Jueces
Sumä Caminaycücunapi Isquirbishan
Judawan Simeon ayllum mandacü Adoni-bezecta malcantinta llallin
1
Chaypi Josue wañucuptinmi Israel caśhtacunaca Tayta Diosta tapupäcula:
“¿Mayanní ayllucunatan Canaan läducunäwan pilyä puntacta lipäcuśhä?”
nil.
2 Niptinmi Tayta Dios nin:
“Judami puntacta linꞌa;
paypa maquinmanmi cay allpäta ćhulaycú” nil.
3 Chaymi Juda wawꞌi-caśhan Simeonta nin:
“Acuchun tücamäní allpaćhu cä Canaan läducunäwan pilyayta yanapapämänayquipä.
Chaypïta ampa tücaśhüniquimanpis liwshipäcushayquićh” nil.
Niptinmi wawꞌi-caśhan Simeon lluy liwshipäcula.
4 Chaynu Juda lipäcuptinmi paypa maquinman Tayta Dios ćhulaycula Canaanwan Ferez läducunäta.
Jinaptinmi chay Bezec malcaćhu ćhunca walanga (10,000) wayapacunacta llallïla.
5 Chayćhütacmi mandacü Adoni-bezectapis talilcul,
Canaan,
Ferez läducunäwan pilyaśhanćhu camacäcuyäla.
6 Jinaptinmi mandacü Adoni-bezec ayicula.
Chaymi Juda ayllucunaca anꞌasalcälil maquinpa,
ćhaquinpa maman dïdunta cuchülälila.
7 Jinaptinmi mandacü Adoni-bezec nin:
“Yaꞌapis anćhish ćhunca (70) mandacücunactam maquinpa,
ćhaquinpa maman dïduncunacta cuchülá.
Jinaman micuśhäcunap usünincunactam ashipaculcäla.
Chay lulaśhätanümi Tayta Dios yaꞌactapis canan lulayäman” nil.
Jinaman Jerusalenta puśhäläliptinmi wañucula.
Juda ayllum Hebrontawan Jerusalenta llallin
8 Chaynütacmi Juda ayllucunaca Jerusalenmanpis pilyä lipäcul ispädawan lluy camacaycul malcactapis cañaycälälila.
9 Chaypïtam Neguev lädućhu,
ulꞌunnincunaćhu,
pampannincunaćhu yaćhä Canaan läducunäta camacaycü jiꞌalpapäcula.
10 Chaynütac “Quiriat-arba” nishan Hebronćhu yaćhä Canaan läducunätapis camacaycälälila:
Sesai,
Ahiman,
Talmai nishan malcacunäta.
Debir malcacta Otoniel llallïlulmi Acsacta walminpä ćhasquin
11 Chaypïtam Debir malcaćhu nunacunäta camacänanpä Caleb lila.
Chay malcap punta śhutin Quiriat-sefermi cala.
12 Chayćhümi Caleb limalicula:
“Cay Quiriat-sefer malcaman mayanpis yaycuycul llallïcätá wamla chulí Acsactam walminpä uycuśhä” nil.
13 Jinaptinmi Cenazpa chulin Otoniel llallïla;
Cenazꞌa Calebpa śhullcanmi cala.
Chaymi wamla chulin Acsacta Otonielwan casarächila.
14 Chay puśhaśhan muyuncäćhümi Acsacta wayapan Otoniel umachäla papänin Calebta allinnin ćhaclacunacta mañacunanpä.
Chaymi sillacuśhan aśhnunpïta Acsa jiꞌalpucuyaptin papänin Caleb nin:
“¿Imactam munayanqui?”
nil.
15 Niptinmi Acsa:
“Neguev allpacta uycayämalꞌa,
ama chaynu callaychu michcacunactapisa uycallämayꞌari” nin.
Chaymi Caleb janay lädu,
ulay lädu pucyuyücunätapis chulin Acsaman uycula.
Judawan Benjamin ayllum llallipäcun
16 Ceneob läducunäñatacmi Juda ayllucunäwan Palmïra malcapic lipäcula Judapa chunyäninman;
chay cayan Aradpa sircan Neguev lädućhümari.
Chay Ceneo läducunaca Moisespa suyrunpa ayllunmi capäcula.
Chayćhu cä nunacunäwanmá paycuna quïdaculcäla.
