manamá licaycuśhä.

12 “ ‘Amatacmi unꞌapäcunquichu jamana muyunca quiquin Tayta Diosniquipä japächäśhan muyun caśhanta.^e

13 Jinantin süta muyunmi lluy ima lulayniquicunactapis lulaycunqui.

14 Anćhish muyuncäñatacmi ichá Tayta Diosniquipä japächäśha muyun cayan.

Chay muyun amam ima lulayniquitapis am,^f

nï walaśh wamla chuliquicunapis,

nï wayapa-walmi uyway nunayquicunapis,

nï uywayquicunapis,

nïtac juc caśhta wasiquićhu jamapacücäpis imallactapis lulanꞌachu.

15 Yalpapäcuyꞌari Egiptop maquinćhu uyway nuna cayalcaptiqui Tayta Diosniqui sumä munayninwan,

nana-nanay maquinwan juluycuśhuśhayquita.

Chaymi jamana muyuncäćhu Tayta Diosniqui jamanayquipä nishulanqui.

16 “ ‘Tayta Diosniqui uycuśhuśhayqui cay allpäćhu allin cawsayta achca wata uycuśhunayquipä taytayqui mamayquita allinpä licaycuy.^g

17 “ ‘Amam mayantapis wañuchinquichu.^h

18 “ ‘Amam mansibacunquichu.ⁱ

19 “ ‘Amam suwacunquichu.^j

20 “ ‘Amam nuna-masiquita yanꞌal tumpanquichu.^k

21 “ ‘Amam nuna-masiquip wasinpi,

walminpi,^l

uyway nunanpi,

wäcanpi,

aśhnunpi,

nï imallanpïpis wañupacuyanquichu’ nil.

22 “Cay camachicuycunactam quiquin Tayta Dios limalicula ulꞌüćhu nina waläcäpa,

sumä pucutay taycüśhäpa ćhawpinpi lluy malcaca ulꞌup saytanćhu cayalcaptin.

Chayta lumipi ishcay tablachaman isquirbiyculmi uycamäla.

23 Chaynu sumä pucutay taycüśhapi limaśhanta uyalïlulmi,

jinaman ulꞌüćhu nina walayäta licälulmi yaꞌaman śhapäcamulanqui yaśhacunäwan ayllup puydïnincuna.

24 Chayćhümi nipämälanqui:

‘Quiquin Tayta Diosninchicmi sumä caynintawan jatun munayninta licachimälanchic,

jinaman nina waläcäpi limamuśhantapis uyalilanchicmi.

Canan licaycunchicmari nunäta Tayta Dios limapaptin nunaca jinalla cawsaycuśhantapis.

25 Chaynu captinpis ¿yaꞌanchic imapïmá wañuyachwan?

Tayta Diospa shiminta nina waläcäpi jinalla uyaliyalꞌa wañüśhunćhá.

26 Cawsä Tayta Diospa shiminta nina waläcäpi yaꞌanchicnu uyaliyalꞌa manamá mayanpis cawsaycuchwanchu.^m

27 Aśhwanpa amlla aśhuycul Tayta Dios lluy nishanta uyaliycamuy.

Chayćha am willapämaptiqui yaꞌacuna uyaliculcal cäsuculcäśhä’ nil.ⁿ

28 “Chaynu nipämäśhayquita Tayta Dios uyaliyälamari.

Chaymi nimäla:

‘Cay malcaca nishuśhayquita uyalilämi.

Lluy nishancunaca allinmi.

29 Maylä chaynu śhunꞌuyu capäcul lluy camachicuynïta muyun-muyun cäsuculcanman.

Chayćha paycunapis milaynincunapis wiña-wiñaypä allin caycälinꞌa.

30 Canan paycunaman cutil chucllanman-cama cuticulcänanpä nimuy.

31 Amñatacmi ichá yaꞌawan quïdanqui camachicuynïcunacta,

limapäśhäcunacta,

yaćhachicuynïcunacta uycuptí yaćhachinayquipä.

Chayćha uycuśhá allpäćhu lulayman ćhulapäcunꞌa’ nil.

32 Chayurá Tayta Dios lluy nishanmannu lulaycäliy,

mana maymanpis ichalcullal.

33 Tayta Diosniqui nishanmannülla lulaycapäcuy,

chay allpa uycapäcuśhuśhayquićhu cawsapäcuśhayquicama lluy lulaśhayqui allin lishunayquipä,

wiña-wiñaypä cawsapäcunayquipäpis.