Tayta Diosmi ćhunca camachicuyninta uycun
20
Chaypïtam Israel caśhtacunäta Tayta Dios camachila cay nil:
2 “Egiptop maquinćhu uyway nuna caśhayquipïta yaꞌa Tayta Diosniquim julaycälimulac.
3 Yaꞌapïtá amam juc taytachacunactá uywapäcunquichu.
4 “Amam imaman lichcä taytachacunacta lulapäcunquichu;
nï janay pachäćhu,
nï cay pachäćhu,
nï allpa lulićhu,
nï yacu lulićhu cäcunäman lichcätapis.
5 Amam taytachacunaman unꞌulaycälinquipischu nï alawaycälinquipischu.a
Yaꞌa Tayta Diosniqui silüsum cacullá.
Chaymi mana uyalicuycul lulayta ćhapäcunätá mućhuycachishä chulincunaćhüpis,
willcancunaćhüpis,
chulinpa willcancunaćhüpis.
6 Ñatac cuyamänïtawan camachicuynïta cäsucücunätam ichá lluy milaynincunactapis cuyaywanlä licaycuśhä.b
7 “Amatacmi Tayta Diosniquip śhutintá yanꞌal mana allinpä licayalcächinquichu.
Śhutïta yanꞌal limäcunätá allinpachu manamá licaycuśhä.
8 “Amatacmi unꞌapäcunquichu jamana muyunca yaꞌapä japächäśha muyun caśhanta.c
9 Süta muyuncäćhümi lluy ima lulayniquicunactapis lulaycunqui.
10 Anćhish muyuncäñatacmi ichá Tayta Diosniquipä japächäśha muyun cayan.
Chay muyun amam ima lulayniquitapis lulanquichu,d
nï walaśh wamla chuliquicunapis,
nï uyway nunayquicunapis,
nï uywayquicunapis,
nïtac juc caśhta wasiquićhu jamapacücäpis lulanꞌachu.
11 Tayta Diosmari süta muyun camala sïlüta,
allpäta,
lamarcäta chayćhu lluy ima cäcunätapis.
Anćhish muyuncäćhüñatacmi jamala.
Chaymi chay jamana muyunca Tayta Diospä japächaycuśha cayan.e
12 “Tayta Diosniqui cay allpäćhu allin cawsayta achca wata uycuśhunayquipäf taytayqui mamayquita allinpä licaycuy.g
13 “Amam mayantapis wañuchinquichu.h
14 “Amam mansibacunquichu.i
15 “Amam suwacunquichu.j
16 “Amam nuna-masiquita yanꞌal tumpanquichu.k
17 “Amam nuna-masiquip wasinpi,
walminpi,
uyway nunanpi,
wäcanpi,
aśhnunpi,
nï imallanpïpisl wañupacuyanquichu” nilmi Tayta Dios camachila.
Israelcunämi chucchupäcun
18 Chay ulꞌüćhu jinantin Israelcunaca waclicunäta,
räyucunäta,
curnitilla tucamuśhancäta,
jinaman ulꞌüpi sumä-sumä untay yaluśhantapis licapäcul manchacuypïmi chucchuśhtin calullaćhu capäcula.
19 Chaymi Moisesta nicuyalcan:
“Amlla limapaycälimaptiquiꞌa uyaliculcäśhämi.
Tayta Dios limapämaptinꞌa wañülälishäpis canćha” nil.m
20 Niptinmi Moises:
“Ama manchaculcaychu.
Tayta Diosꞌa śhamula imanuy capäcuśhayquitapis licaycümi.
Chaynütac śhamula juchacta mana lulallal payta manchacuywan imaypis cawsaycälinayquipämi” nin.
21 Chaynu malcaca calullaćhu cayaptinmi Moisesñatac lacta pucutaycäćhu Tayta Dios caśhanman aśhuycula.
Uycuna patacta lulananpämi nin
22 Chayćhümi Moisesta Tayta Dios nin:
“Israel caśhtacunäta caynu niy:
Amcuna licapäculanquiñam janay pachäpi limapaycälimuśhäta.
23 Amari jalutacayalcämaychu,
ürupi illaypi taytachacunacta lulaycul alawapäcuśhayquiwan.
24 Aśhwanpam allin cawsaśhanpi uycuna patacta allpapïta lulaycul wäcacunacta,
uwishcunacta,
capishcunacta cañaywan uycamanqui;
allin cawsaśhayquipïpis uycamanquimá.
Mayćhüpis yalpalcälimänayquipä nishäćhümi yaꞌa allinpä licaycälishayqui.
25 Ñatac lumipïta uycuna patacta lulalꞌa mana labraśhawanmi lulanqui.n
Imawanpis labräśhacá mana allinmanñamari muyun.
26 Ñatac uycuna patacta amam patac-patac ishpinactá lulanquichu,
ishpipäcuptiqui cala caćhpayquita mana licapäcuśhunayquipä” nil.