17 Chaypïta Juda ayllum wawꞌi-caśhan Simeon aylluwan Sefat malcaćhu yaćhä Canaan läducunäta llallilcul lluy malcantinta camacaycälälila.
Jinalculmi Hormad nïta śhutichälälila.
18 Chaynütacmi Juda ayllucunaca Gaza,
Ascalon,
Ecron malcacunäta allpantinta-cama duyñuchacaycälila.
19 Tayta Dios Juda aylluwan cayaptinmari ulꞌucunäćhu cäcunäta alapacüla.
Pampanninćhu yaćhäcunätañatacmi ichá jïrru carritayü-cama captin alapacuyta mana atipapäculachu.
20 Ñatac Moises limalicuśhanmannümi Hebron malcacta Caleb ćhasquila.
Chay malcaćhu yaćhä Anacpa quimsa chulincunactamá Caleb alapacüla.
21 Ñatac Jerusalenćhu yaćhä Jebus läducunätam ichá Benjamin ayllucunaca alapacuyta mana atipapäculachu.
Chaymari Jerusalenćhu canancamapis Benjamin ayllucunäwan cusca Jebus läducunaca yaćhayalcan.
Josepa milayninmi Bet-el malcacta llallin
22 Tayta Diospa yanapayninwanmari Josepa milaynincunapis Bet-el malcap cuntran lipäcula.
23 Chay malcamanmi licäcunacta caćhäla.
Chay Bet-el malcactam puntacta “Acchi” nipäcula.
24 Licäcunäñatacmi chay malcapi nuna yalamücäta nin:
“Cay malcayquiman imanuypa yaycapäcunäpä willaycamaptiquiꞌa llaquipaycälishayquimari” nil.
25 Chayćhu yaćhaycächiptinmi yaycuycul ispädawan malcantinta lluy camacaycälälin.
Chay lisiycachishan nunätañatacmi ichá lluy aylluntinta mana imanälapischu.
26 Jinaptin chay nunaca Het läducunäpa allpanman liculcalmi chayćhu muśhü malcacta śhalcalcachil “Acchi” nïta śhutichäla.
Chaynüllam canancamapis chay śhutin.
Mana llalliyta atipäśhan malcacuna
27 Manases ayllucunäñatacmi alapacuyta mana atipapäculachu:
Bet-seanta,
Taanacta,
Dorta,
Ibleamta,
Meguidoctapis malcantinta-cama.
Cay malcacunäćhümi Canaan läducunaca tacyacaycälila.
28 Ñatac Israel caśhtacunaca sumä munayniyümanña muyülälilmi ichá Canaan läducunäta ñacay lulaycunacta lulachipäcula.
Aluytá manam atipapäculachu.
29 Chaynütacmi Efrain ayllucunäpis Gezerćhu yaćhä Canaanta aluyta mana atipapäculachu.
Chaymi paycunawan cusca yaćhapäcula.
30 Chaynütacmi Zabulon ayllucunäpis aluyta mana atipapäculachu Quitronćhu,
Naalalćhu Canaan läducuna yaćhacunäta.
Chaymi paycunawan cusca yaćhapäcula,
masqui ñacay lulaycunacta lulachiptinpis.
31 Chaynütacmi Aser ayllucunäpis aluyta mana atipapäculachu Acoćhu,
Sidonćhu,
Ahlabćhu,
Aczibćhu,
Helbaćhu,
Afecćhu,
Rehobćhu Canaan lädu yaćhäcunäta.
32 Chaynu Aser aylluca mana aluyta atipaculculmi paycunawan cusca yaćhapäcula.
33 Chaynütacmi Neftali ayllucunäpis aluyta mana atipapäculachu Bet-semesćhu,
Bet-anatćhu yaćhä Canaan läducunäta.
Chaymi paycunawan cusca yaćhapäcul ñacay lulaycunacta lulachipäcula.
34 Dan ayllucunätañatacmi ichá quiquinta Amhor läducunaca ulꞌucunäman alupacüla.
Jinalculmi pampacunäman manaña jiꞌalpachimulachu.
35 Chaynüpam Amhor läducunaca jinalla tacyacaycälila Heresćhu,
Ajalonćhu,
Saalbimćhüpis.
Ñatac Josepa milaynincuna munayniyüman muyülälilñam Amhor läducunäta ñacay lulaycunacta lulachipäcula.
36 Amhor läducunäpa culindanmi cala Acrabimman ishpinapi aśhta Selacama,
chaypi wichaytam ishpilapis.