Cay libru manam quijacunacta ariglä fiscunapïchu limayan. Sinuꞌa Israel caśhtacunäćhu sumä allin-cama caminaycücunapïmi willaycamanchic. Jueces ninanꞌa mas allin canman “sumä allin-cama caminaycücuna” ninanmi. Paycunamari sumä juyu-cama ćhïnicünincunapïta Israel malcanta salbaycälila. Paycunam sumä ñacaycunaćhu, alli-cama pilyäcunäwan pilyapäcula.

Jucnin caminaycüca ichüninwan lulämi cala; jucninꞌa walmim, jucninꞌa watica walmip wawinlämi calapis. Chaynu nunacuna cayalcaptinpis Tayta Dios munayninta camalaycachilmi Israel malcanta salbaycü cala.

Juyu-cama mandacücunäpa maquinpïmari chay caminaycücunaca salbaycälila. Israel caśhtacunaca allpanćhüña cayalcalpis juc caśhtap mandaśham abisnintá capäcula. Malcaca juchacta lulapäcuptinmi juc caśhtap maquinman Tayta Dios ćhulaycula, manchacuywan cäsuculcänanpä. Timpullanćhütacmi Tayta Dios malcanta salbaycunanpä nunancunacta caćhaycamü cala. Chay allin-cama caminaycücunaca cayalcan: Otoniel, Aod, Debora, Barac, Gedeon, Jefte chaynütac Sansonpis.